كان قاعد بغرفته
دخل عليه وبين ايدينه جاي
نطق بنبرته الهاديه : صبحك الله بالخير وعليك بالعافيه الجاي
حط الجاي جدام قيس
قعد ولازال الجاي الخاص فيه بين ايدينه
ابتسم : صبحك الله بالنور يعافيك هالمره مغير وجايب جاي
الوليد : اشتهيت جاي من هالصبح ف مايصير انا اشرب جاي وانت قهوه
هز راسه بخفه بالايجاب : صح مايصير
الوليد : شلونك مع موضوع البعثه ؟
قيس : الحمدلله هالمره كانت اسهل من اول مره
الوليد : اي طبيعي اول مره كان شي يديد عليك الحين صرت تعرف ب هالسوالف
اخذ رشفه من الجاي : بالضبط وان شاءالله ما تكون اخر مره
ترك الوليد الجاي على الطاوله
على دخول مساعدة قيس
ولي كان بين ايدينها ملف
قدمت الملف ل قيس : دكتور مثل ما طلبت كلشي صار مثل ما تبي وهذي تذاكر الطلبه
اخذ منها الملف وهو يهز راسه بالايجاب : تمام يعطيج العافيه
على طلوعها من الغرفة
دخل عليهم جراح : السلام عليكم
الوليد وقيس : وعليكم السلام
شاف الوليد موجود : اووووه الوليد موجود
الوليد بمزح : ها يعني اطلع ؟
قعد وهو ينطق : لا يبا اقعد طلبت من الله عين عطاني عينين كان جاي اشوف قيس وطلعت انت موجود
الوليد ولا زال يمزح مع جراح : خلاص هذا انت قلت جاي تشوف قيس انا استأذن
قيس : اقول اقعد لا يحوشك كف
جراح : هذا هو جدامي اعطيه ؟
الوليد : اصلاً بقعد على قلوبكم
فتح قيس الملف وشاف متى طيارة الطلبه
جراح بفضول : شنو هذا ؟
قيس : تذاكر الطلبه
الوليد : صج متى السفره ؟
قيس : بعد يومين ان شاءالله
ابتسم جراح : حلو حلو عاد ان شاءالله مو الصبح لانه ياخي يا غثى السفره اذا كانت الصبح
انهى جملته ب انتظار قيس يقوله عن موعد الطيارة
قيس : لا المغرب ان شاءالله ويوصلون امريكا الصبح
جراح : اي حلو الله يوفقك يا قيس على الي تسويه
ابتسم : بعد عمري جراح اجمعين ان شاءالله
الوليد : حتى بعد الي صار مع ابوك لازلت عند وعدك
تنهد : مهما صار يتم ابوي
جراح : يدري بموضوع البعثات ؟
هز راسه بالايجاب ونطق بنبرة حزن : اي قلت له
قيس : من سلمني كرسي المستشفى اقترحت عليه موضوع البعثات بس شرط علي انه لازم اشتغل على نفسي واكبر المستشفى وعلى ما اكبرها طلب مني اسوي جامعة ب امريكا عشان البعثات
على ما تخلص الجامعة الا اكون انا كبرت المستشفى رحت له ما رضى يدخلني البيت قلت يا قيس ما عليه بلش ب اول بعثه وخل يعرف انك رسلت اول طلبه للجامعة الي سويتها
رحت له قالي مبروك بس
الوليد : ما قلت له على البعثه الثانيه ؟
هز راسه بالنفي : لا اروح اقوله عن الي اتفقنا عليه من سنين يكتفي بس ب مبروك شي يكسر القلب والله
جراح بحده : اقولك شي ياخوي بس لا تزعل ولا تتحسس من كلامي
هز راسه بالايجاب بخفه
جراح : انت الي بيدك خسرت اهلك كل الي كانوا يبونه انك تتزوج بس انت رفضت فكرة الزواج
اوكيه مو مشكلة ارفض بس فكرة انك انت وحبيبتك عايشين بنفس البيت من غير زواج كان هالقرار وايد صعب على اهلك
شنو استفدوا من علاقتكم غير انكم خسرتوا اهلكم
الوليد : من غير زعل قيس ب جراح صح كلامه عمي كان يبيك تتزوج بدال لا تسكن معاك من غير زواج عمي مو مشكلته انك ما تبي تتزوج مشكلته انكم عايشين بنفس البيت من غير زواج
