هاتفي المفقود

١لقصه كامله

#هاتفي_المفقود
الجزء الاول
اماسي الليل
بابا وين صرتي مو خليتي بالي عليج والله يا بابا تلفوني ضاع وبقيت ادور عليه وما لگيته
وين ضيعتي بابا /بالمول اظاهر من نزلت من السياره واكع مني لان مبقيت مكان ما دورت عليه بالسياره وبالصيدليه وسألت حارس الكراج ورحت على الامانات كلت بلكت احد لگاه ماكو
المشكله ادك عليه مطفي
قصتي بدت سنه ٢٠١٠
اعرفكم بنفسي اسمي سالي عمري بداية القصه ٢٧ سنه منفصله قبل سنتين يعني عمري ٢٥ سنه بوقتها قصتي ويا طليقي اتزوجنا عن حب بالاردن تعرفت بي بالجامعه لكن جنت معميه بالحب لدرجه جنت اسمع من هوايه ناس يحذروني منه ومن خيانته الي خلال فتره الخطوبه بس اني جنت ساده عيني واذني لان حبيته لدرجه وتعلقت بي اتزوجنا بالجامعه اخر سنه جنت فرحانه وسعيده الى درجه متنوصف اجلنا موضوع الاطفال الى ما بعد التخرج وهالشي جان رحمه من رب العالمين ورا سنه ونص زواج والدي تمرض ورحت بقيت يم اهلي كم يوم ورجلي كان عنده علم ما اكدر ارجع للبيت خلال هالايام لان ابويه وامي كبار بالعمر واني وحدي باقيه وياهم بعمان وراح اعرفكم بعائلتي بعدين
المهم بيوم احتاجيت شغله من بيتي وشفت بابا شويه احسن گتلهم اروح ساعة وارجعلكم
رحت للبيت تقريبا ساعه ١٠.٣٠ اعرف برجلي هيج وقت مو بالبيت ويا جماعته بالكافيهات لذلك ما دكيت عليه كلت اروح وارجع بسرعه حتى ميصور اني راجعه راح ابات ويجلب بيه
المهم رحت للبيت فتحت الباب حسيت من وضع البيت اكو احد
بس البيت من الامام كله مطفي الاضويه ومن دخلت جوه كلها مشتغله استغربت المهم رحت لغرفتي فتحت الباب وجانت هاي الصدمه رجلي ويا اعز صديقاتي ومتزوجه ورجلها صديق رجلي طلعت من البيت ركض بدون وعي ولا نزلت دمعه من عيني سقت سيارتي واني مخدره مثل الي دا احلم ورجعت للبيت ما حجيت شي اهلي حسوا بيه شي گلولي شكو ابويه حالته متسمحله ينقهر او ينصدم
گتلهم ماكو شي طبعا رجلي يركع تلفونات من طلعت الى ثاني يوم العصر
گلي اني هسه راح اجي اشرحلج
دزيتله مسج ما اريد اشوف وجهك وورقتي توصلني خلال ايام بدون فضايح لان ما اريد اهلي يتأذون
وبالفعل ورا كم يوم وصلتني ورقة طلاكي واخذت كل حقوقي كامله بس كل القوه الي جانت عندي بجيت بچي مو علمود رجلي لا بچيت لان جنت غبيه وغافله عن سوالفه والكل جانوا ينبهوني وهو زباله واني جنت معميه لكن الحقيقه هالموقف الي شفته بي خلاني تلعب نفسي منه وما اكدر اباوع بوجهه حتى بالمحكمه حسيت نفسي بس اريد اخلص منه يمكن الي يقرا يحس اني قويه بالفعل اني قويه من برا لكن من جوه انسانه محطمه
قصتي اني من عائله مكونة من اب تاجر وعنده شركة مواد بناء
وام دكتوره واخوه ٢محمد خريج طب اسنان وعايش بلندن ومتزوج بت خالي وعنده اطفال ٢ولد وبنيه واحمد التؤام مالتي الي هو چان اقرب انسان الي واخت لينا اكبر مني ب٤سنوات مخطوبه لابن خالتي اخو زوجة محمد قصتنا بعد السقوط اخويه احمد خطفوه ورادوا من عدنا فديه جانت كلش چبيره لان يعرفون ابويه حالته الماديه زينه لكن تعرفون اغلب الناس الي عدها فلوس قبل تشتري املاك وتبقي مبلغ يعيشهم بالبنگ لان باقي الفلوس تشتغل بالتجاره لذلك ابويه انضنك بس راد يجمع المبلغ لان الي عنده ما يسد عشرين بالميه من المبلغ الي رايدي اطر ابويه يبيع املاك بفلس ونص لان ماعدنا وقت منطينا العصابه مهله واداين الباقي من عمي وگله تدخل ويايه شريك بالاملاك العندي بكد المبلغ الي اخذته منك
المهم جمعنا الفديه لان گلوله تسلمها اي يوم ابنك العصر يمك وسلمها ابويه على طريق ابو غريب ورجع للبيت ينتظر وقلبنا مثل النار الى ان صار العصر سمعنا صوت عياط. طلعنا للشارع لگينا اخويه محمد مذبوح وشامري على رصيف يم حاوية الزبل وجيرانه طالعه دتذب الزباله وشايفته ومتعرفه عليه
الصدمه الي مريت بيها من شفت اخويه مذبوح و امي مثل المخبله وابويه صارت عنده جلطه سببت عنده شلل اني شلت هم كل واخد بيهم ونسيت نفسي الى ان صار عندي مرض نفسي ابچي يوميه بليل وتجيني كوابيس واحلام ابقى اعيط
اني وابويه فوگ مصيبتهم گالوا خلص نطلع لعمان
اول ما وصلنا ودوني على دكتوره نفسيه وبقيت اتعالج عدها اشهر يله صرت زينه وبعدها قدمت على كليه وجنت هسه طالعه من الحاله الي جانت عندي جان اخويه احمد صديقي ومن فقدته فقدت هوايه امور لذلك اول ما بدا بسام يتقربلي بالكليه تعلقت بي وملى عليه الفراغ العاطفي الي احمد چان ماليه وهالشي عرفت بي بعد ما انفصلت عرفت اني ما حبيت بسام جان مجرد انسان تعلقت بي بعد صدمه وفراغ عاطفي حاولت اوهم نفسي بي وبحبه وتعلقي بي
