صحبتي وكتبغي راجلي😔

بارت 7

غيقطع عليهم المصروف ويعيشهم فالدل بما أن عندوا نفوذ غيطلق ماما ويشرد خوتي إلا أنا مقبلتش نتزوج... بديت كنبكي وبست ليها يديها وقلت ليها بغا نتزوج أ ماما
ماما : مكيناش شيحاجة لخصها تفرض عليك الزواج وإلا تزوجتي خاصكي تحافظي على راجلك وتبغيه وتكوني ليه الأمن والإستقرار وتحافظي على شرافوا ومالوا وصحتوا....
أنا : واخة ماما كوني هانية أنا معمري نخيب ضنك ولا نضيع التربية لربيتيني...
صافي رضيت بالواقع وقررت باش نتزوج وأنا راضيا بالقدر ديالي وبديت كنوجد معاهم واخة مكنتش فرحانة دازت سيمانة دغية وجدوا لوراق ديال العقد مشيت لبست أنا واحد الجلابة بيضة وكنتسنا نشوف زماني غنمشي معاه ليوم باش نتكاتبوا وأنا معمري مشفتوا كيداير يارب ميكونش خايب ولا شي همجي ...واحد شوية كيصوني تلفون ديال بابا شيحد من طرف العريس...
بابا : ألوااا سي الحاج محمد فينكم ياكما كين باس
الحاج محمد : لا مكاين باس غير ولدي منير راه عندوا شيخدمة ليوم حتال غدة وغنجيوا أونجيبوا لعدول تالدار ندوزوا العرس ويدي مرتوا وصافي...
بابا : واخة الحاج لله يعاونك ..
وقال ليا راه لعريس تالغدا عاد غيجي  دوزوا العرس ويديك...
أنا : طلع ليا دم ولكن قلت بحال ليوم بحال غدا مشيت تكيت فيقوني مع التمنية تقولي مشاركة فالمراطون
ماما : أنوضي أبنتي راه خوك كيتسنا برا غيديك عند لكوافورة
أنا : واخة غير سيري أنا غندوش ونهبط..
ماما : ( من بعد ساعة ) رجعات عندي أويلي رجعتي نعستي يالبعلوكة غادي تشوهيني ..
أنا : نضت كنجري مشيت تخشيت تحت الدوش دوشت دغية ولبست جلابة بيضة وبلغة بيضة ومشيت مع خويا داني لصالون لقيت خمسة ديال لبنات واقفين كيتسناوني هالي جلساتني فوق الكرسي كتصاوب ليا شعري وحدة كتصاوب ليا ضفاري وحدة لمكياج وحدة كتنش عليا البرد وحدة شادة ليا لكاس ديا لحليب حسيت براصي وحدة من حريم سلطان صافي لبسوني تكشيطة فالبيض وداروا ليا تاج شفت راسي فالمراية وااااااو كنحمق جيت فنا معا مموالفاش ندير لمكياج جاني راسي بحال شي star غزالة باينة غانجيب تمام لعريس ههه ملي تميت خارجة داروا ليا زيف بيض على وجهي جا خويا داني وملي وصلنا لدار كانت فيا لخلعة قلبي كيدرب معاون مع جوق كيفاش غيكون هاد الراجل دخلنا لصالون ليفيه ضياف بان ليا واحد الراجل متوسط العمر لابس جلابة بيضة وطربوش حمر هذا هوا العريس زعمة قرب حدايا خويا هداك لعدول يالهبيلة شفتي داك الراجل الشارف لهاز عكاز وكيدور فراسوا فيه تقفقيفة تاع لموت هداك هو لعريس مكرهتش نتلاح عليه نريشوا ولكن عندوا الزهر أنا هيا العروسة دخلوني بزغاريت جلسوني حدا لعدول من جيهت ليمن عيني على الباب كنتسنى يدخل لعريس ومخلوعة بدا لعدول كيهدر ...
لعدول : نبداوا على بركتي الله فينهي لعروس وفين هو العريس يقربوا حدايا
أنا : قلبي كيزدح قربت حدا لعدول وعيني كيدورو على الحاظرين من تحت داك الزيف لمغطين ليا بيه وجهي ....
العريس : قرب حدا لعدول أنا لعريس..
أنا خرجت عينيا حتا كانوا غيخرجوا من زيف ملي شفت لعريس كيحمق وباقي غير صغير لابس واحد الجبادور فالبيض ومطروزة  بالأخضر وجاتوا كتسطي بغيت نحماق بالفرحة وحسيت أني عشقتوا من شحال هادي ماشي عاد ليوم ..
لعدول : فاطمة الزهراء بنت عمر واش كتقبلي بمنير ولد محمد زوج ليك على سنة الله ورسوله
أنا : أه موافقة .... وحشمت ههه
لعدول : منير ولد محمد واش كتقبل بفاطمة الزهراء زوجة لك -------------.....
منير : بقا شحال وهو ساكت ومكيهدرش بحالة كيسولوا شي حد أخر هوا غمعروض طر لعدول يعاود ليه سؤال وأنا عيني غرغروا ماعرفتش علاش حسيت بيه ماباغينيش كنشوف فيه من تحت الزيف محاملش يكون هنا شفتوا زير على يديه وقال ليه موافق...
بداوا زغاريت وناس فرحانين وكيشطحوا وأنا كنشوف كيفاش هاد الناس فرحانين لتعاستي جات عندي ماما قالت لي راه غادي نمشيوا أنا ولعريس نباتوا فلوطيل والغد فصباح غنسافروا شداتني غمة على قلبي سلات الحفلة وسلمت على ماما وخوتي وأنا كنبكي وركبت فطوموبيل  حدا منير  ومشينا دخلنا لشومبر  كان مقاد بحال داكشي ديال لأفلام الورد لحمر فوق النموسية والشمع والريحة كتسحر كلشي كان في غاية الرمانسية جلست فوق النموسية كنتسنى إيجي يحيد ليا زيف على وجهي ويقول لي مبروك علينا ويتعرف بيا...
منير : حل الباب دخل شوفي دوشي ونعسي بلا ماتسنايني خرج وسد الباب ..
أنا : نزلوا دموع من عيني بقا فيا الحال ماشي حيت مجلسش معايا ومعطانيش وقت بقا فيا غير 5 سويع لضيعت فالصالون ومشافنيش حتا كيديرة غير ضاعت هاديك 3000 درهم كون عطيتها لشي طلاب كون دعا معايا وديت الأجر
مشيت دوشت  ولبست شورط وتيشورط فالغوز وجبدت عليها بنعسة متقلبتش كنت عيانة بزاف في صباح حليت عيني على دقان فالباب مالقيتش منير فالبيت معرفتش فين بات حليت الباب لقيت rom service واحد الخدامة معرفتها من الصين ولا من دكالة قالت ليا مدام هاكي هاد العلبة راه ديالك ومشات حليت هدكشي لعطاتني.