قصر الدبلوماسى

قصر الدبلوماسى (الاولى)

شخصيات القصة الاساسية

سامح : ٦٢ سنة ، سفير سابق
فاتن : ٥٦ سنة ، زوجة سامح
مروة : ٢٨ سنة & اروى : ٢٤ سنة & اسر : ٢١ سنة (اولاد سامح)
مالك : ٢٨ سنة ، ظابط شرطة بـ رتبة نقيب
فؤاد : ٥٨ سنة ، ابو مالك ، مستشار
*_____________________________________________**___________________________*
الحلقة الاولى ....

الساعة ١١ الصبح فى قصر سامح الخولى ....
(. دخلت الشغاله على اروى وصحيتها من النوم على صوت دوشة واشخاص كتير فى الڤيلا .)
الشغالة : اروى هانم اصحى
اروى : صباح الخير فى ايه !!
الشغالة : صباح النور يا هانم
اروى : هو فى ايه تحت
الشغالة : ده البوليس جه عشان يحقق
اروى : بوليس !! وبيحقق !! هو ايه اللى حصل
الشغالة : سامح بيه صحى من النوم لقى الخزنة مفتوحة وكل اللى فيها مش موجود
اروى بقلق : فى حد حصله حاجة
الشغالة : لا يا هانم كلهم بخير
اروى : ماما فين
الشغالة : كلهم تحت ، وسامح بيه بعتنى اصحيكى عشان الظابط عايز يعمل استجاوب مع كل اللى فى البيت
اروى : اوكى روحى انتِ هغير وانزل
الشغاله : طيب بسرعه يا هانم عشان النيابة على وصول
اروى : قولت اوكى هغير هدومى وانزل
(. غيرت اروى هدومها ونزلت عشان هيبدأوا الاستجاوب مع اهل البيت كلهم ، اروى نازلة من على سلالم الڤيلا لقيت ظابط المباحث مالك ، اللى انبهرت بيه جداً واللى وقفها فى مكانها ووقفت تبص عليه ، مالك كان مشغول بـ فحص المكان والمكتب والخزنة .)
مالك : الخزنة مفتوحة بمفتاح مش مكسورة
ياسر(ظابط) : ممكن يكون فتاح خزن
مالك : سامح بيه
سامح : افندم
مالك : حضرتك عارف المسروقات
سامح : اه طبعاً كان فيها ١٠ الاف دولار ومجوهرات خاصة بالمدام وبناتى واوراق
مالك : اوراق خاصة بايه
سامح : مش فاهم السؤال
مالك : مش حضرتك شغال فى وزارة الخارجية فى الوقت الحالى
سامح : مش شغال بمعنى الكلمة انا زى ما تقول مستشار ، يعنى بيحتاجونى فى شغل واستشارات
مالك : احنا عارفين الخدامات اللى قدمتها لـ البلد من قبل حتى ما تكون سفير
سامح : كلنا فى خدمة البلد يا حضرة الظابط
مالك : الخزنة كان فيها اى اوراق خاصة بـ الخارجية ؟
سامح : امم تقريباً ، كان فى اوراق المفروض اسلمها النهاردة
مالك : اوكى احنا هنستجوب كل اللى فى البيت سواء اهل البيت او الخدم
سامح : الكل فى انتظارك
(. كل ده واروى واقفة تتابع مالك وكلها انبهار ، اروى كانت فى دنيا تانيه ولا كأنهم تعرضوا للسرقة .)
(. استجوب مالك اهل البيت كلهم ، واخدوا وصف المجوهرات اللى اتسرقت ، بعدها جت النيابة ورفعوا البصمات واكتشوا ان ازاز اوضة المكتب مكسور من بره بجانب ان فى خرابيش فى الخزنة .)
__**__**__**__**__
(. غيرت اروى هدومها ونزلت .)