كل صدمه امر بيها تخليني اصير اقوى المهم اختي لينا جانت مخطوبه وخطيبها بأستراليا من طلعنا لعمان ورا سنه ونص طلعت تزوجت هناك يم بيت خالتي واخويه محمد ومرته حضروا بدل من عدنا
بس احنه هنا سوينالها حفله صغيره بس اقارب ومعارف بالبيت
اخر سنه بالكليه اتزوجنا اني وبسام وبقيت يوميه اروح اطمئن على امي وابويه
الى ان انفصلت وعرفت سبب زواجه مني ما اتوقع الحب لان الي يحب ميكدر يخون بس لان اني شريفه وهو انسان مسقط وميأمن باي وحده تصير مرته من لگى وحده مثلي نظيفه وطاهره لحد يوم الزواج يله خليته يلزمني گلك هاي العب براحتي من وراها واني مأمن راح تصون شرفي ولان جنت واجهه مشرفه اله ولاهله لان اهلي متمكنين ماديا ومن عائله مثقفه وواصله واني الحمد لله جميله وهوايه تقدمولي بس قلبي اعمى اختار بسام
المهم بعد الانفصال مسحت كلشي ماضي مؤلم بحياتي
اول همي صاروا امي وابويه اني اشتغلت بصيدليه بمول بعمان وابويه شغل فلوسه ويا جماعه والحمد لله امورنا تمام وبعدها املاكنا ببغداد
#هاتفي_المفقود
الجزء٢
اماسي الليل
اخويه محمد وعائلته يجونا بالعطل مال المدرسه علمود جهاله
ولينا لا كل كم شهر تجي لان اهل زوجها بعمان قريبين على بيتنا
واخو زوجها الولد شامل دائما يسأل علينا
حسيت بي اكثر من مره عينه عليه الولد كلش مؤدب وابد ما فديوم سمعني حجايه بس من تصرفاته ويايه عرفت عنده مشاعرتجاهي بس اني كرهت شي اسمه رجال وزواج وجربت حظي مره وما افكر اعيدها طول عمري اخذت نصيبي وفشلت
افكر بمستقبلي واهلي افضل
بيوم كعدت مستعجله لان عندي دوام وتأخرت عن الصبدليه واني دا اسوق بالطريق خابرت على البنيه الي تشتغل ويايه انطيتها خبر الشارع زحمه خليت التلفون بچيب القمصله وصلت للمول دا ادور مكان اركن شفت سياره دتطلع من مكانها رجعت شويه دا انتظرها تطلع ويا ما طلعت السياره كسر عليه واحد واخذ المكان ومبتسم اني بقيت دايسه على الهورن معصبه المهم طلعت سياره ورايه هو اشرلي عليها معناها روحي اطبگي هناك ويضحك لفيت ورحت ركنت سيارتي بس فايره اريد اروح ارزله المهم نزلت ما لگيته رحت للصيدليه اول مدخلت
صباح الخير اماني
اماني :صباح النور
سالي الدكتور (صاحب الصيدليه )وصل
اماني :لا لساتوا يمكن يتأخر اليوم
سالي :الحمد لله /انشغلت بعدها بالمراجعين للظهر مثل كل يوم اتصل على اهلي اطمئن عليهم ادور التلفون ماكو مابقيت مكان المهم اتصلت من تلفون اماني اطمئن على اهلي لان تصورت التلفون بالسياره ولان الصيدليه عليها شغل مكدرت اروح اجيبه وابقي اماني وحده واليوم الدكتور ماكو لذلك اخذت تلفونها وخابرت على اهلي
هلو بابا شلونكم
الاب :الحمد لله شو داگه من تلفون اماني /من شفت رقمها بقى بالي عبالي بيج شي
سالي /لا بس نسيت تلفوني بالسياره ومكدرت اروح اجيبه وكلت هسه تقلق عليه
الاب:اي والله هسه امج قبل دقايق سألتني سالي خابرت گتلها لا
سالي :يله حبيبي راح اروح عندي مراجع مع السلامه
الاب :مع السلامه
بعدها خلص دوامي طلعت للسياره لگيت على جام السياره واحد راسم قلب وكاتبلي كل هالجمال وسيارتج وصخه
صدك بهذا اليوم جنت كلش تعبانه ومعصبه من بدايته وحسيت كل شويه تجيني مغثة وهاي وحده منهم فتحت باب السياره ادور التلفون ماكو مابقيت نبشت السياره تنبيش ما لگيته
رجعت للصيدليه ماكو رحت على السكيورتي الي يفترون يم باب كل كراج هم ماكو ورحت على ادارة المول بلكت احدلاگي مسلمه للامانات ماكو تلفت اعصابي لان تلفوني نوكيا N7 مابي رمز ومنقهرت على التلفون بس بي صوري وجانت بي صور عرسي وصور اني وبسام حتى بملابس النوم مثلا كاعده بحضنه وعندي صور مال حفلة لينا جانت بس نسوان واني لابسه بيها فستان يادوب مغطي جسمي قصيره كلش وتنشد على الرگبه والظهر كله طالع وفديوات اركص بيها بالحفله وكومه صور ما اتذكر شنو بس اعرف بي صور الي بملابس ووضعيات مو مال احد يشوفها
تخبلت اخر شي شفت نفسي تأخرت رجعت للبيت بقيت ادك على التلفون من تلفون ابويه كله مغلق وهذا الحجي تلفوني جان مفول
بقيت لتالي الليل ادك على رقمي مغلق
بقيت اريد انام مكدرت من القلق والتفكير المهم دكيت اخر محاوله شو رقمي دك وبعدها انغلق
ورا نص ساعه وصلتني مسج من رقمي على رقم ابويه الي دا ادك منه مكتوب بيها
(شكد شايف جمال واغراء بس الي شفته بالصور طير عقلي )
من قريتها انجنيت وكمت ابچي دكيت التلفون مغلق
دزيت مسج كلت بلكت من يفتحه يشوفها
