الديار مازالت ديارك حتى لو طال غيابك

بارت ١

بسم الله
لا تنسون ذكر الله
لا تنسون تقيموا البارت واعطوني رأيكم
____________________________
صحيح اللي قالوا اذا تبي تتجاوز شي او تنساه اعتزل اي شي يذكرك فيه او ابتعد عنه........صح انها ما نست ولا اعتزلت ذكراها لكنها شبه تجاوزت...... اكثر من ١٥ سنه مرّت كانت كافيه انها تتجاوز او ترغم نفسها وتجبر عقلها الباطن انها تجازوت.......من يقدر يتجاوز او ينسى آلامه صعب......وصعب على وحدة فقدت كل شي في حياتها بداية بأبوها اللي تركها وعمرها ١٠ سنين الى أمها اللي توفت وتركت جرح كبير وآلام عميقة داخل قلبها جدتها ومعاملتها كلام الناس عليها لكنها قوية وتجبر نفسها على القوة تهرب من كل شي وهذا صار من عوايدها بدون لا احد يدري عنها
ابعدت يدها عن اللجام تمسح دمعتها اللي نزلت على خدودها تحس بحرارة دموعها
رفعت عيونها للسما اللي بدت الشمس تشرق تعلن بدايه يوم جديد
شدت اللجام بقوة تآمره بالوقوف
وقف الادهم تسمع صوت صهيله تتبدل ملامحها من حزن الى فرح تلفه تقول: لازم نرجع بيحسون
ارخت اللجام تضرب بارجلها بطنه يزيد من سرعته الادهم ترفع اياديها فوق تصرخ بكل فرح واريحيه تعيشها فاللحظه هذي ما في غيره الادهم اللي يغير مودها ويزرع الابتسامه على فاهها صح ولا احد يدري انها تركبه لانها تدري لو عرفوا وبالاخص جدتها ما بيمر الموضوع مرور الكرام لكن الوحيد اللي يدري بالموضوع ويقول لهم انه خيله لكنه خيل شمّا اللي اشتراه لها زيد بعد ما عرف حبها للخيل
نزلت من عليه تفتح الباب الخلفي للمزرعه تدخله بهدووء
نزعت اللجام من عليه وكذا السرج تدخله لمكانه تسكر عليه تطبع قبله له على الهوا
فزت برعب من سمعته يقول: ما توووبين
التفتت بسرعه تشوفه واقف بزيه العسكري تمسك مكان قلبها تقول برعب: الله يسامحك زيود خوفتني
ما تعرف تطلع صوت
ضحك زيد وقال: وش زيود انتي بعد اقووول زيد
ضحك شمّا وقال زيد: ارجعي بسرعه قبل لا يكشفونك
هزت راسها تسرع من خطاويها داخله لبيت جدتها
نزعت عبايتها ولثامها تلبس جلالها توجهت للمطبخ تاخذ الصحن وتطلع متوجهة لزريبة النياق
بعد دقايق من المشي وصلت وقالت: بسم الله
فتحت الباب تبتسم للنايفه اللي اقبلت عليها وحطت الصحن على الارض ومسحت على وجهها وقالت: تسمحين ناخذ من لبنك
ابستمت من ما اعطت اي رد وانزلت اياديها لصدره الناقة تعصره
وقفت ونفضت ثيابها ترفع الصحن تقرب شفايفها ترتشف منه
ابعدت الصحن بتلذذ وخرجت بعدما سكرت الباب متوجهه للدجاج تاخذ البيض الجديد
رجعت للبيت تشوف جدتها وزيد اللي جالسين يتكلموا وقالت مزنه: خيير متى ناويه تحطين الفطور
قلبت عيونها بملل من نفس السيرة اللي تنعاد كل يوم اشر لها زيد انها تمشي
دخلت للمطبخ تجهز الفطور وما هي دقايق واجتمعوا يفطرون مع بعض
مزنة: متى ناوي تتزوج انت
غص زيد في لقمته وضحكت شمّا تكتمها من رفع نظره لها يناظرها بحده
تنحنح يقول: ما في نصيب
رفعت سبابتها مزنه تقول بحده: النصيب موجود يا زيد واعلمك ان لقيت بنت الحلال ترا بتتزوجها غصب
وقف زيد وقال: يصير خير
ابعد عنهم يطلع من البيت متوجهه للمركز
التفتت لشمّا اللي تحاول تكتم ضحكها وقالت بحده: خييير اضحكي ولا اسكتييي
كتمت ضحكتها شمّا تكتفي بهز راسها
[بيت العم صالح]
وقفوا بعدما كملوا فطورهم وتوجهت وصايف عند هزاع
وصايف: هزاع وقف
التفت لها هزاع يشوفها تقرب منه وقالت بتردد: ابي اكلمك بموضوع
ناظرها ينتظرها تكمل وقالت: بس....
