الأَزلم"سم أسود"

المـشهد

بِسْمِ اللهِ الرَّحْمَـٰنِ الرَّحِيمِ

الكاتبة: لونا علي

لا تنسون التصويت والتعليق بين الفقرات
ومتابعة الحساب luna_ali18

✿✿✿

صوت المحرك يمزق الصمت اللي مغطّي المكان وآني گاعدة بالسيارة ماكو أي صوت غير صوت الماكينة والهوا البارد يدخل من الشباچ ويلعب بشعري

أحس كُلشي ميت حتى الهوا اللي المفروض يريح ما گدر يبرد النار اللي مشتعلة بداخلي .. گلبي يدگ بقوة أحسه راح ينفجر بأي لحظة نبضاته مدوية براسي تدگ وحدة ورا وحدة بسرعة

أخوي يمّي ساكت وعيونه مثبتة علىٰ الطريق المظلم الگدامنا، إيده مشدودة على الستيرنگ بقوة كأنما متمسك بالحياة نفسها..ما ينطق بكلمة كأنما أي كلمة تنگال راح تكسر هدوء الموت اللي غامر المكان هيبة اللحظة صايرة أقوى من كُلشي...

الأحداث صارت بسرعة خيالية أسرع من ما لحگنا نفكر بيها أو نستوعب شنو اللي صار.. كأنما الدنيا كُلها قررت تضربنا بلكمة فجائية من حيث ما ندري..الأشياء صارت أسرع من نبضاتنا..أسرع من تفكيرنا أشياء صارت وما نعرف شلون وصلنا لهالنقطة شلون فجأة الدنيا انكلبت لهالشكل...

گلبي مليان أسئلة بس ماكو جواب الأفكار متداخلة متعقدة براسي أحاول أربط الأشياء أحاول أفهم بس كُلشي متداخل ومتشوش أسئلة بلا نهايات بلا أجوبة تطن وتدگ براسي

نطلع؟ نشرد؟ ليش وصلنا لهالمرحلة؟ شراح يصير إذا شافونا؟ شراح يسوون بينا؟

الطريق گدامنا يضيق كأنه متآمر ويشترك ويا الدنيا اللي گاعدة تسكر عليَّ من كُل جهة، كلما السيارة تتقدم أحس الدنيا دتصير أثگل والهواء صار سُم ما ينشرب

گلبي ينبهني بلخطر بس الخطر مو گدامي الخطر جاي من وراي يلاحگني، شعور ما ينزاح من صدري كُل ما نفكر وين نروح نلگى الطريق مسدود مثل خياراتنا اللي گاعدة تنتهي وحدة ورا الثانية...

صوت صراخهم بعده يرن بأذني واضح كأنما صار قبل شوي مو ساعات، ما يروح، ما يخف الزمن توقف عند هذيچ اللحظة..اللحظة اللي كُلشي بيها انكسر الضربة چانت قوية چانت ضربة بلا رحمة ناس چانوا يركضون ورانا وأشوفهم بنظرة بطيئة كُل حركة بيهم تتباطأ كأنما الزمن كُلة تجمد عند اللحظة اللي كُلشي بيها انهدم...

شفتهم شفت وجوهم المصدومة عيونهم اللي تلمع بالغضب شفت كُل حركة صغيرة تصير حوالي بَـس محد منهم شاف شنو اللي بداخلي الناس يشوفون الظاهر يشوفون الفوضى اللي بره بس محد شاف النار اللي تحرگني من جوة
محد حس بشعوري محد سمع صوت گلبـي وهوَّ يحترگ...

بيّـة وجع ما ينحچي كُلشي صار أعقد من اللي أگدر أوصفه أحس الدنيا كُلها انگلبت علينا وماكو مخرج ما أعرف شنو اللي جاينا بعد بس اللي جاي مو طبيعي كابوس متواصل مستمر بلا نهاية ماكو استراحة ماكو لحظة أتنفَس بيها ..