Taking Chances (Published Under Flutter Fic)

Kabanata 2

Kabanata 2
Personally

Nagpupuyos ang loob kong nakauwi sa bahay. Naiinis ako dahil pumayag ako sa utos ni boss. I know it's my duty na sundin siya pero sana ay hindi na lang ako tumuloy.

Unang-una, dahil sa nalamang ang Salcedo na iyon pala ang kikitain ko. Ikalawa, ang pagtawag niya sa aking call girl. Ang panghuli at ang pinakanakakainis...ang paghalik at pambabastos niya sa akin.

That manwhore!

Bumuntonghininga muna ako at inayos ang sarili ko bago pumasok sa bahay. Tahimik na naman ito gaya ng kinasanayan ko kapag nauwi. Inilapag ko ang bag at envelope kong hawak bago pumunta sa kusina at uminom ng tubig para mahimasmasan. Kakausapin ko na lang si boss para iba na lang ang magbibigay. Hindi ko kayang makitang muli ang bastos na iyon.

"Tao po? Ally, nand'yan ka na ba?" Mabilis kong inilagay sa lababo ang basong pinag-gamitan ko at inayos ang nahawi kong buhok.

"Nang! Nandito po!" sagot ko. Lumabas ako mula sa kusina at nakita ko si Nang Elsa na nasa pintuan kasama si Chance.

"Mabuti naman at nandito ka na. Kanina ka pa hinahanap ng batang ito..." Ngumiti ako sa sinabi niya. Nilapitan ko si Chance at kinarga.

"Salamat, Nang, ah? Hayaan n'yo, maghahanap na ako ng magbabantay sa kanya para hindi ko na kayo maabala." Ngumiti ako. Tumango naman ito at gumanti rin ng ngiti.

"Naku, walang problema. Ako'y natutuwa rin sa batang 'yan. Hindi naman siya makulit at nakawawala siya ng pagod, sa totoo lang."

"Salamat ulit, Nang." Tumango siyang muli at nagpaalam palabas kaya hinatid ko siya habang karga si Chance.

"Ma, hungry na 'ko..." Napangisi ako sa tinuran niya at hinagkan ang namumula niyang pisngi.

"Good boy ka ba kina Nang Elsa kanina?" malambing kong tanong bago hinaplos ang buhok niya.

"Opo naman, Ma! Sabi po nila bait ako, eh," bibo niyang sabi habang papasok kami sa loob. Hinalikan ko siya sa pisngi saka ko siya pinaupo sa sofa para mabuksan ko ang TV.

Tahimik lang siyang nanood ng cartoon. Dumiretso na muna ako sa kusina para kunin ang binili kong pagkain.

"Yehey! Jollibee!" Tumalon siya at natawa naman ako nang tumakbo siya patungo sa akin at niyakap ang mga binti ko.

"Kiss!" Umupo ako saglit at inilapit ang pisngi ko sa kanya na agad niyang iniabot at mabilis na hinalikan. "Love you, Mama!" masayang sabi niya at dumiretso sa mesa sa tapat ng maliit na TV.

Nangingiting nakatingin ako sa kanya na bibong-bibo at makalat na kumakain. Inalok niya pa ako ng hawak niyang manok pero nginitian ko lang siya at inilingan.

"No, kainin mo na lang. Prize mo 'yan kasi mabait ka." Lumapit ako at pinunasan ang gilid ng labi niya.

"'Pag po ba bait ako, may chicken-manok ulit?" Tumango ako bilang sagot kaya hinalik-halikan niya ang pisngi ko.

Nakasandal ako sa sofa habang tinitingnan siya na pinapapak ang spaghetti habang nanonood ng Spongebob sa TV. Lumulubog ang gilid ng labi niya dahil sa dimple at ngumingiti rin ang mga mata niya habang tumatawa dahil kay Patrick na nabagsakan ng bahay nitong bato.

"Shower ka na, baby." Binitiwan ni Chance ang tinidor na hawak at saka mabilis na lumapit sa akin. Kinarga ko siya at dinala sa banyo para hilamusan at linisan.

"Ako na toothbrush! Big boy na 'ko!" Natawa ako nang sabihin niya iyon kaya agad kong ibinigay sa kanya ang toothbrush niya. Nakatingin siya sa salamin habang pilit na nag-to-toothbrush. Iniwan ko siya saglit para kumuha ng damit niya.