نعم أنا مطلقة

فستان بألوان القدر

*************نعم أنــــ مطلقةــــــا************
الجزء الرابع و الأخير
فستان بألوان القدر 

وصلت لداري ..
دازت ستة د شهر؛ ستة د شهر اللي كنتضارب فيها مع الوقت و صحتي ؛  ..تابعت فيها حياتي بزز مني و  بنفس الروتينيات و كرست فيها وقتي للعلاج و الوقت لاخر كلو  مع ولدي ..  والليل كنقلب فيه صفحات من الماضي القريب ؛ صفحات كتبتها أنا و أشرف ..اللي  رغم المرض و الوقت اللي فات مقدرتش ننساه و مغابش على عينيا حتى دقيقة .. 
كيف داير ؟! قدر ينساني ؟! باقي كبغيني ؟! كفكر فيا ؟! كحلم بيا كيف كنشوفو في منامي ؟! الدار باعها ؟! المرايا هرسها ؟! تعرف على شي بنت أخرى ؟! ولا فضل يحتفظ بيا كلي واخا مشيت؟!
حتى واحد ما يقدر يجاوبني على هاذ الأسئلة كاملة غير ماما ثريا (سبحان الله باقا كنقول ليها ماما 😔) ..
هزيت تليفوني و عيطت ليها 📲
أنا : السلام ماما
ثريا(مامات أشرف) :و عليكم السلام أ بنتي ؟؟ سمحي ليا معرفتكش ؟!
أنا : سارا
ثريا :(طريقة تنفسها تبدلات ولات كتنهج )  ويلي يا الحبيبة ديالي ؟! علاش مسولتيش فيا ؟! خلعتيني عليك و نمرتك عيطت لك فيها مليون مرة ديما مسدودة؟؟؟
أنا :  ضيعت تليفوني و النمرة مكانتش مسجلة مقدرتش نرجعها ! سامحيني الدنيا و المرض خداوني منك
ثريا : ميهمش مادامك بخير ؛ قولي ليا كيف بقيتي و جاد كيف داير لباس عليه ؟!
أنا : انتي الوحيدة اللي عارفة و مغاذيش نكذب عليك .. انا مرة هاكذا و مرة هاكذاولله الحمد ؛  واخا حيدو ليا الرحم و المرض داع ليا في مناطق أخرى .. دعواتكم نغسل ذنوبي في الدنيا ونلقى وجه ربي بالخير !
ثريا :(كتنخسس بالبكى ) متخافيش أ بنتي ، ربي كبير و ان شاء الله ربي يعافيك .. ويشافيك !
أنا : آمين ؛ يسمع من فمك ربي 🙏🏻 أشرف كيف داير ؟! لباس عليه ، توحشتو أ ماما ، عييت ما نتناساه ونصبر في راسي ؛مقدرتش
ثريا : أش غاذي نقول ليك أ بنتي ؛ حالتو حالة و مبقى يهضر مع حتى واحد غير من الخدمة ل بيتو و حتى الماكلة و الله مكنعرفو فين كياكل ..
أنا : كون غي ربي خداني قبل نتعرف عليه .. ونتسبب ليه و ليكم في هاذ شي
ثريا :ربيً يحفظكً و ينجيك ؛ الحق عليا أنا يا بنتي اللي غلطت  وطاوعتك و كنت أنانية و خبيت على ولدي ؛ ولدي يا سارا كضيع من بين يدي .. راه نهار عطيتو الورقة قاليا ليا ميمكنش و سارا كنعرفها حسن من راسها ؛ ميمكنش تلعب بيا ميمكنش أ ماما  وضرب في يديه مع الحيط حتى شبع ؛من هذاك نهار مبقى عطاني وجه من غير السلام !؟
أنا : حبيبي يا أشرف ؛ ثيقيني هاكذا حسن ليه متقولي ليه والو ..  عافاك خوذي ليه تصويرة جديدة و رسليها ليا في الايميل
ثريا : واخا ابنتي ربي يكون معاك  غير الانتيرنيت راني مكنعرفش ليه رسلي ليا العنوان نرسلها ليك اليوم باذن الله ؛ وقولي ليا ل خاصك شي حاجة نرسلها ل بنتي ؟؟!
أنا : ربي يخليك تاج فوق راسو و تشوفيه كيف بغيتي يا رب ؛ نرسل ليك العنوان في ميساج دبا ان شاء الله !
ثريا : ايوا چولي ليا شنو بغيتي ثاني نرسل ليك ؟! شي جليليبة من هاذو اللي خرجو جداد ؟!
أنا : ههههه الصراحة تشهيت حلوة د اللوز ☺️
ثريا : ما يكون غير خاطرك ؛ دبا نمشي نتقدا ليك من المنزه أنا : ربي يخليك 😘
ثريا : بنتي خوذي برأيي و عيطي لعائلتك و قوليها ليهم ؛ ودخلي للمغرب
أنا : الى قلتها ليهم جدة تمشي فيها ؛ و زايد هاذ الشي العلاج هنا احسن و مكنخلص والو ؛ في المغرب غاذي يخصني نخلي دين ورايا باش نتعالج .
ثريا : الى كانت غير قضية الفلوس انا نتكلف بيه ؛ اما من ناحية أحسن عندك الحق  أ بنتي تماك حسن من هنا .. وايني واخا هكذاك شوفي كيفاش تمهدي ليهم ؛  واخا مكنبغيش نهدر في هاذ شي ؛  لا قدر الله ووقعات ليك شي حاجة يدفنوك بين ليهود و نصارى؟!
أنا : كوني هااانية فكرت في كلشي و خديت تأمين في البنك الشعبي الى طرات شي حاجة هوما يتكلفو بكلشي
ثريا : وجاد وليدك؟؟
أنا : كتبت وصية عند المحامي ؛ ياخذو باباه،ويلا مبغاش عندي خالتي و بنات خالتي  هنا يتكلفو بيه الى قبلو حتى يدير ثمنطاش سنة و بعدها ربي وكيلو ؛ اليتيم غالي عند الله و ربي يدير ليه تاويل يا رب!