كتبتله الله يخليك رجعلي التلفون وشكد تريدانطيك مكافئه لان التلفون يخص زوجتي واتفق وياك اخليك المكافئه بمكان تروح تستلمها وتسلم التلفون حتى تأكن اني ما اعرفك
كلت بلكت يعرف المسج من رجال وتلفون زوجته يخاف ويرجعه ويطمع بالمكافئه
بقيت انتظر يجيني اشعار المسج وصلت ماكو طبعا رحت للدوام ثاني يوم مطفيه وبالي مو يم الشغل وكم مره اغلط بين ادويه الزبائن والدكتور انتبه عليه گلي في مشكله سالي
جاوبته اعذرني عندي ظرف بالبيت شاغل تفكيري ومدا اكدر اركز زين اوعدك راح انتبه اكثر
الدكتور : خلص روحي للبيت ارتاحي مافي مشكله انا واماني نسد مكانك اليوم
سالي :تشكرت منه لان انسان كلش راقي هو عمره ب ٤٠ وتزوج صديقتي ضحى جانت تشتغل ويايه بالصيدليه اكبر مني ب٦سنوات وكلش علاقتي بيها قويه والدكتور حبها واني صرت الوسيط بينهم الى ان تم الزواج ومن يومها الدكتور كلش علاقتي قوت بي لان زوجته صديقتي المقربه وصارت علاقتي بيهم عائليه
رجعت للبيت ركض على تلفون بابا لگيت ماكو مسج ولا المسج الي دزيته واصل بقيت كل شويه اشوف المسج وصل لو لا
#هاتفي_المفقود
الجزء٣
اماسي الليل
تقريبا ساعة ٧ وصلت المسج اني رأسا من شفتها وصل دكيت على رقمي دگ وسوولي رفض
دزيت مسج رجاءا رد لان عرفت من المسج الي وصلني البارحه هو ولد
ورا شويه دزلي مسج من رقمي
كتبلي الرقم الي دتستخدمي وترسلين منه الج لان اريد ادزلج شي خاص مو مال احد يشوفه غيرج
اني فهمت عرف اني صاحبة الرقم والمسج مالتي عرفه كذب وخفت ليدز شي على تلفون ابويه صوره من الصور
او يطلب مني تأكيد اني صاحبة التلفون
دزيتله لا مال ابويه وياريت مدز عليه شي الا من ارسلك اني
دزلي اذا تريدين تلفونج يرجعلج دبريلج خط جديد ومن نتفق على المكافئه اسلمج التلفون
جاوبته ماشي باجر اروح اشتري خط شكرا لتعاونك كلت خلي امشي وياه المهم يرجعلي التلفون لو حتى يطمع بمبلغ ماعندي مشكله
بعدها انغلق تلفوني فقدلي اعصابي بس اريد الصبح يطلع حتى اشتري خط بقيت الليل كله افكر بالتلفون واتذكر شنو بي من صور حتى لينا عدها صور ويايه من رحنا للحمام النسائي بيوم حفلتها ولافين نفسنا بمناشف وگاعدين بالحمام نشرب چاي اني حاضنتها
اوف يا ربي اطلع من مصيبه ادخل بمصيبه والله كرهت حياتي وقلت حظي شوكت ارتاح لا من بنيه ولا من تزوجت ولا من اطلكت
يعني اذا صوره وحده طلعت الناس تاكل وجهي وتالي يكولون اطلكت لان مو شريفه وتالي يطلع بسام خوش ادمي
ياربي سترك ورحمتك لخاطر ابويه وامي ياربي اني بحياتي ما عاصيتك ولا مسويه شي غلط
من التفكير تعبت ونمت
ثاني يوم رحت للصيدليه حاولت افصل الشغل عن مشكلتي لان عيب من الدكتور وبقيت اشتغل من ضمن المراجعين على الصيدليه دخل شخص ابتسملي وراد ادويه بقيت اريد اتذكر وين شايفته من رحت اجيبله الدوا اتذكرته الي اخذ مكاني بالبارك شكد قليل ذوق ومكروه
رجعت دخلت الدوا على الحاسبه وكالبه وجهي عليه انطيته الدوا هو مبتسملي گتله هلكد حسابك جاوبني المفروض تتعلمين تبتسمين للزبائن لان كلهم مرضى ما ناقصهم تكشيرتج
جاوبته حضرتك معني بهاي التكشيره اما باقي الزبائن فاني ابتسملهم ميحتاج تنبهي ضحك گلي لان اخذت المكان حاقده عليه
جاوبته هي مو مسألة مكان بكد ما هي مسألة ذوق وياريت تحاسبني على الدوا ماعندي وقت اقصقص وياك
جاوبني اذا على الذوق اني صح عديم الذوق واذا على التقصقص غير وقت نقصقص
جاوبته ما اتصور دفعلي الفلوس وجاوبني بأبتسامه لتكونين واثقه زياده عن اللزوم /وراح
سولفت لاماني عليه لان شافته من الجام (الي يفصل الصيدليه الى قسمين ) ديحجي ويايه وسألتني عليه
مين هاد الشاب الحلو بيأربلك
جاوبتها لا وحچيتلها الموقف سألتني هو عراقي ولا اردني
جاوبتها لا عراقي
هو ملامحه صدك حلوه وشكله العام حلو ومرتب ومبين متمكن من سيارته وملابسه ولهذا شايل خشمه ونظراته الي مو راحه حسيته ابو بنات
بعدها التهيت بالسغل الى ان كملت دوامي طلعت من الصيدليه بوجهي لمحل الموبايلات بنفس المول اخذت تلفون ونزلت اخذت سم كارت هم من فرع شركة الاتصالات الي بالمول وسألت الولد گتله عفيه اذا تلفوني ضايع وادك عليه مفتوح تكدر الشركه اطلعلي وين موجود
الولد گلي هاي لازم تقدمين بلاغ بالشرطه من ينطوج ورقه تبليغ توديها للشركه يشوفون وين مكان التلفون من مكان الشبكه الي ملتقطها ينطوج العنوان
اني أيست من هالطريقه لان الصدك اني واهلي مو وجه مشاكل يعني اني رجلي شفته بعيني ما سويتله مشكله وفضيحه اخاف على اهلي من المشاكل واحنه هنا وحدنا واني بنيه ابويه مقعد وامي مره جبيره ماعدنا سند ولا احد يدافع عن حقنا لذلك اني امشي بصف الحايط حتى ما اتعرض لمشكله