قاطع كلامها من قال: وصايف تكلمي
بلعت ريقها خايفه من ردة فعله لكنها تشجعت وقالت: ابي أدوات رسم
وسع عيونه بصدمه من طلبها وقال: انتي ترسمين
اكتفت بهز راسها بدون لا تناظره ورفع راسها بيده اللي استقرت على دقنها وقال: احد يدري
نفت براسها وقال: طيب
رفعت عيونها بسرعه وقالت بدهشه: صدددق
هز راسه بضحكه ومسكت يده تهزها بفرح وقالت: احلف احلف هزاع
ضحك وهز راسه ترفع ارجلها تضمه بقوة وقال: ما ترسمين الأرواح
نفت براسها وقال: طيب ادواتك بيوصلون لك
ضحكت بفرح وقالت: يا حظييي فيك هزاع
هزاع: يلا يلا وراي شغل
هزت راسها وقالت: هزاع لا تقول لاحد تدري لو عرفوا وش بيصير
هز راسه يطلع ،، التفتت لبدور اللي صفقت وقالت: وااااو صراحه
بلعت ريقها وصايف تعديها لكن وقفت من قالت بدور بخبث: صراحه ابي اعرف وش بيصير لو عرفوا ابوي...جدتي
أطلقت ضحكتها تلتفت لها وصايف بحده ترفع سبابتها: لو احد درى يا بدور ما يصير لك خير
ضحكت بدور وقالت: المفروض اخاف
احتدت ملامح وصايف وقالت بدور: وش ابي فيك اساسا انتي ولا رسماتك ناقصنا وجع راس
ابتعدت بدور تبتسم بخبث ووصايف اللي بلعت ريقها تقول: ما ظنتي بتقول لاحد اهههخ يااا بدووور اههخ
______________________
"العصر"
[بيت الجده ،، غرفة شمّا]
خرجت من غرفتها تمر من جنب غرفة جدتها توقف خطاويها من سمعتها تقول بحده: راااشد لا تجنني
اعتدلت في وقتها تحاول تسمع
راشد: يمه الله يهديك وش تبين الحين
مزنه بحده: كم لك الحين غايب عننا وعن بنتك
راشد بانفعال: يممه كم مرة اقول لك انها ما هي ببنتييي
زفرت بقوة وقالت: راااشد اقووولك تعال خذ بنتك قبل لا ياخذونها
سكت راشد يحاول يفهم قصدها وقال بتلعثم: و..وش..وش تقصدين
مزنه: اذا تبي بنتك تعال خذها قبل لا ياخذون روحها ترا درو سبب موت خولة
قفلت الخط مزنه تتركه بصدمته وتساؤلاته الكثيرة
وسعت عيونها ترفع يدها لفمها أثر صدمتها ،، ابتعدت بسرعه تدخل لغرفتها من سمعت خطاوي جدتها
دخلت الغرفه وراسها مليااان تساؤلات وش سبب موت امها من بياخذ روحها وش سبب كره ابوها لها
نزلت دموعها من كثر كتمها لدموعها وكونها لأول مرة بعد سنيييين طويله تسمع صوت ابوها وبنفس الوقت تعرف ان ورا موت امها سبب
نزلت على فرشتها تضم لحافها لصدرها تكتم شهقاتها
[الحوش]
جلسوا البنات بعد ما ضبطوا الشاهي وجابو الفصفص
وقالت صيته: وينها شمّا ما ناديتوها
وقفت وصايف وقالت: بروح لها
اخذت خطاويها لبيت جدتها ،، فتحت باب غرفتها تشوفها منسدحه على فرشتها
قربت منها وقالت: شمّا
مسحت شمّا دموعها بسرعه وعدلت نبرة صوتها تقول: شتبين وصايف
وصايف: قومي نجلس مع بعض
اكتفت بهز راسها بنفي ونزلت عندها وصايف تقول: شمّااااا يلااا
