فتاة مسلمة

💜

#شاب_يحكى ...👇
#لما روحت أزور أمي من يومين ، لاقيتها واخداني على جنب وبتقولي  :

- يا أحمد ابقى خلي مراتك تهتم بنظافة بيتها شوية .. أختك لما راحت عندكم أخر مرة رجعت مش مبسوطة أبدًا وبتشتكي من إهمال ريم مراتك .. شد عليها شوية ميصحش كده !

للوهلة الاولي مكُنتش عارف أرد عليها وأقولها إيه .. أنا عارف إن ريم مقصرة شوية في نقطة شغل البيت دي ، هي معترفة بكده وبتحاول تصلح العيب ده ، زائد إنها خلوقة وحنينة وفيها مميزات كتير جدًا تانية بتخليني أتغاضى عن النقطة دي وشوية أشجعها تنضف وشوية تانيين أزعل منها كنوع من العتاب .. وأهي ماشية ..

لقيتني برد على أمي بضيق وبقول  :

- طيب وهو يصح يا ماما إن هالة أختي الكبيرة العاقلة تطلع أسرار البيوت اللي بتدخلها بالشكل ده !

وقبل ما أمي ترد ، كملت  :

- هالة جات بدون ما تتصل يا ماما علشان نعمل حسابنا .. وجات بيت فيه 3 أطفال منهم طفل كان مريض بقاله كذا يوم .. يعني عادي جدًا إن الأم تكون مضغوطة بقالها كذا يوم ومش مرتبة الدنيا أوي ..

~ المفروض يا أحمد إن البيت يكون مترتب علطول ، مش بس لما ييجوا الضيوف  .. ومراتك تنظم أمورها ومتتحججش بتعب الواد

- ومين عندها عيال وبيتها بيكون مترتب علطول ؟!

لقيت أمي بترد بكل فخر  :

~ أختك أهي ما شاء الله عليها معاها 3 عيال بردو ، وبيتها دايمًا زي الفل  .

- وأختي بردو يا ماما عصبية جدًا جدًا ، وبتمسك أولادها تموتهم من الضرب لو لمسوا أي حاجة في البيت أو كسروها .. تفتكري ده الصح بقى علشان تحافظ على نظافة البيت ؟

لقيت أمي اتضايقت ، وقالت  :

~ أختك بتحاول تعلم ولادها النظام يا أحمد ، وبعدين مفيش حد مفيهوش عيوب !

- بالظــبـــــط كده يا ست الكُل .. مفيش حد مفيهوش عيوب .. علشان كده لو افترضنا حتى إن ريم مراتي عندها عيب معين ، فأنا هستحمله وهحاول معاها تصلحه وعمري ما هنسى المميزات الكتير اللي عندها .. ومتنسيش إن هي كمان يا ماما مستحملاني في حاجات كتير ..

~ نعم !  مستحملاك في حاجات كتير ! ده أنتَ ألف واحدة تتمناك يا أحمد !

- ده اللي هو أنا ! .. مش أنتِي  اللي كنتِ من كام سنة بتقوليلي امتى تتجوز وأرتاح منك  !

لقيت أمي ضحكت ، وهديت شوية ، فقولتلها  :

- ياريت يا ماما الموقف ده ميتكررش تاني من هالة .. مينفعش أبدًا بأي حال من الأحوال ندخل بيوت الناس ونخونهم بالشكل ده ونطلع نتكلم عليهم بره ..

احنا حرين يا ماما .. ننضف مننضفش براحتنا .. ده بيتنا احنا واحنا اللي قاعدين فيه ، محدش من حقه يتدخل أبدًا في التفاصيل اللي زي دي  ..

كمان قوليلها أحمد بيقولك اشغلي نفسك بعيوبك الأول ، ولما تخلصيها نبقى نتكلم !

~ متتكلمش كده على أختك يا أحمد !

- أنا مقولتش حاجة يا ماما .. هالة أختي الكبيرة وليها مكانة عندي .. بس اللي هي عملته ده غلط كبير ومينفعش يتكرر تاني ..

لو أنا مش راجل عاقل كان زماني اتشحنت من الكلمتين دول وروحت اتخانقت مع مراتي بسببها  .. ساعتها بقى هالة كانت هتفرح يعني ؟

لقيت أمي سكتت .. فحسيت إن رسالتي وصلت فقفلت الموضوع ..

مش هنكر إني من جوايا اتحرجت لما هالة جات والبيت بالمنظر ده ، وريم كمان كانت هتموت من الكسوف وخصوصًا لأن نظرات هالة وكلماتها كانت قاسية جدًا وكانت درس كافي لريم علشان تاخد بالها من موضوع نظافة البيت ده ..

يعني رغم اعترافي إن كلام هالة صحيح ، لكني مش هسمح أبدًا إن حد يتدخل في حياتي الشخصية بالشكل ده ، وعمري ما هاجي على مراتي أو أولادي علشان كلام ناس حياتهم أصلًا مليانة عيوب ..

دعواتكم هالة وأمثالها يبطلوا يعملوا الحركة دي .. علشان بينزلوا من نظرنا أوي بعدها ..
حتي لو كانوا اقرب الناس لينا ... غصب عننا لو عاقلين هنفكر الف مره ومش هنسمح لمخلوق يعكنن علينا حياتنا ....
مجرد مواقف حياتية ممكن نتعلم منها كتيررررر ........

#منقول 🌺
لكاتبها