ومال اروح اقدم بلاغ واهلي يدرون صعبه ابويه صحته تتعب
المهم اخذت التلفون والخط ورحت للسياره ركبت شفت ورقه صغيره بكد چف الايد على الجامه الاماميه نزلت اوخرها شفت بيها كتابه بالجاف
مكتوب حتى من مكشره انت حلوه ومرسوم ❤️
اني عرفت هو نفس الشخص الي اليوم شفته بالصيدليه وهو نفسه الي كتبلي كل هالجمال وسيارتج وصخه وراسم ❤️ على جام السياره بنفس اليوم الي اخذ مكاني
الصدك حبيت حركاته بس مجرد ابتسمت لتصرفاته ومن گلي اني عديم الذوق يعترف شخصيته غريبه
رجعت للبيت لكيت اهلي بالحديقه ويمهم بيت اهل سنر رجل لينا خاله وعمو
سلمت مساء الخير
جاوبو ا مساء النور /گتلهم شلونك عمو شلونج خاله ان شاء الله بخير /جاوبوا بخير
خاله گلتلي شلون الدوام مرتاحه بي گتلها الحمد لله گلتلي زين سويتي كعدت البيت بعمان ملل
گتلها الحمد لله بقيت شويه اسولف وياهم بس بالي يم التلفون اريد افوت ادز مسج من رقمي الجديد على رقمي القديم الي مضيعته
ورا شويه ترخصت ودخلت لغرفتي خابرت على الشركه حتى يفعلون الخط واكدر استخدمه وبقيت وياهم على الخط علموني كل الخطوات انتظرت وراها بساعتين تفعل خطي
دزيت مسج
مرحبا هذا خطي الجديد ممكن تتواصل ويايه عليه دزيت المسج وبقيت انتظر توصل لان طول ما الخط مغلق الرساله متوصل من توصل يعني انفتح الخط بقيت اترقب ماكو
طلعت يم اهلي وراحوا الخطار وبعدها سويت العشا وهم ماكو واخر شي من خلصت كل اموي بالبيت واهلي راحوا نامو دخلت للغرفه لگيت مسج من تلفوني القديم من تكونين وحدج اتصلي
يعني المسج الي دزيته وصل وجاوبني قبل نص ساعه
دگيت على رقمي القديم من الجديد
جاوب شخص الو
سالي:الو مرحبا /الشخص :اهلا
سالي:صوته مبين مال واحد متمددكتله شوكت اكدر استلم التلفون
الشخص :بالاول غير نتفق على المكافئه/جاوبته اي عادي الي تطلبه /گلي بالاول ابقي ويايه نسولف حتى اتأكد انتي صاحبة التلفون
سالي:اللهم طولج ياروح شوكت يخلص هالكابوس گلت بقلبي
جاوبته ماشي شنو اسم حضرتك گلي عثمان
عثمان :وانتِ سالي صح عرفت من المسجات /جاوبته اي نعم
گلي انتِ منفصله /جاوبته ياريت ما ندخل بشغلات خصوصيه
گلي مو حتى اتأكد جاوبته اي منفصله گلي ولا تزالين ممرتبطه
جاوبته لا گلي مو شفت مسجات و ردت اتأكد من اجابتج اني بداخلي اگله شكد سخيف مفلسه للتلفون حتى المسجات قاريها
گلي :خلص باجر اشوفج باي مكان يعجبج گتله بكيفك ماعندي مشكله بأي مكان
گلي يعني اذا بشقتي تجين جاوبته لا قصدت مكان عام گلي خلص ب كافيه نلتقي اي ساعه
گتله الطهر لان عندي دوام /جاوبني ماشي وحددنا الساعه والمكان اتقصدت الظهر حتى ميشوفني احد واختاريت كافيه بمكان بالافرع ممعروفه حتى ما اشوف احد اعرفه وتصيرلي حجايه
#هاتفي_المفقود
الجزء٤
اماسي الليل
ثاني يوم
طلعت لشغلي وجنت شايله هم اذا الدكتور اليوم مموجود شلون راح اطلع الظهر من وصلت للصيدليه الحمد لله لگيت ضحى جايه اليوم لان الدكتور عنده استلام ادويه
دخلت هلو ضحاوي اليوم شعجب
ضحى :هلو يا بذاته صار اسبوعين لا شايفتج ولا تلفون
سالي :والله حقج بس بابا جانت عنده فحوصات والله وملتهيه وهاي صار ٤ايام مضيعه تلفوني وحايره شلون الگاه
صحى :وين ضيعتي
سالي :لج مو المهم التلفون المهم الصور الي بي يعني اني فوگاها محجبه ومطلقه اذا طلعت صوره الناس تاكل وجهي لج كل صور عرس لينا بيها
ضحى: وتالي وين راح تلگي
سالي :الگاه ان شاء الله اليوم المفروض اروح استلمه لذلك عفيه ضحى اطلع ساعه زمنيه حبابه اجيب تلفوني وارجع
ضحى:ماشي اني اصلا باقيه وياكم بدل شادي اليوم ماعندي شي
سالي :على الوحده موعدي
الهيت بالشغل ويا ضحى واماني من صارت وحده الاربع گتلها لضحى راح اطلع
رحت للكافيه مابي احد فارغ بس ميز بي بنات ٢ وميز بي رجال ومره كبار بالعمر
دك تلفوني الو
عثمان :الو هلو سالي اصعدي بالطابق الثاني اني موجود دا نتظرج
سالي :ماشي /صعدت للطابق الثاني بالكافيه وجان فارغ مابي احد من التفتت شفت الولد الي حجى ويايه بالصيدليه البارحه مبتسملي اشرلي سويت نفسي ما انتبهتله شلت تلفوني ودكيت على رقمي القديم حتى اشوف هذا الي اسمه عثمان وينه
دگ التلفون سمعت صوت رنة تلفوني بالمكان
شفت الولد شال التلفون بس توقعت هو جايي اتصال
بس من انفتح الخط وهو گال ألو وصوت الصدا من الشخصين بنفس المكان التفتت عليه گلي تعالي اني نفس الشخص الي عنده تلفونج
رحت گتله مساء الخير
جاوبني مساء النور /شنو تشربين
