قصص مال الشام .....

حديث الأرواح.....(واقعيه)

#حديث_الأرواح_بقلم_مال_الشام #قصة_واقعية الجزء الأول + الثاني + الثالث كنت طالعة انشر الغسيل على الحبل .. مع انو لازم كون هلأ بمدرستي تحديداً الصف العاشر بس أبي قرر انو بكفي دراسة .. اول شي زعلت .. بس هلأ تعودت حملت سلت الغسيل و طلعت .. كان الجو فيه نسمة برد و السما مغيمة يعني يا دوب في شمس .. بلشت انفض التياب وانشرهن و حط الملاقط انا وعم غني لفيروز و دندن ... وفجأة اجت عيني على حمامة لونها رمادي متخبيه تحت الكراكيب الي على الأسطوح .. تركت القميص الي بأيدي و مشيت باتجاها شوي شوي مشان ما تنتبه علي .. وصلت وقعدت على ركبتي وتطلعت فيها كانت كتير حلوة وهادية .. شافتني وما هربت مني .. حسيتا هي كمان عم تطلع فيني .. ( شو عم تعملي هون يا حلوة ؟ .. اول مرة بشوفك على الأسطوح شكلك جايه جديد .. ما بدك تطيري وتهربي مني ؟ .. ) مديت ايدي انتفضت وصارت ترفرف بجناح واحد ..ركضت ولزقت بالحيط وحسيت كأنها عم ترجف .. كانت عم تحاول تطير بس ما قدرت تحرك الجناح التاني ، انقهرت من حالي لانو خوفتا .. بعدت عنا ورجعت كفي نشر الغسيل وعيني عليها .. خلصت ونزلت لتحت وبقيت عم حوص اخدت زبدية فيها مي وشوية خبز ورجعت طلعت حطيتن قريب منها بللت الخبز بالمي ونزلت لتحت كملت شغلي بالبيت .. - انا اسمي فردوس .. عمري هلأ صار 15 سنة عندي تنتين اخوه بنات متجوزين وتلاته شباب واحد منن متجوز .. والحمامة الي تعرفت عليها بأول مره صارت هي رفيقتي وبيت اسراري انا وياها كتير قراب ومنحكي كل شي لبعض .. حاولت كتير عالجها مشان تقدر تطير بس ما عرفت وخفت احكي لامي و تخلي اخواني يشيلوها من على الأسطوح .. حياتي كتير هادية وطبيعية .. ما فيها شي مختلفة او مميز .. واجباتي اليومية متكررة والأشخاص الي بشوفهن وبيشوفوني محددين بحكم اني من عيلة محافظة وما عندي رفقات .. كنت على الأسطوح قاعده مع الحمامة الي سميتها ( حره ) وسمعت امي عم تعيط علي..قمت بسرعه ونفضت تيابي و خبيت حره ونزلت ركض لعندا .. اعطتني تياب جديدة و قالتلي فوت اتحمم ورتب حالي لان جاين خطابة لعندنا وابي بدو يستقبلن .. عملت متل ما قالتلي وما كنت مستغربة لان اخواتي تجوزو بهاد العمر .. بس كنت خايفه وخجلانه كتير .. بعد ما طلعو الجماعة من عندنا فاتت امي وابي على غرفتهن و انا ما عرفت شو صار معن وتاني نهار اجو النسوان وفوتتني امي لعندهن كان قلبي رح يوقف من الرعبة و الخجل .. الي عم تمسك خصل شعري والي بتشدني من خدودي و احلى شي امو للعريس الي طلعتلي جوزة وقال ( حبيبتي زكاتك اكسريلي ياها مشتهيتا وما عم تنكسر معي ممكن ؟ ) فتحت عيوني على وسعهن وتطلعت بأمي لتحكي شي .. عضت امي على شفافها واشرتلي بعيونها انو اخود الجوزة .. وبالفعل اخدتا وكسرتلن ياها .. بس قدرت اطلع من عندهن فتت عالمطبخ وبلشت ابكي ما كنت مرتاحه وحسيت الي عم يصير شي كتير غريب علي ومو صحيح .. وبعد ما راحو قالت امي انو هدول الجماعة رح يصيرو بيت حماي وابي موافق عليهن .. وقعدت معي وصارت تشرحلي شوية تفاصيل عن العادات و كيف بدي اتصرف وشو بدي اعمل بكرا لما يجي العريس يشوفني ... رغم الخوف و المواقف الغليظة الي صارت بس نمت وانا متشوقة شوفو لهاد الي رح يصير جوزي!! .. وضليت عم فكر شو بدي البس بكرا وكيف رح احكي معو وانا اول مره بحياتي بحكي مع رجال غريب علي ! مرق الوقت بشكل بطيء كتير وتأخر الصبح لأجا .. صحتني