Ni Anne Franceine Jean B. Corillo
Sining karun lang ako nagsinuplada
Pero ako na gin kuntra
Sining karun lang ako nagminaldita
Pero malain na insigida.
Sining karun lang ako nagbinugalon
Ila ginpadugo pa gid akon taghipusuon
Sining karun lang ako naghipuson
Ila ako ginapaugayong sang tayuyon.
Sining karun lang ako kabatyag sini
Nagabakho sa realidad; indi magpati
Nagapanangis sa ginlinas-linas nga dughan
Sining karun lang ako indi maintiendihan.
Sining karun lang ako ginpatiyabaw
Nagtiyabaw sa garapon sang kalinungan
Insat waay pa ini nag undang?!
Sining karun lang, abaw, ako nalumos sa sabaw.
Sining karun lang ako naglugdang
Pamangkutanon wala diri wala didto; gatalang-talang
Gapaindis-indis sa duwa kalapyo nga mga mata
Sining karun lang mga malain nga tinaga gin usang.
Sining karun lang ako nagkusmod
Lain man sa ila pagtamod,
Ako kahapon, daw pinudpod gin tuktok
Sining karun lang galaom nga maupawan sa pamisok.
Indi bwas,
Indi man kahapon
Waay na sang masunod pa,
... sining karun.