سالي :لا شكرا الحقيقه طالعة زمنيه من شغلي ولازم ارجع بعد نص ساعه ياريت تگلي شكد تريد مكافئه وتسلمني تلفوني اشكر تعاونك ويايه بس چان المفروض البارحه من اجيت للصيدليه تگلي التلفون عندك والي تريده انطيكياه
عثمان :ابتسمت وگتلها لحد البارحه جنت متردد بالمكافئه الي اريدها بس حاليا لا ثبتت عليها
سالي :شكد تريد اكتبلك بي صك وتكدر تصرفه واذا تريد باجر اطلع وياك ومن اخلص دوام لاقرب بنگ اسحبلك المبلغ
عثمان :ابتسمت گتلها شكلي يوحي محتاج فلوس /جاوبتني لا العفو بس اني كتلك انطيك مكافئه لان راح ترجعلي تلفوني
جاوبتها بس اني ما اريد مكافئه ماديه ومراح ارجع التلفون اليوم
الى ان نتفق على المكافئه
سالي :حضرتك شتريد بالضبط مدا افهم ياريت تحجي لان گتلك وقتي ضيق
عثمان :اريدج انتي ليله وحده وتلفونج يرجعلج
سالي :انت قليل ادب والمفروض من الاول اعرف بيك مو ادمي
طلعت وعفته ودموعي تنزل ياربي شنو هالمصيبه هذا مراح يعوفني بحالي اكيد
عثمان خليني اعرفكم بنفسي اني اسمي مازن مو عثمان هذا الاسم اختلقته من سألتني على اسمي
عمري ٣٠ ولاده وجنسيتي استرالي من اصل عراقي ممزوج لان عايش حياتي طول بعرض سهر وشرب ونسوان صداقات بس مامتقرب لوحده بحياتي مجرد صداقه طبه وطلعه وتلفونات وحفلات بيها راقصات اتونس وارجع لشقتي
اني تسلسلي ٣بين ٥ اخوه الاصغر مني اختي متزوجه ووالدتي والدي متوفي
اهلي انتقلوا للامارات علمود الشغل وعدنا شركة هناك امي واخويه الصغير كاعدين بشقه
واختي متزوجه وعدها طفل. والالاكبر مني حازم متزوجو عايش باستراليا بعده يقود الشركه هناك ومراد متزوج وهم كاعد بالامارات لازم فرع الشركه الي بدبي احنه ال٣ عدنا شركه ادويه وكلاء لشركات ادويه عالميه وحازم ومراد بحكم متزوجين وعدهم التزامات عائليه يشتغلون من مكان سكنهم واني خلوني استقر بعمان حتى ادير الفرع الي بالاردن والعراق لان ما عندي التزام مثلهم
لذلك اخذت شقه بعمان واستقريت هناك
وبيوم جان عندي موعد ويا صاحب صيدليه بالمول المفروض نلتقي بكافيه بالمول جنت كلش مستعجل وبقيت ربع ساعه افتر اريد اصف سيارتي ماكو ويا نزلتي بالطوابق صار كبالي مكان سياره دتطلع من دا ادخل بدل منها سمعت هورن ابتسمت لان عرفت هالحلوه جانت تنتظره ولو عندي وقت وامل الگي مكان ثاني جان تركته الها بس مو وكت الشهامه وذوق حاليا
البنيه جانت كلش جميله لدرجه بقت بالي طول فتره انتظاري بالكافيه بعدها كعدت ويا صاحب الصيدليه واتفقت وياه بعدها رجعت للكراج اجتي عيني على سيارتها جانت كلها تراب رحت لسيارتي فتحت الباب وسديته لان ردت اشوفها مره لخ رحت دا اكتبلها رقمي على جامة السياره من وصلت يم السياره سمعت تلفون يدك نزلت اشوف وين الصوت جان جوه السياره من جهة الباب الي هي تركب وتنزل منه اخذته مبتسم راح اشوفها مره ثانيه وبدون ما اكتب رقمي بس كتبتلها كل هالجمال وسيارتج وصخه ورسمت ❤️
رجعت للشقه طلبت اكل وطلعت التلفون اتفرج الصور عقلي طار من جمالها شكد ما هي جميله بالحجاب بس ملكة جمال بدونه تخبلت عليها بس شفت صور ويا شاب بعدين عرفت هذا رجلها لان لگيت صور زفاف تجمعهم
صار عندي خيبه امل ما اعرف ليش قلبي نعصر وضجت بيومها شمرت التلفون وقررت ارجعه للبنيه لان طلعت متزوجه ورا ما وصلني الاكل كعدت اكل اجتي مسجات لتلفونها صار عندي فضول گلت يجوز هي او رجلها
فتحت المسجات جانت من وحده اسمها لينا كاتبتلها (حبيبتي سالي شلونج ماما وبابا شلونهم اكلج بعدج قافله على موضوع الارتباط لان اكو بنيه صديقتي تريد بنيه لاخوها واني گتلها عندي اخت منفصله بس مضربه عن الزواج وشوفتها صورج تخبلت عليج كلتلي عفيه قنعيها اخويه كلش حباب ودكتور عمره ٣٧سنه شتكولين رديلي خبر )
من خلصت المسج غلقت التلفون ابتسمت لان طلعت مطلقه وما مرتبطه حاليا بيني وبين نفسي بقيت افكر اتعرف عليها اذا بت اوادم اتقدملها
بليل طلعت ويا جماعتي نسهر نشرب رجعت للبيت متونس شفت التلفون تذكرتها گلت اني زمال اكو واحد عليش عيشتي وحر يفكر بتزوج ويربط نفسه بمره وجهال
هي البنيه مطلقه يعني اكيد مو شي (مو راحه هاي نظرة المجتمع للمطلقه مترحمها دائما تعيبها ويشوفوها شي رخيص الكل يطمع بي )يعني اكدر اخذ منها الشي الي اريده بسهوله لان مو بنيه واشبع رغبتي بيها لان كلش دخلت دماغي واريدها باي طريقه
فكرت استخدم التلفون اهددها بي بس بالاول خلي اشوف شنو ميتها اذا سهله ماكو داعي التهديد افاتحها مباشره بالموضوع واذا طلعت صعبه استخدم التلفون لان بي صور اكدر اخوفها بيهم