امي من بكير لنعزل البيت كمان مره ونجهز ضيافه الرجال والنسوان واجو اخواتي ساعدونا وبلشت حس برهبة اللحظة لما اجا ( حسان ) وفتت لعندو وحاملة بايدي صصينية القهوة .. كانو الفنجاين عم يهزو بالصينية والمي صارت تشرشر .. ومرت اخوه واختو عم يتفحصوني منيح .. وصلت لعندو ومديت الصينية وما استرجيت اتطلع فيه .. كنت بدي اطلع من الغرفة بس صوت حماتي سبقني وطلبت مني روح اقعد جنبها .. ما بعرف ازا هي كانت حاسة كيف عم ارجف وانا جنبا .. بصعوبة قدرت ارفع عيوني واسرق نظرة على حسان ، شب اسمر .. طويل و مجذب و عيونو لونهن اخضر .. صار يسألني ويحكيني وانا رد بصوت واطي .. _____________________ انا عجبتو وهو عجبني .. وصار كل شي بسرعه و صارت حفلة كتب الكتاب .. فات حسان بعد ما كتبو الكتاب ليشوفني و يلبسني المحابس .. ومع زلاغيط النسوان وعلى فوتو انقطعت الكهربا من المكان كلو .. وما عاد حدا شاف التاني لانو كانت الحفلة بعد المغرب اول صوت سمعتو هو شهقة حماتي ام محمد .. شهقت بقوة وضربت على صدرها ( يا لطيف يا لطيف شو هالفال البشع ) فاتو العالم ببعضهن و انا توترت .. وصل حسان وقعد جنبي وسلم علي و صارت دقات قلبي تتسارع .. بعد عشر دقايق كانو الكل قاعدين وساكتين اجت الكهربا ورجع صوت الأغاني بس حماتي ضلت قاعده مكانها وعم تزورني وانا عيوني بالأرض و ماسكة دمعتي..#مال_الشام حسان : فردوس انا صرت جوزك هلأ .. تطلعي فيني فردوس:امك معصبه كتير ليك كيف عم تطلع علينا حسان:ههههه طيب ما تهتمي عادي هلأ شوي وبتشوفيها قامت ترقص وتغني .. تطلعي فيني لشوف .. رفعت عيوني فيه ومع انو كنت بدي ابكي بس لما شفت ضحكتو صارو عيوني يضحكو ونسيت الي صار..بس المشكلة انو حماتي ما نسيت هالموقف البسيط و طول فترة الخطبة وكل ما صار مشكلة صغيرة او خلاف تزتلي كلمة انو فال هالخطبة على ابنها مو منيح وقطعت الكهربا على فوتو هي اشارة .. قلت لأمي انو ماني مرتاحه بنوب بس كانت تقلي التهي بجوزي وشو ما قالت مرت عمي ابتسم وما جاوب .. قبل العرس باسبوع اجا حسان زيارة لعندي...عملتلو شاي وحطيت موالح و قعدت انا وياه و اخواني التنين وامي .. بعد ربع ساعه كل واحد راح على مكان وضليت انا وحسان قاعدين على البرندة فردوس : حسان بدي احكيلك سر حسان:سر؟؟؟؟؟خير؟ فردوس:تعال معي على الأسطوح حسان:ليش عالأسطوح ليكنا قاعدين .. بخاف ابوكي ينزعج فردوس : ما منطول والله بس بدي ورجيك شي رفع حواجبو باستغراب وضليت عم نق لاجا معي .. طلعنا لفوق واخدتو على الزواية الي فيها ( حره ) وعرفتو على رفيقتي الحلوة و قلتلو انو الها فترة هون وما حدا بيعرف وما عرفت عالجها مشان تطير ضحك علي وقلي انو عالأغلب تموت ازا ضلت هون حتى لو بحطلها اكل بس لازم تطير فردوس : لا ما بتموت ، انا سميتها حرة مشان هي ما تزعل و تعرف انها حرة حتى لو ما طارت حسان: هههه فردوس بلا هبل .. ليكي هي مبين جناحها مكسور شو هاد الي مربطتيها فيه ؟ فردوس:انا سألت اخي وهو قلي لازم تنربط بقطعة قماش وتتغذى وبعدا تطير وهيك ربطتلها جناحها حسان:طيب خلينا نفكو ونجرب نشوف ازا فيها تطير ؟ فردوس:امبارح جربت وما قدرت تحركو .. حسان:طيب هلأ منجرب يلا حملتا وحطيتا بحضني و فكيت قطعة القماش عنها .. كنت حاسستا دبلانه و خايفه .. مد حسان ايدو وقلي اعطيني ياها .. حطيتا بايدو و اخدا وراح على طرف الأسطوح وانا عم امشي وراه فردوس : شو رح تعمل ؟ حسان:رح اتركها تطير فردوس:لك لأ والله ما تعافت ما فيها تطير ليك ما عم تحركو ! حسان:خلص بس شوفي انتي .. بالفعل حطها على طرف سور الأسطوح وصار يدفشها لقدام وهي تهرب منو وترجع .. رجع مسكها و رماها بالهوا بسرعه وانا وقع قلبي من مطرحو وصرخت بدون وعي .. وشفتها كيف حاولت تعيش بس ما قدرت و وقعت تحت بأرض الديار الخلفية الي ببيتنا .. فردوس:لك شو عملتتتتت حرام علييييييييييك حسان:ايه مابعرف فكرتا رح تطير !! ما قدرت امسك دموعي بكيت كتير وانقهرت كتير وخفت انزل و شوف شو صار فيها ، نزل حسان و دفنها هنيك لان ارض الديار الخلفية كانت تراب وشوية شجر .. #مال_الشام اختنقت من الموقف الي صار و حسان يتمسخر علي وانا ابكي و انو الموضوع مو مستاهل .. _______________ اجا موعد العرس ، ما لحقت امي تفصلي فستاني على ايدها متل خواتي لهيك اشترولي ياه جاهز بس كان كتير حلو قماشو ساتان ومشكوك لولو .. وطرحة شيفوت ناعمة كتير الكل قالو طلعت كتير حلوة بالعرس .. بالذات لفت شعري لانو شعري اسود متل عتم الليل وطويل كتير و مكياجي كان خفيف ضلو ملامحي واضحين .. بعد ساعتين من الحفلة قالو انو الرجال بدن يفوتو والحريم تتغطى .. ما عاد عرفت شو عم حس مبسوطة ولا خايفه ولا شو .. فاتو ابي و اخواني و حسان وخمس دقايق طلعو هن وضل حسان قعد جنبي .. ومسكلي ايدي وحسيت متل تيار كهربا مشي بجسمي حسان : طالعه كتير حلوة فردوس:شكراً حسان:لايمت بدك تضلك تخجلي مني خلص رح تصيري مرتي كنت عم اهرب بعيوني منو وملبكة كتير .. حط ايدو على خدي ولف وشي لعندو : شوفي جبتلك هي الأسوارة فردوس:ايه بس انت لبستني دهب حسان:مافي شي بيغلى عليكي.. تعي لبسك ياها التفتت على امي كانت مشغولة مع المعازيم .. اجت عيني على مرت عمي ولقيتها قاعده و وشها لونو اسود اسود وعم تطلع فيني وتزورني .. مسك حسان ايدي ليلبسني الأسوارة وسحبتها منو بقوة ( مافي داعي خلص ) حسان:لك شبك جايبلك ياها هدية ! شبكت ايدي ببعضن بتوتر: شكراً كتير بس والله ما في داعي ما بدي ياها حسان:العمى لك شو هالبنت هي ! #مال_الشام بقينا ربع ساعه ما عم نحكي بس عم نسمع صوت الأغاني .. لوقت ما بلشنا نسمع صوت شي تاني .. فكرت حالي عم اتوهم بس كان في اصوات عالية عم تيجي من برا صوت رجال كأنو في خناقة او شي الكل انتبه على الصوت و طفو المسجلة وعنجد كان في اصوات عالية جايه من برا .. وقف حسان وبدو يطلع ، مسكتو من ايدو بخوف ( وين رايح؟ ) سحب ايدو مني وتجاهلني وضل نازل بسرعه وامو عم تندهلو ( امي طمني شو صاير برا الله يستر يا رب الله يستر يارب ) اجت اختي و قعدت جنبي فردوس : شو بدو يكون صاير برا والله ميته من الرعبة اختي:حبيبتي عادي ما في عرس الا بتصير في خناقة او مشكلة صغيرة وبتنحل بسرعه فردوس:وين اخواني ابعتي وراهن ليفهمونا شو صاير ! اختي:لك اهدي بئى مكياجك كلو انتزع شوفي كيف صار وشك !! هاد وش عروس ؟؟ فردوس:امانه اعطيني مي بدي اشرب.. ناولتني كاسة مي وشربت شفة و رجع فات حسان .. قامت اختي من جنبي و هو اجا باتجاهي والكل يسألو شو في وما عم يرد على حدا وشو متل السم وعيونو متل الجمر وعم يتطلع فيني كأنو قاتلتلو قتيل وقفت على رجلي واول ما وصل سألتو انا وعم ارجف ( حسان شو صاير ؟ شو في ؟ ) كان بأيدو عباية سودا رماها علي وغطاني فيها .. حطها على راسي بقوة وسكرها ركضت امي والكل يسالوه شو صاير و ما كان يرد على حدا و انا حاسة حالي رح غيب عن الوعي وما عاد مركز بشي ولا فهمانه شي .. بعد ما غطاني نزلني وسحبني من ايدي بقوة كأنو اظافرو رح تنغرس بلحمي .. بلشت ابكي و اسألو بصوت عالي ( لك وين ماخدني شو صاااير ؟ ) وما كان يرد ولا حدا قدر يوقفو .. تطلعت بأمي لقيتها عم تبكي وصرخت بصوت عالي ( امي خلي ابي يجي بسرعه امانه ..) #حديث_الأرواح_بقلم_مال_الشام #واقعية الجزء الثاني انقلب العرس عزا ... قاعده ببيتي الي فوق بيت حماي لحالي والباب مسكر علي .. بفستاني وبطرحتي و بدموعي .. وصوت عياط النسوان فوق بيتي من بيت سلفي و من تحت من بيت عمي .. مات سلفي .. اخو جوزي الكبير .. عمل حادث سيارة وتوفى ونحنا بالعرس و قامة القيامة .. اخدني حسان وجابني على البيت حطني وقفل الباب علي .. ضليت للساعه 1 قاعده لحالي عم افتل من شباك لشباك بدي حدا يطلع لعندي كنت حاسة روحي رح تطلع وراسي رح ينفجر من البكي والعياط الي حوالي .. بعد دقايق سمعت صوت الباب عم ينفتح .. ركضت لشوف مين اجا .. فتح حسان الباب و فاتت امي و خواتي ريم ومريم .. تركنا حسان ورجع نزل لتحت وانا رميت حالي بحضن امي وصرت ابكي فردوس : شو عم يصير عنجد محمد مات يا ربي كيف هيك صار مريم : طولي بالك اختي الشب عمرو خالص وكلي الله .. ريم : يبعتلي حمى عليكي على هالنصيب يا اختي لا حول ولا قوة إلا بالله .. اخدتني امي بدلت تيابي و مسحت مكياجي .. و الصبح نزلنا لتحت لنوقف مع مرت معي و نستقبل الناس .. واول ما شافتني وقفت بكي واجت لعندي و حكيتني كم كلمة متل السم من بين اسنانها ام محمد ( اطلعي لفوق وما تخليني شوف وشك ، من لما شفنا وشك ما شفنا الخير حسبي الله ونعم الوكيل ) تطلعت بأمي وبلعت ريقي بخوف .. سحبتني امي لورا و همستلي ( اطلعي على بيتك) لحقوني خواتي و فتنا وسكرنا الباب علينا فردوس: مريم .. ريم .. هلأ عنجد معقول انا السبب ؟ مريم : استغفر الله العظيم شو هالحكي ، ما بجوز تقولي هيك هاد قضاء وقدر والشب عمرو خالص الله يصبر مرتو و اولادو ريم:اختي هي حماتك صارت بمقام امك هيك اهلنا ربونا .. بدك تسايري وتتحملي و ما تفتحي تمك ها .. وهلأ هي موجوعه وخسرت ابنها شو ما حكت ما لازم تاخدي على خاطرك ايه؟ هزيت براسي وقلتلهن ماشي .. مرق اسبوع كنت اشتغل ببيتي كل شي من قهوة وضيافه و اكل للعزا حسان يجي يحطلي الأغراض ويروح و امي واخواتي يجو لعندي يساعدوني .. غير هيك ما كنت شوفو ابداً .. اختنقت من الي عم يصير وكنت بدي اعرف احكي معو كل ما حاولت يتجاهلني ويروح .. اخر شي عرفت انو حماتي مانعتو يفوت لعندي .. مشيت الأيام يوم ورا يوم لوقت ما مرق شهر ونص وجوزي ينام تحت عند حماتي اخر شي ابي بعت خبر وراه واخدو حكي معو وقلو ازا ما بدو ياني اهلي بدهن ياخدوني وارجع على بيت اهلي.. اتصلت امي فيني وقالتلي جهزي حالك اليوم جوزك طالع لعندك .. ماعرفت اضحك ولا ابكي جهزت حالي وقعدت انطرو وانا حاسة بقلبي غصة منو ... بعد ما فقدت الأمل من جيتو نمت انا وعم ابكي .. حسيت عليه بعد نص الليل وهو عندي بالبيت ... بس شفتو صرت ابكي من كل قلبي كأني مو طايقتو وهو صار يعتذر مني ويقلي انو امو هلأ تعبانه ولازم نسايرها و هو نطرها لنامت ليقدر يطلع لعندي وبدنا نضل هيك فترة ليبرد جرحها ما بعرف ازا قلبي طيب او جدبة بس تفهمت وضعو و وعدتو وقف جنبو وما ازعل من هون ورايح .. ومن هون بلشت اتنازل عن جوزي بالتدريج .. نام عندي و عالفجر بدل تيابو و تغسل ونزل لعند امو .. بعد تقريباً اسبوع دريت امو انو بيطلع لعندي بدون علمها وانو صرنا متجوزين بشكل