شخبطه قلم

ماما

فتحت عيني ع الدنيا لقيتك شيلاني
بدموع الفرحه و البسمه الحلوة مستقبلاني
يلي قضيتي تسع شهور بتتوجعي
و كلو يهون مدام مستنياني
ياللي يا ما سهرتي جمبي الليالي
ياللي ياما من غير ما اتكلم كنتي سمعاني
ياللي ضحيتي بحاجات كتيييير عشاني
ياللي رغم قسوتي عليكي احيانا
كنتي بتحني و بأبتسامتك الحلوة مسمحاني
ياللي عانيتي عشاني سنين و لسه بتعاني
ياللي ضحيتي بوجودك وسط اهلك
و برجلك رحتي للغربه .. رحتي لعذاب كتماه
بس مع ذالك بتقولي كلو يهون عشان مستقبل عيالي
يا حب مولود جواكي من قبل ما تشوفيني
يا عين يا ما دمعت سيول عشان ضربتيني
ضربتيني و قلبك بيتقطع
خايفه اضيع ف الغلط و خايفه توجعيني
يا جفون سهرت ليالي تداوي ف مرضي
و بأحلى حواديت كنتي بتحكي و تسمعيني
ياللي علمتيني احب الحياة
احب بلدي .. احب اهلي .. احب مدرستي
و متعرفيش ان حبي ليكي انتي هو اللي معيشني
ياللي مهما زعلتك مكنتش بهون
ساعه و التانيه و تصالحيني على طول
طبعا البكريه بقى
اول فرحه و اول هنا
انا اللي قولتي عليا ف سبوعي
الحب ابتدا بنور العيون ندى
انا اللي حبي ليكي مينتهيش
دانتي ست الكل و بطيبتك انتي ملاقيش
ياللي اسمك هبه و انتي هبه من ربنا ليا
جيتي عشان تقويني و ترفعيني
للاعلى دايما بتشجعيني
ياللي الفرحه بتكون طالعه من عينك لما تكوني
قاعدة وسط صحابك و بتقولي بنتي وتمدحيني
ياللي وقفت قدامي الحروف وانا بكتب عنك
هقول ايه ولا اوصف ايه
مهما حاولت اوصف مش هوفيكي حقك
عارفه ليه لاني حته منك
انتي المثل الاعلى
انتي القلب اللي بيشجعنا
انتي ام مثاليه
يا ماما
يا احلى ابتسامه
يا حضن جميل ملوش مثيل
يا قلب كبير بيساع كتير
يا ملايكه على سطح ارضي
حياتي معاكي وردي
بقولك قدام الكل و من غير كسوف
لو غلط فيوم ف انا اسفه
بس متمناعيش عني المصروف
بتضحكي و بتقولي مصلحه
لا بقى انا هنا مصححه
انا عايزة المصروف عشان اجبلك اجمل هديه
اهديهالك ف ليله زي ديا
يا هديه من ربنا اصلا ليا
ربنا يخليكي و يبارك فيكي يا عنيا
بحبك
ندى البكريه 😜
......
قصيدة يوم الام .. هي فيها تفاصيل شويه عن حياتي .. بس عايزة رأيكو انا اول مرة اكتب مدح .. لو لاحظتو دايما بكتب عن مشاكل