ولاني عقيم

جزء 7

الجزء السادس عشر
تمنيت نموت الف مرة على اني نسمع منو هاد الهضرة ياريتني ماتولدت كاع ولا اني نتهان هاد الاهانة حسيت راسي حشرة ما عندها قيمة فالدنيا كرهت راسي مليون مرة احتقرت راسي اكثر ما احتقرني هو انا مالحت راسي على حد هما اللي طلبوني للزواج واش تزوجت باش نتهان واش تولد يا ربي باش نتداس تحت الاقدام فهاد الدنيا علاش حقدت على راسي اكثر من اي واحد تمنيت تنشق الارض ولا اني نسمع هاد الكلام منو مشاعري تخلطو عليا فديك اللحظة مشاعر مختلفة ولكن كلها سلبية كلها خايبة عشت اسوء حالة ممكن يعيشها الانسان على الاطلاق تغرغرو عيني بالدموع وهو بحال الى انا مكيناش كمل شغالو وبدا يصفر ويغني ويبدل حوايجو انا بدون شعور نضت وخرجت برا بديك الحالة تمشيت رجليا كنحس ماهازينيش دخلت للدوش ديال واحد البيت شعلت الما وبديت نبكي بحرقة قلبي تقطع مليون مرة فديك اللحظة بكيت وبكيت وبكيت بحرقة كبيرة لاول مرة فكرت نقتل راسي ونتهنى من هاد العداب بقيت كنفكر وانا مقهورة ..انا مستحيل نبقا معاه بعد هادشي ..شنو غندير واش غنطلق عاود شنو غيقولو الناس..غيسبو فيا العيب من جديد ديك الساعة غنأكد ليهم باللي انا اللي خايبة بالصح با ربي اش درت لهادشي كلو ..واش نقولها لعائيلتو وهما يتفاهمو معاه ..ويلا زاد شد نعايا الضد ..معندي حل من غير اني نصبر على قدري مان يصحابلي اني ممكن نعيش ولكن انا مقدر عليا الحزن طول حياتي الفرحة ماشي من حقي الحل الوحيد اللي عندي هو اني نتفاداه ونحني راسي باش نعيش على الاقل واخا مرانيش فرحانة نشرف عائيلتي باللي بنتهم تزوجات واحد لاباس عليه ومن عائلة معروفة ومهندس على الاقل نعيش مع ناس نقيين بحال عائلته يا ربي معندي حل ...مسحت دموعي وخرجت من الدوش مشيت للبيت ملقيتوش اكيد خرج عاود تاني بدلت حوايجي وقررت نعيش حياتي كأن شيئا لم يحدث نزلت تمشيت شوية فالجردة وتفكرت ماما قلت نصونيلها نهضر معاها شوية صونيتليها وبدات متسولني كيفاش كيعاملك راجلك واش نتي فرحانة على بالها لقيت شنو يعوضني ولكن مبينت ليها والو قلتليها باللي انا اسعد وحدة فالدنيا وباللي رشيد ممخليني محتاجة والو وباللي كنا ناويبن نسافرو ندوزو شهر العسل لولا ان رشيد عنده الخدمة بزاف ميقدرش يخليها فرحاتلي بزاف ولكن قلبي كان كيغلي من الداخل حسيت بالنار شاعلة فيه ..دوزت نهاري بوحدي وانا مهمومة مكليت والو مللي مشيت ننعس ماجانيش النعاس بقيت كنتقلب غا بوحدي فالفراش حتى كنسمع طوموبيلة رشيدكانت الساعة ثلاثة دالليل درت راسي ناعسة سمعتو داخل كيغني بالجهد شوية سمعت شي حاجة تهرسات كانت واحد الفازة طلع عندي للبيت شعل الضو وبدا كيغني بالجهد شفت فيه كان سكران الله يا ربي اش غندير معاه شديته وهو يطيح علي