رسمي و طلعت اصواتهن و تخانقتو .. كنت واقفه على الشباك عم اسمع كل شي هي وعم تقلو انو كانت بدها ياه يطلقني لانو وشي مو خير عليهن وانها مو طايقه تشوفني و بتحس شي كابس على صدرها بس تتزكر اني صرت كنتها .. وهو ما دافع عني بشي وكان عم يترضاها .. وبعدا بلشت حياتي الطبيعيه (او شبه الطبيعية) مع حسان بس ما كنت استرجي انزل لعند حماتي بنوب لوقت ما هي طلعت لعندي و صارت تفهمني انو لازم انزل اشتغل عندها تحت لانو بنت حماي سافرت مع جوزها وهي تعبانه وما بتقدر تشتغل .. وبس خلص من شغل بيت حماي تحت اطلع لبيت سلفي فوق واشتغل شغل سلفتي لانها بالعدة ودير بالي على ولادها وطعميهن وشوف شو بيعتازو و بعدا بنزل على بيتي .. هاد كلو وانا بنت 15 سنة وما استرجي اعترض او قول لأ كان كل همي رضاها بلكي بتغير فكرتها عني .. حسان كان منيح معي بالليل يهرب لفوق شوية اكلات طيبه والصبح نخبيهن تحت التخت حتى ما تشوفهن حماتي ، سلفتي كمان كانت تكرهني وتكره وجودي كأنها مسدئة حماتي انو انا السبب بموت جوزها كانت اكبر مني بخمس سنين وقوية كتير .. فطورها وغداها و كل شي كان يطلع لعندا جاهز هي وولادها وما كنت قصر معها بشي .. بلشت اتعود على حياتي الجديدة وبلشت حب حسان واتعلق فيه لانو بهل بيت هو الوحيد الي كان يهتم فيني ازا قلت اخ او تعبت و يسايرني بكم كلمة ويطلب مني وقف معو واتحمل .. بعد 8 شهور كنت لسه مو زايرة بيت اهلي ولا مره و كل ما اطلب من حسان يقلي اسألي امي وبس اسألها تقلي ( ومين بدو يساعدني بالبيت ؟ ) ولما حاول الجئ لعمي ( ابو جوزي ) بقلي متل ما قالت مرت عمك اعملي .. لوقت ما فاجئتني وطلعت لعندي الصبح فاتت علي انا ونايمة بتختي وفتحت الباب ام محمد: فردوس بعدك نايمة ؟ فردوس:مرت عمي ؟الساعه 6 بس ساعه وبقوم ؟ ام محمد : لا قومي هلأ خلصي شغلك وروحي زيارة على بيت اهلك .. اقعدي عندهن كم يوم الك كتير ما شفتيهن فردوس:عن جد مرت عمي ؟ فيني روح؟ ام محمد: لا عم امزج معك كنتي .. لا حول ولا قوة الا بالله .. خلصي شغلك وروحي .. ما كزبت خبر وقمت عالسريع بلشت من الطابق الأول بعدين الطابق التالت بعدين بيتي و ضبيت غراضي واحترت ازا بنطر جوزي ليرجع او بروح هلأ .. سألت حماتي وقالتلي انو هي بتخبرو و طلع معي عمي ليوصلني على بيت اهلي .. على اساس ابقى هنيك تلات ايام .. ابي كان حنون و سمعتو بالبلد متل الدهب .. كانو عم يحكو بجوازة اخي واجو مريم و ريم شفنا بعض وبلشت احكيلهن كل شي وهن يبكو علي و ينصحوني ويفهموني كيف اتصرف وكيف اقنع جوزي وخليه يوقف بصفي ضد امو وكانت كلها شغلات اول مره بسمعها ..تعلمت اطبخ ونظف و اعجي جوزي حقو بس اكتر من هيك مابعرف... باليوم التالت اتصلت على بيتي لاحكي مع حسان يجي ياخدني وما حدا رد .. اتصلت على بيت حماي وردت مرت عمي وقالتلي ضل كمان يومين ما اعترضت وبقيت .. بعد يومين قلت لأخي يوصلني اخدني على بيتي وصلني وراح .. قلت بطلع بالأول بتحمم و برتاح وبعدا بنزل لتحت وهيك صار .. عالظهريات جهزت حالي و طلعت شق على سلفتي ازا عاوزة شي قبل ما انزل شوف حماتي وقفت على الباب ودقيت اكتر من مره .. اخر شي فتحتلي سلفتي كوثر و انصدمت من المنظر الي شفتها فيها .. كانت لابسه قميص نوم و ريحة عطرها واصله لبرا .. قالتلي انو ولادها تحت ومو معتازة شي نزلت متل الجدبة و مستغربة ليش هيك عاملة كوثر بحالها .. وقت فتت لعند حماتي وشافتني كأنها شافت جني قدامها وما عجبتها رجعتي