مَهُووسيِ

-02

"تذكير"

موراها رحت للدار و قعدت نبكي و نخمم كيفاش ندير معاه هادا تاني و كيفاش حا نكمل لعام كومبلي نشوفو كل يوم بلا ما نقدر نشكي بيه بصح فقدت الامل كي تفكرت بلي واحد ماراح يأمني علاجال خدمة يما لي نستحي ساعات نقول عليها ام حتى داتني عيني مالعيا و رقدت معوجة فوق الفوتاي فالصالون بلى حتى ما نتعشى

- لبارح ما رقدتش قع مليح والليل قع و انا نديرفليكوشمار حتى سمعت الرافاي صبح يقولي بلي راهو جا نهار جديد، نهار وحداخر نعيشو فهاد العالم تع الشكوبي مع العطايين و المنافقين تع دزاير

نضت مدڤدڤة قع بسبة الفوتاي لي رقدت فوقو لبارح و راسي يوجع و عينيا منفخين مالبكى رحت غسلت وجهي و درت روتيني اليومي نورمال و رحت لشمبرتي موراها

مانيش حابة نروح نقرا ليوم و مانيش قادرة اصلا، تسما قررت نروح نطيب عفسة ناكلها، مالفطور تع لبارح مازال ما كليت والو

طيبت بانكيك و شبحتو لعمري و عمرت كاس كوندي و رحت للصالون نتفرج نتفلكس فالتيلي، حلي الوحيد بش نهرب من العالم

هي حنا ماناش مرفهين لهاديك الدرجة بصح بسبة شغل ماما عايشين لاباس علينا ولا بالاحرى انا عايشة بسك ماما اغلب الوقت مشي فالدار، معلاباليش اسك تبدلت نظرتها من جيهتي بصح ما ولاتش قاسية عليا لهاديك الدرجة كيما كنت صغيرة..