محمد وبلسم

هم انتَ؟

دائما ما كنت أومن بالنظرة الاولى، تعطي انطباعي الاولي عن الشخص سواء ارتاحيت اله او ما حسيت ان هو المفروض يكون قريب الي او ان هل شخص هو أنيس الروح..

هذا الي كتبته بلسم في قناتها على التليكرام ولكن قبل هل رسالة ب12 ساعة..

- شسويتي بروحج، احرجتي نفسج واحرجتي الولد وياج، غبرة هذا الي كان ناقص، خبال والمشي وره الاحلام امشي تأخرتي عن الدوام امشي

كانت خطوات بلسم متسارعة وتكاد ان تجري من شدة الخجل الي وقعت بي وهي تعاتب نفسها بهل طريقة، اما محمد فالصدمة ما نسته ان الانسانة الي اعجب بيها بالحلم صارت واقع! بس هل واقع يبتعد شوية شوية..

- الحكها راح تروح منك، بس شنو اكلها هسه تكول هذا ما صدك حاجيته ولزك بيه، الاجتماع! الاجتماع تأخرت.

عاد محمد للاجتماع واتجهت بلسم لعملها ولكن كمية المشاعر المتضاربة بين الاثنين كانت كبيرة جداً،

- اهلا محمد، تأخرت؟
= والله يا استاذ صار حادث اذا اكلك عليه تستغرب وممكن ما تصدك
- خير ان شاء الله ماكو شي؟
= لا ماكو شي استاذ لا يبقى بالك، واعتذر من الجميع عن التأخير
- تمام معناها نبدي الاجتماع

مر هذا اليوم والاثنين كان تفكير بالحلم وكيف صار حقيقة، لكن محمد راد يتواصل مع بلسم راد يعرف هي وين، لكن الموضوع كان اعجازي بشكل حرفي

نام الاثنين مرة ثانية

نفس الاغنية! بصوت عالي الطرفين كل شخص واكف على سايد مقابل الثاني

- هم انتَ!
= انتِ!، اني ادور عليج
- لا تعبر، لا تعبر راح تموت
= اخيراً لكيتج، اريد اعرف بس شلون حلمتي بيه وشلون شفتج بالحقيقة منو انتِ!
- لا تعبر، لااااااا

نضرب محمد، وصحى الاثنين من هذا الكابوس الي تكرر للمرة الثانية لكن بعض التفاصيل كانت تختلف!

- يا دين ام هل حلم الي ما يريد يفك عني، الله بعد ساعة يلا يدك المنبه ارجع استغل هل ساعة

هذا الي حجته بلسم ويه نفسها اما محمد ما كدر ينام بعدها، خدر چاي وكعد يفكر بالشي الغريب الي ديصير...