خرافه البنت العفيفه

البنت العفيفه البارت الاول

#خرافتنا_اليوم

#البنت_العفيفة
الجزء الاول

ياحزاركم يامزاركم ونور النبي العدنان ينور دياركم حكايتنا اليوم علي بياع متجول هو واصحابه ، طبعا زمان مافيش اسواق زي توة هذا سوقهم ، هدوكة الاصحاب يشروا في بضائع من قرية ويحطوها حاشاكم عالحمير ويمشوا لقرية تانية يبيعوا فيها بضاعتهم  وياخدوا ثمنها فلوس ولا يبدلوها ببضاعة تانية تعجبهم ويرجعوا يبيعوها في قرى تانية ولا قريتهم ، وكانوا هالاصحاب من كثر ما ناشطين ومعاملتهم كويسة للشراية،  يعرفوهم معظم القرى ، ويستنو فيهم بالساعة والدقيقة باش يشروا منهم ، ويوصوهم علي حاجات يبوها باش المرة الجاية يجيبوها معاهم.
ولما يوصلوا لقريتهم يرتاحوا شوية مع اهاليهم ويعطوهم الفلوس اللي ربحوها ويلقوا باش يصرفوا وياكلو، ومرة في طلعة من طلعاتهم باعوا بضاعتهم ومروحين لاهاليهم شورهم تلخبطوا في الطريق وحسوا ان الطريق طوالت مش زي ماهما متوقعين وحتى الماكلة والشراب تم منهم ، وقعدوا حايرين !!! كان قعدوا في الصحراء خايفين في الليل يهجموا عليهم ضباع وياكلوا واحد منهم ولا كلهم، ولا  يكملوا طريقهم بالك يلقوا قرية قريبة يرتاحوا فيها ويشربوا وياكلوا  ، واحد منهم قالهم اني عطشان وجيعان وحتى جهد ماعنديش ماعاد قادر نمشي ، قلهم بروا وخلوني وخلاص ، مارضوش يخلوه قالوله باهي اقعد هنايا ويطلع واحد ولا اثنين يشوف بالك فيه قرية قريبة يرجع يقوللنا!!
اتفقوا علي هالكلام وطلع واحد مسافة قريبة يشبح من بعيد في ضي فنار والع دوب مايبان، فرح ورجع يجري لصحابه وقلهم الحمد الله  اللي خالقنا  مانساناش  في ضي والع  قريب اكيدة فيه ناس  ، خلي واحد مننا يمشيله ويطلب منهم  خبزة وامية باش نكملوا بيها عقاب رحلتنا ، واحد منهم قلهم اني نمشي وانتم استنوني هني ، وتوكل علي ربي ومشي ، لما قرب من الضي لقي بيت شعر منصوب وضي الفنار اللي شافه من بعيد وقف بعيد شوية وقعد ينادي : يااهل البيت !! طلعتله بنية وقالتله منو ؟ منو اللي ينادي؟
قلها عابر سبيل ، ياوخيتي احنا مروحين ورحنا ، مانلقاش عندك شوية خبزة ليا ولصحابي باش نقدرو نواصلوا رحلتنا؟ البنت طلعت اخت رجال وبنية حلال واصيلة قالتله:  موجود كل خير !! ومشت جابتله خبزة،,قلها يخلف عليك وكثر خيرك وطلع بيمشي لصحابه والدنيا ليل ماشافش كلب حاشاكم مربوط تحت الشجرة ، اول ماشافه الكلب نبح عليه علي غفلة وهو انخلع وجري شوية ، فيه بير في الارض مافيشي حيط حفرة بس وقديم مهجور طاح فيه وستر ربي مافيشي امية.