ثريا : معرفت من قوليك أبنتي .. ربي يطول في عمرك و تشوفيه عريس و يبقى هاذ الشي غير هضرة
أنا : آمين يا رب  ؛ كنت بغيت نقوليك سلمي على أشرف ؛ وايني هبيلة أنا ، نخليك دبا تهلاي في راسك بزااااااااف بزاف 😘
ثريا : في حماية ربي أ بنتي انتي و ولدك و الى بغى الله راني نعيط ليك مرة مرة نسول في بنتي ! 
غير قطعت معاها قلت مع راسي ويلي أنا مسطية علاش نرسل ليها العنوان ؟؟ ويلا طاح في يد أشرف و فهم باللي في القضية شي حاجة ويلا ماماه عطاتو ليه وقالت ليه سير شوفها ؟! على أي حسيت بيها تنادم معاها الحال .. لا غاذي نسد تليفوني و منعيطش ليها .. عيطت لدارنا سولت فيهم كاملين واحد واحد و سديت تليفوني !
واخا بعدها هضرت مع فاميلتي كاملة ؛ حاجة وحدة بقات في بالي ؛ الهضرة اللي قال أشرف لماماه ..سارا ميمكنش تلعب بيا ميمكنش ؛ ياربي تصبرو و تقويه و ياربي ميحقدش عليا و يطوي صفحتي .. ياااا رب 
وفي لحظة تهزيت من الماضي و رجعت واقع آلام المرض و حصص الشيميو ؛ قدر الله و ما شاء فعل ..كل دقيقة كتدوز الا و جاد بين ايديا .. دموعي كغلبوني ملي كنفكر النقص اللي غاذي يقدر يعيش بيه طول حياتو .. واش غاذي يتهلاو فيه ؟!؛ و لا غاذي يتلاوح بين ليدين حتى يكبر ؟! أستغفر الله ربي يتولى أمرو ..
من بعد زوج سيمانات ؛جوايه التسعة و نص ديال الصباح ؛   كنت كنلبس باش نخرج نمشي ل كلينيك .. موعد ديالي مع الشيميو ؛ وكنسمع صونيت ديال الدار ؛ عاوتاني شي حد بغاني نحل ليه للباب ..أوووووف ؛ خلصوني و ندير ليكم عساسة  أنا چاع😤
أنا :وويييييي؟! شكون؟!
في الآنتير فون : عافاك تقدري تحلي ليا الباب ؛ نسيت المفاتيح دياولي !!
أنا : واخا .. وعافاك المرة جاية جرب حظك مع شي جار آخر ؛  راني عييت  ؟! السلام .
ورجعت نقاد حالتي .. مبقاش ليا الوقت !
ترررررن ترررررررن الصونيت ديال بابي 🤔🤔
أووووووووف "آبلا "عاوتاني ؛ نعناااااع مبقاش وا مبقاااااش كملتييييه 😤😤😤
مشيت نجري نحل الباب على أساس أنها جارتي التركية .. اللي ديما كتجي تاخذ من عندي النعناع ؛ من نهار تزوجات مغربي و أنا كنتصخر ليهم على نعناع ! كنت شاهدة على زواجكم ماشي على أتاي 😤
إييييييڤيت ؟؟؟؟!
حليت الباب و بقيت مصدومة ؛ معرفتش واش الشمش ديال صباح اللي چلباتني و لا عقلي لاعب ماتش ضدي ؟!
أنا : أ أ أشرررف؟!!
أشرف : غاذي تخليني واقف قدام الباب ؟! يا كما جيت فشي وقت ما شي هو هذاك ؟؟
أنا : لا لا دخل ..
دخل و بقينا كنشوفو في بعضياتنا ؛ ضعاف و دار اللحية 👨🏽 سلمت عليه في الدخلة ديال الباب .. مبقيتش لقيت كلامي .. معرفت شنو نچول ليه !
أشرف : نبقى واقف هنا؟! الى مديرونجيك نتلاقاو برا !!
أنا ؛ أ ويلي متچولش هاكذا ، غير تفاجأت .. دخل دخل برك في الصالون !
أشرف : كاس ديال الما عافاك راني شحفانً؟؟
أنا : دقيقة و أنا معاك خود راحتك  ؛ شنو تشرب؟! فطرتي و لا مازال ؟!
أشرف : لا فطرت ؛ بغيت غير كاس د الما و آجي بغيت نهضر معاك !
أنا : واخا ..
مشيت للكوزينة و كنتفتف ؛ بقدرت ما فرحت خفت .. خفت من المواجهة معاه .. و الكاس مبقيتش عارفة فين حاطاه ؛ ثلاجة من تلخبيطة مبقاتش كتبان ليا..
هزيت ليه كاس د الما و الكاس كقرقب في الپلاطو ..  بالرعدة ؛ غير وصلت للصالون  بغيت نحطو قدامو فوق الطابلة ؛ قلبتو بكثرة ما كنتفتف ..
أشرف :سارا ؛ سارا .. تهدني ؛ مكاين والو .. غير بشوية عليك !
أنا : سمحليا ؛ أنا غاذي نجيب ليك واحد آخر ..
أشرف : لا غير بركي أنا غاذي نوض نجيبو !
مشى و خلاني في الصالون مع نفسي .. معرفت فاش نفكر لا منين نبدا .. أشرف ؟؟. أشرف جا؟!
ويلييييي مشى للكوزينة كتشطح بالماعن ؟! يوووووووووو 🙄 شرب في الكوزينة و جاب ليا معاه كاس و جا برك حدايا ..
أنا : إييييه ؛ جيتي خدمة ؟! ولا غير سياحة ؟؟
أشرف: لا هاذي لا ذيك .. جيت على قبلك !!
هضرتو .. كيف ديما نيشان مكعرفش يراوغ !
أنا : ممم مزيان ؛ و كيفاش عرفتي العنوان ؟؟
أشرف : فاتحة معايا تحقيق ؟؟ مفرحتيش ب جيتي؟!
أنا : أكيد ؛ على سلامتك .. غير باقية تحت الصدمة ، متديرهاش مني قلت صواب ..
أشرف : ماشي انتي سارا اللي عرفت ؟؟ التكلفات و الپروطوكولات؟؟ متحتاجيش معايا أنا ماشي عدوك ؟؟
أنا : لا عيب تقول هاكذا ..
