قصص عراقية

ابو دنيا

بالشارع اكو مصورين ثنين بس … المصور الي اني اشتغل يمه و شوية ليكدام يم مطعم الفلافل اكو مصور ثاني ..
الشارع بي محلات هواي بس تقريبا اشهر شي هو اسم الاستديو الي اني اشتغل بي و الاستديو الثاني الي بنفس الشارع … لان دائما يمنا تصير هوسات و دك وركص و موسيقى و طبل ( اقصد علمود الاعراس ) …
اني يوميا افتح الصبح و ابقى وحدي بالاستديو لحد ميجي الظهريات لو العصر صاحب المحل … فد يوم كالعادة مفتح و منظف الاستديو و يجوني زبائن الي يريد صور شخصية الي يتصور معاملة يعني هيج وهيج .. اكو مدرسة متوسطة و اعدادية مال بنات قريبة علينا … بوكتها جان بداية دوام و شغل زين لان ينطلب من الطلاب صور صغار مال معاملات …
اجوني بنات و ولد صورتهم وراحو و شوية كلت خلي اطلع الكرسي برى اكعد اباع عالناس الرايحة والجاية و اصبلي كلاص جاي من الترمز  و وياه جكارة …
طلعت كعدت و لزمت الكلاص بيدي والجكارة ورثتها و عبالك كاعد و كدامي شواطئ و محيطات جزر الكناري ..
دخلت بعالم ثاني و عشت الدور مال تخيل و الهدوء النفسي .. لان اني احلى شي بحياتي الجكارة و كلاص الجاي .. و بنص هالتخيلات دخلولي حيتان ثنين و قرش … كطعو التخيل عليا .. الحيتان و القرش عبارة عن شباب تلاثة .. ثنين منهم ضخام و واحد لا .. جسمة عادي لذلك سميته بالقرش .. هالتلاثة الله يسلمهم سألوني بس سوال واحد لا غير …
انت المصور ؟؟؟
كلتلهم اي و بعدني مكلت تفضلو لزموني من ياخة القميص و هيه لزمة و هيه جرى للمحل …
شمروني عالميز الي حاطين عليه الغراض و طبعا اتدعبلت ورى الميز و هم معتقوني لوجه الله ..
بالعكس …
افترو عليا و هم جروني و انواع الكتل اكلت .. و اخر شي قبل ميطلعون واحد بيهم تفل عليا (مكرم القارئ) وكال بنات الناس مو لعبة ياهيج وياهيج وياهيج .. و راحو في سبيل حالهم وعافوني نايم مدد ورى الميز ..
كمت بالكوى و مشيت كبل عزلت المحل و طلعت لبيتنا … حجيت لاهلي عالصار و خابرنا على الارضي مال صاحب الاستديو و حجيناله كلشي …
اجه الرجال بسرعة لبيتنا و حجيتله كلشي .. هو يعرفني اني مو ابو بنات و صارلي سنين وياه مسويت شي من هالقبيل .. سألني شايف الولد قبل ؟؟
كلتله لا والله مشايف و لا واحد بيهم …
كال هذولة مية بالمية غلطانين و رايحين على مصور فلان (يقصد على الاستديو الثاني الي يم ابو الفلافل) ..
كلتله خلي نفترض غلطانين الغراض الي تكسرت شلون ؟؟
كال يمعود سهله فدوة الك بس لازم ندور عليهم ..
كلتله شلون ندور بله ؟؟ ناس جتي للمحل و ضربوني وراحو .. لا شايفهم قبل ولا اعرفهم و لا حتى اعرف على شنو ضربوني بس الظاهر واحد متحرش بوحدة منهم و عبالهم اني و طلعوها بيا …
كال ماعرف بس اكيد راح تبين …
و ثاني يوم فتحنا و طبعا اني مرحت للشغل لان صدك جنت تعبان من الكتل الي انكتلته …
ولد الاوادم حتى ملحكت اضربهم لان تلاثة و فوكه فوكه كتلوني
… المهم …
وراها بيومين رجعت للشغل و مشت ايام و ما بين شي …. و المصيبة بذاك اليوم (يوم الكتله) جانت دنيا ظهرية و اني الوحيد من المحلات القريبة مني ابقى بالاستديو الظهر وما اروح اتغده بالبيت … اتمنيت لو جانو موجودين جان اكيد جوي ساعدوني على هالمصيبة …
الحاصل …
مثل مكلت مشت ايام و راحت ايام والموضوع انسى و محد ما اجاني بعد و لا شفت الشباب التلاثة ابد ….
الى ان بيوم من الايام جوي بنات ثنين طالبات ..
طبعا اباع عليهم من ورى الجامخانة وحدة تريد تفوت والثانية ترجع ليورى والي تريد تفوت تجرها و تحجي وياها و هم تتقرب و ترجع تنهزم ..