البنية هادي عندها سبعة خوت ولاد وهيا رأس بنية ، وخوتها عندهم ارض وارثينها من بوهم يمشولها كل يوم يرفعوا معاهم  في راجل يحرثلهم في ارضهم والدنيا زمان كانت امان مرات لما مايكملوش حرثهم  يباتو في الارض ووخيتهم تبات بروحها في بيت الشعر .
لما طاح الراجل في البير قعد ينادي عالبنت قلها ان شاء الله ربي يسترك تعالي طلعيني شوفي حد يطلعني ، قتله خوتي كلهم في الحرث ومرات يباتو مايروحوش، قلها:  باهي احذفيلي حبل باش نقدر نطلع ، مشت جابتله حبل وشدت من جهة وحذفتله الجهة التانية ربط الحبل في نصه و شد فيه وبدت تشح في الحبل تبي اطلعه من البير ، الراجل كان ماشاء الله رزين ، وهيا سلامتها بنت ماعندها ليه جهد، قعدت تشد في الحبل وتجبد فيه لين قريب وصل لفم البير وبعدين غلبها الحبل وطاحت لحقاته في البير ( جاك عمك والبلح هههه)
  اول ماطاحت خافت !! قلها ماتخافيش انتي اختي قدام ربي وربي يشهد علي كلامي.قالتله: وانت خوي قدام ربي، وقعدت هيا في تريكينة وهو في تركينة تانية في وسط البير.
هدوكة خوتها بالصدفة هديكة الليلة ماكملوش حرثهم وبيباتوا في الارض ، مشوا قالوا للحراث متاعهم مادامك تبي تمشي تشوف مرتك,وصغارك وترجع اخطم علي وخيتنا جيببنا منها ماناكلوا وقلها احنا الليلة بنباتوا ، ومشي هداكة الحراث لين وصل لبيت شعر البنية ووقف بعيد وقعد ينادي عالبنت ؛ سمعاته البنية ردت عليه من قعر البير راني هني في البير ، جاها يجري وجاب حبل ومدهولها ، خيرك كيف طحتي ؟  وهيا ربطت الحبل في وسطها وطلعها ؛ اول ماطلعت قلها شن اللي طيحك في البير؟ حكتله اللي صار معاها وقتله ياوخيي استرني ربي يستر علي ولاياك ماتقولش لحد يشهد عليا ربي ان هذا اللي صار لكن الناس  مش حيصدقوني وحيزيدو عليا الكلام والبنت ماليها الا سمعتها. الحراث فقير وبسيط كلها ربي يستر عليك دنيا وآخرة ، ونزل الحبل تاني وطلع البايع المتجول اللي طاح معاها في البير ولما طلع من البير حكاله نفس القصة وقاله اني عاهدتها في البير بيني وبين ربي هيا زي وخيتي وخدي خبزته واميته ومشي لصحابه اللي يستنوا فيه ، الحراث كأنه تردد شوية مشي البنت قالتله دين في رقبتي مع نهاية الموسم الأجر اللي يعطولك فيه خوتي اني نعطيك زيه مرتين غير استر عليا ، الحراث يعرف  البنت وعفتها وصدقها و قلها باهي سرك في بير ومشي لمرته وصغاره شافهم واطمن عليهم وماجابش سيرة لمرته علي صار في البير.
الحراثين حرثوا الارض وزرعوا الحبوب وكبر الزرع وحصدوه ولموه المزارعين وخزنوا اللي خزنوا وباعو اللي باعو وكل مزارع اعطي للراجل اللي حرثله فلوسه ، والبنت زي ماوعدت الحراث متاع خوتها ابرت بوعدها واعطاته ضعف اللي اعطوهوله خوتها.
حدي الحراث فليساته وروح لحويشه فرحان ، لاقاته مرته وشافت الفليسات اللي عنده استغربت !!! قتله شني امالة المرة هادي اعطوك فلوس بالزايد واكثر من اجرتك متاع كل عام، شنو هالعام نزلت عليهم الطيبة والكرم شن خطر عليهم؟
قلها : ايه الحمد الله اعطوني حقي والزايد
مرته وحدة شومة قتله كل عام تشتغل معاهم وتحرثلهم اش معنى العام هذا بس اعطوك بالزايد ، شورك خديت محصول من وراهم وبعته لروحك وماقلتلهمش عليه، فكنا ياراجل من رزق الحرام!!