فاتن : رايحة فين
اروى : هروح اقابل صحابى
فاتن : يا بنتى هتخرجى واحنا فى الظروف دى
اروى : ظروف ايه يا ماما
سامح : انتِ مش شايفة اى ظروف خالص ، يعنى اتسرقنا دى مش ظروف
اروى : ايوة يا بابا يعنى انا هقعد اعمل ايه مش البوليس جه وحقق وهيدوروا على اللى سرق
فاتن : اخرجى يا اروى متوجعيش دماغنا
سامح : متنسيش تجى على الغدا
اروى : اكيد انا عارفة ان اهم حاجة ان العيلة كلها تتجمع على الغدا سلام (ومشيت)
فاتن : هى فين العيلة دى
سامح : ليه بتقولى كده
فاتن : مروة من ساعة ما مروة اتجوزت متلمناش على تربيزة واحدة
سامح : وكنتى زعلانه انى رافض الجوازة
فاتن : انا مش زعلانه انك رفضت الجوازة انت ضغطت على البنت لحد ما خليتها تتجوز غصب عنا
سامح : عمرى ما هسامحها على اللى عملته فينا
فاتن : انسى بقى يا سامح البنت مبسوطه ومرتاحة وكلها شهر وتجيب لنا عضو جديد فى العيلة
سامح : انا لسه زعلان منها
فاتن : بتهيألى كفاية اوى انك محضرتش فرحها وسافرت المانيا من غير ما تسلم عليها
سامح : انتِ مش لسه من شوية كنتى زعلانه انها مش موجوده فى وسطنا
فاتن : دى حاجة ودى حاجة
سامح : قفلى على الموضوع ده يا فاتن خلاص اللى حصل حصل ربنا يسعدها
فاتن : يارب ، اه صحيح ايه حكاية الورق اللى كان فى الخزنة
سامح : الورق ده كان مهم جداً كنت المفروض اسلمه للخارجية النهاردة
فاتن : يعنى فى حد قاصد يسرقه
سامح : مظنش السبب الرئيسى فى السرقة هى الفلوس والمجوهرات لان كان فى اوراق ملكية ،بس اللى سرق خد كل حاجة فى سكته
فاتن : خير يارب يلاقوا اللى عمل كده
سامح : ان شاء الله
فاتن : انا مش عارفة ليه انت واجع قلبك بالشغل انت مش خلاص يا حبيبي طلعت على المعاش
سامح : خدمة بلدى مش محتاجة سن يا فاتن ومش محتاجة انى اكون موظف او فى مركز معين
فاتن : الولاد لو يعرفوا انت بتحب البلد دى ازاى مكنوش سافروا كل واحد فى حته اسر فى امريكا ومروة فى المانيا
سامح : اروى بس هى اللى بتحب تقعد هنا
فاتن : اورى طلعالك خالص
سامح : طيب انا هروح اخلص شوية شغل عشان احتمال يحتجونى فى النيابة
فاتن : اوكى يا حبيبي
*_____________________________________________**___________________________*
فى احدى الكافيهات ........
سمر(صديقة اروى) : يعنى اللى سرق جاى وعارف ان الخزنة فيها فلوس ومجوهرات
اروى : معرفش
سمر : طيب الظابط لما حقق قال ايه
اورى بتنهيدة : اااااه من الظابط
سمر : ماله
اروى : ملاك يا بنتى نازل من السما ، انا مكنتش سامعه ولا شايفة اى حاجة غير سيادة النقيب مالك
سمر : هو اسمه مالك
اروى : اممم اسمه مالك وهو مالك قلبى من اول نظرة
سمر : انتِ هبلة يا اروى بتحبى واحد مشفتهوش الا مرة
اروى : انا اول مرة اعرف يعنى ايه الحب من اول نظرة
سمر : حب ايه يا بنتى ، انتِ مش كنتى بتقولى انا مبعترفش بالحب
اروى : يوووه بقى يا سمر سبيني افتكره بقى
سمر : يا بت فوقى بقى فى ايه ، بيتكم مسروق وانتِ بتتكلمى عن واحد ممكن متشوفهوش تانى
اروى : انا هعمل المستحيل عشان اشوفه تانى
سمر : والله انتِ اتجننتى
اروى : لو شوفتيه هتعذريني
سمر : افرضى كان مرتبط
اروى : مكنش فيه دبل فى ايده
سمر : انا بقول مرتبط يعنى بيحب مش لازم خطوبة او جواز
اروى : انتِ احبطتيني اسكتى بقى
سمر : طيب خليكي كده احلمى لحد ما تفوقى على الواقع
اروى : مالكيش دعوة
*_____________________________________________**___________________________*
فى بيت مالك ......