وسعت عيونها وصايف من منظر شمّا عيونها المورمه وخشمها الأحمر وكحلها الخربان
وصايف بخوف: شمّا شفيك كنتي تبكين
جلست شمّا ومسحت دموعها بعنف وقالت: لا
وصايف: وشو اللي لا تسوقينها على من
شمّا بتأفف: اوووف وصايف قلت ولا شي
وقفت وصايف من شافتها وقفت وقالت: طيب على خاطرك بس ترا نحتريك تحت
خرجت بدون لا تسمع ردها وضربت شمّا رجلها مع الأرض وقالت: اوووف حتى البكا ما تبكييين على خاطرك
تأففت تلبس جلالها تخرج من غرفتها تدخل الحمام تغسل وجهها
خرجت لعندهم تجلس جنبهم وقالت: السلام عليكم
ردوا بوعليكم السلام وقالت مهره بحماس: عندي لكم خبببر
اعتدلوا البنات بحماس وقالت وصايف: وش هوو
مهره: كم تعطون
ترف بملل: ياا مهره بتقولين ولا لا
ضحكت مهره وقالت: ساااالم بيخطب وضحححه
شهقوا البنات بصدمه وقالت ترف: هااا
ضحكت صيته وقالت: من قال لك
مهره: سمعته يكلم ابوي اليوم الظهر والواضح ان ابوي رافض
شمّا بهدوء: خير ليه ما يوافق
اكتفت بهز اكتافها بمعنى مدري وقالت وصايف: اساسا كل الديرة ما تطيق ابو وضحه تبين عمي يحبه
شمّا: حتى ولو لو يحبها يخطبها هو يبي البنت مو ابوها
ضحكت مهره وقالت: صادقه بس ترا حتى وضحه ما تجوز لي
صيته: صراحه مدري وش يحب فيها والله
ترف: ليه هو يحبها
ضحكت مهره وقالت: يعشقها يا بننت
بلعت ريقها بغصه اجتاحت حلقها ورفعت عيونها للسما تمنع دموعها
شهقوا البنات من حسوا بقطرات المويه والتفتت صيته وقالت: بتمطر
هزوا رؤوسهم بفرح والتفتوا لشمّا اللي مو كانت بصوبهم ابدا سااهيه ولا هي معهم تفكر وارهقت نفسها بالتفكير
دقتها صيته ولا شافوا منها رد
دندنت وصايف لعل شمّا تاخذ بالها: الجو غيييم وخابرك تعشق الغييم.....دايم تقوول ان المطر لمة احباااب
التفتت شمّا لوصايف باستغراب وسرعان ما فزوا كلهم من ضرب الرعد بقوة يهطل المطر بقوة او المسمى (الصنديد)
ابتسمت بسرعه تقوول: بناااات مطططر
ضحكوا من ردة فعلها ووقفت تحت المطر عكسهم اللي كل وحدة اخذت شي تدخله داخل
ابعدت جلالها على راسها تنثر شعرها تدور مكانها يبتسمون من سمعوا صوت ضحكاتها دليل فرحتها
ابتسمت بفرح ترفع اياديها لوجهها تمسحه رفعت يدها للي خلقها تدعي بدعائها الدايم (ربي اني اسألك ان تريح قلبي وفكري وان تصرف عني شتات العقل والتفكير ربي ان في قلبي أموراً لا يعرفها سواك فحققها لي يا رحيم، ربي كن معي في اصعب الظروف وارني عجائب قدرتك في اصعب الايام يارب) (اللهم اجبر خاطري جبراً انت وليه فانه لايعجزك شي في الارض ولا في السماء ربي اشرح صدري و ارح قلبي و ازح من قلبي كل خوف يسكنني)
تستغل الفرصة ولعل هذا المطر بداية خير لحياتها