جراح : زين جد قيس ما فكرت انك تتزوجها بدال لا انتو ساكنين سنين مع بعض لو كنتوا متزوجين جان الحين عندك ولد بالحضانه
تنهد بعمق : تمام قلت الكلام لكم بس مو مشكلة برجع اقوله مره ثانيه انا صاحب هالمستشفى ودكتور واهي دكتورة ولاده يعني احنا الاثنين نكون مشغولين
يعني عادي بالوقت الي اكون فاضي فيه تكون هي مشغوله والعكس وعلاقتنا تمام
ليش نتزوج وشي كان عاجبنا قبل بعد الزواج يصير ما يعجبنا
عقد جراح حواجبه بعدم فهم : ما فهمت من شنو انت خايف ؟
قيس : جراح الزواج بحد ذاته تعتبر مسؤولية حالياً انا مو جاهز ل هالشي وغير جذي فكر فيها احنا ننشغل عن بعض وهالشي ما ضر علاقتنا
بس بعد الزواج يمكن يضر العلاقة تبي تكون معاي او انا ابي اكون معاها راح نعصب من بعض لانه ما نشوف بعض وغير جذي انا مابي اجيب طفل والعامله تربيه لي
الوليد : قيس ترى نفس الشي بس الفرق انها بتكون حلالك مو نفس الحين مع بعض بالغرفة …..
قاطعه بغضب : لا حدك عاد شلون تفكر فيني هالتفكير اوكيه عايشين مع بعض بس اهي بغرفة وانا بغرفة والحمدلله ما سوينا شي يغضب ربي
هز جراح راسه بالايجاب : اوكيه الحين فهمتك من قلت انت بغرفة واهي بغرفة
الوليد بفضول : هالكثر تحبها لدرجه خسرت اهلك عشانها ؟
ابتسم ولمعت عيونه : احبها احبها حيل ولو ما كانت دكتورة ولاده وكانت وظيفتها لها وقت محدد جان تزوجتها
جراح : صدقني مثل ما انتو الحين متفاهمين راح تقدرون تتفاهمون بعد الزواج
الوليد بحده : بعدين شالعياره تراها تشتغل عندك تقدر تشوفها قول انت خايف من المسؤولية
هز راسه بالنفي : صدقني على انه احنا بنفس المكان بس عادي يمر يوم ما اشوفها فيه غير ١٠ دقايق تكفون سكروا الموضوع خلوني جذي مرتاح
جراح : زين اسمع وصيت لك على طباخه ان شاءالله جم يوم وتكون عندك
الوليد : اي مسكين ما تشوفه ضعفان
قيس : اي والله ايام اكل بس وجبه وحده
جراح : كنزي ما تسوي لك اكل
قيس : الا اذا كانت بالبيت تسوي ولكم امس ماكل مجبوس دياي على العشا
الوليد : عليك بالعافيه
قيس : يعافيك
بعد انظاره من الوليد وطالع جراح : شنو وصيت بالضبط ؟
جراح بمزح : تكون حلوه وجميله وشعرها طويل وعندها غمازه …
قاطعه قيس : جراح !! شنو هذا ؟
بعد ما انهى جملته ضحك
جراح : زين ضحكت شوف الصراحة اهم شي وصيت انه تكون وحده تعرف تطبخ اكلات كويتيه
ابتسم : كفو عليك هذا اهم شي
الوليد : عاد من تكون عندك طباخه اعزمنا عندك
قيس : هو ليش من تكون عندي تعالوا بيوم انا اطبخ لكم بس يعني بيوم ما يكون عندي شغل
رفع الوليد تلفونه وشاف الساعه
قام وهو ينطق : خذتنا السوالف ونسيت عندي مرضى ناطريني انا استأذن
قام جراح : عيل انا بمشي بعد نتقابل ان شاءالله بيوم عندك
قيس : ان شاءالله حافظكم الله
طلع جراح من غرفته
والابتسامه مرسومه على شفاته
طلع تلفونه من جيبه
اتصل على عدي
بعد ثواني جاه الرد : سجل عندك بعد يومين الطيارة راح تطير المغرب على خطوط الجوية الكويتية لحق احجز مقعدين
