سلام الخاوة نعرفكم بروحي ديركت باسكو راني مزروب راهي السبعة تع العشيا مستني الكار يجي راني مخلي خاوتي وحدهم في الدار مالصباح راهم وحدهم
المهم المفيد انا اوس
عندي 18 سنة جاي سمر وعينيا زروقة وشعري بني بصح فيه خصلات تع الشيب ملي كنت صغير عندي وكي كبرت زادو بانو اما طولي 1,70 هكاك
اما الحاجة اللي حيرتني هي الجسد تاعي اجماعة الخير راهو كي التع الطفلة ولا شباب عليه خصر رقيق ومترم مالفوق ولتحت علاجال هدي نلبس غير حاجات عراض اوفر سايز باه مانبانش مانيش مخصوص تنمر المجتمع تعنا يحب المترمين
علابالي راح تقولو نورمالمو راني نقرا ولا عندي باك بصح انا عندي عامين ملي خرجت مالليسي كي كان عمري 16 باسكو ظروفي المالية مور ماماتو بابا ويما وخلاولي زوج خاوتي توام دوكا راه في عمرهم 6 سنين ماتسمحليش نقعد نتكسل في الدار
وفي وقتنا هدا مكاش اللي يعاونك تشوف غير نظرات الشفقة وهدي اكره حاجة عندي لوكان نموت ومانمدش يدي للناس
راني ميت بلعيا ماالخمسة تع الصباح وانا خدام في القهوة نفتحها بكري ونسيقها ونقعد خدام حتى لنص النهار اومبعد نزيد نروح نخدم نعاون في وحد الشونطي كل مرة واش ندير خطرة النقي خطرة نرفد السلعة مطبع بواش كاين المهم نخلص
جاي قريب شوية مالدار وكل مرة وقتاه تخلاص الخدمة بصح اليوم راني روطار بزاف
راني نخمم في خاوتي جود وكاميليا علابالي راني مقصر معاهم بزاف ومانقعدوش كيفكيف بصح الله غالب الخدمة هادي كامل وماتكفيناش باسكو نخلصو الما والتريسيتي وفوقها حنا كاريين عند عمي وجه الشر اللي دا الدار مور ماماتو والديا واستغل الفرصة باسكو مكاش وين نروحو ومازالني نتفكر فيها اليامات تعنا كي كنا عاءلة كاملة كيما حنا كيما الناس نحس مزال فيها ريحة بابا ويما
علابالي بلي ماتعشاوش باسكو لوكان مانكونش معاهم ماياكلوش انا موالف الجوع نورمال نصبر بصح هوما مزالهم صغار ولازملهم اللي يتهلا فيهم
لازم نسيي اوموا نعوضلهم حنان والديهم اللي خسروه وهوما في 4 سنين
المهم لحقت للدار زدت الضاربت مع الباب تع الشيكوبي ماحبش يتفتح وقيل كروشا بعدم معركة طويلة تفتح الحمد لله جاو ليا الشوادا تاوعي يجرو يضحكو ويضاربو شكون يحق الاول ماڨري قاعي وراه يوجع مالعيا بصح كي نشوفهم يضحكو ننسا كلش
رحت للكوزينة كشما نطيب وتقابلني الفاجعة تع الما يطرش في الكوزينة والعين مڨروضة جريت غلقت الفانا تع الما وحطيت ترمتي على الكرسي وعيطت الجيران برا راني سور سمعو
اوس "يالشواداااااا شكون كسر العين تع البوطاجي"
سكتو لزوج حتى نطقت كاميليا
"والله ماانا جود كان داير الكرسي ويلعب بالما حتى طارت وحدها "
حتى رجعلها جود
"وعلاه تكذبي يالكلبة مشي نتي اللي جيتي زعما توريلنا شطارتك وتغسل الماعن ونتي مغرف ماتعرفيش تغسليها"
وياربي سيدي بدات الحرب بيناتهم اللي محال تعرف شكون اللي دار الحاجة هديك