الجزء السابع عشر
الجسم ديالو كان ثقيل بزاف بزاز باش حيدتو مني البيت ولا عامر ريحة الشراب حيدتلو جاكيت ديالو والصباط وغطيتو خليتو ناعس ومشيت نعيت فبيت اخور مزيان هاكا كملت السيد محاملنيش وسكايري من الفوق عندي زعر اي وحدة تتمناها والغريب فالامر انتا مللي كنشوفو شي وحدة هاكا الفيلا ومزوجة بواحد بوكوص كنحسدوها على الحياة اللي عايشاها وكنقولو راه الحياة عطاتها كلشي ولكن حتى واحد معارف لاخور فاش عايش وباش عايش ..الصباح فقت ومشيت طليت عليه لقيتو مازال ناعس مشيت عندو شفت فيه كان داير بحال شي ملاك متقوليش هادا هو داك المتكبر اللي مشايف حد ..دوزت على شعرو بحنان نزلت لوجه وانا كنتأمل فيه وفتفاصيله لحية خفيفة ووجه ابيض ملائكي وانا فعز التأمل شد لي يدي بجهد وحل عينيه انا تخلعت وحيدلي يدي من على وجهه وناض قالي التزمي حدودك معايا ومتحاوليش تلعبي معايا انا نضت بالزربة وخرجت من البيت با ربي اش هادشي درت كيفاش سمحت لراسي نقرب منو بعد داكشي اللي سمعت منو البارح وعطيت ليه فرصة اليوما عود تاني يقولي نفس الهضرة انا ماشي رخيصة حتى هاد الدرجة نلوح راسي على شي واحد كرهت كرهت وندمت اش داني ليه ..نزلت نفطر جلست على المائدة والمدبرة كتوجد وكتحط فالفطور وكتهضر وانا بالي ماراهش معاها كاع ..كانت فرحانة بيا على ماكاقول شوية وهو ينزل سيدهم رشيد لابس لباس رسمي جا معاه كيبينو بوكوص بزاف سرحت فيه وانا نفيق لا لا مخاصنيش نشوف فيه باش ميقوليش شي هضرة عاود تاني اللي تجرحني حنيت راسي وشفت قدامي وبديت كناكل هو جا جلس يفطر بعدما صبح على المدبرة وبدا ياكل ..حتى فالماكلة ديالو مثير للانتباه مغوبش وسرحان وكياكل بالميزان وبكل اناقة وقياس وثبات كمل الفطور ديالو وناض بدون اي كلمة وانا تابعاه بعينيا حتى خرج وبدا بحر التساؤلات اكيد كيشوفو فيه الملايين ديال البنات يوميا اكيد اي وحدة كتتمنى يديها فيها وغا الهاي كيفاش بغيت انا يديها فيا وانا مافيا ميتشاف سرقني الفضول نسول على زوجتو الاولى وانا نسول الدادا كيفاش كانت واش زوينة وكان جوابها: ياه ابنتي هي حق مولانا كانت زوينة وكانت بنت صاحب السي المختاري رشيد كان كيبغيها بزاف ولوكان جبر لبن الطير يجيبولها ولكن هي مكان عاجبها حتى حاجة وكانت ديما مرضاه ومعصباه ونهار اكتشف باللي صعيب باش يولد وخاصو علاج طويل شبعاتو اهانات قررات تطلق منو اما هو فاقترح عليها يكتب ليها كل ما كيملك باش تبقى معاه وانها تصبر معاه حتى يتعالج ولكن هي رفضات والزوينة كاع هي انه حصلها كتخونو فواحد الاوطيل مع واحد من اصدقاءه مع ذلك مشا لعندها وقاليها باللي هو مستعد ينسى كلشي ويبدا معاها من جديد ولكن هي تنفخات ورفضات وطلبات الطلاق وفعلا تطلقت منو وهو مسكين دوز ايام كحلة من بعدها بقا كيصونيلها وكيمشي يرغبهااما هي غا كملت العدة ديالها تزوجات ديك الساعة هو يجهل كان كيضل فالبارات كيسكر وكيكمي ومكيهضر مع تا واحد وخدمتو هملها دوز مرحلة صعيبة بزاف ولكن بعدما لقاتك ليه منال قرر حتى هو يبدا حياتو وينسى الماضي ..