و لو ما قلتلها ابي بعتني كان بدها تعملي مشكلة .. المسا على وصلت حسان طلعت على بيتي انطرو بس ما اجا لعندي .. نزلت كزا مره سألت عنو وقال عندو شغل .. مرقو يومين نفس الوضع بعدين اجا لعندي وقال كان عندو شغل بالمزرعة و بالمحصول وما صحلو يرجع عالبيت بنوب ما اخدت واعطيت بالموضوع و مشيت القصة .. صرت انتبه على جوزي انو كل يوم بيتأخر علي ساعتين اقل شي .. وحماتي ما عاد خلتني اطلع لعند سلفتي وسلفتي ما عاد نزلت لتحت .. هاد كلو كنت مستغربتو وما عم لاقيلو تفسير .. لوقت ما عرفت انو جوزي اتجوزها لكوثر .. بهداك اليوم طلعت لعند كوثر قبل رجعت حسان و ضليت قاعده وهي عم تتناشف بوشي وما كنت افهم عليها انو بدها تقلعني .. دق الباب وركضت عليه لتفتحو وقمت لحقتها ولقيت جوزي على الباب حسان : فردوس انتي هون؟كنت بدي شوف ازا كوثر محتاجه شي فردوس:اي بس هاد مو وقت رجعتك كأنك جاي بكير؟ حسان:اي اي طلعت بكير..يلا انا نازل على البيت الحقيني فردوس:ماشي هلأ بلحقك .. كوثر:حسان استنا شوي .. مسكتو من ايدو وفوتتو عالبيت وانا عم اتفرج عليهن حسان:شبك كوثر؟ خلص منحكي بعدين كوثر:لا لازم نحكي هلأ .. انا حامل و كمان شوي رح يبين علي الحبل واول عن اخر بدها تعرف ما في داعي نخبي اكتر فردوس: شو ؟ .. شو عم تحكي انتي ؟ حسان:_ _ _ كوثر: انا وحسان تجوزنا .. حماتي هيك بدها وانا هلأ حامل .. فردوس:حسان مزبوط هاد الحكي ؟ .. لك حسان احكي شي !!! حسان !!! _____________________ بهيك موقف ما بتزكر الا مثل واحد ( موته وفوقها عصة قبر ) .. رحت حردت ببيت اهلي شهرين وحسان ما سأل عني وانا دمعتي ما نشفت والكل يسايرني ويقنعوني انو انا الأصل وانا الأولى وهو تجوزها مشان ولاد اخوه ما يروحو للغريب .. اتصل ابي على حسان وطلب منو يجي ياخدني وبالفعل اجا اخدني وما قدرت اتطلع بوشو ابداً .. ما عاد قدرت اعتبرو رجال كتر ما عم ينزل من عيني .. فتت على بيتي و بقيت اسبوع ما انزل اشتغل لحماتي وما بدي شوف حدا .. بس هي ما تركتني بحالي وصارت تقول انها جوزتو ( ام الصبايان ) لتفرحلو بولد لانو انا ما حبلت لهلأ وشكلي ما بخلف .. بعد فترة جبرني حسان ارجع انزل ساعد امو و ما احكي مع كوثر شي واتجاهلها بس ما كنت اقدر .. بس شوفها حس حالي عم اختنق .. كيف يعني جوزي يوم عندي ويوم عندها وانا لسه عروس ما لحقت شوف شي الا القهر و الذل !! خلفت كوثر وجابت الصبي متل ما حماتي كان بدها وانا ما حبلت وبلشت اقتنع بحكيها انو عنجد ما فيني جيب ولاد .. ومرقو تلات سنين وانا على حالتي عايشه بدون روح كل يوم ابكي دم بدل الدموع، ما حبلت ولا صار معي شي جديد و اجت كوثر وخبرتنا انها حامل مره تانيه و انا صرت ابكي قدامهن وما قدرت خبي دموعي .. لبعد اسبوعين زارتني اختي وقلتلها انو عم حس دايماً بتعب ولعية نفس يمكن لان نفسيتي تعبانه .. جنت وفرحت كتير وقالتلي بجوز كون حامل ... و بالفعل اتصلت بأخي فوراً وقالتلو يجي ياخدني على الدكتورة وعملتلي فحص وطلعت "حامل" المسا خبرت حسان بس رجع وهي كانت احلى لحظة بحياتي لان كنت حس حالي كتير بحاجة لطفل و نفسي عيش احساس الأمومة .. فرحتي ما بتنوصف ولا بتنحكى رغم كل شي عم عيشو بس فرحة بخبر انو رح صير ام وانو ماني عاقر متل ما بتقول حماتي .. خبرت بيت عمي و الصدمة انو كزبوني بكلمة وحده .. ( الشجرة اليابسة بعمرها ما بتزهر لك كنتي .. كيد النسوان مو علي .. قومي اشتغلي !! ) رغم انو انا حامل وكوثر حامل