شهيرة (ام مالك) : ايه يا حبيبي اللى اخرك كده
مالك : الشغل يا ماما غصب عنى
شهيرة : ربنا معاك
فؤاد : احنا قرينا الخبر فى الجرنال
مالك : هما لحقوا ينزلوه
فؤاد : اه امال ايه مش قصر السفير السابق
شهيرة : ده المانشيت اسمه سرقة قصر الدبلوماسى
مالك : والله وجع راس تحس ان اهل البيت نفسهم مش فارق معاهم
شهيرة : يعنى هيعملوا ايه يعنى يا حبيبي
مالك : مش عارف بس مكان كده فيه لامبالاة
فؤاد : مالكش دعوة انت بيهم شوف شغلك انت وخلاص
مالك : وانا فى ايدي حاجة غير انى اشوف شغلى
شهيرة : هجهزلك الغدا ماشى
مالك : ياريت يا ماما
(. وقامت شهيرة تجهز الغدا لـ مالك .)
فؤاد : مالك فيك ايه
مالك : القضايا اللى بتكون خاصة بـ ناس تقيلة فى البلد بتعملى وجع راس
فؤاد : وايه الفرق
مالك : الفرق انهم بيبقى لازم نوصل لنتيجة يعنى من الصعب نقيد القضية ضد مجهول حتى لو هو فعلاً مجهول
فؤاد : هو مش سامح الخولى ده سفير سابق
مالك : بس من الناس التقيلة اوى اللى خدمت البلد من قبل حتى ما يكون سفير وحالياً بيشتغل فى الخارجية
فؤاد : هو ايه اللى اتسرق من بيته
مالك : فلوس ودهب وشوية ورق
شهيرة : الغدا جاهز يا مالك
مالك : عن اذنك يا بابا هقوم اتغدى
فؤاد : قوم يا حبيبي بالهنا والشفا
*_____________________________________________**___________________________*
فى المانيا .....
ادم (زوج مروة) : مروة
مروة : ايوة يا ادم
ادم : مالك يا حبيبتى قاعدة سرحانه كده ليه
مروة : مفيش
ادم : لا فيكي حاجة
مروة : خزنة بابا اتسرقت النهاردة
ادم : مين سرقها ؟؟
مروة : منعرفش لسه بيحققوا
ادم : حد فيهم حصله حاجة
مروة : لا كلهم كويسين بس انا قلقانه
ادم : قلقانه من ايه
مروة : اللى توصل به الجرأة انه يقتحم القصر ويدخل اوضة المكتب ويفتح الخزنة ويسرق اللى فيها على مهله وبعدين يمسح بصاماته ممكن المرة الجاية يقتل حد فيهم
ادم : متبقيش سوداوية كده ان شاء الله خير
مروة : يا ادم الموضوع مش سهل ، نسيت السرقة اللى حصلت قبل كده
ادم : ماهو باباكى غلطان برضه ، ليه ميجبش فريق من اى شركه حراسات
مروة : ما فى body guards
ادم : body guards ايه يا مروة دول اجسام على الفاضى
مروة : احنا اتكلمنا مع بابا كتير فى الموضوع ده وهو رافض
ادم : طيب رافض ليه
مروة : بيقول مبحبش المنظرة
ادم : ربنا يستر بقى
مروة : ادم حبيبي ، ممكن اطلب منك طلب
ادم : اؤومريني يا حبيبتى
مروة : ممكن اسافر اشوفهم واطمن عليهم
ادم : دلوقتى ؟؟
مروة : اه
ادم : لا طبعاً
مروة : ليه
ادم : انتِ على وش ولاده
مروة : طيب وفيها ايه
ادم : انا عايزك تولدى هنا ولما تولدى ابقى روحي واقعدى معاهم زى مانتِ عايزة
مروة : وهتفرق ايه اولد هنا ولا هناك
ادم : عشان الجنسية
مروة : بابا هيزعل اوى لما يعرف ان اول حفيد له مش هيبقى مصرى
ادم : وخدنا ايه بقى من الجنسية المصرية
مروة : بغض النظر خدنا ايه ياريت لما تقابل بابا متقولش الكلام ده ماشى
ادم : انا مش عارف فعلاً انتوا متمسكين بيها كده ليه انتوا معشتوش فيها كتير
مروة : يا ادم كل واحد له انتمائته ووجهات نظره وللعلم بابا عاش فى مصر عمره كله ومسبهاش الا لما بقى سفير واضطر يعيش بره
ادم : ما علينا المهم دلوقتى انتِ تولدى وبعد الولادة سافرى
مروة : هتسافر معايا
ادم : على حسب شغلى
مروة : ربنا يسهل
*_____________________________________________**___________________________*
بعد كام يوم ......
