🌾🌾🌾🌾🌾🌾🌾🌾
تروح واتحلَّف على البيبان اسدها
وانتهينا اكتبلك إبآخر رسالة
واگعد الليل إعله طوله انتظر ردها
واحضن السكته التمر منك متاهة
وابچي عنوانك بگدها
وارجع اتمشى اويه حلمك
وادري عينك غيري عدها
وادري حزني إمن المسافة
الما سألتك وين حدها
گلِت تخلص بالأغاني
گلْت اغشم گلبي واصفالك واتاني
گلِت هاي الگاع شأبعد من مطرها ؟
وواحد يكمل الثاني
گلِت هي احلامي هيج
گبل لا اوصلها اعاني
وعثر ظني وگلت سهلة
وكمّلِتها دروبك مفارگ وذلة
وتهت مني إبَّحر اغرگ لوم يلا اگدر أوصله
وين ضيّعت الصدگ والطيف والگبلك اندله ؟
وين بيَّت اسمي وانا أنصاح باچر
هاي من يمتى انا أمس ؟
وين عفت صياح روحي ودرت عني إليا همس ؟
صوتمن هذا اللفاك ورحت خايف ؟
رحت روحة كلمة من بين الشفايف
رحت مني تريدني ورديت عايف
ياهو گلك ماقريت بعينك النسيان لمن گتلي تذكر ؟
ياهو گلك مالمحتك من چنت وياي
ولغيري بضحك نظرات تشمر ؟
يل بعيد المادريت شجاي اشوفك صرت هسه
ياهو گلك باچر إمن تموت تنسى ؟!
💢💢💢
َ
