Kape

Kanina tinanong ng kaibigan ko ano daw mas gusto namin: uminom ng kape sa umaga o sa gabi?

 Narinig ko yon at biglang bumalik ang lahat ng alaala sa aking isipan. Nung gabi na 'yon ang isa sa pinakamasayang gabi sa buhay ko. Hinding hindi ko makakalimutan kung paano ko nakita ang maganda niyang ngiti sa ilalim ng sinag ng buwan, kung paano kuminang ang mahaba niyang buhok sa dilim, kung paano kumislap ang mga mata niyang tila ngumingiti rin. 

Nung gabi na 'yon ay ang gabi na hindi ako nakatulog dahil hindi ko siya maalis sa aking isipan. Nung gabi na 'yon ay ang gabi na ako'y hindi mapakali dahil hindi ko lubos na maintindihan kung bakit hindi ko magawang umamin sakanya na gusto ko siya. Nung gabi na 'yon ay ang gabi na narinig ko na ang pagsambit niya sa aking pangalan. 

Nakita ko siya nung umaga kasama ang mga kaibigan niya. Naglalakad sila sa pasilyo ng aming eskwelahan at nagtatawanan. Nang marinig ko ang kanyang tawa ay parang nawala lahat ng tao sa aking paligid. Wala akong ibang narinig at nakita kundi siya. Siya lang. 

Ang namumukod tanging babae na ginusto ko ng tunay. Ang babae na nagpapaligaya sa akin sa araw-araw. Ang babae na kumukumpleto sa akin. 

Lumipas ang oras at ang paglubog ng araw ay dumating. 

Naglalakad ako pauwi nang nakita ko siya sa di kalayuan, naglalakad siyang mag-isa. Gusto ko sana siyang tawagin ngunit baka mailang lang ito dahil hindi namin kami ganoon kalapit sa isa't-isa kaya't hinintay ko na lamang siyang makalayo bago ako tumuloy maglakad. 

Umakyat ako sa aming balkonahe at doon nagkape nang makita ko siya sa kanilang bahay. Kasama niya ang kaniyang nakababatang kapatid habang nagkukwentuhan. 

Humigop ako ng kape at tinitigan siya. Pinagmasdan ko kung paano siya ngumiti, tumawa at pinagmasdan ang kaniyang magandang buhok mula sa di kalayuan. 

Napagdesisyunan ko na na ngayong gabi, magbabago ang buhay naming dalawa. 

Hinintay kong umalis ang kaniyang kapatid bago ko sinimulan ang aking plano. Hating gabi na nang maubos na ang taong nasa labas pa kaya't bumaba na ako at lumabas ng bahay.

Mahinahon kong binuksan ang pintuan namin at naglakad patungo sa katabing bakanteng lote. Iginala ko ang aking paningin para masiguradong walang makakakita sa aking gagawin. 

Nagpatuloy ako sa paglakad at narinig kong muli ang tawa niya na tila nagmula sa isang anghel. Nakita ko na ang kaniyang katawan na parang iginuhit ng isang magaling na pintor. 

Dahan dahan akong lumapit at niyakap siya ng mahigpit na mahigpit at binusalan ang kaniyang bibig. Pinakiramdaman ko ang aking paligid at matapos ay binuhat siya ng patiwarik at nagtungo pabalik sa loob ng aking bahay.

 Itinali ko siya sa aking kama ngunit naging mahirap ito dahil siya'y nagpupumilit na makatakas at lumalaban pero ako'y nagtagumpay at doon nagsimula ang aking maitim na balak. 

-Wakas-