الى ان اخير شي جرتها وفاتو ثنينهم …
سلمو عليا و وحدة بيهم بدت تحجي …
كالت اخوية اني جاية اعتذرلك على مشكلة صارت قبل فترة … كلتلها شنو !!!                              كالت قبل فترة اجوي عليك ولد تلاثة ضربوك بسببي و الغلط مني اني لان رجعت للبيت ابجي و بس كلتلهم المصور عالشارع العام تحرش بيا و اني جنت اقصد عالمصور الثاني و اخوتي افتهمو غلط و جوي عليك و من رجعو للبيت حجو شلون جوي عليك وضربوك و كلتلهم لا مو هووووو اقصد عالمصور القريب من المطعم …
و راحو عالمصور القريب من المطعم و هم تعاركو وي الولد الي تحارش بيا و رادو يجون يعتذرون منك بس ميعرفون بيا وجه يجوك لذلك ما اجوي و كالو خلي تبرد السالفة و نروحله لان خطية الولد لا بيها ولا عليها ضربناه …
كلتلها اها …. و انتو ولد الناس لعبة بيدكم انتي و اخوتج ههههههه
وطبعا هالحجاية طلعت مني لا ارادية من الضوجة و حسيت على نفسي من شفت البنية الي وياها ضحكت عاد اني ردت اتلافى الموضوع و كلتلها مصار شي و شكرا على الاعتذار ….
و راحو هيه و صديقتها و وراها بفتره جوي اخوتها الحيتان و القرش و هم اعتذرو و رادو يقدمون اي تعويض مادي اني ما قبلت و كلتلهم خلص و سديت الموضوع … لهنا مخلص الموضوع و بده موضوع ثاني بحياتي غيرها كلها … بدت علاقتي بشخصين جدد بحياتي و الهم فضل عليا بكلشي … الشخص الاول ( مروة ) الي هيه صديقة البنية الي اخوتها ضربوني … و الشخص الثاني ( عامر ) اخو البنية و واحد من الي ضربوني … انجمعت بعلاقة حب نهايتها جانت خطوبة بمروة … يعني علاقة مو مال لعب ولا هالخرابيط … بدت علاقتي بيها بعد الموقف الي جوي اعتذرولي بي … و جانت بالبداية بس سلام بعدين صار سوال وجواب و هاي جانت اول علاقة بحياتي … و عامر سالفته سالفة .. الولد حس بتعذيب الضمير مقابيلي و كام بين فترة و فترة يمرلي و صار صديقي و اكثر من اخوية و عن طريقة كدرت اشتغل شغل ثاني بعيد كل البعد عن التصوير و الحمدلله الشغل فتحلي عيوني على شغلات ثانية و كدرت شوية استعدل بحياتي … عامر عنده مكتب عقارات بالغزالية … و شغلني وياه وعلمني عالسالفة .. علمني شلون افتر بالشوارع و اسأل التجمعات مال شباب على بيوت للايجار لو للبيع و اروح بنفس الوقت لأهل البيت اعرفهم بنفسي و اكلهم اني صاحب دلالية (وطبعا هالشي هو كالي لازم تكوله) و ورى ما اعرفهم بنفسي اكلهم راح اجيبلكم مشتري لو واحد يأجر البيت (على حسب العرض يعني) و كمت اتفنن بهل الموضوع والولد كام يحسبلي نسبة زينة على كل سالفة تأجير لو بيع … و طبعا البيع بي خوش نسبة … و الحمدلله الوضع شوية تحسن … و علاقتي بالبنية صارت قوية و مثل مكلت انتهت بخطوبة و وراها بمرور الوكت عرفت البنية شكاكة كلش و تشك بكلشي … يعني اذا ما اجاوب على الارضي الي بالمكتب معناها اني مسوي شي … و قبل ماكو موبايل حتى الواحد رئسا يجاوب لان التلفون بجيبة و هيه متقدر هالشي .. و اذا يمنا بالمكتب عائلة مثلا ديحجون بيناتهم لو وي عامر وهيه صدفة تسمع الصوت معناها (تقوم القيامة) و كثرت المشاكل بيني و بينها و اخرها جان فصخ الخطوبة وكل واحد راح بحالة … و مرة من المرات احنا و بطريق شغلنا للمكتب اني وعامر .. السيارة مال عامر جانت برازيلي جديدة بس اكيد شمهما السيارات تكون جديدة تبقى معرضة للحادث (الله يبعد عنكم كل سوء) و بالطريق الدرايم شفت تفلش و افترت السيارة بيده و دخلنا بحايط مال بيت عالشارع العام … عامر مصار بي شي واني ماعرف منين جتي حديدة و فاتت بجتفي … و طبعا الحمدلله كمت على حيلي و صرت زين .. بس بخلال فترة علاجي جنت اتردد على مضمد بالغزالية و مضمد ثاني بمنطقتنا حتى ينظفولي الجرح لان كام يخزن شوية و يرادلة تنظيف … المضمد الي بالغزالية