التفتت لصوت عمها صالح اللي قال: شمّا يا بنتي ادخلي داخل لا تمرضين
ضحكت شمّا وابتسمت من خوفه عليها وقالت: طيب
دخلت بعدما اكتفت بلحظاتها القليله اللي شرحت صدرها
اخذت المنشفة من عند وصايف وقالت: شكراً
نشفت شعرها وقالت: وينها بدور
هزت كتفها بمدري وهزت راسها شمّا تكمل تنشيف شعرها
[المركز]
زيد بمحاولة تمالك اعصابه: اخووي لو ممكن تهدى وتعلمنا اللي صار
مالك: وش تبيييني اقووول زوجة اخوووي قتلت اخووي
سكر عيونه بغضب وقال: طيب انت تقول انه ما هو موجود صح
هز راسه مالك وقال زيد: طيب وش دراك انها هي اللي قتلته
مالك بغضب: مااا في غيرها اساسا هي تكرهه
التفت زيد لاحد العساكر اللي جنبه وقال: طلعه برا وجيب البنت
هز راسه وتقدم يطلعه وما هي دقايق ودخلت نورة جنبها ولدها ريان
جلست على الكرسي اللي أمامها ورفعت عيونها للي قال: بكلمك لحالك لو سمحتي
هزت راسها تنزل نفسها لريان وقالت: حبيبي ريان تقدر تنتظرني برا
نفى براسه ريان وقال: لا بياخذوني
بلعت غصتها ورفعت كفوفها تحاوط وجهه وقالت: ما يقدرون انت ولدي انا ما بسمح لهم
ابستم ريان وقال: طيب بشرط
ضحكت بخفه وقالت: وش هو
تكتف وقال: ما نرجع للبيت
سكتت ومرّت ثواني وهزت راسها وقالت: طيب يا روحي
ضحك وطلع مع العسكري اللي مد يده له
زيد اللي قال وهو صاد عنها: وينه زوجك
سكتت تسمعه يكرر سؤاله وقالت: مدري
التفت لها يناظر عيونها اللي كانت منزلتهم تناظر يدها وقال: اسمعيني زين حنا هنا عشان نساعدك فلو سمحتي نبي ردود مقنعه اكثر
بلعت ريقها بتوتر وقالت: ما قتلته انا
شبك يده زيد وقال: وليه يتهمونك بقتله
شتت نظرها بارتباك مما أدى إلى شك زيد
اعتدل في جلسته وقال بحده: يا اختي ما ابي اعيد كلامي فلو كان عندك اي حجه انك مو قاتلته تكلميييي
اقشعر جسدها من حدة صوته تنفي براسها وقالت: مااا عندي ايي حجه واسااااساا اسبوووع وهووو غايب
زفر بقوة وقال بهدوء من لاحظ رجفتها: تقدرين تقولين لنا كل شي من البدايه
سكتت لدقايق تفكر باللي بيصير لها بعد اللي بتقوله هل بيخلونها بخير
رفعت عيونها له وقالت: بيقتلوني
فتل شاربه زيد يحاول يتمالك اعصابه وقالت: لو تبيني اقول ا ...ابي منك الامان
استغرب زيد من كلامها ومن كونها تبي الامان من اللي يشوفهم انهم أهلها
نورة بارتباك: زوجوني له وعمري ١٦ سنه إجبار لان حالة اهلي كانت سيئة جداا ....... تزوجته وزادت معاناتي معاه بحكم اني كنت صغيرة ولا عندي فكرة عن الزواج كنت احسب اني بعيش احسن او اني على الاقل بحس بالأمان معاه لكن......سكتت من اجتاحتها دموعها وكملت: حملت منه غصبا عني بعد زواجي منه بشهر كان ...... كان.........يعنفني قدام أهله ويه...