ركضت على التلفون دا اشوف عدها فيس /فتحته لگيت بي فيس ومفتوح يعني اكدر انشر بي الي اريده واخوفها اذا امتنعت
المهم من فتحته اجتني مسج منها من رقم مدعيه عدها زوج وهو الي راسلي المسج لان التلفون لزوجته ضحكت عليها لان حاولت تتلوت بس شكلها متعرف اللف والدوران
رحت على المسجات دورت على مسجات بينها وبين طليقها وقريت كل المسجات وشفته يتوسل بيها وهي كاتبتله (انتهى كلشي وطلگ بدون مشاكل لا تجبرني احجي الي شفته وافضحك )
وعرفت من خلال المسجات ويا مجموعه من الناس هي مو وجه مشاكل وفقيره مو وكحه وتحتف على اهلها الحقيقه تعاطفت وياها لان شفت بعض المسجات توحي اكو ألم بداخلها بس تحاول تظهر نفسها قويه اطاهر هاي اقرب انسانه الها ولهذا تفضفض الها اسمها ضحى
بقيت افكر حرام ااذيها لذلك قررت ثاني يوم اروح للصيدليه اوديلها التلفون
لكن ثاني يوم من دخلت وشفتها كل احوالي تغيرت احس اكو شي بداخلي تعلق بيها اريدها وزاد هالشي من شفتها تتفحصني دتحاول تتعرف عليه اظاهر نستني لذلك طلبت ادويه
من رجعت شفتها مبوزه بوجهي عرفت عرفتني حبيت اداهرها
واخر شي من صدتني تعلقت بيها اكثر وفكرت ما ارجعلها التلفون واسوي الي براسي
صح جنت رافض هالشي بقلبي بس عقلي نغوى بيها وطلعت من الصيدليه بس قلبي يمها بقيت طول الطريق افكر بيها وشفتها هادئه ورزنه و عاقله محترمه نفسها وعمرها ووضعها كمطلقه من لبسها وتصرفاتها والاكثر من المسجات كدرت اتعرف على شخصيتها لان حتى طلعه بليل متقبل تطلع ويا صديقاتها تخاف من كلام الناس لان مطلقه معناها سمعتها تهمها ومن عائله محافظه
المهم رجعت للبيت فتحت تلفونها اجاني بليل گتلها جيبي خط جديد تحججت حتى اكدر احجي وياها
ثاني يوم بقيت طول فتره شغلي بالمكتب افكر بيها اخذت عقلي كله خبلتني مدا اعرف شنو الي صارلي لو بيدي هسه اروح اشوفها بس تحملت لليل رجعت للبيت حتى ما طلعت سهرت ويا جماعتي بس ردت ارجع افتح الخط ولگيت اتصال من رقم وعرفت هذا رقمها الجديد كتبتلها اتصلي من تكونين وحدج ردت اسمع صوتها وابقى احجي وياها
#هاتفي_المفقود
الجزء٥
اماسي الليل
ثاني يوم بقيت طول فتره شغلي بالمكتب افكر بيها اخذت عقلي كله خبلتني مدا اعرف شنو الي صارلي لو بيدي هسه اروح اشوفها بس تحملت لليل رجعت للبيت حتى ما طلعت سهرت ويا جماعتي بس ردت ارجع افتح الخط ولگيت اتصال من رقم وعرفت هذا رقمها الجديد كتبتلها اتصلي من تكونين وحدج ردت اسمع صوتها وابقى احجي وياها
ومن اتصلت ما انطتني مجال بقت تتعامل ويايه بحدود ومنطتني مجال وصلتلي بصوره غير مباشره هي متتقبل تحجي ويا احد غريب بخصوصياتها والي يربطنا حاليا التلفون لا غير
لذلك قررت اشوفها وجها لوجه واتفاهم وياها
وشفتها ثاني يوم وكعدنا وصدمتها بلي رايده شكد هي هادئه صارت حمره من العصبيه فقدت اعصابها ورزلتني وطلعت
صح بداخلي تأثرت بالي صار بيها بس مو بيدي كل ما اشوفها اكو شي يجبرني افكر وياها هيج
المهم رجعت لشغلي وبقيت افكر شلون فقدت /واجتي بالي فكره اخطبها بس ارجع واگول لا هاي مجرد نزوه لان عجبتني اريدها بس اخذ الي اريده منها راح تطلع من راسي وفكره الزواج دتجيني لان اعرفها صعبه ومراح تجي بسهوله واني رايدها لذلك دا اشوف الزواج اسهل طريقه
بعدين فكرت بطريقه اهددها ماكو غيرها
المغرب عرفت هسه هي بالبيت دزيتلها مسج كتبتلها
طلعنا عرف وعدنا اصدقاء مشتركين بالفيس يعني اذا انزل اي صوره او فديو الكل تشوفه وما اتوقع انت تريدين يصير هالشي لذلك فكري بالي ردته وانتظر اتصالج
سالي طلع من الكافيه مضروبه على راسي ممصدگه اني هلكد ثوله ودائما عندي حسن ظن بالناس وبالاخر يطلعون مو اوادم
اخذت سيارتي وطلعت للمول ودموعي ما اكد اوگفها من هلكد ما انقهرت على نفسي من طبكت سيارتي انهاريت من البچي ياربي ليش كل هذا ديصيرلي الي حبيته طلع واحد نذل وخاين وتزوجته واطلكت وصرت كدام العالم مطلقه والكل يطمع بيه ويتصور ممكن بسهوله ياخذ الي يريده
ومن جهه انقهرت على سذاجتي الي تخليني احكم على الناس دائما بالزين ومن اجي على الواقع انصدم الى متى وشوكت راح اتعلم الدرس وتلفوني الي مراح يرجعلي وراح تبقى الصوره غصه بصدري وخوف من الي جاي
ياربي اني ماعندي احد غيرك يوگفلي انت اعلم بحالي ياربي دبرني ودليني على مخرج من هالمصيبه
هدأت نفسي ورحت غسلت وبعدها رجعت كملت دوامي ولو ضحى حست بيه شي واكثر من مره سألتني تحججت گتلها من الطريق والزحمه والشمس معدتي قلبت وذبيت من راسي وهسه ارتاحيت الحمد لله ليضل بالج بقيت قلبي محروك وما اعرف افكر صح وخايفه من الجاي
