بيت شعر

كلتلهم

دري شبلل ترابي وصحيت اسمر..
ومدري شكبر يم الناس.. ومن عدهه ونويت ازغر..
ومن عدهه وعرفت اغرگ اذا صار الدغش معبر..
وعرفت الغيم بعيوني نذر للحر!
وعرفت الدمع من يضوي چثير وجوه تتكسر!!
وچثير الباگو ارسومك وذاك انته
شما طفّو معانيّك ..خذتني امحاسنك يسمر..
شما گالو ذبل حزنه.. صحت للناس هلهولة صبح خظّر..
شماگالو تذكرته……….
گالو زاعل عيونك وگلتلهم امس شفته
امس شفته ربيع وباردة النجمة بشواطيه..
شمال وجدحة السنبل غناويّه..
ظلام ولمعة عيوني تراچيه..
گالو مامش مگيظين؟ گلتلهم كبر فيّه..
گالو لايگ لحزنك؟
وگلتلهم قريت الثورة بعيونه ملامحهه عراقية،،
وقريت الناس البلونه سمر… تشبه نعاويّه..
سمر.. تشبه حچي الگمره على الحيطان،
سمر.. تشبه نده الغبشة على الگيعان،
تشبه كَسرة عيوني على البيبان!
غريب اركاد عمره. وشربته النهران..
گالو يسهر لجيتك؟ وگلتلهم سهرلي هوااي..
غرفته اعله النهر تضوي. نسه اعيونه اعله شباچه ونسه الشباچ فوگ الماي!!
بلچي معيبر من الليل حدَّر للضوه شرّاي،،
بلچي تعرّس ارسومه النذر للشمس وجهه افياي..
النذر للگاع مسحاته وعرفهه الماي..
النذر للناس فيّ عمره.. برد هلهولة بشارة.. الحصد خنياب گصته وبي غسل عاره..
الشرب ليل الشته رعشات لاچن مابرد ثاره..
وگلتلهم.. وگلتلهم..