من عرفته بنفسي و كلتله محلنا مال عقارات هنا … كالي عندي كرايبي رجال جبير و بنته يدورون على مشتمل صغيروني للبيع … و عن طريق كلامه افتهمت انو الرجال زوجته ميته بالجديد و ميريد يبقى بنفس البيت الي ماتت بي زوجته لان بنته حالتها النفسية كلش تعبانة بسبب الذكريات الي بالبيت .. و يريد يغير البيت بلكي بنته شوية تتحسن لان حتى دوامها بالكلية تركته و تعبت كلشي … و لكيتله المشتمل و طبعا هالحجي اني تحسنت بي و الجرح صار زين .. بالتحويلة مال الرجال قررت اساعدهم اني وعامر و المضمد لان نعرف ماعدهم احد خطية … و ساعدناهم و بالصدفة صارت عيني عالبنية و ماعرف الي صار بوقتها يعني النظره مفتهمت نفسي بيها (اعجاب لو شفقة على وضعها لان شكلها صدك تعبان و مبين هالشي من عيونها) و الرجال ابوها (ابو دنيا) الله يحفظة ويحفظ والديكم فد انسان كلش طيب و مثقف ولسانه ينكط عسل .. من هذولة البغادة القديمين كلش و يجر الكلمة من يحجي و من يشرح فد موضوع يحسس الواحد كاعد ديشوف التفاصيل بكل حرف بيها … حبيته للرجال و هو هم حبني و كام مرات يتردد علينا للمكتب مال عقارات يكعد يمنا … بهل الفترة صارت احداث ٢٠٠٣ و وكفنا عن الشغل و عزلنا المكتب لان حرب و محد ميجي … و تفرقنا كل واحد راح محافظة بسبب الحرب و بعدين خلصت الحرب و رجعت الناس فتحت محلاتها لان الناس تريد تعيش خو متبقى هيج … المهم … جتي فترة صار كتل عالحلاقيين و على الدلالين اذا تذكرون و تقريبا هالشي بكل مناطق بغداد … و فد يوم احنا متجمعين بالمكتب كالعادة وقت المغربية و فاتت سيارة بيها ملثمين خرطت طلقات عالجامخانة مال مكتب و كملت طريقها … الجام تكسر و كلنا نمنا بالكاع و بس راحت السيارة كل واحد بينا كام يتفقد جسمة اخاف متصوب لو لا .. جنا بالضبط بالمحل اربع اشخاص اني وعامر و احمد (ولد صديق عامر) و ابو دنيا .. كمت اني و الحمدلله ماكو شي بيا وباوعت على عامر هم مابي شي و ثنينا اني وعامر باوعنا على احمد لكينا جامد و يأشر على ابو دنيا لان متمدد بالكاع و شفنا الدم بالكاع عالكاشي و من الصدمة كلنا كمنا نصيح بنفس الوقت … و رحنا عليه و طبعا هو مابقى بي ولا نفس رئسا سلم روحه الطيبة الطاهرة بيد رب العالمين ….. اكو محلات عالسايد الثاني من المكتب التمو و صارت هوسة كبال المكتب و كبل ودينا الرجال للمستشفى بس تلاثتنا نبجي الطريق كله و اني الطريق كله لازم ايده ابوس بيها واكله كوم عمي ترى دنيا بقت وحدها و محد ماعدها غيرك ... كوم عمووو و ابوس ايده قوي و اشمشم بيها .. و راح عمو ابو دنيا و دنيا صدك بقت وحدها و عاشت ببيت المضمد لان ماعدها احد غيرهم … و المكتب مال عقارات عزلنا نهائيا و وكفنا عن الشغل .. و عامر حول شغلة بالسيارات (المنافيست) و اني هم اشتغلت وياه بس دنيا مطلعت من راسي ابد …. و حجيت هالشي لعامر .. و كال والله لا تفوتها لان خطية و اني وياك بكلشي و مستعد اساعدك بكل التكاليف .. كلتله لا خوية مستورة و الحمدلله .. و رحت للمضمد وطبعا هالحجي بعد فترة جبيرة .. و تقدمت عالبنية و وافقو الناس و تزوجتها و الحمدلله على كل حال .. حاولت اعوضها عن كلشي و طبعا مستحيل راح اعوضها بس الحمدلله والشكر ورى اول طفل دنيا تحسنت هواي و خصوصا سمينا اول ولد على اسم المرحوم ابوها و وراها الله رزقنه ببنية و نحمد الله على كل حال عايشين و مرتاحين و صح العيشه بسيطة بس مرتاحين و منريد من الله غير الستر و العافية .. لا نريد قصور و لا نريد جاه و مال بس اهم شي نعيش بسلام …. و اخيرا الله يحفظكم
(ابو دنيا)
انتهى
اخوكم ابو بغداد سايق التكسي
#ابو_بغداد

هذه القصص منقولة من صفحة أبو بغداد على الفيسبوك .. يرجى متابعتة
Abo Baghdad : https://www.facebook.com/AboTxei