مَهُووسيِ

-01

نضت صبح كيما كل يوم ميتة بلعيا و كارهة حياتي بش نروح لهاداك الليسي تع النحس، الليسي لي عندي عامين ملي دخلتو و مانيش قادرة نصبر بش نخرج منو لعام الجاي

الحاجة الوحيدة لي راهي مصبرتني عليه هوما صحابي ادم و نزيم و سيليا و كامي كون مشي هوما راني دبرست عندي شحال

سقمت فراشي موراها و رحت للفيسي بلت امبعد للسالدوبان غسلت وجهي و سناني و درت سكين كير كي العادة مور ما خزرت فروحي بتقزز فالمراية

هي ناس قع يقولو عليا زلة و عندي طاي تهبل بزاف بنات يحلمو بيها بصح انا مانشوفش روحي هكاك كامل، بالاك بسبة هدرة ماما لي كانت تقولهالي ملي كنت صغيرة و اللي كبرت عليها لي كانت باريڤزومبل "بعدي عليا يالزرزومية ندمت عالنهار لي حليت فيه رجليا لباباك المخري هاداك" ولا تاني "ربي عاقبني على فعايلي بطفلة مزعوقة كيما نتي" ولا "كش نهار نقتلك بلا ما نفيق وجهك ما وليتش نحمل نشوفو قع اعق" و بزاااف بزاف وحدوخرين

و انا vu que كنت صغيرة خلاص ترسختلي هاديك لهدرة في راسي و وليت نشوف برك الجانب السيء من روحي و نسيي نسقمو و ندير glow up مالغري بزاف بنات يشوفوني برفكت من جميع النواحي حتى لينوت تاوعي فالمسيد ملاح يعني مانيش ممتازة بصح هاديك ال 15 نجيبها نورمال هكاك و ستل مشي متقبلة نفسي و نحس روحي انسكيور

الحاجة الوحيدة لي نشوفها مليحة فيا هي انو هاد الصوالح قع ما نخرجهمش للعيباد حتى لي قراب ليا، و دايما نخليهم بيني بين نفسي و جامي قلت لكش واحد بلي مشي متقبلة نفسي بالعكس نحب نشكر روحي سورتو قدام البيكميز الصوصيالات تع لكلاصا لي ميتين مني مالغري جامي دنيت ليهم

مهم كملت قع صوالحي و لبست و وجدت دوزاني و رحت للكوزينة كشما نجبد ناكل، رفدت كوندي شوكو و باكي قاطو كول امبعد خرجت و غلقت الباب مورايا بسك واحد ماكاين فالدار، كي العادة نوض نلقا روحي وحدي 

خاوتي عبدو و زاكي عايشين فالخارج راحو حراقة ف 2019 خلاوني مع المهبولة تع ماما بصح مازلت نحبهم و نتوحشهم

و يما كل نهار مع واحد جديد، يا درا شكون سعيد الحظ ليوم، من راجل لراجل كون جيت شابة كيما هي كون راني ستغليت جمالي فحاجة تصلح وليت اكتريس ولا مودل مشهورة بسك هي اصلا حرام فالحرام خلي نديرو الحرام فعفسة تصلح خير ولا لا؟

ما كبرتش لحكاية فراسي بزاف بسك هادا هو الروتين تاعي قريب كل يوم و كملت طريقي لليسي المعوق هاداك لي جاية شوية خالية و اغلب الوقت مافيهاش عيباد