صاحبي في مقام ابوي

البارت الثاني عشر

بدر بعصبية = وش تقوله انت

خالد بألم = مالك دخل ,,, اتركني

بدر بعصبية = انا مالي دخل

وضرب وجه خالد بقوة عدة مرات بمرفقه

علي = بدر اصبر شوي خلنا لين ننزل ,,, السيارات الحين تشوفنا

فيه شي بعد غير هذا حرام عليكم

بعد كلمة علي تركه بدر واعتدل خالد بجلسته ولاحظت الدم يطلع من فمه او خشمه ماميزت المهم نص وجهه ينزف دم ,,, واحتمال خشمه

رفع خالد فنيلته يمسح الدم عن وجهه وبعدها احنى راسه لحد رجليه يغطي وجهه بيأس

فجأة شميت ريحة سيجارة ,,, تلفتت ولقيته عبد العزيز يدخن ,,, التفتت بخوف لخالد

اللي رفع راسه لعبد العزيز ,,, وشفت بوجهه الخوف وهو يشوف عبد العزيز يدخن

راكان باستهزاء = خلودي لك اسبوع مارحت مدرستك ماقلتلنا مغيرها والا وشلون.؟

التفت خالد له وسكت

علي = هههههههههههههه خايف خايف ياراكان قلتلك لا ترسله بس ماطعتني

رفع بدر يده وضرب فخذ خالد اليسرى بقوة

بدر بعصبية = اذا سألناك جاااوب

مسك خالد رجله بألم وحاول يبعدها عن بدر وشره

راكان = ليه ماصرت تروح .؟ ( ورفع يده وعطى خالد كف طير وجهه ناحيتي ) لا تسفهني وانا أسألك

علي وهو يتلفت = راكان عطه مناديل خله يمسح الدم اللي بوجهه ,,, ياجماعة السيارات تشوفنا ,,, اخاف يشكون ,, اصبروا لين ننزل

عبد العزيز = الدرايش اللي ورا مظلله ماحد منتبه ,, لا تخاف

علي = ايه بس شف راعي السيارة اللي بجنبنا يشوفنا

تلفت راكان شوي

راكان = صادق علي ,,, خلاص بدر اصبر شوي ( واخذ كرتون المنديل ورماه بوجهه خالد ) خذ امسح خشتك

تلفت خالد للسيارات وبعدها هجم على بدر عشان يلفت النظر لسيارتنا

علي بخوف = ابعده بدر عنك بيفضحنا

شفت راكان يمد جسمه بالكامل لخالد ومسك شعره وجره بعنف خلا خالد يميل على ورا وصار وجهه بين المرتبتين الاماميتين واخذ راكان يعطيه من هالبكوس بوجهه وصدره وبدر مستلم رجله ,,, شكله حالف يكسرها

شفت علي يرفع قبضة يده لكن مسكته باخر لحظه ومنعته قبل يضرب خالد

انا = لا تكفى

لكن من وين ادافع عن خالد وهم اربعه وحنا اثنين ,,, اذا منعت هذا عنده البقية

مسك علي ذراعي بقوة

علي بعصبية = انت لا تدخل ودورك جاي ,, اصبر بس خلنا ننزل ( والتفت لراكان وبدر اللي الى الحين وهم طاحين بخالد ضرب ) بس انت واياه

راكان وانفاسه سريعة = بدر بس بس ( وتلفت للسيارات شوي وبعدها مسك راس خالد ودفعه عشان يرجع لمكانه )

مسكه بدر وجلسه بمكانه غصب عنه

اخذ خالد مكانه وهو يئن ويتألم ,,,

واخيرا سكتوا عنه

التفتت لخالد بقلة حيلة ,,, وشفت الدم يغطي فمه ومغمض عيونه بقوة ويتألم من رجله اللي ماسكها

اخذت كرتون المنديل اللي طاح تحت رجولي ومديته على خالد ,,,

التفت خالد لي بصمت وصار يطالعني وانا اطالعه وانا مستغرب ليش يطالعني كذا واتمنى اعرف وش يفكر فيه الحين

وبعدها نزّل نظره على كرتون المنديل اللي معي ودفع يدي بعيد

خالد = منهم هم مابيه

ورفع فنيلته يمسح وجهه

بدر بعصبية = وهو مايبيك ( وضرب فخذه )

نقز خالد من الضربة

خالد بألم = آآآآآآه

واضح من النقزة ان فخذه صارت ماتتحمل ضرب اكثر ,,, حسبي الله عليك يابدر حسبي الله عليك

علي بعصبية = بدر وش اقول انا .؟ ياخي اصبر خلاص قربنا نوصل

انتبهت اننا صرنا نبتعد عن المباني السكنية اكثر لين وصلنا لاخر محطة في الديرة على طريق الرياض ,, محطة ماوراها الا صحراء ,,, ووقفت السيارة ورا المحطة وصار يفصلنا عن المحطة جدارها الخلفي