سمر : انتِ مستنية حد
اروى : اه
سمر : مين
اروى : اصبرى شوية يا سمر لو سمحتى
(. بعد شوية جه عماد صديق لـ اروى .)
سمر : طيب متقولى انك مستنية عماد
عماد : اخباركم ايه
سمر : الحمد لله
اروى : عملت ايه
عماد : طيب اخد نفسى واشرب حاجة
اروى : اخلص يا عماد
عماد : النقيب مالك فؤاد الشاذلى ٢٨ سنة ، ابوه المستشار فؤاد الشاذلى وامه الدكتورة شهيرة عبد الوهاب
سمر : اهااااا انتِ موصياه يجبلك قرار مالك
اروى : استنى انتِ يا سمر لو سمحتى كمل يا عماد
عماد : عنده اخين هو اوسطهم ، الاتنين متجوزين وهو لا خاطب ولا متجوز
سمر : طيب مرتبط !!
عماد : من الواضح ان مالك ده مبيعملش حاجة غير انه بيشتغل ووقت ما يحب يرفهه عن نفسه بيروح مع صحابه نادى ضباط الشرطه
اروى : يعنى مش مرتبط
عماد : مظنش بيروح شغله الصبح بيخلص يروح يتغدى مع اهله وينزل بعد المغرب مع شباب وبيكون نبطشى يوم الاحد
اروى : متشكرة اوى يا عماد
عماد : العفو يا اروى بس ممكن سؤال بس من غير ما اكون بتطفل عليك
اروى : عيب يا عماد الكلام ده احنا اصحاب من زمان خد راحتك
عماد : انتِ ناوية على ايه مع مالك ده
اروى : من غير لف ودوران انا مُعجبة بيه وكنت عايزة اقرب منه مش اكتر
عماد : بس اشمعنى هو
اروى : مش فاهمه السؤال
عماد : بصى انا لما سألت عليه عرفت عنه حاجات كتير
اروى : حاجات غير اللى انت قولتها
عماد : ايوة
اروى : ممكن اعرفها
عماد : زى انه جد جداً ، عملى زيادة عن اللزوم وطبيعة شغله فى المباحث بتخليه يشك فى اقرب الناس ليه حتى نفسه من الاخر كده مش اى حد يستحمله
اروى : امممم خلاص يا عماد ده مجرد اعجاب
عماد : المهم دى ورقة فيها كل حاجة عنه ، رقمه وعنوانه حتى مكان شغله
اروى : متشكرة اوى يا عماد مش عارفة اشكرك ازاى
عماد : العفو يا اروى بس خدى بالك ، يالا انا همشى
اروى : اوكى باى
سمر : انتِ ازاى تقولى لـ عماد انك معجبة بـ مالك وعايزة تقربى منه
اروى : وفيها ايه !!
