بعد كل نهاية عطله دراسيه تقرر عايلتي اننا نقضي الاجازه عند جداني في الديره طبعا الي لها مسميات كثيره قريه والمعنى واحد .خلوني الحين اعرفكم على نفسي قبل ندخل على القصه انا اسمي تركي وعمري ٢٣سنه اعيش في السعوديه تحديدا مدينه الطايف خريج تقنيه تخصص حاسب عاطل ابحث عن عمل من صفاتي الجمال ووالوسامه وحسن الصوت والطول والعضلات مصدق؟ لهدرجه مشت عليكم وانتم ماتعرفوني بس ليش ماتمشي؟ المهم خلوني اخذ الشيء بمحمل الجد لان فعليا من صفاتي الي يكرها ابوي اني اخذ كل شي بطقطقه ولعب وفوق ذا ابوي يقول لي اني شجاع ولا اخاف ! بس مستحيل اصدقه لان عن نفسي اشوفني اكبر خواف بالعايله ...انا الكبير. وعندي اخوي راكان بالثانوية. واختي نوره في المتوسط. وترف اختي الصغيره،، طبعا انا الي شايل البيت لاني اخوهم الكبير وكل المسؤليه علي قررنا الفجر اليوم اننا نروح للديره قفلنا الشناط في الليل ويوم جا الفجر صحينا طبعا مو سهل اننا نقوم الفجر لان اصعب مهمه هي انك تقوم من الفراش وهو بارد ركبنا السياره وتوكلنا على الله مامر حتى ساعه الا ازعاج من اخوي واختي وبكاء ترف والحاله الي بالسيارة يرثى لها مضاربات بالكلام وامي تصارخ عليهم يسكتون واما انا ودي افتح الباب وانط من الازعاج بس فجاة وقف ابوي السيارة والتفت علينا وقال لنا وبيده العقال : قسم بالله ان ما سكت انت وياها انه بالعقال!!!!
وعم الصمت اخيرا وباخذ لي غفوة عبال مانوصل بس ،،،وبعد مرور حوالي ساعتين اخواني نامو ولاحظت على ابوي التعب وراسه معرق وسالته : يبه شفيك؟
ناظرت فيه امي وقالت : محمد شفت سكرك اليوم ؟ يمديه مرتفع بس؟
نشف ابوي العرق الي بجبهته بطرف شماغه وقال : والله مدري شوفي وينه مقاس السكر؟
مدت امي يدها لي وقالت : تركي جيب كيس العلاج .
تصنمت بمكاني وقلت : اي كيس ماعطيتيني شي ؟
عصب ابوي وقال : تركي ماهو وقت مزح جيب العلاج!!
بلعت ريقي وانا اعرف ان ابوي بيذبحني وانا مالي دخل!!
نط راكان من مكانه انا اقول اللحظه ذي الي تكلم فيها راكان فعليا حسيت بالاخوه كان مثل الشهم القوي وقال : تراه معي !!
حطت امي يدها على صدرها واخذت تنهيده وقالت : الحمدلله معليش تركي نسيت اني عطيته راكان !
ركز ابوي السيارة وقاس السكر وكان منخفض بالحيل وقلت لابوي اني بسوق عنك لين نوصل الديره وفعلا مافي اليد حيله وخلاني اسوق عنه تبادلنا الاماكن وسميت بالرحمن ومشيت ولا رفعت رجلي عن البنزين الا وانا على باب جدي الحمدالله على سلامتنا وصلنا لهم الا وصلاة العصر قد دخل ..دخلنا عند جدي وسلمنا عليهم ورحبو فينا وطبعا اكثر ناس انا فاقدهم عيال عمي واكيد انهم بالمزرعة بدون ما اسأل عنهم ورحت لهم بالمزرعه وكانو جالسين بالدكه يتقهوون
عبدالله ( ولد عمي) : ااارححبببببب ترككي جااا!!!
عبدالعزيز (ولد عمي ): والله اني كنت حاس انك بتجي ارحبب
فيصل (ولد خالي ) : يااامرحباااا تراحيب المطر
فهد (اخو عبدالله) : ياااهلااا ووغلااا
رحبو فيني مثل اول وكانهم اول مره يشوفوني يغلوني وانا اغليهم لهم معزه ومحبه بقلبي محد يعلم بها ...لعبنا بلوت لين ماطفشنا وضحكنا طبعا كل واحد جاي من ديرته وبالاجازة كلنا نجتمع ببيت جدي لين ما تنتهي العطله وكلنا ننام بغرفه وحده .
رحنا لغرفه النوم واصلا ماكانت غرفه نوم كان مجلس قديم لبيت جدي بس جدي بنى مجلس ثاني وسحب على المجلس ذا ..فرشت فراشي جمب عبدالله وبديت ارتب فراشي .
عبدالله : هي عزوز خلك ثابت ولا تتحرك!!
عبدالعزيز بخوف : وشش !! وش فيه !!
عبدالله قرب من عبدالعزيز وبيده الشماغ وقال : اذا قلت لك بتخاف بس لا تتحرك !!!
وليت عبدالعزيز ماناظر باللي جالس على كتفه بكل برود وكانت وزغه (بريعصي) . صرخ عبدالعزيز بقوة ونزل فنيلة البيضاء وقام ينط زي المجنون واحنا نركض ندور على البريعصي قلب فينا قلب .
فيصل اشر تحت فراشي وقال : تتترككييييي تحتت فراشك !!
وكل واحد منا وبيده جزمه (الله يكرمكم) ورفعنا فراشي والحمدالله ذبحناه وكل واحد انسدح بفراشه الا عزوز كانه بزر بيني انا وعبدالله خايف من الحشرات .
..يوه يا عيال الباعوض اكلني اكلل!!
فيصل : وتوك ماشفت شي اصبر باقي الخنافس
راكان : خلاص اسكتو بالله ابرقد !!
فهد : ياورع انت وش جابك عندنا رح ارقد عند امك!
فهد يحب يستفز بس عشانه طفشان ورد عليه راكان بعصبيه: الورع انت واشكالك!!
فهد : هههههه شفيك جالس امزح معك!
..سمعت صوت خطوات جايه مع طقه عصى وقلت : تسمعون الصوت !!!؟
عبدالله : ياليل اكيد انه جدي !
وبسرعه كل واحد فيهم غطى نفسة بالبطانية وانفتح الباب وكان جدي ناظر فينا يبي يتاكد وش ذا الازعاج عشان يبدا يهاوشنا طلع من الغرفه
أنت تقرأ
سر الصندوق الاسود
Actionفيه صندوق متواجد عند جدي ويخفيه لنا اكثر من سنوات ويمكن له سنين كثيره ! مره من المرات بكتشف وش سر الصندوق وليتني ما رحت !