قرب مني شد ليا من إيدي و كمل : أنا ماشي عدوك  و ارتاحي مغاذي نعاتبك على والو ..
الصونيت ديال تيليفون قاطعت هضرتو ؛ بنص عاين ؛ الدكتور ديالي .. عندي معاه موعد كيفاش ندير يا ربي ..
أشرف : جاوبيً..
هزيت التيليفون جاوبت و كنتمتم و غنلغز في الهضرة .. خذيت تيليفون و بعدت ..
الدكتور : مدام سارا ؛ الحصة ديال اليوم مهمة و خاصك ضروري تجي .. كنتفهم أنك يمكن بدلتي رأيك و قررتي تنازلي .. لكن الأمل كاين ..و
أنا : لا دكتور ماشي هاكذاك ..
الدكتور : خليني نكمل ؛ ديما عرفتك قوية .. عافاك  ؛ كملي العلاج ديالك مخاصرة والو .. فكري في ولدك .. عندك نصف ساعة باش تكوني في العيادةً نتسناك ! 
أنا : واخا أنا جاية دكتور شكرا،  و قطعت !
تلفت لقيت أشرف ورا ظهري .. ناري سمعني عل و عسى ميكونش فهم !
أأأأ .. أشرف ؟!!
أشرف : آش كتسناي سربي لبسي صباطك خلينا نمشيو ! يالاه يالاه !
بقيت مفيكسيا ليه عينيه كنحاول نفهم منو ..
أشرف : راني عارف كلشي .. معنديش الخبار بالتفاصيل ملي نرجعو تفهميني  وحدة وحدة..
تلاحيت عليه و عنقتو و بديت نبكي ..
دفعني بجهد وشدني من ذراعي بزوج و داني و جابني ؛ وقابلني معاه ..
أشرف : سارا شوفي فيا انتي امراة مؤمنة بالله و قدره خيره و شره و زيادة على هاذ الشي قوية  بزاف ! ويد في يد حتى نتجاوزو هاذ المحنة .. أنا وياك ماشي بوحدك فهمتي؟!!
أنا : أشرف ؛ سمح ل...
أشرف : مبغيت نسمع والو .. طلقي راسك غاذيين نتعطلو ..
مشينا لأول مرة من بعد ماتفارقنا حسيت بواحد الاحساس غريب ..شنو من خير درت و وقف معايا حتى تلاقيت بانسان فحالو ؟! شكون اللي تقبلات دعوتو ليا يلاقيني ب مع ما حسن مني ؟! ما غضب عليا ما عاتبني على شنو خليتو عاش .. ومن الفوق جاني حتى الباب داري و ها هو غاذي معايا ؟؟؟؟؟ حچااا كيفاش عرف العنوان ؟!
أنا : أشرف كيفاش..
قاطعني ..
أشرف: اللي عندو لسانو عمرو يتلف ! عقلتي نهار قلت ليك عاودي ليا كللللللشي اللي كتديريه تماك بالتفاصيل و على صحابك و البلايص اللي كتجمعي فيهم ؟؟
أنا: آه عاقلة و ايني عمرني قلت ليك العنوان ؟؟؟
أشرف: لا وايني قلتي ليا ؛ ساكنة في بلاصة كتحمل نفس اسم العالية في المحمدية ؟؟؟! وبالضبط الحجرة العالية 
كاينة ولا لا ؟! ونهار قلتي ليا : غاذي تشدني سكتة قلبية الى تعطلتي عليا كون غير كنت بعدة في فرنسا السبيطار قدامي ..يقدرو يعتقوني اما هنا نموت و ميعتقونيش؟!! ونهار قلتي ليا كبنيو في جامع حدا دارك نسيتي مدرتيش ليهم تبرع؟؟
سارا أنا منسيتش ضمة على الحروف اللي سمعتهم منك .. فما بالك ننسى هاذ شي كامل ؟! 
أنا : اااااه وايني متقولش ليا دقيتي على ديور الدرب كاملين؟! باش لقيتيني ؟؟
أشرف : كون ملقيتش كفاش كنت غاذي نديرها ..سولت واحد جماعة ديال الولاد و قالو ليا على ليموبل اللي كتسكني فيه و قلبت على كنيتك في الآنتيرفون .. وانتي اللي حليتي ليا الباب..
أنا : منستغربهاش منك .. شحال و انت هنا ؟!
أشرف : دبا شي اربع ايام .. ومناويش نرجع غير باش متحاوليش تفكي مني !! 
أنا : لا حاشى .. غير الخدمة ديالك ؟!
أشرف : الخدمة ديالي نقدر نحلها غير بسكايپ والى اقتضى الأمر شي اجتماع و لا راه كاين الواليد ! يعني كوني متؤكدة مية في المية أنني غاذي نكون في وجهك صباح ظهر و عشية ..حتى تبراي ان شاء الله ويلا بغيتي تفكي مني وقتها مووووصيبة ؛ غاذي نكون فرخت انا وياك ! الى تقبلي  النصيحة مني ؛ غير بداي تولفي عقلك على وحودي الدائم ✌🏻️
أنا : معرفتش باش من وجه نشوف فيك ..
أشرف : مبغيت نسمع والو من هاذ الخزعبيلات ديالك .. يالاه نزلي حتى انا غاذي نتخشى معاك في سكانير عل و عسى يلقاو فيا شي حاجة  فحالك ونتوانسو في الشيميو .. مالكي سبيطار فحال الاوتيل .. وفابور من الفوق
أنا : فال الله ولا فالك ربي ينجيك و يحفظك .. وبديت نضرب فيه ؛ بكية و ضحكة في نفس الوقت !
