نزلته من الربطه اللى انا كنت ربطهاله وقعدت اتفرج على التلفزيون ..
لقيته بيقولى انا عاوز اخرج .
قولتله تخرج فين يابنى الساعه ديه ؟ وبعدين انا مش همشى معاك فى الشارع بشكلك ده !
قالى ونبى يا خيرى عايز العب فى الملاهى شويه انا بقالى كتير محبوس فى الفيلا ومبخرجش خالص .
قولتله جرى ايه يلا يا بهلول هو انا مقعد ابن اختى معايا ! ملاهى ايه اللى عاوز تلعب فيها ؟!
قالى ونبى يا خيرى متخفش انا هتشيك والبس كويس !
قولتله طب ووشك ؟
قالى لا ده مكياج لزوم الشغل بس انا شكلى احلى من كده !
قولتله والله شكلك بنى ادم وبتشتغلنى .. بس خلى فى بالك لو طلعت بنى ادم مش جنى اقسم بالله لهحرقك !
قالى ياعم جنى والله استنى اطلعلك البطاقه ..
طلع من جيبه حاجه شبه البطاقه كده بس ملونه ..
قولتله شيل يابنى البتاعه دى فى جيبك وسيبك من شغل العيال الصغيره ده وخش نام !
دخل الاوضه ..
دخلت الاوضه بعديها بشويه لقيته نايم وبيشخر ..
روحت مزعق بصوت عالى يا بهلوووول !
قومته من النوم مفزوع ولقيته بيقولى جرا ايه يا ابن المجنونه انت ! هو انا معرفش انام فى البيت ده ابدا !
قولتله عيد كده الكلام ده تانى .
قالى انا اسف والله انت مامتك مش مجنونه دى مامتك ديه ست العاقلين !
مسكته من قفاه ونزلت فيه ضرب ..
وهو يقولى والله ماكنت اقصد ياعم والله ما اقصد ده كلام انفعالى بس !
بعد ما خلصت ضرب فيه سبته وقومت انام ..
صحيت مفزوع على صوته وهو بيهز فيا ويقولى يا خيررررى !
ولقيته سابنى وقعد يتنطط ويقولى عملتها فيك زى ما انت عملتها فيا ! وكان فرحان اوى !
قومت غسلت وشى ودخلت لبست وجيت خارج من باب الفيلا لقيته جاى ورايا ولابس قميص اسود وبنطلون اسود ومدارى شعره الاحمر ب كاب اسود وماسح المكياج عن وشه والصراحه كان شكله شيك اوى يمكن اشيك منى ..
قولتله وانت ياعم بهلول متشيك كده ورايح على فين ان شاء الله ؟
قالى جاى معاك الشركه طبعا .
قولتله شركه ايه اللى انت هتجيها ؟!
قالى ما هو انا عينت نفسى عندك فى الشركه !
قولتله انت فى حد فى عيلتكوا متخلف يلا ؟ عينت نفسك فى الشركه ازاى يعنى ؟!
قالى ما اصل انا روحت اول امبارح قدمت ورقى فى الشركه واتعينت الحمدلله .
قولتله طيب مش انت اتعينت فى الشركه بتاعتى صح ؟!
قالى اه .
قولتله طب اعتبر نفسك مرفوض من دلوقتى يا كلب !
وسيلته وخرجت ورزعت الباب فى وشه وروحت الشركه ..
مش عارف انا هفضل فى الهبل ده لحد أمتى ؟!
يتبع ....................