عيطت ڨاع واش عندي باه يسكتو
"بلعو عليا لزوج مانسمع حس حتى واحد راكو معاقبين مكاش عشا حتى نسڨم العين"
خرجت على سعدي المقود المنيوك اللي مزال مافهمتش واش صرالو مشيت حتى وين لحقت للحانوت شريت عين جديدة وشوية دوزان لازم معاها
كي كنت راجع نشوف كلب يجري جاي لعندي حال فمو ومخرج لسانو كشغل راه يتورني في فلم اكشن ندبت زهري وبديت نجري معوق كي القحبة اللي هداوين ناكوها
رجل هنا ورجل لهيه راحت الكاريزما
هدا ڨاع صرا والشتا اللي مالقالتش وقتاه الطيح تصب
"نيكمها حالة ملخر"
مافقتش كيفاه حتى لقيت روحي في وحد الزنيقة جاية مخبيةوخالية حبست نتم نرد النفس بصح روماركيت بلي ماكنتش وحدي كان وحد الراجل تما قاعد ومكسل رجليه فلرض وحاط راسو دنيت ليه باه نهدر معاه
اوس"واش ياخو صافا كاشما خصك واشبيك "
ماسمعتوش رجع وماتحركش اصلا حتى زدت الدنيت ليه شديتو مكتافو وطلعتلو راسو تمت بانلي الموس اللي كان مغروس في كرشو والدم راه يشرشر منو تما تفكرت نهار مات بابا بين يديا بديت نبكي ونعيط بصح ماكان حتى واحد
"نوض افطن دوك نديك لسبيطار يداووك ماتخافش ماتموتش"
غير قلتلو هكاك رفد راسو وخزر فيا خزرة تخوف وهدر بصوت مبحوح
"بلاك تديني لسبيطار وماتمسنيش خلي قسامي هنا وقود منا "
هدا ڨاع هو يهدر وانا نبكي مرانيش حاب نزيد نشوف ناس تموت قدامي
كي شفتو ماحبش يروح لسبيطار قررت باه نسيي ندير اللي عليا والباقي على ربي
" اسمعني دقيقة وركز معيا ماتموتش دك تعيش غير علاجالي مزال ماشفتش بزاف حاجات في حياتك مزالك صغير"
والله ماعلابالي واش راني نخلط المهم راني نهدر ونقنعو يقعد فاطن هداك هو الصح
كي رفدت راصي لقيتو يخزر في عينيا وغايس وللمرة الثانية تلاقاو عينينا
تبسم وهدر
"مارانيش حابلك المشاكل لوكان نموت تباصي نت"
" ماتزيدش تهدر على الموت قدامي"
هدرتها بالزعاف تما هو ضحك وحسيت كشغل الديت الموافقة تاعو
جريت للفارماسي جبت معقمات وشاش وباصمات واي حاجة وحوخرا قادرة تعاون
وليت ليه لقيتو مغاشي بصح مزالو حي جبدت هداك الموس من كرشو تمت بدا يخرج الدم بالبزاف توترت وخفت مبعد زربت حبست الدم كي حطيت فوقو الفيستا تاعي كي حبس عقمتو ودرتلو القطن ولويت عليه الشاش لبيض
وقفتو وتكيتو على جنبي باسكو محال نرفدو السيد جاي ضخم والديتو معايا للدار
هاي جماعة هادي اول مرة نكتب عندي بزاف افكار بصح مازال مانضمتهاش
الا عجبتكم قولولي نكمل واللي عندو كلمة حلوة يقولها واللي ماعندوش يسكت
ايا باي نحبكم ونحب تشجيعكم تان ❤️❤️
ماتنساوش ديرو نجمة وكومونتار شباب ياكماخسرتو والو وفي نفس الوقت تشجعوني
أنت تقرأ
حب ماكانش في البال
Romanceكي تتحمل بزاف المسؤواية تتبدل داخليا وخارجيا حكايتنا رايحة في العاصمة وباينة بلي ياوي معنتها بلي ولد وولد تسما اللي ماعجبوش الحال يبدل البلاد 😂