أشرف: مسمومة حتى شيميو حسدتيني عليه ..يا العفريتة راني سولت و قالو ليا هذاك شي كدوخ بحالا شارب قرعة ديال الڤودكا  😂😂😂بصح ؟؟؟
أنا : لا زدتي فيه غير فحالا واكل شي سطل ديال سلو ومكترين  فيه الچوزة .. غير كتهلوس شويا و صافي و كتبدا تچر 😂😂
أشرف : لا صافي بلاش هاذ شي فيه الچران ..بلاش ! آجي الهنا فايتة سايطة في شي سطل على قدو ديال سفوف؟؟ 😂
أنا : اشمن سطولة ديال سفوف و اشمن سطولة ديال شباكية و الحلوة ؟!!! الله يسمح ليا كنت كناكل حق العائلة كاملة ندوز بيه آخر حلقة الكواسر في رمضان 😂
رجعت ليا روحي دخلنا اليد في اليد ؛ فحالا عمرني آذيتو .. ولا هجرتو
استقبلنا طبيب وعرفتو على أشرف وهضرنا شوية و من بعد بديت حصة الشيميو تحت نظرات اشرف ؛ الممرضة وجدات ليا المصل اللي غاذي ندير ..تكيت وعطيتها ايديا ..روتين أسبوعي ..لكن هاذ السيمانة غير كل السيمانات اللي دازو ؛   فرحانة وممثيقاش باللي حبيبي جا لعندي 😍
أشرف كشوف فيا بتمعن وايني كنحاول منبينش ليه الخوف ديالي .. ودايرة فحال غير حاطة سيروم و صافي ..
أشرف : حبيبة نخليك خمسة دقايق وانا جاي ..
أنا : فين غاذي ؟! دبا تودر هنا ..
أشرف : لا غاذي غير نجيب قهوة و ندوز الحمام واني معاك !!
أنا : سير و متعطلش عليا عافاك .. عنداك يبانو ليك شهبات و تبقى حال فيهم عينيك ؟! أشرف 🙄
أشرف : عندك الصح .. عندهم الزين الواحد خاصو يخاف !
أنا : أشرررررررررف 😡😡😡
أشرف : صافي فهمت ها أنا .. غاذي نشوف في الارض منهزش راسي حتى يبان ليا دخلت في شي شهيبة بالغلط ؟! وقتها ميكونش غير شوفان غاذي يكون حتى التماس 😈هاذ شي اللي بغيتي ؟!!
أنا : 😡😡😡 لا صافي غ هز راسك وايني شوف بديطيكتور ؛ شوف غير ضبابة بلا متحنزز و دور وجهك لا حسيتي بشي وحدة جاية قبالتك .. راهم صوبيصات عزيز عليهم ينبشو الواحد .. 😤
أشرف : هاااااا إلى نبشاتني معندي مندير ليك ..
أنا : لا معندك متدير وايني غاذي تربع حدايا و ما غاذي فين .. شوف را بدا يطلع ليا الضغط و المكينة غاذي تصوني و نجمعهم عليك غير الپوچوص على خوه !
أشرف : الى بغيتيني نخشيك في هاذاك الفران بلا عطرية ديريها  😡😡😡انا غاذي
أنا : انت تختار .. يالاه تحرك  ومتعطلش !
أووووووه شحال توحشت نتناوش معاه😍😍😍 هو بوحدو كقدر يخدم فيا هاد المود .. طيارة وايني الويفي أكتيڤي 😂
بقيت متكية ودوا كدوز .. داز الوقت و أشرف مازال م رجع ؟! فين غير هذا ..
أنا -->للفرمليا : ختي ؛ حبسي هاذ شي انا جاية
الفرمليا: لا متقدريش تنوضي ؟!
أنا : راني تزيرت بغيت نمشي للحمام
الفرملية : تسناي نجيب ليك فاش تقضي حاجتك !
أنا : امممممم ؛ لا صافي ؛ شوفي ليا غير خطيبي فين هو عافاك وقولي ليه يجي ..
الفرملية : دغيا توحشتيه .. 🤗
أنا : 😬😬😬
وهو يدخل .. أشرف و انا دورت وجهي .. ومكشرة و عاقدة حجباني و مغمضة عينيا
أشرف : حبيبة .. نعستي؟!
أنا : لا
أشرف : راني تعطلت حيث عيطت ل ماما وبقيت كنهضر معاها على برا .. حيث ممنوع تليفون في الكولوار🤓
معرفتش علاش حسيتو ككذب ..
أنا : عيط ليها نيت نهضر معاها ..
أشرف : امممم راني خليتها غاذي تمشي الحمام حتى ندخلو للدار ونعيطو ليها
أنا : اممممم واخا ! شربتي قهوة ؟!
أشرف : قلبت حتى عييت و مبانتش ليا المكينة ديال القهوة !
أنا : واخا ؛ الحمام لقيتيه بعدة ؟!
أشرف : وايلي ضروري .. كون جيتك سورالي فازچ 😂
أنا : امممممم ؛ كجاوك الشهبات؟!
أشرف : تچولي غير عزافات(شطابة ديال صقف والقنات)
أنا : ههههههه صبغني صبغني ! بقينا شي عشرين دقيقة حتى كملت و دازت ملها مناچرة .. غير باش منفتحش معاه تفاصيل المرض حتى رجعنا للدار ؛ عيت منحاول نخبي العيا اللي شدني  .. وايني غلبني..
غير وصلت للدار ..
أنا : أشرف خوذ معاك سوارت ديال الدار ؛ وسجل ليا نمرتك عافاك في تليفوني .. ولا بيپي هلى راسك من عندي ،جيب حوايجك من الأوتيل و آجي .. عااافاك متعطلش ☺️
أشرف : واخا غير ارتاحي انتي .. جاد معاش غاذي يجي ؟؟
أنا : جاد متجيبو ليا النونو حتى الستة ؛الايامات الاخرى كتجيبو مع الربعة !
شافني جارة ليزاري خذاه من يدي و فرش ليا فوق الكناپي مقابلة مع تلفزة تسرحت حتى داني نعاس !
ملي ؛ فقت ؛ طليت على الساعة :سبعة نيشان .. 😳😳
جاد ولدي ، ناري البنت محليتش ليها الباب كوراها صونات حتى عيات ؟؟؟؟؟ آش هاد الراحة اللي أنا فيها ؟!!!
نضت كنجري .. غير وصلت الكولوار سمعت ضحك ديال جاد و أشرف جاي من الحمام !
أشرف بصح جا ؟! مكنتش كنحلم؟؟؟ مشيت نجري حليت باب الحمام .. لقيتو مسدود !