رفعت كفوفها لوجهها تغطي عيونها اللي تغورقوا بالدموع وقال زيد: اي موضوع حساس ما تقدرين تبوحين به تجاوزيه
هزت راسها وقالت: ولدت ولدي ريان وازدادت معاناتي ما اكتفى باهانتي لوحدي بالعكس حتى ولدي اهانني وذلني و..واتهمني انه ريان ماهو ولده
سكتت تشتت نظرها للسقف تتحاشى النظر فيه وكملت بعيون مغورقة: طلقني
استغرب زيد بحكم انو أهله ما قالو له انه طلقها وقال: كيف أهله ما قالو
هزت راسها وقال: ايه لأنهم عارضوه يوم طلقني واجبروه يرجعني لكني ما قبلت
زيد: سبب الطلاق
سكتت وقالت: عاندته كنت ابي اهرب من عيشتي معاه كنت ابي اهرب انا ولدي من ذاك المكان ما كنت ابي ولدي يعيش في ذل وقهر وظلم اكثر من اللي عاشه اتهمني ان ريان مو ولده فمن ظلمه لي وقهري وذله لي واسترخاصه لي قلت اي لاني كنت ابيه يطلقني واروح من هناك لكن يشهد علي الله أن ولا واحد من غيره مسك اصبع من يدي ولا عمري عرفت احد غيره
اخذت نفس وقالت: قبل اسبوع طلقني وقبلها بليله سمعت كلامه مع اخوه مالك وابوه
زيد: وش كانوا يقولون
نورة: نزل للرياض يبيع اللي يبيعه
زيد باستغراب: وش اللي يبيعه
نورة: كل اللي حرمه ربي
ارتسم على ثغره ابتسامة سخريه وقال: سلطان
رفعت عيونها له بسرعه وقالت: هاا كيف ...كيف عرفت
وقف زيد وقال: ما عليك الأمر كله عندي وانتي بريئة
سكتت وقالت: طيب
لاحظ من نبرتها ونظراتها اللي وعدها به وقال؛ اطلعي معي
اكتفت بهز راسه تطلع يرتمي بحضنها ريان وقال: ماما ضربوك زي ابوي ليه تبكين التفتت بسرعه لزيد اللي ناظرهم باستغراب وقالت: لا لا يا ماما اسكت لا عاد تجيب الطاري هذا
صح انه استغرب وانصدم من كلامها وانها متزوجة منه من كان عمرها ١٦ ومعاناتها وصبرها معاه وفهم انها كلها لعبه من اهله عشان يغطون على غيابه
دخلت معاه لمكتبه وقال: اجلسي هنا لين اجيكم
ناظر لريان اللي مسك عباية امه يقول: ماما ما ابي خلينا نروح لأي مكان آخر
شتت نظرها بتوتر وقالت بهمس له: مافي مكان لنا آخر يا ماما
اشر ريان لزيد وقال: بس ممكن ....
قطع كلامه زيد من قال: تعرف ترسم
رفع نظره له وقال بحماس: اييي ماما تعلمنيي
نقل زيد تظره لنورة ورجعهم لريان وقال: طيب تعال معي
التفت لامه ياخذ اذنها واكتفت بهز راسها اخذ خطاويه لمكتبه يفتح درجه ياخذ ورقة ومجموعة اقلام
زيد: تعال اجلس هنا
ريان: بالمكتب
هز راسه زيد يحمله يجلسه وقال: ارسم فالورقه ولا تقرب لأي شي ثاني تمام
هز راسه ريان وقال: تم
اخذ قلم يبدأ يخطط فالورقة بكل فرح بحكم انه يحب الرسم
التفت زيد لنورة وقال وهو صاد عنها: لا تطلعين لأي مكان واجلسي هنا حتى لو تأخرت
__________________________
[المزرعه،،بيت العم عبد المحسن]
(المجلس)
سالم: يببببه الله يهديك انا وش ابي بابوها
عبد المحسن بحده: ساااالم بنت عاصم تحررم علييك فاااهم
وقف سالم بغضب وقال: ليييه لا يكووون اختي وانا مدري
وسع عيونه عبد المحسن وقال: شتقصصصد يا حيوااان
سكت سالم من استوعب اللي قاله وقال: مو قصدي....