خلص دوامي رجعت للبيت بابا سألني خيرة بنتي شو شكلج تعبان گتله لا اظاهر اكلت اكل وتسممت اليوم ذبيت من راسي
لذلك ابين تعبانه اترخصت من امي وابويه ودخلت لغرفتي
من التعب والتفكير نمت ما كعدت الاب ١٠ بليل كمت من فراشي رحت اشوف التلفون اتأكد اذا دز شي
فتحته لگيت منه مسج يهددني بالفيس الي جنت اصلا ناسيته وما اجى بالي جسمي كله بقى يرچف من الخوف والهبطه
وكاتبلي اكو اصدقاء مشتركين يعني اكيد عنده تلفوناتهم حتى اذا غلقت الحساب اقل ما بيها يدز صوره لاي واحد من الي يعرفه ويعرفني وانفضح ياربي شنو هالمصيبه الي وكعت على راسي واخر شي كاتبلي فكر واتصلي بيه
بشنو افكر افكر اغضب ربي لو ينزلي صوره وينشرها بكل عمان هم ما اسويها
دزيتله مسج( الي تطلبه مني مستحيل اكدر اسوي اذا انت متخاف الله اني اخافه حتى لو نزلت كل صوري مراح اطاوعك )
بعدها رحت صليت حتى ارتاح من الخوف والقلق حسيت اريد اقتل نفسي واخلص قبل لا تجيني حجايه لذلك توضيت وصليت وقريت قرآن نفسي اطمئنت ورجعت نمت
مازن : ما كدرت اطلع ويا جماعتي وبالي يمها /بعدها جنت اتفرج تلفزيون وانتظر منها اتصال بلكت التهديد يجيب وياها نتيجه سمعت التلفون رن رحت فتحته لگيتها دازه مسج فرت دماغي بي وحسستني بكم النذاله الي عندي وعرفت مراح اطاوعني حتى لو نزلت كل الصور بالفيس لان خلت مخافة الله فوگ كل شي وهالشي خلاني اتمسك بيها اكثر بس المشكله حتى اذا اريد اتزوجها اهلي مراح يوافقون لان مطلقه ومحد راح يجي يخطبلياها واكيد اهلها ميقبلون اخطبها بدون اهلي وبدون موافقتهم بقيت دايخ الليل كله قررت اروحلها ثاني يوم فكرت بحل بس ياريتها تتقبله
ثاني يوم رحت للصيدليه اول مدخلت حسيتها خافت شفت الدكتور رحت سلمت عليه وبقيت شويه احجي وياه بقت هي خايفه وتراقب وگفتنا سوا اتصور خافت لان توقعت اجيت عليه دا اكله شي يخصها لذلك ردت اريحها اتشاقيت ويا الدكتور وبقينا نضحك وبعدها طلعت رحت يمها گتلها انتظرج بالكافيه بالطابق الفوگ ومراح اطلب منج شي يغضب الله بس تعالي لتحاولين تجاهليني ومتجين لان من اعصب افقد ويجوز اسوي شي يأذيج
#هاتفي_المفقود
الجزء٦
اماسي الليل
سااي :من شفته دخل للصيدليه وراح على الدكتور قلبي وكع وكلت هاهيه اجى ينفذ تهديده بس بعدين من شفتهم يضحكون استغربت معقوله عنده سابق معرفه بالدكتور ويجوز الاصدقاء المشتركين يقصد من ضمنهم الدكتور بس ارتاحيت الحمد لله ميخصني الحجي بينهم
بعدها طلع راد يشوفني بصيغة تهديد الصراحه خفت منه لان دخل على الدكتور ردت اموت من الخوف عبالي راح يحجيله شي عني عاد ينزل صور بالفيس
ورا شويه اخذت رخصه من الدكتور بحجة اروح اكل وارجع
صعدت للكافيه التفتت شفته كاعد بزاويا رحت بدون سلام
كعدت گتله نعم اتوقع وصلك ردي على الي طلبته ولتحاول تفتحه مره لخ
مازن :اسمعي هو الطلب بعده قائم بس بغير صيغه
سالي :كمت من مكاني جاوبته شتريد تسوي سوي لزم ايدي گلي سالي دقيقه فهمتي غلط مراح اخليج تسوين شي يغضب الله جاوبته شلون بله
گلي اكعدي وافهمج كعدت گتله عفيه ترى اني بت ناس اخاف سمعت بيه مطلقه عبالك اني ساقطه ترى عندي مخافة الله لو توديني للتهلكه ما احيد عنها لذلك الله يخليك اعتبرني مثل اختك ورجعلي التلفون بدون طلبات تعجيزيه ما اكدر عليها وهنا نزلت دموعي لان دا اتوسل بي لدرجه حسيت بالمذله
مازن :ما اكدر اعتبرج مثل اختي وما اكدر اشيلج من راسي والي اريده نكدر نسوي بالي يرضي الله اتزوجج بعقد محكمه وبعدها ننفصل بدون ما احد يدري لا اهلج ولا اهلي وكل واحد يروح لحال سبيله وتلفونج برجعلج ولا كأنه بيوم شفتيني او عرفتيني فكري بهالشي ورجعيلي خبر مكدرت اشوفها دتبچي مديت ايدي مسحت دموعها گتلها هالشي خارج ارادتي واذا ما حصلته اعرف نفسي راح ااذيج الى ان احصله هذا طبع عندي بكل امور الحياة الي اخلي براسي لازم احصله واتبع كل الطرق لحد ما احصله
سالي :من رخصتك لازم انزل مع السلامه
مازن :براحتج مع السلامه /بقيت صافن معقوله هالبنيه هلكد مؤدبه ورا كل الي حجيته وياها ترخصت وكلتلي مع السلامه لو غيرها وحده تگلي الله ياخذك على الي دسوي بيه
سالي :رحت للحمامات غسلت وجهي وبقيت شويه الى ان ارتاحيت وبعدها كملت دوامي اتصل عليه ابويه يبلغني راح يطلع هو وامي ويا اصدقائهم لمطعم ويتأخرون جاوبتهم ماشي
من خلص شغلي رجعت للبيت فتت سبحت ورحت سويتلي اكل وچاي وكعدت اتفرج تلفزيون ردت ما افكر بشي اخلي التدبير على رب العالمين هو يطلعني من هالموضوع
