صهباء الطنايا

الجزء الثاني

الجزء الثاني
صهباء الطنايا ...

مصطفى:الله يساعدهم
فاتن : يساعدك الله عيوني ، متعشي لو اسويلك عشا؟؟
..متعشي ولله الحمد
..لعد اسويلك جاي
...تعالي اكعدي اريد احاجيج بموضوع

...رجعت كعدت وهي عيونها تلمع وكأنما شاكة بالموضوع الي راح يفاتحها بي اخوها مصطفى

...كول ابو حسين خير
..ماكو الا الخير شوفي اختي ..صاحبي واخوي محمد طلب ايدج للزواج
وابو جاسم اني اضمنه ونعم الاخلاق
ان وافقتي خير عالخير وان رفضتي اخليج بعيوني

...فاتن وهي مدنكة خجل .انت شتكول

..الگول گولج اختي ..ان رضيتي ما تلكين احسن من محمد

..زين لو فرضا ووافقت وين نوكعود
...هو حاليا بس راد الموافقة وبعدين يفاتح اهله بالموضوع
...الي تشوفه يخوي ..عافت وكامت بخجل

فاتن ومحمد معجبين ابعض تعلقو ابعضهم من النظرات ..محمد اكثر من مرة ينعزم لبيت مصطفى وشاف فاتن

فاتن مابيها شي مميز ويجذب لكن دمها حلو ..
طويله كلش.. ذو بشرة حنطية ..شعرها ملفلف
بيرمن طبيعي

اما محمد فكان رجل وسيم روحه فكاهية مرح
عيونه ملونه وعنده خصلات شيب براسه
هالشيب مو كبر وانما جنس وراثه من الصغر وعنده شيب ..شخصيته مسالمة ويحب الكل
يصير صديق مصطفي الروح بالروح

فاطمة ..وهي تلف عباتها وتكعد متهممة تشرب الجاي
اخذت استكانها ..اي يفتينه وتالي شقررتي خيتي

...والله يفطم ماادري
...ايباه ماتدري لهد من يدري
...متخوفة من اهله مو سمعتي مصطفى شجان يحجي عالابو شيخ جهاد ..ميرضون احد وعدهم نضرة الفوقية

..وعساهم لا رضو انتي متزوجته لو متزوجة عشيررته..وبعدين انتي شناقصج

...ماادري دماغي متشوش اريد اروح لزيارة
..اي اني هماتين اريد اروح

..لعد من تكسر الشمس نطلع شكلتي
..اي هاهي متفقين

عدت الايام وفاتن علمت اخوها بموافقتها على محمد ..لكن تبقي هناك فسحة خوف داخل قلبها
بسبب الصورة الي رسمتها عن ابو محمد الشيخ جهاد

محمد ..وهو كاعد عالسفرة الي يتوسطها الاب
..يابه اريد احجي وياك بموضوع
.. موضوع بخصوص شنو
...اني ..بصراحة يابه اني قررت اتزوج
..شيخ جهاد وهو مبتسم ..اي واخير اجانا الفرج
التفت لإيمينا ..سمعتي واخيرا
والله والله راح اسَويلك عرس لاخلي كل الناس تحجي بي ..اكو وحدة ابالك لو اختارلك

...لالا اني عزمت وقررت بعون الله
ووقع الاختيار عالوحدة بنت عالم وناس واصلهم معروف

...ماخاب العشم بيك بعد ترباة ايدي من بيت منو