Son qış

1.

Səhər gözlərini bir neçə metr aralıda işləyən qartəmizləyən maşının gurultulu səsi ilə açdı . Üzərində büzüşdüyü karton kağızdan başını qaldırıb küçəyə nəzər saldı . Dünən axşam saatlarından yağmağa başlayan qar bu gün  şəhəri ağappaq örtüyə bürümüşdü .
Dikəlib kartonun  üzərində oturdu , nimdaş paltosunun üstündəki qarı təmizlədikdən sonra  kürəyini yanındakı iri zibil qutusuna söykədi.  Yuxusuzluqdan şişmiş gözlərini qıyaraq qartopu oynayan uşaqları izləməyə başladı . Tək dərdləri yoldaşlarının  qar topasından yayınmaq olan bu körpələr ona necə də xoşbəxt görünürdülər ... Dərindən ah çəkdi . Bir zamanlar o  da bu sevinc hisslərini yaşamışdı . Amma o çağların üzərindən uzun illər ötmüşdü . Hətta həmin anları əsrlər əvvəl yaşamış olduğu şübhəsinə  qapıldı  Ömər . Bir zamanlar qarın yağmasına  sevinən  uşaq indi qışın  bitməsini , qarın tezliklə əriməsini arzulayan bir adama çevrilmişdi . Cünki bu qar onun uşaqlıgında gördüyü kimi məsum  deyildi ...Artıq bu qış möcüzəsi onun gecələrini üşüyərək yuxusuz  keçirməsinə səbəb olurdu .
" Ola bilsin ki, qar mənim kimi  küçədə gecələyən bütün zavallıların ən böyük düşmənidir ."düşündü .
Ayağa qalxmaga çalışdıqda bütün bədəninin uyuşmuş olduğunun fərqinə vardı . Əlləriylə belini tutub bir-iki addım atdı .
Yaxınlıqda məhəllənin iki gənci dayanıb söhbət etməkdə idi . Ömərin qəribə yerişini görən gənclərdən saqqalı olanı :
-Nə olub , Ömər ? Hamilə filan deyilsənki ?- soruşub gülməyə başladı . Digər oğlan  da yoldaşına qoşulub  güləndə Ömər bu axmaq zarafatı eşitməmiş kimi davranıb  gənclərdən uzaqlaşdı .
Həmin oğlanlar ,demək olar ki, onunla  yaşıd idilər . Hansısa universitetin hansısa fakultəsində oxuyur , "boş" vaxtlarında da Ömərə sataşmaqla əylənirdilər .
Yavaş addımlarla  hər səhər bir neçə dəqiqə  isinmək   üçün daxil olduğu  marketə yaxınlaşdı . Satıcı çox mehriban  qadındı və əksər hallarda  Öməri isti  çaya qonaq edirdi .
 Tozlu papağını  çıxararaq - Sabahın xeyir , Nuriyyə xala .- deyib öskürməyə başladı .
Qadın onu görüb gülümsədi .
- Xoş gördük , oğlum . Xəstələnmisən ? Otur o stulda . Nuriyyə xalan çay və  limonla  səni sağaldacaq .
Əyləşib qadının müştərisini yola salmasını  gözləməyə başladı . Bu zaman gözləri magazadakı şirniyyatlara sataşdı . İki gün idi ki , dilinə bir tikə də dəymirdi . Baxışlarını məcburən şirniyyatlardan yayındırıb satıcıya baxdıqda  bayaqkı  müştərinin  getmiş, yerinə başqa bir alıcının  gəlmiş olduğunu anladı .
Artıq on dəqiqə idi ki ,   marketə daxil olan adamların   onun cırıq , köhnə paltarları üzərindəki narahat baxışlarından sıxılaraq  Nuriyyənin vəd etdiyi çayı  gözləyirdi .  Amma qadının müştərilərin əlindən vaxt tapmayacağını başa düşüb ayağa qalxdı . Burada olmağının insanların əhvalına pis təsir etdiyini anlayaraq qapıya doğru addımladı .