اشر عبد المحسن للباب وقال: اطللللع
قرب منه سالم بندم على تسرعه وقال: يبه والله ما قصدت كلام...
عبد المحسن بصراخ: قللللت اطلللع ولا يشوفك وجهيييي
هز راسه سالم يطلع من المجلس يناظر للعيال اللي جو من سمعوا الصراخ وقال منصور: وش صاير
فهد: سااالم
القى عليهم نظره يبتعد عنهم متوجه لمكانه الاحب الى قلبه
خرج من المزرعه متوجه لبيتها ينقز الجدار وتحديدا شباك غرفتها
دق الشباك اكثر من مرة وفتحته تبتسم وقالت: ما بغيت
ابتسم رغم حزنه وقال: كيفك
تمعنت في ملامحه وقالت: انت اللي كيفك ملامحك ما تبشر بخير
مسح على وجهه بتعب وفتل شاربه وقال: ابوي مو راضي
قلبت عيونها بملل وفهمت السالفه كلها وقالت: وانت بتمشي على كلام ابوك
سكت سالم وقالت وضحه: سالم ترا ٢ سنتين وانا صابرة ترا انت اللي بتتزوج ما هو ابوك
سالم: ادري يا وضحه بس ما اقدر اكسر كلام ابوي
ضحكت بسخريه وقالت: طيب وانا اللي اكذب على اهلي واخون ثقتهم
سكت سالم وقالت وضحه: آسفه سالم على اللي بيصير لكن والله العظيم اني كرهت اليوم اللي عرفتك فيه وحتى تراك معزوم على زواجي بعد بكرة
توسعت عيونه بصدمه وقال: وش تقووولين
وضحه بحده: ايي يا سالم ضحكت عليك واستغليت حبك وانا اساسا مخطوبه من ولد خالتي شهر الحين واتمنى انك ما تتدخل فولا شي لاني فعلا ماااا احبك ولا ابيييك
سكرت شباك غرفتها تتركه بصدمته
_______________________________
العشا
نزلت عيونها لريان النايم على حجرها ساعات وهي تنتظره لكنه للحين ما جا رفعت يدها تضبط لثمتها تحاول تصحي ريان
فتح عيونه بازعاج وقال بخوف: وش صار ماما بابا جا
نفت براسها وقالت: الله لا يجيبه بس بنروح
ريان باستغراب؛ بس للحين ما جا عمو
ابتسمت بهدوء وقالت: ما حنا جالسين هنا ما نبي امان احد
وققت من على الاريكه تمسك يده وقالت: يلا يا روحي
فتحت الباب تشوف خلو المكان من العساكر قليلين اللي يشتغلون
اخذت خطاويها لبرا المركز تطلع منه لمن وقفت من سمعت صوت وراها ينادي: يااا ريااان
التفتت تشوفه جاي صوبهم وقرب منهم يقول بحده: خييير مو قلت لا تطلعين
التفتت بسرعه لريان وفهم زيد وقال: انتظرنا هناك ممكن
اشر له زيد مكان موتره وهز راسه ريان
التفت لها وقال: وش مطلعك
نورة: بتمنعني يعني
زيد: ما بمنعك بس
قطعت كلامه من التفتت تبي تروح لكنه رجع يقول: يااا ام ريان اسمعيني
نورة: والله يا اخوي تعبانه وجدا وساعات وانا انتظر فلو تسمح انك تخليني اروح
هز راسه زيد وقال: طيب ما عندي مانع
التفت له تشوفه متوجه لموتره يركب ريان
زفرت بقوة وتوجهت لعندهم تفتح الباب تبي تطلع ريان
ريان: وش فيييك ماما
نورة: تعال بنروح
ريان بزعل: بس ماما ليه
نورة بحده: ريااان لا تجنني قلت تعااال اسمع الكلام
التفت لهم زيد اللي كان أمام وزفرت بقوة تتماسك اعصابها وقالت: ريان اطلع
تكتف بزعل وقال: لا ما ابي وين بنروح ما عندنا...