عاركها وقلها : اسكتي يامراء ، ومشي لفريشه دار روحه  بيرقد باش ماتجبدش لسانه في الكلام!!جاته تجري وقتله توة تقولي الحق ولا تو غدوة نمشي نباركلهم عالموسم ونتأكد من كلامك .
قلها الحراث باهي امري لله ربي قاللنا استرو واللي يستر علي الولايا ربي يستر علي ولاياه!!
قتله توة تقولي شن  فيه؟ قالها : يامراء فكيني اني وعدت مانقولش لحد. قتله توة تقولي اني الشك ركبني ، ياتقولي ياتوة نلم حوايجي ونمشي لحوش اماليا
قلها لا حول ولا قوة الا بالله مرتي وعارفك ماتنبلش في فمك الفولة وكان قتلك تو بتكبريها وبديريها,قصة وبتظلمي بنت الناس وربي مايحبش الظلم لعبيده وامرنا بالستر!! سمعت هالكلمتين وزادت ولعت فيها النار وقعدت تنوح وتبكي وقتله توة تقولي من هيا بنت الناس؟ وشن درت معاها؟ الراجل كان بمصيبة وحدة ولا بمصيبتين الخنبة والشرف !! ولقاها معاش فيها لازم يقوللها كان هذا بتفضح بيه هو قدام الناس. قلها,يامراء بداية الموسم متاع  الحرث مشيت لحوش فلانة بعتوني خوتها بنجيبلهم ماياكلوا لقيتها طايحة في البير ومعاها راجل جت بتطلعه من البير طاحت معاه ، طلعتهم من اليير وانتي الناس وتعرفيهم تو كان يسمعوا بالقصة تبدأ سيرتها علي كل لسان ، سترت عليها واعطتني,فلوس بزيادة وهادو الفلوس اللي شبحتيهم.
تاني يوم هديكة المرية متعودة هيا وجاراتها مع العصر كل وحدة مكملة حوستها يقعمزوا تحت شجيرة يهدرزوا علي حالهم واحوالهم ويشربوا طويسة شاهي ، ناضت وحدة من الجارات قتلها خيرك اللطف,البارح نسمعوا في عياطاتك وصياحاتك انتي وراجلك ؟ شوره,الرزقة متاع الموسم,هذا شوية,اللي,حصله من الحرث!! قتلها لا بالعكس الموسم هذا ضعف الموسم اللي كان يحصل فيه؟ قتلها كيف؟ قتلها حق اللي حصله من بنت فلان  اللي طلعها من البير!! قتلها وهادي شن نزلها للبير؟قتلها والله ماني عارفة,زوجي قال طلعتها من البير هيا وراجل معاها لما خوتها ماشيين للحرث!! ياوخيتي ربي يستر علي بنات الناس خوتها رجالة سبعة وكل واحد شناباته يوقف عليهم الصقر، لكن بالله عليك ماتقوليش لحد، الفجي في الولايا.
روحت هديكة الجارة وحكت,القصة لجارتها التانية ومن التانية للثالثة وكل وحدة تزيد,كليمة من,عندها لين ولت قصة والناس كلهم سمعوا بيها!!! وبعدين وصلت الدوة لخوتها السبعة!!
اول ماسمعوا خوتها ولو زي المجننة الدنيا سوادت قدام عيونهم ، قعمزوا مع بعض يبوا يفكرو شن بيديروا في المصيبة اللي جتهم وكل واحد يقول كلام فيه اللي صدق الكلام وفيه اللي قال اختي طاهرة عفيفة مااديرهاش المهم صارت فيهم حالة وبعدين,وصلوا,لقرار انهم في هديكة الليلة بيذبحوا اختهم باش يفتكوا من عارها ويسكتوا افام الناس . البنت سمعت كلام خوتها واول ماجي المغرب وتت حويجاتها وهيا تبكي وتنوح وتسللت من بيت الشعر وهربت مسيكينة في هداكة الليل والخلي خايفة وتبكي وتدعي لربي ينور طريقها ويطلع الحق ومش عارفة لاتمشي لا يمين ولايسار تجري وخلاص بتبعد علي خوتها باش مايلحقوهاش ويذبحوها وان شاء الله ربي ينتقم من كل اللي يظلم الولايا ويتبلى عليهم، ، تجري يانويرتي وخايفة من الظلام تتلفت هني وهني وخايفة خوتها يستاقضوا بيها ماتبيش توقف ، ومن التعب والخوف ياناري طاحت من طولها!!!
زعمة شن بيصير في بنيتنا العفيفة ؟ بتعيش والا بيجوها الذيبة ياكلوها؟ وخوتها بيلحقوها بيذبحوها ولا لا؟

هذا كله حنعرفوه في الجزء التاني من حكايتنا