سمر : مينفعش يا اروى الكلام ده انتِ فى مصر مش فى اوروبا
اروى : اولاً عماد ده صاحبنا من زمان اوى وبنحكى لبعض كل حاجة عادى جداً وثانياً اكيد عماد بالعقل كده فهم قصدى
سمر : براحتك بس خدى بالك بعد كده
اروى : اوكى متقلقيش
سمر : بس انتِ فعلاً هترتبطى بيه رغم اللى قاله عماد
اروى : انتِ يعنى شايفة المأذون قاعد جنبى
سمر : خلاص متتعصبيش
*_____________________________________________**___________________________*
فى خلال تلت اسابيع ....
- حققوا فى القضية وموصولش لحاجة واتقفلت واتقيدت ضد مجهول
- مالك مسيطر سيطرة تامه على تفكير اروى
- اروى ساعات بتروح تشوفه وهو خارج من شغله او وهو رايح النادى بس محاولتش تكلمه
- مروة خلفت ولد وسميته عمر
- فاتن سافرت المانيا لـ بنتها
*_____________________________________________**___________________________*
فى قصر سامح الخولى .....
(. سامح بيكلم لواء شرطه فى الموبايل ومتعصب جداً .)
سامح : يعنى ايه يا افندم اتقيدت ضد مجهول
اللواء : يا سامح بيه انتوا مش مساعدين معانا خالص
سامح : يعنى المفروض ان انا اعمل ايه مش دى مهمتكوا
اللواء : انتوا مش شاكين فى حد ومحدش شاف السارق وهو داخل بيت ساعدتك ولا وهو خارج ومفيش بصامات حتى المجوهرات متباعتش لحد دلوقتى والفلوس متصرفتش يعنى هنوصله ازاى
سامح : السرقة دى لو اتقيدت ضد مجهول انا بيتى هيبقى مورستان اللى عايز يدخل هيدخل
اللواء : حضرتك ممكن تجيب حراسة خاصة او تراقب القصر
(. هنا جت اروى وباست باباها .)
سامح : انا مبحبش الشكليات دى
اللواء : يا سيادة السفير دى مش شكليات انت شخصية عامه ومهمة وتعتبر ثورة قوميه للبلد
سامح : متبالغش يا سيادة اللوا
اللواء : انا ده رأيي فى حضرتك جهودك محدش يقدر ينكرها وعشان انت عضو فعال ومفيد للبلد فـ اكيد حضرتك مستهدف او على الاقل القصر
سامح : ربنا يسهل انا هحاول الاقى حل للموضوع ده
اللواء : ان شاء الله وياريت حضرتك تعذرنا بس اكيد مجرد ما السارق يبيع المجوهرات هنعرف نوصله متقلقش
سامح : شاكرين جهودكم معانا
اللواء : العفو يا افندم ده واجبنا (وقفلوا)
سامح : مالك ؟
اروى : مفيش لسه صاحية من النوم
سامح : ما تجى نسافر سوا
اروى : لا يا بابا معلش مش عايزة
سامح : انتِ بقالك فترة متغيره
اروى : متغيره ازاى !!
سامح : مبتخرجيش كتير كعادتك وبتنامى اغلب وقتك وعلى طول سرحانه وبتتعصبى
اروى : مفيش حاجة يا بابا متقلقش ، هما وصلوا لفين فى القضيه
سامح : ضد مجهول كالعادة
اروى : يعنى معرفوش يوصلوا لـ اللى عمل كده
سامح : لا
اروى : ايه الحكاية يا بابا كل جريمة بتحصل فى القصر بتتقيد ضد مجهول
سامح : اللى بيعمل كده حد محترف يا اروى
اروى : المفروض مهما كان محترف ميكنش اكثر احترافيه من الشرطة
سامح : الناس دى بتعمل اللى عليها وزيادة ومش هيستفادوا حاجة لو اتقيدت ضد مجهول
اروى : بابا انت مش طلعت على المعاش سيبك بقى من الشغل اللى عامل لنا توتر واعداء لحضرتك
سامح : متقلقيش يا روءة ربنا هو الحامى ولو حصل حاجة الشرطه بتحاول
اروى : الناس دى بتهزر مبيشوفوش شغلهم كويس
سامح : ما علينا كويس انها جت على قد كده
اروى : كويس فعلاً (وقامت)
سامح : رايحه فين ؟
اروى : هروح اخد دش واكل اى حاجة ، هى ماما هترجع امتى ؟
سامح : لسه بدرى
اروى : اوكى
سامح : اسر هيجي من امريكا الاسبوع الجاى
اروى : يجي بالسلامه
سامح : اروى انتِ كويسة
اروى : اه عن اذنك يا بابا
(. وطلعت اروى اوضتها وفضلت تفكر فى مالك .)
