نسل الطغاة

تكملة Part 1

هالة(هلة): صحيت لگيت ابوي واختي يمي وراسي أحسه راح ينفجر
شصار غزالة؟
.
غزالة: الحمل مرتخي والحبل انفل من ردتي تصعدين لوما ستر الله وهدومچ چلبن بالحديد چان رحتي بالمي
.
هالة: اني شديته حيل زين من البارحه شلون نفل لحاله
.
غزالة: والله مدري، هسه المهم انتِ بخير وماوگعتي الحمدلله.
.
هالة: فلا تعدتها.
كاعدين احنا من الفجر وهي كاعدة گبلنا
معلمة تگعد گبلنا بس والله اندغمت ورخته تا اگع وتعمدت ركوبتي.
.
غزالة: مني شبيچ؟
.
هالة: تاضي ام شضوم الله ياخذها
.
غزالة: ها والله مدري، نصل ونشوف يلا ابوي ينتظرنا تانكمل دربنا.
.
هالة: ليش أنتِ بشنو تدرين أصلا...
يلا مشينا كوميني
.
غزالة: شنو قصدج؟
.
هالة: تاضي تريد تاخذج لمحمد، تريد تطلع حقارتها عليچ.
.
غزالة: محمد ابن عمي ماني متشيمه عنه وهو زين بس تاضي مستحيل اعيش وياها
.
هالة: والله يعيني على فطارتچ وبرودچ تعيشين ونص
خليچ گوية حتى محد يكدر يجبرچ على شي..
ابن عمي وشيال همي،، غمة لچ ولأبن عمچ ولعمچ ومرته العوبة.
وصلنا الحمل وأبوي وسكتنا
.
كنعان: ها يمه هلة شلونچ تگدرين تمشين؟
.
هالة: زينة يابه مابيه شي اگدر امشي.
ركبنا ركايبنا وعبرنا الفرات ووصلنا للغنم والبادية
چانت أيام ربيع والغنم تشبع بالمرعى
مشت الأيام عادية نگعد الفجر نحلب الغنم ونخلي حليب للطليان وبعدما يرضعون نربطهم ونسرح امهاتهم
بعدها نجيب الحليب ونخلي بماعون نظيف ونغطي ونطلع نحطب ونخيط ونملى مي من الغدير او البير حسب اقرب شي النا
نجي نسوي غدا نتغدا ووحدة تاخذ زهاب من الغدا تودي لأبوي بالغنم وتبقى وياه للمغرب يروحون ونتلگاهم نحلب الغنم مرة ثانية ونهد الطليان حتى ترجع لامهاتها ونجيب الغنم عليها وتضل يم البيت
نفور الحليب على النار حد الغليان وبعدها تخثره حتى يصير خاثر(لبن، روبة)
ثاني يوم نتريگ بقسم منه والباقي نحجه بالشچوة (خضاضة لبن مصنوعة من جلد الماعز او الغنم او البقر)
نخض الحليب حتى ينفصل اللبن السائل عن الزبدة ونشيلها نحطها بمزبد (جلد من المواشي يصنع لحفظ الزبدة)
هاي الزبدة نجمعها لأكثر من مرة وكل كم يوم نخليها على نار بگدر(قدر) كبير نسبياً ولمن تبدأ تذوب نظيف ملح وطحين أو ملح وجريش حسب الموجود
يصير دهن حر (دهن غنم)
نحفظه بالظرف (جلد من المواشي يصنع لحفظ الدهن الحر)
أيضا بالصحراء چنا بهيچ أيام نگنص (ندور چما أو كمأ وفطر)
يعتبر لحم بلا عضم وغذاء موسمي.
.
مرت الاشهر والربيع انتهى تقريبا
صرنا بشهر نيسان
بهذا الشهر دائما أكو موسم مميز وهو الگصاص
نگص صوف الغنم حتى من يجي الصيف مايضايقها الحر وهم نستفاد منه نبيعه او نسوي منه غزل للبيوت سجاد وفرش
خصوصا أنه كل اعمالنا اليدوية تكون بفصل الصيف لأن النهار طويل ونگدر نشتغل هواي.
صار يوم الگصاص وبما أنه أبوي ماعنده ولد راح تجي فزعة ويه ولد عمامي حتى يخلص الگصاص بيوم واحد
أجت فزعة من ناس يگولون أنهم يقربون ألنا من بعيد
من طارف العشيرة هيج شي وحاليا معزبين بغنمهم وحلالهم حوالينا حالهم حالنا وجايين من قرية قريبة على قريتنا سموها (البيضاء)
...
أحدى قرى الجزيرة
البيضاء أو البيضة كما تُسمى بالعامية
يسكنها نسل سعد  أولاده واخوانه
كان نسل سعد ولدين (محمد، أحمد) أحمد له العديد من الأولاد( لطيف، كاظم، حسين، خلف)
والثاني محمد له ولدان(خالد،عابد)
كان احدهما خالد والاخر عابد