ورا شويه دگ التلفون شفت رقم بدون اسم فتحته
الو
جاوبني الو سالي اني مازن
سالي :منو مازن /
مازن :سالي اسمي الحقيقي مازن مو عثمان
سالي :وان يكن بالنهايه انت نفس الشخص
مازن:سالي اسمعيني اني مو سئ لهدرجه الي انت مصورتها
اني بحياتي ما متقرب على مره بس الي ديصير وياج خارج عن ارادتي ما اعرف سبب تعلقي بيج من يوم الي شفتج تغيرت هوايه امور من ضمنها كعدتي حاليا بالبيت مو من عوايدي يوميه جنت اطلع اسهر ويا جماعتي بهذا الوقت بس انت ماخذه كل تفكيري
لذلك اريد ترجعيلي رد قبل ما اروح لبغداد نهاية الاسبوع عندج بعد ٣ايام فكري بيها
سالي: مازن اذا اوافق وكطعنا مهر بالمحكمه زواجنا يستمر يوم واحد وبعدها اطلگني وبنفس اليوم الي نكطع مهر بالمحكمه تسلمني التلفون
مازن :موافق والمهر الي تريدي هم اكتبلج بي صك
سالي :ما اريد منك مهر بس اريد ضمان يخليك اطلگني ثاني يوم
مازن :شنو الضمان الي تريدي اقبل بي
سالي :ما اعرف انت گلي
مازن :حتى اثبتلج ما بنيتي ااذيج او العب عليج اكتبلج وصل بيع وشراء حصتي بالشركه مالت اهلي يم محامي في حاله ما تم الطلاق بالتاريخ المذكور بالعقد
سالي :من سمعته هيج يحجي خفت منه اكثر لهدرجه راغبني وعنده استعداد يسلمني حصته علمود يوم واحد ورطت نفسي ما ادري شنو الي صار بعقلي وفتحت ويا هذا الموضوع والله خايفه من غبائي وين راح يوصلني
جاوبته انطيني فرصه افكر وارجعلك خبر جاوبني ماشي بس لتتأخرين عليه گتله اوكي
ورا يومين نعزمنا اني واهلي بعرس ولد گرايبنا بالقاعه
بيومها خلصت دوامي من وكت لان الدكتور وضحى هم معزومين الجاليه العراقيه بعمان اول ما طلعوا جانوا ناس تعرف ناس من ايام بغداد بصاية الاهل والوظائف والجيره بنفس المنطقه الناس قبل بالعراق متألفين وناس تعرف ناس وعلاقات قويه لذلك تشوفين بالعرس الواحد يلتمون هوايه من معارفج
المهم رجعت للبيت خليت مكياج لبست فستان اشتريته علمود الحفله وبعدها كملوا امي وابويه اخذتهم للحفله دخلنا القاعه جانت الترتيبات تجنن تذكرت قاعة عرسي شكد تعبت بيها ورتبتها وبقيت اكثر من اسبوع يوميه اطلع علىود التحضيرات من الصبح ما ارجع الى المغرب وتالي نهايتها زواج فاشل. الله يسعدهم ان شاء الله للعرسان
انملت القاعه بعدها وصلت ضحى والدكتور
ضحى :لج سالي حقيره ليش هيج طالعه حلوه
سالي :انت دوم مجامله
ضحى :لج سالي انت هلكد ما حلوه مسيطره
سالي :ضحى ميحتاج اكلج انت طالعه كلش حلوه لان من شفتج وشفتيني انت يوميه عندج عرس ومهتمه بنفسج
ضحى :لج الي ميدلل روحه محد يدلله اخذيها نصيحه مني
ورا شويه علنوا وصول العرسان بعدها بدوا يركصون على الستيج ولد وبنات اني الحقيقه جان عاجبني اروح اصفگ وياهم بس بقيت كاعده لان شفت اخت بسام طليقي وعيالها موجودين
مردت يحجون عليه واكيد هسه اهله حاقدين لان ميعرفون السبب الحقيقي
ورا شويه بابا گلي روحي بنتي غيري جو ويا البنات وضحى
جاوبته لا هيج مرتاحه افضل
وراها اجتي ضحى ودعاء اخت العريس ضمن كروب البنات صديقاتي الي نطلع سوا
چلبوا اكوم وياهم گتلهم ما اكدر اخت بسام موجوده ما اريد يطلعون عليه حجايه
ضحى :كافي سالي هو عايش حياته طول بعرض فوك الي سواه وانتي مدفعه نفسج الثمن يمعوده طز خلي يحجون هو من رضا على احد
سالي :سمعت كلمة ضحى كلت اني ظاله من كلشي اخاف وكلشي احسب وكل مشكله تجيني تاخذ مني احلى ايام عمري
رحت وياهم على الستيج نصفگ ونضحك ونتفرج على ركص الولد مثل المخابيل ورا شويه دخلت ملايين الراقصه تخبلوا الشباب عليها ورا ثواني بين ما دا احجي ويا ضحى على ملايين گتلها هاي تصغر متكبر التفتت شفت مازن لازم كاس وديركص وياها وكم ولد وياهم اظاهر اصدقاءه / ما اعرف ليش ضجت وانقهرت بداخلي هو هم شافني حسيته ارتبك اني گتلها لصحى راح ارجع للميز تعبت من الوگفه /رحت على الميز كعدت بمكان يصير ضهري على الستيج ما اريد اشوفه بقيت اسولف ويا بابا وماما والدكتور رجل ضحى ورا شويه ضحى رجعت بصفي وبقينا نسولف گتلها ضحى تروحين للحمامات گلتلي قبل ما اجي للميز رحت گتلها اوكي
طلعت من القاعه ورحت للحمام برجعتي بالممر شفت مازن واگف باب القاعه خفت لا دينتظرني ويروح احد يشوفه اكو يم الحمامات مكان بي استراحه رجعت كعدت بيها بين ما ردته يدخل يله اروح ادخل
دك تلفوني رقم مازن ما جاوبته ورا شويه سمعت صوت ورايه سالي انداريت مازن بسرعه وگفت دا اريد ارجع للقاعه گلي دقيقه جاوبته رجاءا لحد يشوفنا سوا واصلا اخت طليقي هنا وما اريد تجيني حجايه من وراك