اروى لنفسها >> طيب على ايه وجع القلب ده ماهو لاما اخد خطوة واتكلم معاه لاما ابطل اروح ابص عليه واشيله من بالى خالص ، لازم الاقى حل مانا مش هفضل كده متعلقة بواحد انا معرفش اذا كان ممكن يرتبط بيا ويحبنى ولا لا !! مينفعش كده لازم اخد موقف
*_____________________________________________**___________________________*
فى احدى نوادى ضباط الشرطة ......
(. اروى راحت النادى واستنت فى عربيتها لحد ما شافت مالك داخل النادى وفضلت واقفة كـ عادتها مترددة تدخل ولا لا وفى النهاية قررت تدخل ، دخلت اروى وفضلت قاعدة قصاد مالك اللى كان مستنى حد بس اتأخر وقررت تروح تتكلم معاه بأى حجة .)
اروى : مساء الخير
مالك : مساء النور
اروى : حضرتك كابتن مالك الشاذلى
مالك بابتسامه : كابتن !! ههههه اه انا
اروى بتوتر : حضرتك مش فاكرنى
مالك : لا سورى مش واخد بالى
اروى : انا اروى سامح الخولى
مالك : اهاا بنت سيادة السفير
اروى : ايوة انا ، انا فكراك لما كنت بتحقق عندنا فى قضية سرقة الخزنة وافتكرتك هتعرفنى
مالك : معلش اعذريني انا يومها كنت مركز فى القضية اكتر من اى حاجة تانيه
اروى : ممكن اقعد مع حضرتك ولا فى مشكلة
مالك باستغراب : لا مفيش مشكله اتفضلى
(. قعدت اروى مع مالك وساد الصمت المكان .)
مالك : تشربى حاجة
اروى : ميرسي
مالك : هطلبلك نسكافيه معايا
اروى بابتسامه : اوكى
بعد شوية ....
اروى : انت دايماً ساكت كده
مالك : لا عادى يعنى مبحبش اتكلم كتير
اروى : حاسة انى مضيقاك
مالك : اطلاقاً
اروى : هو انت ليه اضايقت لما قولتلك كابتن
مالك : لا انا مضايقتش ، مبحبش الكلمه دى
اروى : طيب اقولك ايه
مالك : مالك
اروى : تمام
مالك : وانتِ متعودة تجى هنا دايماً
اروى : لا ، انا كنت مستنية واحدة صاحبتى بس هى كلمتنى وقالت مش جاية
مالك : بس اشمعنى بتتقابلوا هنا
اروى : وايه المشكلة
مالك : يعنى غالباً البنات اللى زى حضرتك مبيجوش هنا
اروى : زى حضرتى ازاى ؟
مالك : اللى فى المستويات دى
اروى : انا مبحبش اتصنف انا بقعد فى المكان اللى برتاح فيه ولا يعنى كل اللى بيجوا هنا ظباط
مالك : مقصدش
اروى : امال
مالك بابتسامه : خلاص مفيش حاجة وعموماً ، منورة المكان
اروى : ده نورك
بعد شوية ........
