أنا اسمي هاجر ، عمري 20 سنة ، ربي كارمني بالزين وهذا بشهادة لي يعرفوني ، ملامحي طفولية ، متحجبة والحمد لله ، حياتي رسمتها وتحكمت فيها العادات و التقاليد...
انا من عائلة ميسورة الحال ، وحيدة بابا ويما .. كي نقولكم وحيدة والديا تتخايلوني مفششة .. بصح أنا العكس ، كان بابا صعيب و واعر ويما من النوع لي مايفتحش العين .
عشت 8 سنين الاولى نتاعي فالريف كيما نقولو فالبلاد ..
كنا نسكنوا مع دار عمي " عمي عندو 2 ولاد وطفلة "
وليدو لكبير اسحاق كبير عليا ب 10 سنين ... وخالد أكبر مني ب 8 سنين ... وبنتو أسماء كبيرة عليا ب 5 سنين .
عشت مع ولاد عمي كي لخاوة يحبوني بالأخص اسحاق كان مفششني .. وأسماء كانت كيما ختي ، ديما مع بعض مالصباح لليل.
وحد النهار زمان الصيف ، السخانة تطيح بغل وترعف جمل ههه ... وأنا جاني سيدي نخرج نلعب برا .. زرطيت لماما وخرجت وحدي هه لخاطر أسماء كانت فدار جدها ، أنا قاعدة نلعب وهو جاليا خالد " هذاك الوقت كان عندي 8 سنين و هو 15 سنة " .
قالي أرواحي معايا نشروا بعثتني يماك نشريلها ، وأنا راني مشغول .. أرواحي معايا نشريلك وانتي طلعيلها القضيان .
رحت معاه ، مشينا فطريق خلاف لي نعرفوا ، قتلوا خالد وين رايحين هذا مشي طريق الحانوت ، قاي نفوت على صاحبي نستحقوا ومبعد نروحوا نشروا .. وأنا بسذاجتي وبرائتي آمنتوا .. وياريت مارحتش معاه ...