قطعت كلامه من قالت: ياااا رب صبببرك ريااان
تدخل زيد وقال: انت تبي معي صح
هز راسه ريان وقال زيد: طيب اذا ما تبين تجين معانا روحي لوحدك
نورة بانفعال: مجنووون انت تبيني اخلي ولدي معك من انت اساسا
زيد: يااا بنت الناس ماني ماكل ولدك لو سمحتي اركبي واذا كنتي تبين تروحين لمكان بكرى اودييك
ريان ببكا: لا تصارخون ماما تعالي معي
سكرت عيونها بغضب تجلس جنب ريان تسكر الباب
زفر نفسه زيد يحرك متوجه للمزرعه
جالس تحت النخل رافع عيونه للسما يشوف منظر القمرا والنجوم يفكر في كلامها وكيف انها ضحكت عليه طول السنتين اللي مروا يستوعب انه فقد ابوه بسببها وهي اللي ما اعارته اي اهتمام حتى
وقف ينفض ثوبه راجع لبيتهم لكنه وقف من شاف احد فباب المطبخ مستقرة نظراته عليها
ارتبكت من التفت عليها تدخل للمطبخ بسرعه تدعي انه ما لحظها ولا عرفها
ما اعار الموضوع اهتمام ورجع للبيت يدخل للمجلس يشوف ابوه اللي مان جالس يقرأ ورده
جلس جنبه يشوف صد ابوه عنخ وقال: يبه
سكت عبد المحسن من كرر مناداته له سالم وقال وهو صاد: نعم
بلع ريقه سالم وقرب يحب يد ابوه وقال؛ السموحه يا ابوي كلمة طلعت وقت عصبيه انت تدري اني ما اقصد
سكت عبد المحسن وقال سالم: ابشر يبه باللي تبيه وبنت عاصم ماني ماخذها
خرجت آخر كلماته بصعوووبه على قلبه صح انه قالها كلام لكن مشاعره ،احاسيسه ،حبه ،قلبه، يوافقونه في هذا الرأي؟؟
التفت له ابوه وقال سالم: والله يا ابوي ان ما يرضى علي زعلك لو تبي الدنيا اجيبها لك بس سامحني
عبد المحسن بحده: مااا تتكرر يا ولد سمراء
ضحك سالم من ذكر امه: آسف على كلامي وانفعالي عليك انا استوعبت غلطي يبه قراري واختياري كان خاطئ فالحين مابي الا رضاك
هز راسه عبد المحسن وقال: تدري لو ما جيتني الحين ما كنت بسامح حتى لو....