اروى : سمعت ان القضية اتقيدت ضد مجهول
مالك : للاسف
اروى : عادى اتعودنا على كده
مالك : اتعودتوا !! قصدك ايه
اروى : قصدى ان لما القصر اتسرق قبل كده برضه اتقيدت ضد مجهول
مالك : غريبة اوى ده معناه ان انتوا حياتكوا فى خطر
اروى : مظنش ، لان اللى بيعمل كده هدفه السرقة بيشوف شكل القصر من بره بيتأكد ان الخزن مليانه بقى فلوس ومجوهرات ، الناس بتتعامل مع القصر انه مغارة على بابا
مالك : طيب ليه مبتحبوش حراسة على القصر او تراقبوه
اروى : بابا قالى قبل كده انه مش عايز يعرض حياة حد للخطر
مالك : انا حاولت بقدر الامكان اعرف السارق بس للاسف موصلناش لحاجة خصوصاً ان مفيش حد من اهل البيت شافه
اروى : اه وكمان احنا مش شاكين فى حد
مالك : خير ان شاء الله
اروى : بس انتوا شغلكوا صعب اوى
مالك : كل مهنة لها درجة من الصعوبة وكل شخص له طاقة من التحمل وربنا بيدي كل واحد على قد طاقته
اروى : كلامك حلو اوى يا بخت مراتك بيك
مالك : ليه
اروى : عشان عندها زوج بيفكر بالطريقة دى
مالك : بس انا مش متجوز
اروى : ولا خاطب ؟
مالك : لا
اروى : ليه
مالك : دايماً بقول ان النصيب لسه مجاش
اروى : بس هل فى مواصفات معينه
مالك : اه فيه بس انا مبدورش عليها مستنى النصيب يجيبهالى
اروى : ربنا يسعدك
مالك : متشكر ، معلش يا انسة اروى انا مضطر امشى
اروى بلهفة : طيب مش هشوفك تانى
مالك باستغراب : نعم !!
اروى : قصدى اتمنى اشوفك تانى
مالك : ان شاء الله عن اذنك
اروى بلهفة اشد وتوتر : طيب ممكن امم اه ........
مالك : فى ايه !!
اروى : ممكن رقم موبايلك
مالك : ليه ؟
اروى : انا اسفة لو ضايقتك
مالك : مضايقتنيش ولا حاجة انا بس استغربت
اروى : انا قصدى عشان لو ........
مالك يقاطعها : هاتى موبايلك اكتبلك الرقم
اروى بفرحة : اتفضل
(. تبادلوا ارقام الموبايلات ومشى مالك وهو مستغرب اروى ومتأكد انها معجبة بيه جداً ، اما اروى فـ كانت طايرة من السعادة وشايفة ان ده اسعد يوم فى حياتها .)
__**__**__**__
مالك فى عربيته بيكلم نفسه >> البنت شكلها بتحبنى او على الاقل معجبة بيا ، كل حاجة بتقول كده كلامها عيونها لهفتها ، هى مفهاش غلطة بس مشكلتها انها متسرعه ومندفعه شوية جايز تكون كمان خفيفة فى تصرفاتها ومبتعرفش تتحكم فى مشاعرها ، متظلمهاش يا مالك ممكن تكون اتعودت على كده انت ناسى انها كانت عايشة بره اكيد اتعودت على الجرأة
اممم خلينا نشوف الايام مخبية ايه
__**__**__**__
اروى فى عربيتها بتكلم نفسها >> ياااااه انا مبسوطه اوى ، يا ترى يا مالك حسيت باللى انا مخبياه جوايا حسيت بالكلام اللى نفسى اقولهولك ، انت عملت فيا ايه بس يا مالك !!!
هو معقول كل ده يحصلى من مرة شوفته فيه !! معقول فعلاً فى حاجة اسمها الحب من اول نظرة !! معقول اكون حبيته للدرجة اللى تخليني كل يوم اطلع استناه قدام شغله او قدام النادى عشان بس اشوفه !! حبيته لدرجة انى مش عارفة اتحكم فى تصرفاتى ولا مشاعرى !! يفرق ايه مالك عن اى شاب تانى !! لا يا اروى يفرق كتير !! يفرق انك حبيته من اول ما شوفتيه
*_____________________________________________**___________________________*
فى بيت مالك .....
(. وصل مالك بيته ويدوب فتح الباب ولقى ...................... .)

__*__*__

ارجو تتقييم الحلقة بـ تعليق
*_____________________________________________**___________________________*
بـ قلمى / آلاء الشريفى
(. لو حد عايز ينقل القصة يراسلنى على الرسايل .)