أشرف: مبقيتيش كتحشمي باغية تحلي الباب على الرجالة ؟!
لاا سمح ليا حساب ليا جاد بوحدو .. شنو كاتديرو ؟!
أشرف : كيحك ليا جاد ظهري ؟! عندك شي مشكل؟!
أنا : لا لا كون غير فيقتيني نحكو ليك نيت أنا بلا ما تستعبد ليا ولدي ؟! 😈
أشرف : حكانك هذاك اللي مكبردش القلب .. جاد حار عليك !!
بصحتكووووووووووم مسبقا ؛ حك ليا ولدي مزيان وخرجو جديد عافاك  😂✌🏻️
مشيت الكوزينة .. باش نشوف ما نطيب العشا ..
ويليييي ؛ غسل الكركور ديال الماعن اللي كان 😁😁😍 و جمعها .. و كرطونة كبيرة فوق الطابلة  ماشي أنا اللي جبتها ؛ غاذي تكون غير الحلوة ..قربت ؛ حليتها لقيت فيها بسطيلة ديال دجاج اممممممم .. منين جابها هاذ جن؟!
و حليت الثلاجة لقيت فيها تقدية جديدة 😍😍😍
وجدت شلاظة و ديسير بالفرماج حلو و الفواكه ..قاديت الطابلة و زوقتها شميعات من هنا و وريدات من لهيه  ؛ بدلت حوايجي .. درت البسطيلة تسخن على خاطرها وبقيت قدام تلفازة ..
كنسمع تكهكيه هاذو معوالينش يخرجو ؟! راني مت بجوع ؟
مشيت ليهم : خرجووووو باراكا عليكم الما غاذي يجيني غالي 😤😤 يالاه خرجوووو
أشرف :صافي كنلبسوا علينا .. الا لبغيتينا نخرجو عندك فحال الهنود ؟!
أنا : أشررررررف
أشرف : صافي أ حنا جايين .. دقيقة
مجنون هذا .. نخرجو عندك فحال الهنود .. خرج شكون حبسك 😳😂😂
طفيت الفران على البسطيلة وخليتها فيه باش تبقى سخون ..
أشرف : أوهوووووووووو ؛ الرومانسية عاود ثاني ؟؟ 😍😍
أنا : بصحتكم ؛ جادووووو حبيبي ؛ ماماتي وليدي أنا ..دقيقة نجيب البسطيلة طيلة طيلة 😍
أشرف : بركي اللرض أنا اللي صايبتها أنا اللي نجيبها !!
أنا : صايبتيها ؛ ان شاء الله مخلصتيش بزاف ؟! متأكد انت ليك غير اربع ايام هنا ؟!
أشرف : اليوم الخامس بالظبط .. راه صحيبتي اللي صايبتها غير بردي ؟!
أنا : كون غير علمتيني نقول حتى أنا ل صحيبي يجيب لينا باش ندوزوها .. شي عرق السوس .. والله باباها دجاجة حتى تنوض من البسطيلة تشطح على الدبكة 😈😈😈
أشرف :  ساراااااا 😡😡😡
أنا : يالاه طلق راسك راني سخفت و شدني فقر الدم بجوع و ولدي مسكين خرجتيه صفر تقول غير دوشتي ليه بالما بارد؟؟ 
أشرف : جادوووو بصح بابا ؟!
جاد : نو نو نو پاپا 🤗🤗
بابا ؟!!! فيساع ؟! 😳😳😳 معرفت ما نقول 🤐
أشرف : بسم الله .. يالاه بداو قبل يبرد .. بنين هاذ شي أ جاد ؟! الله يعطيها الصحة
أنا : راه غير فيك جوع .. باسلة حاسلة .. وكثرة فيها السكر تقول قلب اللوز ماشي بسطيلة ؟!
أشرف: باااااز ؛ شنو هاذ قلب اللوز ؟؟
أنا : واحد الحلوة جزائرية دايرة فحال الحرشة مسقية بالعسل بنيييينة ! غذا ان شاء الله نجيبها !
أشرف : امممم واخا ؛ زوينة بيجامتك ..
أنا : حتى پيجامتك جات معاك تقول غ فريد الأطرش ..
كملنا عشانا على نظرات الشوق المتبادلة ..ونعست جاد في بيتو .. وجيت بركت حدا أشرف !
أنا : غاذي تكون عيان .. راك غسلتي سطوك ديال الماعن ؟؟؟! شكرااا
أشرف : إيوا غاذيين يبقاو يتسناوك الحادچة ؟!
أنا : لا راه موصلتش ليهم  راه دوا اللي كنشرب .. 😥😥
أشرف : لا والله مقصدت غير بغيت نصحك معاك معرفتش كيفاش تزبقت ليا ..
أنا : عارفة فير باش تتأقلم شوية مع الوضع ..
أشرف : نستاهل نوض نغسل الماعن منخليهمش يباتو .. آجي ونسيني ..
أنا : واخا انت غسل و أنا نشلل ..
أشرف : مشات
درنا فيهم دقيقة ؛ عمرت براد أتاي و تجمعنا عليه في الصالون ..
أشرف : سارا بلا متزيري على هذاك الكاس .. مغاذيش نعاتبك فاهم كلشي و عمري شكيت دقيقة في حبك ليا !
أنا : قالتها ليك ماماك؟!
أشرف : آه عاودات ليا كلشي ..وملي طفيتي التليفون آخر  تخلعات بزاف !
أنا : دبا فات الوقت غذاان شاء الله  تعيط ليها نعتذر منها
أشرف : غذا مغاذيش نساليو .. غادين نجمعو الاوراق باش نتزوجو ..
أنا : نتزوجووووو ؟؟ كيفاش و فين ؟!
أشرف : بصح كنت ضد نجي نعيش هنا ؛ لكن العلاج حتمها علينا .. كيف قلت ليك أنا مراجعش المغرب ! يالاه تبداي توجدي ليا في دهازي راني مجبتش حويجي من دارنا
أنا : أشرف راني ..
أشرف : جيتي حتى لعندك فهماتك بزاف د الحوايج و الموضوع هذا مباغيش نهضر فيه .. أنا ما بغيت لا ولاد لا والو بغيتك انتي و جاد .. و هاذي هي الفرصة باش نتقربو منها انا وياك لربي !
