"අඩෝ ට්‍රිප් එක නම් සුපිරි හොඳේ..."
නිවාඩු පාඩුවේ දවස් ගත කරලා වැඩට ආපු දවසේ උදේ කට්ටියගේ ප්‍රධාන මාතෘකාව උනේ එයාලා ගිය විනෝද චාරිකාව...
"මුන් දෙන්නා නම් කලේ කාපු එකමයි බන්..."
පවිත්‍ර එක්ක හිටිය අනිත් සගයෝ දෙන්නව පෙන්නන ගමන් පවිත්‍ර එහෙම කියද්දි හැමෝම ඔලුව වන වන හිනා උනේ ඒක අනුමත කරන්න වගේ...
"කාලෙකට පස්සේ පවුලේ අය එක්ක නිදහසේ හිටියා බන්..."
මිස්ටර් සිල්වත් හරිම අවංක විදිහට සැනසීමෙන් ඒක කියද්දි මේ කතාවට කැබින් එකේ ඉදලා ඇහුම්කන් දෙන ශේනුකට එයා මුල් වෙලා මේ කරපු වැඩේ ගැන ගොඩක් සතුටු හිතුනා...
"මොකද සිහින සද්ද නැත්තේ..."
මොන තරම් පිටට පෙන්නන්න අකමැති උනත් මෙච්චර වෙලා අහන්න ඕනේ කියලා හිතාගෙන හිටිය කටහඬ ඇහුනේ නැති එක ගැන ශේනුකටත් තිබුනේ දුකක්... සඳමාලි මිස් නොදැනුවත්ව හරි එහෙම අහපු එක ගැන ශේනුකට සතුටු හිතුනා...
"ඌට ඔලුව කැක්කුම කියන්නේ..."
"පැනඩෝල් දෙකක්වත් බිව්වද..."
"ඔව් සඳමාලි මිස්... අඩු වෙලා යයි..."
පවිත්‍ර සඳමාලි මිස්ට හේතුව කියනකොට ශේනුක නළල රැලි කරගෙන බලන් හිටියේ සිහින කතා කරනකල්... ඒත් සිහිනගේ කටහඬේ තිබුන මලානික ගතිය ශේනුකව තවත් කනස්සල්ලට පත් කලා... ඒත් ශේනුකට මේ වෙලාවේ ඒකට කරන්න දෙයක් නෑ, හොරෙන් මේ කතාව අහගෙන ඉන්නවා කියලා පෙන්නන්නත් බෑ, ඊටත් වඩා සිහිනට එයා ගැන වද වෙන එක අඟවන්නත් බැරි නිසා ශේනුක සිහින කොයි වෙලේ හරි කැබින් එකට එනකල් ඉන්න හිතුවා...
"May I come in sir..."
"Come in..."
ශේනුක වරුවක් තිස්සේ බලාගෙන හිටිය ඒ වෙලාව උදා උනා... ඔලුව රිදෙන නිසා දවල් කෑමත් බාගෙට කාලා සිහින ශේනුකගේ කැබින් එකට ආවේ දෙයක් අහන්න...
"සර් අර ෆයිල් එක මම හවසට දුන්නම ඇතිද...? තව ටිකක් කරන්න තියනවා..."
සිහින වෙනදා වගේ ශේනුකගේ ඇස් දිහා බලාගෙන කතා කලේ නෑ... ඒක ශේනුකට නෝට් උන නිසා ශේනුක හිතුවේ සිහිනට අසනීප නිසා වෙන්න ඇති කියලා...
