الحــلقة الأولــى من " #بنت_الأكابر "
دخلت "فريدة" اوضتها وهى محروق دمها ومتعصبة جداً .. سندت ضهرها على الحيطة وقاعدت على الارض وماسكة جراب الموبايل قاعدة تكسرر فية من نرفزتها ..
دخلت عليها اختها بالصدفة "فرح"
كان باين عليها انها مضايقة
فرح : اية يا فريدة مالك !!
فريدة : ..........
فرح : بتعيطي لية ؟؟ اهدى طيب و احكيلي حصل اية !
أخدتها في حضنها وحاولت تهديها شوية لحد ما اتكلمت وقالتلها اللى حصل ..........
فريدة : شوفت شريف النهاردة الصبح ماشي مع واحدة وضحك و هزار و عااايش حياتة وهو مبيردش عليا من امبارح !
فرح : يادى النيلة على شريف .. والله ما عارفة انتى ازاى لسة باقية علية بعد اللى هو عملة معاكى قبل كدة !
فريدة : بتنيل على عين اهلى وبحبة !
فرح : طيب احكي حصل اية ؟؟ قولتيلة انك شوفتية ؟
فريدة : قولتلة طبعاً بس بعد ما طلع عيني عشان يرد عليا .. طبعاً اتعصب عليا و كدب عليا و قالى محصلش و بعد كدة قالى دى زميلتى و اية اللى فيها و قلبت بخناقة وانا اللى اتهزقت في الاخر
فرح : و هى طبعاً مش زميلتة دى واحدة شاقطها
فريدة : اساسي يعنى ! - المشكلة انة بيقولى كلام زى الزفت مبقدرش استحملة
فرح : وانتى لية مش بتوقفية عند حدة !!
فريدة : بوقفة طبعاً مببينش قدامة انى ضعيفة !
تــعريف الشخـصيات :
"فريدة" و "فرح" اتنين توأم من عيلة كبيرة أوى .. باباهم مهندس بترول بيعتبروا باباهم هو ضهر العيلة لأنة احسن واحد فيهم .. مامتهم دكتورة عيون برغم شغلها اللى واخد وقتها بس قريبة منهم و مصاحباهم جداً
- "فريدة" - بتتميز فريدة بجمالها بين صحابها و عيليتها .. طويلة ، وجسمها مظبوط ميتقالش انها تخينة ولا انها رفيعة .. عينيها عسلي ، شعرها بني فاتح ، بيضا وملامحها صغيرة .. شخصيتها قوية جداً .. غير فرح اختها تماماً فيها شوية غرور و تكبر والسبب في دة مقام عيليتها وجمالها .. و بتعتبر ان عيليتها هى سندها في الحياه و تقدر تاخد حقها من اتخن تخين في البلد .. واخدة من شخصية مامتها شوية .. مبيهمهاش اى حد .. قلبها جامد جداً وكلامها زى الدبش ممكن تجرح اى حد بكلامها من غير ما تقصد .. رغم انها قوية و تنكة بس أجدع واحدة تقف جمب صحابها وتحللهم مشاكلهم .. في كلية فنون جميلة مهوووسة بالديكور والالوان و الموضة .. عندها اهتمام مُريب بشكلها و لبسها ..
- " فرح " هى تؤام فريدة شبة بعض الى حداً ما ، انما الملامح مختلفة .. شخصيتها عكس فريده تماماً هاديه جداً ومابتكسفش حد بكلامها ومش مستقويه بعيلتها وبتحب تعمل كل حاجه بمجهودها مالهاش ف حوار الولاد اوى بس بنت طبيعيه زى كل البنات بتعجب بحد معين .. مثلها الاعلى ف الحياه باباها (المهندس علاء الصاوى) دخلت كلية الهندسة عشان تبقي زي باباها .. رغم انها أجمل في الشكل من فريدة بس مبتهتمش اوى بموضوع الشكل و الموضة .. بتهتم اكتر بدراستها .. بتحب القراية قد عينيها .. معروفين بين صحابهم انهم التوأم المختلف "فرح الطيبة و فريدة القوية" .. فرح مبيهمهاش الشكل العام أهم حاجة في اللى هتحبة شخصيتة ويكون راجل مش مهم شكلة ومش مهم هو ابن مين .. (عكس فريدة تماماً).