أنا : بشرط ؛ دارنا ميعرفوش أنني مريضة ؟!
أشرف : مكرهتش يعرفو و نديرو عرسنا كيف حلمناو معاهم
أنا : حالتي مكتسمحش ليا نبعد و لا نستحمل التقاليد ديال العرس😔
أشرف : غاذي نديرو عرس أنا و ياك بطبيعت الحال نعلمو والدينا و نهضر مع ماما يديرو عشى و يتجمعو عليه و نقولو ليهم منقدروش نجيو على حساب طليقك منعك تخرجي بحاد خارج فرنسا
أنا : والله فكرة زوينة 😘😘 بعد المرات كنحير فيك
أشرف : شحال غاذي تعطيني في صداق
أنا : قصدك انت شحال تعطيني في صداقي ؟!!
أشرف : دهاز و صداق كشطيني انت و خليني على الظص ..شحال؟!!
أنا : عشرة د المليون و مكنديرش الكريدي 😤 
أشرف : شحااال ؟؟ عشرررررة ؟؟ مجوج ب كريستيانو انا ؟! اما حتى انجلينا راها مشات لدارها فابور
أنا : لا حبيبي مييييسي ميسيييي و ميزي بلا تسقريم
أشرف : أيييه و دهاز ؟!
أنا : بغيت غير حاجة من الحاجة ..سبيبيط لوبوتان ؛ كسيوة ديوغ مونطو شانيل و ساك لوي ڤيتو و الأهم كسيوة د العرس من تصميم إلي صعب .. صافي😳😳😳
أشرف : صاااااااافي ؟! هذا مكان غير حاجة من الحاجة ؟؟
أنا : آه ؛ مانيش جيعانة نقوليك سبعة و لا عشرة ! واحدتون فقط 😬
أشرف : أييه زيدي ؟؟! و العرس فين بغيتيه ؟!
أنا : في نيس .. على البحر .. غير انا وياك و شهود .. على الطريقة الأوروپية ! المهم نديرو غير حاجة خفيفة ؛ يكفيني حضورك و فخامة الفستان ؛ بسطيلة ها هي كليناها دبا 😂😂😂
أشرف : وايني مقيرسة مع راسك .. القضية غاذي تكون ماشي غير حامضة عليا وايني مپومپلوموسية
أنا : غير ارتاح الكوسطار ديالك و الخاتم ديالك على حسابي  😬 انت تكلف بالخاتم ديالي ..
أشرف : والخاتم كيف بغيتيه حتى هو ..
أنا : پلاتين حجرة زمرد و داير بالألماس .. الموديل راني عارفاه كيف داير و فين كاين .. نااااري وتشوفو تحماق عليه .. وغاذي نحفر فيه سميتك 😁😁😁
أشرف : پلاتين يا ربي و إيمرود ؟؟؟؟؟؟ خلينا غير في ذهب سارا
أنا : صافي بلا متبكي .. حتى الخاتم اللي غاذي نشري ليك پلاتين و زمرد غزااااااال و كبير ؛ باش يعرفوك مزوج من بعييييييد 😤
أشرف : دبا نعيط الواليد نقوليه يبيع الشركة و الدار .. 😡😡😡
أنا : صافي ؛ مونطو شانيل مبغيتوش الكسوة ديوغ و  حتى سباط لوبوتا وأصلا مغاذينش نديرو عرس و هيلالا 😁  راك اقتاصدتي دبا 🤗
أشرف : صداق عشرة د المليون زيدي عليها واحد العشرة أخرى ديال فستان الي صعب و زيدي عليها الخاتم القليلة شي جوج و نص والله يستر من الموديل اللي عجبك و زيدي عليها الساك  ب شي جوج حتى هو و الحفلة على البحر ؟! ها حنا و صلنا لربعين 😤😤😤
أنا : صافي كون كنتي في المغرب كون النچافة و العرس و تريتور و الحلاوي و المشاوي و الاوركسترا و عاد ما تعلق .. كون فتي ستة وستين 😁😁
أشرف : لا كون فت ستة و ثلاتين ولا خيمت فيه .. قلت ليك متبقايش تفرجي في الأفلام اللي كيكملو بالعراسات في الاخر .. تبعي غير فيلم اللي كيموت فيهم شي واحد ؛ باكية كلينيكس بجوج دراهم من حدا الجامع البيض  تحرد ليك نيوفك و تماركيك عمرك تفكري في زواج 😤😤
أنا : وشكون قاليك مغاذيش نموت ؟! زيد على الحساب بكية هنا كتدير جوج أورو 😂😂😂
معقلتش على راسي حتى جرني لعندو و عنقني بججججهد ل درجة حسيتو كلو كيرعد في رمشة عين
أشرف : نفديك بحياتي أنا و نعطي مال الدنيا كامل غير ربي يطول ليا في عمرك 😰😰 ولا كان شي واحد فينا يموت نتمنى أنا نسبقك 😓😓
أنا : ربي ينجيك و يحفظك ..
غلبوني دموعي وايني مسحتهم قبل يشوفهم و قلبت الموضوع 
أشرف : غدا ندوزو لاميري نشوفو الوراق اللي خاصنا و راها نيشان نشوفو شنو بغيتي يا الأميرة ديالي ..
أنا : ويلي يا الهبيل غير كنضحك معاك !! هاذ شي كاااامل اللي قلت ليك كنت كنقلي بيه السم لصحاباتي الچاويات اللي في الخدمة .. حيث هوما كتقاسمو حتى في فراشط العرس 😂😂😂
أشرف : الله يمسخك خليتيني كنشهد في خاطري نوضي بعدي مني ..
أنا : هي الأولى .. ونعلمك جنون اللي في هاذ الدار كهضرو بالألزاسية (شلحة ديال فرنسا😂) والله ما جاوبتيهم لطلقوك و شوف شكون يفكك دبا 😤
أشرف : بسم الله الرحمن الرحيم ؛ راها آنتيرناسيونال 😂😂
أنا : سير نعس في بيتي أنا غادي نحل الناموسية ديال الكناپي ..
