محمد وبلسم

شفتك!

ما الحب الا صدفة، لحظات نادرة تمر على ذلك الشخص الذي يعيش بعدها سنين لا يستنشق شيء الا ذلك الحب، عندما يجمع القدر الحب مع من يقدرون الحب سيرسم ذلك اجمل القصص التي يمكن ان تدون..

ليل والشارع ظلام واني مو كادر انام
كل مكان البي حضنتك جاي ادورك
والكمر هم حاس بيه لان ضل يبجي عليه
شافني شكد جاي احنلك بس اذكرك

هذا المقطع الي سمعته بلسم وهي تعبر التقاطع من سيارة كان بيها عدة اشخاص كانوا يغنوها بصوت عالي من ضمنهم كان شخص اسمة محمد..

الاغنية علگت بعقل بلسم الي خرجت تلفونها وبدت تدون الي سمعته حتى ما تنساه وتسمعها من ترجع للبيت، مثل ما تسوي ويه كل اغنية تسمعها بالصدفة وتحبها..

حل الليل، دخل محمد لغرفته و مثل كل مرة كان يكره هذاك الشعور الي يجي لما يدخل الغرفة ويشوف نفسه وحيد، فتح شباك الغرفة كان القمر وقتها مكتمل وشكله حلو الشي الي خلاه يظهر تلفونه ويلتقط صورة على ضوء القمر، كانت ملامح محمد هادئه، عيون ناعسة ولحية خفيفة مع شعر طويل، الصورة بينت نصف الوجه والنصف الثاني كان يأكله الظلام كروح محمد بالضبط..

فتح محمد الاغنية نفسها، واستحوذت السماعات مسامعه وبدأ يسمع الاغنية بنفس الوقت الي بدت تسمعها بلسم وفتحت قناتها على التليكرام وكتبت :

اليوم واني اعبر الشارع سويت حادث، دعمتني اغنية.. اغنية كانت تشرح هواي اشياء اني مو كادرة اشرحها، يا الله شكد اكو اغاني ممكن تشرحنا واحنه ساكتين..

سدت بعدها التلفون وغمضت عينها واستعدت للنوم الي غمرها من التعب، لكن محمد ما قرر ينام بهل سهولة الا لما يكتب رسالة كان يكتبها كل ليلة مميزة

اليوم عيدميلادج، ردت اكتب رسالة اخيرة بس احس الكلام كله انتهى، ما اعرف شنو ممكن اكدر اكتبه بعد، هل معايدة احسها راح تكون فارغة مثل اخر شي باقي بداخلي اتجاهج، فراغ.. ما انكر ايامنه الي عشناها سويه وكلش اقدر اللحظات الحلوة الي عشناها بس هل لحظات اعتقد ان اني دفعت ثمنها غالي، وغالي كلش هم لذلك، اليوم هو يوم ذكرى ولادتج وموت علاقتنا الى الابد..

بهل هل رسالة نام محمد، على انغام الاغنية الي كانت محاوطه كل مسامعه

ليل والشارع ظلام واني مو كادر انام
كل مكان البي حضنتك جاي ادورك..

كان الجو ليل والقمر مكتمل وهل اغنية صوتها عالي بالمدينة كلها وعلى نفس التقاطع كانت واقفة بلسم وعبور الشارع كان محمد، الاثنين ينظرون لبعض بعدها قطع محمد سكوت النظرات هذا 

- شنو ديصير؟
= ما اعرف، شنو هذا الصوت الاغنية العالي وانتَ منو؟
- ما اعرف، انتِ منو؟ وشنو هل جو الغريب
= ما اعرف مستغربة مثلك
- شلون مدا اسمع صوت الاغنية عالي
= اكلك ما اعرف مستغربة مثلللكك (بصوت عالي)
- اصبري خلي اعبر لان مدا افهم شي منج

وباثناء ما محمد كان يعبر الشارع

= ديربالك، ديربااااالك سياااارة

التفاته سريعة من محمد على صوت بلسم الي ما نقذ محمد من الموت..

الشي الي خله الطرفين يصحون من النوم مرعوبين!

محمد شاف السماعات مشمورة على جنب، وبس صوت الاغنية، وبلسم شربت مي مثل كل مرة تسوي اذا تكعد على كابوس، ومرت الليلة...

صباح اليوم الثاني كان محمد على موعد اجتماع في احد المطاعم، الي بدأ يتحضر له، اما بلسم فكانت تنتظر الخط حتى توصل لعملها ولكن القدر احياناً يكتب لنا احداث غير طبيعية، تعطل الخط واتصل ببلسم حتى توصل بطريقتها الشي الي خلاها تاخذ مواصلات حتى توصل، ركبت بلسم اول سيارة بنفس الوقت محمد ركب سيارته، الاثنين يسمعون نفس الاغنية الي معلكه في راسهم
وصل محمد للمطعم ونزلت بلسم من اول سيارة مواصلات، وهنا محمد ركن سيارته على الجانب المقابل للمطعم وهو يعبر سمع صوت عالي

- لاااا، لتعبررر راح تندعم لتعبر

الشي الي دفع محمد ان يتجمد في مكانه، مو عارف يتحرك

- لتعبر، لتعبر
= انتِ منو وشبيج! اخذي نفسج
- اني شفتك البارحة بالحلم، لا لا ما كان حلم كان كابوس وهل كابوس انت ندعمت بي المهم انك ما عبرت ديربالك فدوة، واني اسفة العالم دتباوع علينه جد اسفة، باي

محمد ما كان كادر يتكلم أي شي من صدمة الموقف، ما كان كادر يكلها ان اني كذلك شفتج!..