قطع كلامه سالم من قبل راسه وقال؛ اعقب تن سويتها
ابتسم وقال: وش غير رأيك
سكت سالم وقال بعد دقايق: كلامك صحيح يبه انا عرفت انهم عائلة ما يتشرفون بنسبنا ولا يستاهلون حتى دقيقه من وقتنا
ربت على كتفه وقال: اخترت الصح يا ولدي لكن دام الزواج في بالك وتبي رضاي فتزوج من بنت عمك عبد العزيز
سقط كلامه كالسهم على قلب سالم صعب عليه يلبي طلبه لكنه مجبور هو يبي رضاة ابوه لا غير يفكر فيها ويفكر في نفسه هي بتتزوج طيب وهو؟ بيضل كل حياته يفكر فيها ويفكر في ضحكها عليه ممكن تكون خيرة له
سكت وقال بعد دقايق: افكر وارد عليك
هز راسه وقال: لعلمك تبي رضاي تزوج بنت عمك
هز راسه يطلع من المجلس متوجه لمجلس بيت جدته المكان اللي ينامون فيه العيال
دخلوا البنات لغرفة شمّا وقالت وصايف: سلااام
رفعت عيونها لهم وقالت: وش المداهمه هذي
اخفت كتابها الصغير تحت مادتها المكان اللي تكتب فيه كل أفكارها وشعرها كذلك
مهره: تطردنا يعني
ضحكت وقالت: اعقب
صيته: جينا النام عندك
ضحكت وقال: خليتوا الأذن
هزوا رؤوسهم وقالت: ما اردكم والله
__________________________
زيد بهدوء: انزلو
نزلت تمسك يد ابنها بقوة وهمس زيد وهو مار من جنبهم: ما حد ماكله ترا
قلبت عيونها بملل تدخل معاه تناظر لكبر المكان النخل اللي في كل مكان وحتى برك المويه اللي على الأرض دليل المطر
ريان؛ ماما هنا جميل
اكتفت بالابتسام ونازرت في زيد اللي التفت لهم وقال: ادخلوا
ناظرت للبيت تتقدم معاه ،، اشر لمكان يجلسون فيه وقال: انتظروني هنا
هزت راسها تجلس وفي حجرها ريان اللي كان يتكلم لها عن جمال المكان
دخل لغرفة امه يشوفها تسلم من انتهت من صلاة الوتر وقال: ابيك بموضوع
مزنه: لعله خير
خز راسه وقال: عندنا ضيفه
وسعت عيونها وقالت: وشووو من ذي لا يكوون...
قطع كلامها من قال: يمه استهدي بالله واسمعيني للآخر
حكى لها كل اللي صار من بدايه يومه فالمركز لين دخوله عندها
رفعت كفها لقبلها وقالت: اااخخ المسكينه اكيد متألقه كثير بالله دخلها عندي اشوفها
هز راسه وقال: انا بروح لغرفتي
هزت راسها مزنه تشوف طالع من عندها يرفع نظره لها يشوف ريان اللي كان نايك وقرب منها وقال: هاتيه
نفت براسها وقالت: لا
زيد: يااا بنت الناس بدخله للغرفخ هذي وانتي روحي عند امي تبي تكلمك لما تطلعين تعالي عنده
ناظرت لعيونه واكتفت بهز راسها وقالت داخلها؛ هو جابك لين بيته تبيه يسوي شي فولدك
ابتسمت بسخرية تحاول تخفف من توترها تفتح باب الغرفه اللي طلع منها تشوف مرة فالنتينا من عمرها
اغلقت الباب وقالت: السلام عليكم
مزنه: وعليكم السلام يا بنتي تعالي عني
قربت منها نورة وقالت: سمي
ابتسمت مزنه وقالت: عساك طيبه وينه ولدك
نورة بهدوء: والله نايم تعبان
هزت راسها منيرة وقالت: الأكيد انك انتي تعبانه بس بقولك كلمتين يا بنتي واسمعيني زين
هزت راسها نورة وقالت مزنه: حنا عائلة معروفين هنا طيب عندنا سمعتنا والحمد لله انها لحد الان زينه
فأنا كوني كبيرة العيله ما ابي كلام سيء يطلع عننا او بالادق اصير اسمع "ولد مزنه جايب معاه مره غريبه مع ولد" اكيد تفكير الناس بيروح بعيد وانا لي سنين محافظة على سمعتنا فما ابي في يوم وليلة ينقلب كل شي صح انو زيد اللي سواه معك صحيح لكن ان طلع هذا الكلام فبيضر زيد وبيضرني انا وانت كذلك
هزت رأسها نورة وقالت: المطلوب مني
مزنه: بتتزوجون
________________________
اول بارت بالروايه ان شفت تفاعل يستاهل اكمل بكمل واتمنى من الكل يتفاعل مع البارت ويعطيني رأيه
لا تنسون ذكر الله
اعتذر عن أي خطأ إملائي بدر مني