أشرف : لا غير سيري لبيتك .. غاذي نبقى نتفرج شوية بما داني نعاس ..
أنا : تصبح على خير .. إلى حتاجيتي شي حاجة فيقني ..
أشرف : وانت من اهلو ..😘
غير تخشيت في بلاصتي .. وصلني مساج من عندو 📲
أشرف: نعستي ولا مازال كتفكري فيا ؟؟ 😁
أنا : مازال كنفكر فيك و كنحاول نقنع راسي باللي هاد شي حقيقة ماشي حلم ..
أشرف : انتي الحلم الحقيقة ديالي .. كون ماوصلتش ليك كنت غاذي نتصطى .. وعديني عمرك تعاوديها و ديما تبقاي قدام عينيا ؟؟
أنا :  ولو نعتاذر منك طول حياتي منوفيكش حق شنو درتي معايا ؛ و منغطيش على الفعايل اللي درت فيك .. مدامك عرفتي الحقيقة عمرني نرجع نآذيك ولا نبعد عليك ..اليوم رجعات ليا روحي 😔😔
أشرف : انتي عمري و انتي اللي خليتيني الانسان اللي انا اليوم .. كنمووووووووووت عليك
أنا :  كنحمااااق عليك .. وعلاش مقلتيش ليا هاذشي ملي كنت حداك ؟؟!
أشرف : بالپيجاما ديال فريد اطرش مجاتش ..انا جاي نقولها ليك دبا ☺️
حل عليا باب بيتي .. ووقف على راسي ! نوضي بغيت نهضر معاك في موضوع شخصي مهم ..
نضت وقفت فوق الناموسية ؛ ضربت ليه التحية ..
أنا : نعم يا حضرت حبيبي ؟!
أشرف : معرفتش كيفاش نفاتحك في حقي ننعس حداك ؛ حيث جنابي من دبا بداو كطيبو بالكناپي 🛋
أنا : امممممم .. واخا فهمنا ..
أشرف : هااااااا شتيش حتى انتي طالبة عليها 😈
أنا : لا غير بقيتي فيا حيث عارفة الناموسية ديال الصالون مكتدبرش .. غير هي باردة 😬😬
تلاح عليا و بقينا كنتدابزو بالمخاذ 😍😍😍حتى فيقنا جاد ..رجعتو ينعس و جبت معايا مخاذ زيادة ..
أشرف : هرسنا ليه نعاسو مسكين ..
أنا : معليش .. راه فيساع رجع نعس ..
أشرف : مازال باغية تلعبي بالمخاذ ؟!
أنا : هاذو المخاذ ديال الحاجز حبيبي ..
أشرف : أوووووووف 😤😤😤
داني نعاس و أنا كنحاول نفهم هضرة عينيه الي مخبيين ورا ضو شمع الخافت 😍😍
فقت في صباح لقيت راسي معنقاه و معنقني .. الحاجز المخذاوي منفع بوالو ..😂 ملصت راسي منو بشوية .. قاديت راسي وجدت الفطور .. سمعني كنقرقب في الماعن فيق جاد و هزو في ايدو وجا لعندي للكوزينة ..
أشرف : صباح الجميلات المنفوخات الوجه و العينين ..طبيييعيا 😘😘
أنا : وصباح الجميل ذو الوجه المكمش المعمش 😂😂
أشرف : نغسل أنا و جاد و آني جاي 😘😘 
فطرنا ومشينا جبنا الوراق اللي خاصينا للزواج ؛ عيطنا للعائلتو و العائلتي علمناهم .. تغدينا براا على حسابي هاذ المرة و تافقنا ان جاد متبقاش تجي تديه المربية الا لبغينا نخرجو تجي تقابلو في دار ..
داز شهر ونهار بنهار رتبنا أمورنا حتى تحولنا لدارنا الجديدة في مدينة نيس في جنوب فرنسا ؛ كيف ما حلمت ..😇
غير وصلنا جبنا العدول و درنا الحلال ..و أشرف أصر أنه يشري ليا الفستان اللي بغست و الخاتم اللي حلمت بيه ..  وكلنا عرسنا لشركة أعراس خاصة في الاحتفالات على البحر ..هذاك شي صغيور لكن كبير في قلبنا ؛عرضنا على بعض صديقاتي و أصدقاء أشرف باش يكونو شهود و يتقاسمو معنا الفرحة ..
باقية سيمانة على زواجنا ..  مكرهتش ندير زواج مغربي وايني صحتي نهار على نهار كتخوي بيا صعافيت شعري بدا يطيح و طبيب ديالي فهمني باللي الأمل بدا كنقص .. وايني قررت نعيش ثانية بثانية مع ولدي و راجلي وبلا منفكر ..
اليوووووووم اليوووووووووم نرتابط بالانسان اللي بغيتو وبغاني .. واللي عيشني قصة حب عمرها تخيلات حتى في الافلام ..
فستاني من تصميم ايلي صعب ؛ ومع ضعافيت جاني كجنننننننننن .. شكون شكار العروس؟!!! راسها طبعا ☺️☺️ ولدي لبسناه كوسطار فحالو فحال ديال أشرف 😍😍 ونزلنا للبحر باش يزوجنا لو ميغ ديال نيس 💃🏻💃🏻💃🏻
أشرف : أجمل امرأة شافتها عينا
أنا : وأنت أجمل انسان عرفو قلبي يل أشرفي 😘
اليد في اليد على موسيقى بدات حتى وصلنا قدامو ..
لوميغ : كنطلب من المدعوين كلهم يوقفو عافاكم ..
أنا كنتسنى غير إمتى نقول آه
لوميغ لقى الخطاب ديالو وطلب وكمل : سيد أشرف هل تقبل ب ..سارا كزوجة لك في السراء و الضراء؟!
أشرف : نعم أقبل
لوميغ: سارا هل تقبلي بأشرف كزوج لك في السراء و الضراء ؟!
