.
بعد 3 ساعات فزيت من نومي على صوت فجر واهي ميته بجي
سعاد : بسم الله الرحمن الرحيم
طالعت سرير امي الله يرحمها - اللي تنام عليه فجر حاليا - لقيته فاضي ..
قمت انادي فجر و ريلي ترجف .. قعدت الحق مصدر الصوت .. لقيت صوتها ياي من الحمام
طقيت باب الحمام بقوة : فجر يمه بطلي الباب ليش تبجين ؟؟
ماكنت اسمع غير بجيها .. كانت ميته بجي .. تشاهق و تبجي بصوت عالي
طقيت الباب بكل قوتي : فجر بطلي الباب .. فجر انا امج بطليييه
قامت سوما على صراخي و على صوت البجي .. وكان ويهها مخترع
قعدت اصرّخ : فجر كلمييني اشفيييج ؟؟ .. فجر بطليييه لا اكسره
وصوت بجي فجر للحين مستمر .. كان يقطع القلب .. مثل بجي الياهل اللي ضايع من امه
سعاد : سوما بسرعة روحي ييبلي العدة اللي فيها درنفيس عشان أفتح القفل
سوما : اوكي ( راحت و ردت معاها اللي طلبته )
قعدت أفج القفل و ايدي ترجف و دموعي تنزل .. ماكنت اقدر اسيطر على نفسي وانا اسمع بجي بنتي : فجر يمه الحين ابطلة لا تبجين
بعد ما فتحت البراغي قعدت ارفسه و ادزه بجتفي و سوما معاي تساعدني
سعاد : يمه وخري من ورى الباب
بعد كذا محاوله انكسر القفل و تبطـّل الباب .. شفت منظر كلش ماتخيلت اني راح اشوفه بعد ما افتح الباب .. كانت فجر نايمة!!! نايمه وويهها عالبالوعة - عزكم الله - .. والله من ثواني كنت اسمعها ميته بجي .. بطلت الباب لقيتها نايمه على ارضية الحمام و ويهها بالبالوعه!!!! اشلوووون ؟؟؟
رحت عندها و قعدت عالأرض يمها و لميتها وانا ابجي و اتعوذ من ابليس
سعاد : فجر حبيبتي قومي كلميني .. فجر يمه قوومي
فجر بطلت عينها و اهي مو عارفه باللي صار : اشفيج يمه ؟
بجيت من قلب اول ماسمعت صوتها .. وقعدت المها : الحمدلله على سلامتج حبيبتي
فجر طالعت حواليها جان تخاف : احنا ليش قاعدين اهني ؟ انا اشلون ييت اهني ؟
سعاد : مافي شي قومي معاي
فجر بصراخ واهي تبجي : انا اشلوون ييت اهني ؟؟؟ ردي علي يمه
مسكتها وقومتها معاي ردينا الصالة : مادري يا بعد عمري كنتي بالحمام و بطلته لقيتج نايمه عالأرض
فجر اقعدت تبجي و تلمني : يمه انا خااايفه والله ما اذكر اني رحت الحمام .. يمه انا تعبت .. تعبت
هالليلة نومتها يمي و قعدت اقرى عليها و اهي تزيد بجي
فجر : خلاص يمه لا تقرين بنام
أنت تقرأ
فجر
Horrorرواية رعب كويتية للكاتبة: ReRez تحكي عن فجر ومعاناتها مع العالم الآخر رواية منقولة
