مسألة انتقام

الجزء 6

الجزء السادس :

خرجت ويدي عامرين بالدم و كتبت حدا الباب ديال دار بالدم (1/5) ،مسحت يدي و جاتني شوية دوخة و لكن حسيت بقلبي برد شوية مشيت لحدا الطريق و خديت طاكسي لوسط تمارة ، وطاكسي ثاني من تمارة للرباط رجعت لبيتي دخلت دوشت و بدلت حوايجي و نعست ففراشي مع السخفة و فنفس الوقت غضبانة تخلطت عندي المشاعر بديت كنضحك شوية حيث خديت حقي منو و كنبكي شوية حيث انا ماشي ديال هادشي و معمري تصورت شي نهار غادي نقتل شي واحد و لكن مندماناش حيث تظلمت بزاف و هوما قتلوني الف مرة بداكشي لدارو ليا ،و معنديش البديل باش ناخذ حقي حيث كلشي تخلا عليا ، و لأول مرة من بعد الإغتصاب كنحس بالراحة النفسية شوية و نعست بلا منبقا نفكر.

فقت فالصباح بكري و فطرت و غسلت سباط لعامر بدم و مشيت رميتو فالبحر هو و زيزوار و ليگات، رجعت لبيتي و بديت كنسمع فالتيليفون للتسجيل ،صاحبو الثاني سميتو "عصام السويدي" هو لصحيح فيهم و عاجباه صحتو غليظ داير بحال الوحش يديه گاع مخططين بضريب الموس ،عزيز عليه العنف بزاف و مستحيل شي واحد يتفاهم معاه حيث يديه ديما سابقة فمو و همجي ميمكنش نهدر معاه أو نغلبو جسديا ،هو لخرج من طوموبيل الأول و شدني من يدي و لاحني فطوموبيل و هو أول واحد صرفقني فطوموبيل ملي كنت كنطلب فيهم و لضربني بزاف فطوموبيل فالطريق و عاد تكرفص عليا ملي كنا فالدار، قاليا مراد بنعثمان بلي مكيعرفش دار هاد عصام السويدي و لكن ديما كيكون فواحد القهوة شعبية فشارع علال بن عبد الله بالرباط.
لبست جلابة خايبة و واحد صندالة و درت نظاظر شمس كبار و مشيت حدا القهوة يومين و انا كندور حداها ،و بالفعل بان ليا عصام كيجي ليها كيجلس فشي طبلة لخارج و يطلب قهوة و يعصر عليها صباح كامل و مرة مرة كيمشي يلعب لقمار يقطع ورقة تيرسي حدا القهوة و يرجع للطبلة يكمل قهوة ديالو.
نهار ثالث فقت و وجدت شوية السم غبرة "مفعول ديالو قوي" ،لبست حوايج عاديين و درت واحد ماكياج مفيه.ميتشاف باش ميعرفنيش هزيت صاك كبير شوية خرجت شريت 10 ديال معجون اسنان متنوعين و 10 كلينيكس.

مشيت حدا القهوة لقيت فيها ناس قلال،بقيت حاضياه من بعيد، حاط كاس ديال القهوة كيف العادة و شرب منها غير شوية و كيعمر اوراق ديال لقمار غير ناض و انا نمشي درت راسي بحالا كنبيع كلينكس للناس و معجون أسنان غير باش نوصل بزربة للطبلة ديالو ،وصلت ليها و حطيت كلينكس و بزاف معجونات بحالا كنقاد فيهم و بزربة رميت سم فالكاس و جمعت كلشي و بعدت من القهوة.
رجع للطبلة و هو يهز كاس و شرب القهوة و بزربة السم طلق المفعول ديالو ، شد كرشو بدا كيتوجع و انا نمشي للقهوة دزت من حداه و بقا كيشوفيا و عينيه غادي يخرجو حيدت نظاظر و عرفني ،طاح للأرض و بدا كيتركل كيغوت بالوجع وانا كنشوف فيه و ساكتة كنقول فخاطري: " فين هي الصحة ديالك؟؟ مالها منفعاتك بوالو دابا؟ يالاه نوض واجهني! انا البنت لتكرفصتي عليها بدون ذنب! بنت وزان لمعندها صحة و دمرتي ليها حياتها" تجمعو عليه ناس بالزربة و گارسون بزربة دخل كاس ديال القهوة و أنا ندخل للطواليط غسلت وجهي و كتبت بالعكر في المرايا (2/5) ملي كنت خارجة لقيت سيارة الإسعاف كتهز فيه........
#بنت_وزان
#كلكم_ظلمتوني
#إغتصاب_فتاة