أنا : أقبل أقبل أقبل (حتى كلشي ضحك)
لوميغ : يمكنكم الباس بعضكم الخواتم 💍
لبستو خاتمو و لبسني خاتمي ك دليل على المحبة ديالنا لوميغ: إذن أعلنكما زوجا وزجة 😍😍😍 بإمكانكما تقبيل بعضكم
وبدا البوسان كتطاير في سما .. نخليكم تخيلووو 😘😘
عرب و نصارى زغرتوووووو لينا 🤗و بدينا كنشطحو انا وياه و جاد على أغنية بيت حبيبي ديال يارا .. تصونا من بعد دخلنا ..تعشينا في الاوتيل و قطعنا الحلوة تحت تصفيقات الجميع 🍰 وعدساس الكاميرا اللي تابعانا من صباح كترسخ لينا اللحظة 📸📹
وصلات تسعة ديال الليل جات المربية خذات جاد و أنا و أشرف كملنا السهرة في الباطو غير أنا و ياه و كانت أروع ليلة في حياتي .. وعلى ود التفاصيل متسناوش مني نشرح ليكم عيييب عييييب
الغذ ليه ورا الفطور رجعنا للدار ; كلها ورد وأول حاجة شفتها هي مرايتي؛ ذكريها يا مرآة .. تلاحيت عليه عنققققتو و قلت ليه في وذنيه ؛ كنموت عليك كنبغيك 😻
ودوزنا شهر العسل مابين مدن الجنوب .. منقدرش نبعد بزاف على قبل العلاج واخا مبقاش ينفع فيا ..
وأنا على شط البحر كنكتب و مرة مرة كنهز عيني في جاد و أشرف اللي كلعبو الكرة ؛ مكرهتش نشاركهم غير هو ستيلو ولا كجيني تقيل و الالام كتزاد نهار على نهار ..وفي لحظة  جاني أشرف و قاليا : شنو كتكتبي ؟!
أنا : كنكتب في قصتنا 😌
أشرف : بصح ؟! حولك مرة مرة  بالليل كتنوضي تكتبي ؟؟ حساب ليا كنتي كتقيدي الكريدي اللي عليك عندي ؟! 😂
أنا : هاذي الطريقة الوحيدة اللي لقيت باش نرد ليك واحد من المئة على شنو درتي معايا .. ونعرف المغاربة كاااملين شكون هو سيد الرجال 😌😌😌
و بالمناسبة بغيت نهضر معاك واخا عارفة هاذ الموضوع كضايقك ؛ غير اسمعني متقول والو ومتعارضنيش هذا آخر حلم ليا.. اليوم وصلاتني الوكالة من عند المحامي اللي طلبتي مني .. ابتداءا من اليوم انت الاب ديال جاد ؛ ويلا شي نهار بغى يشوف باباه وقف معاه عافاك و ساندو .. كيف ما بغات تكون ردة الفعل ديالو .. كنظن من هنا لهاذاك الوقت يكون هداه الله على ولدو ..  ودير في بالك نهار اللي طلبتي مني نديرو الوراق باش تتكلف بجاد حتى يكبر هذاك نهار  هزيتي عليا حمل الدنيا و الآخرة ؛ ويلا الله دا أمانتو وعدني باللي تعاود تزوج ؛ حتى جاد غاذي يحتاج لأم ترعاه و تعاونك عليه ؛ وأنا معنديش شك في الاختيار ديالك .. وعارفاك غاذي تفضل راحتي في قبري و راحت جاد على راسك .. و جدة مبغيتها تعرف والو .. راني درت كثر من ميتين تسجيل كل مرة سمعها واحد على اساس انها انا ؛ والله الى عرفاتني مريضة و لا وقعات ليا شي حاجة تمشي فيها ..و آخر حاجة نطلب منك هي هاذ القصة مكرهتش تكمل عليها و تطبعها و تنشرها 🙏🏻 عاااافاك أشرف ..
عينيه تغرغرو بالدموع و ككل مرة باش يهرب من الأمر الواقع كعنقني وكنحس بدموعو سردو ليا وجهي كيف ما انا كنسرد ليه وجهو و حتى صدرو .. 
أشرف : ان شاء الله انتي تكمليها و تصبنيها وتنشريها ..هاذي خدمة العيالات ..انا ماشي خدامتك سمعتي 😡انتي اللي غاذي تديري كلشي ماشي انا ماشي انا ماشي انا ..
واخا كحاول يضحكني ككل مرة و انا بدوري كنحاول نتفاعل معاه باش ضحكتي تطغى على دموعي .. بزوجنا عارفين باللي وصلنا للنهاية ..وبقينا معانقين حتى  داني نعاس في ايديه وملي فقت لقيتو حاضني فحال الى كنت بنتو .. هذا حبيبي ..
طلعنا للدار وجدنا أنا وياه العشا وككل يوم في أي وقت كنلعبو پلاي اللي  علمها ليا وليت ديما كنربحو فيها ؛  نقراو القرآن  اللي صاحبنا آكثر و أكثر هاذي طريقتو اللي كحاول يشبع  مني بيها و في نفس الوقت طريقتي باش كنشبع منو هو وجاد .. حيت ملي شكيت على طبيب انني وليت كنعس بزاف ..و أنني زراقيت .. مجاوبنيش فهمت بأن كل ساعة كتدوز كتقربني خطوة من الموت ..
جادووووو حبيبي عنق ماماتي .. وكيف كل مرة كعنقني و ما كطلقني حتى كنطلب منو .. وولا هادئ بشكل غير طبيعي واش حتى هو حاس ولا غير كتهيئ ليا؟!  الله يهون عليكم ويرزقك صبر فراقي .. يا رب
دازت سيمانة و أنا غير في الدار ؛ توادعت مع عائلتي كاملين ساعااااات في التليفون .. حاسة بأنه آخر اتصال ليا معاهم؟
المهم اليوم أشرف حلف حتى يدير ليا أكلة من إيديه .. ككل يوم ماشي أول مرة ..لكن أول مرة غاذي يختارعو من راسو حيلة باش ميحسسنيش أنني مقادراش نطيب ليهم ؛ حتى انا ولفت على اللعبة معاه حتى ثيقتها ..و على أحر من الجمر كنتسنى نقوليه رأيي فيها !
أنا غاذي نمشي نلبس و نفركس راسي وهذا هو الوقت المناسب باش نرجع نلبس فستان عرسي من جديد
النهاية

قصة جديدة بعنوان "قصة عشق"  😍😹👇🏻