بس ما حدا رحمني او خاف على الي بطني متل ما كانو يهتمو فيها وياخدوها على الدكتور و يريحوها وانا الشغل كلو فوق راسي وجسمي هلك وكان الحمل كتير صعب علي وما حدا وقف جنبي الا رب العالمين .. لما بلش يبين بطني و ثبت حملي حماتي انزعجت كتير و خلصنا من قصة انو عاقر وصارت قصة انو رح جيبلن بنات وام الصبي بس بتجيب صبيان !! .. وفعلاً هاد الي صار .. ولدت كوثر وجابت صبي .. وانا ولدت ولاده مبكرة بأول التامن .. وجبت بنت .. وسميتها ( حرة ) بس الله راد يكون مصيرها متل مصير رفيقتي الحمامة ( حرة ) .. #حديث_الأرواح_بقلم_مال_الشام #واقعيه الجزء الثالث مابهم انو الكل شمتو فيني، مابهم انو حسان ضل تلات ايام لشاف بنتو و تقبلها…. المهم انو اجا على هي الدنيا مين يحمل عني كتف و يصبرني… بعد ولادتي باسبوع فاجئني حسان انو لازم صير انزل على اراضي اهلو و نجمع المحاصيل لان صار وقت الحصاد…كوثر ما طلعت معي لان قالو ولادتها كانت عسيرة و صار عندا اربع اولاد مافيها تتركهن… كنت اترك بنتي عندها و اطلع الصبح مع حسان و نرجع بعد المغرب اتحمم و غسل تيابي و اركض اخود بنتي طعميها و غسلها و انزل ضبضب بيت حماي… بس توصل الساعه 8 مابعود شي بيحركني بنام كأنو جثة… يمكن استيعابي بطيئ بس بلشت اعترض انو ما عاد اطلع احصد المحصول ازا ما بتطلع كوثر معي و حكيت مع أمي و شكيتلها و قالتلي ازا ما طلعت سلفتي ما روح ابداً… _______ حسان: فردوس؟؟؟؟ لك نايمة؟؟؟ فردوس: لا مو نايمة بس طلعت دقيت الباب عليك انت و كوثر وما رديتو و رجعت نام.. حسان:اي بكون ما سمعت انا وعم جهز حالي… يلا مشان نطلع فردوس:ليش كوثر جهزت؟ حسان: رجعنا لنفس السيرة… قلتلك امي مايدها ياها تطلع… عندها اربع ولاد مافيها تتركهن!!! فردوس: وانا عندي بنت صغيرة بدي رضعها و دير بالي عليها، مو شايف بنتك كيف صايرة وشها اصغر و عم تبقى نايمة كل الوقت انا خايفه عليها حسان: ايوووه…. كبران راسك انتي و صار بدك تربايه قعدت ابكي واصرخ: لا مابدي تربايه انا مربايه ومارح اطلع عالشغل كانت علامات الصدمة واضحة عليه كأنو مو مسدئ الي عم يسمعو… مسح وشو بايدو وصار يهددني ( طيب انا بورجيكي) طلع من الغرفة و انا قمت من التخت بسرعه لشوف وين راح، فتح باب البيت و نزل لتحت نده لأمو و طلع هو و ياها… فردوس: مرت عمي انا قلت بروح بس كوثر تطلع و امي قالت ازا ما منطلع تنيناتنا ماروح لوحدي ام محمد: امك اه؟ …. بدك تحطي راسك براس ام الصبيان وليه؟ فردوس: شو يعني ام الصبيان شوووو يعني؟؟؟ شو ذنبي ازا الله اعطاني بنت شووو بعمل!!! ام محمد: حسان اطلاع من الغرفه لشوف اطلاع… ما شفتا الا هجمت علي وصارت تعضني و تقرصني بكل مكان بجسمي و انا ابكي و عيط و بنتي تبكي معي… ومن بعدا صرت اطلع كل يوم من تم ساكت… كل شي جربتو من زيتون و حمص و قمح و بندورة… لصار عمر حرة تلات سنين… حبلت كوثر و كانت تعايرني عالرايحه و الجاي و تقلي انها رح تجيب لحسان الصبي التالت و انا ما قدرت جيب الا شقفة بنت، بس شقفة هالبنت كانت هي فرحة عمري و املي الوحيد بالحياة الي ما دامتلي و راحت مني بسرعه … كان درج البناية بدون سور…كل يوم كان حماي يقول بدو يجيب يحطلو حديد و درابزين مشان الصغار بس ما يعمل شي…متل عادتي عالمغرب كنت راجعه انا و حسان و جسمي متكسر من الشغل… اول ما فتنا على الباب لقتني حماتي و طلبت فوت اعمللهن عشا بس كنت تعبانه كتير و صرت عيط بصوت عالي (لك بدي اطلع اتحمم و غسل و شوف بنتي خلي كوثر تنزل تعمللكن عشا… كوثرررر يا كوووثرررر) فتحت كوثر بابها و طلعت و حطت ايدها على بطنها ( حبيبتي انا حامل مافيني اشتغل مشان الي ببطني) فردوس: وينا بنتي؟ نزليلي ياها لطعميها هون حسبي الله ونعم الوكيل… طلعت بنتي من وراها متل الفراشة بس سمعت صوتي و كانت تضحك و تركض شفتها بعيوني اول ما طلعت من الباب حتى انا صرت اضحك اول ما سمعت صوتها و ضحكتها، كان شي متل الكزب… لابسه فستان زهر بارد و عملتلها شعرها جدولة الصبح وهي نايمة…وهي عم تركض عالدرج بلش قلبي يخفق بسرعه و نفسي يديئ ( حرة…. حرة شوي شوي…. ولك شوي شوووووي) كانت عم تترنح بمشيتها و تسند ايديها الصغار على الدرج و تضحك و تشهق… ركضت لاطلع لفوق لعندها بس كانت اسرع مني…. اسرع مني بكتير… وصلت على الارض بلمح البصر… زحلت رجلها عن الدرج و وقعت من درج الطابق التالت ضربت بدرج التاني و وقعت على الارض… و اخر شي شفتو جسم صغير كتير وقع بسرعة البرق قدام عيوني بدون ما اقدر اعمل شي… ________________ كانت متل الحمامة… متل الحمامة الي رماها حسان من اسطوح بيتنا والله… ريم: يا اختي مشان الله لك ببوس ايدك حاج.. رح تموتي حالك عم تحرقي قلبنا عليكي!! مريم:فردوس شو رأيك تجي زيارة عندنا؟ الك شهر قاعده بهل غرفة خلينا ناخدك لعند ابي ليفرح بشوفتك فردوس:ليش ما طارت؟ ليش ما طارت مو عم تقولولي صارت عصفورة بالجنة؟ مو حرام تتركني لحالي و تروح؟ شو بدي اعمل انا هلأ كيف بدي عيش بدونها؟ ريم: مريم تعي نطلع و نتركها ترتاح لحالها، مافي فايدة من الحكي… امشي معي… ________________ ما كنت قدرانه افتح باب البيت و اطلع، كنت عم ابقى خايفه و متخبيه جوا… و حسان يقضي. تلات ايام عند ضرتي و يوم عندي مضيه انا و عم ابكي يتركني و ينزل لعند امو.. لوقت ما بيوم سمعت صوت عياط و حركة ببيت حماي… بلشت حوص و حاول افهم شو صاير...لبست تياب الصلاة و فتحت الباب و طلعت بعد موت حرة لاول مرة… كنت عم ارجف لوصلت لبيت حماي و هنيك فهمت من ولاد ضرتي انو حماتي اخدوها على المستشفى… صار معها جلطة و رجعوها يومين و بعدا راحت عملت عملية قلب مفتوح… ولما رجعوها كانت ولا كأنها الي ظلمتني و عزبتني كل هالعزاب….ضلت تسال عني و تندهلي لاقعد جنبا و تصير تبكي و تشمني و تحضني… وجعني قلبي على حالتها و ضعفها و صرت انزل نام عندهن بالبيت و اخدمها و طعميها و غسلسلها و استقبل ضيفوها و هي تبكي و تطلب مني سامحها على الي كانت تعملو فيني… ماقدرت الا قلها الله يسامحك…. رجعت اشتغل كل النهار بس هالمرة انا و مبسوطة اول شي لان بدي اي شي اعملو لاهرب من تفكيري ببنتي و تاني شي لانو كنت فرحانه برضى حماتي علي كأنو حلم عندي و تحقق… هون ضرتي خلفت و جابت بنت و على شوي رح تموت من كيدها و قهرها و مو عاجبها مع اني انا مشتهيه الضنا… رجعت حبلت و فرحت كتير و جوا قلبي كنت متمنيه تجيني بنت و حسان يقلي انو ناطر الصبي… و حماتي بلشت تتعافى و تردلها صحتها…. سلبت مني فرحتي بالحبل لما وقفت على رجليها و اول كلمة قالتلي ياها ( من بكرا بترجعي تطلعي على الاراضي و المحاصيل اتدللتي كتير حاجتك قعده بالبيت….) … و رجعت متل اول و ابشع كأنها كانت تستغلني كل هالفترة لتردلها قوتها و ترجع تدوس علي… #يتبع #يتبع [ #حديث_الأرواح_بقلم_مال_الشام #واقعية الجزء الرابع + الخامس + السادس + السابع + الثامن #انتهت بعد صفنه طويلة .. ضحكت .. تطلع فيني جوزي وزورني .. ام محمد:شو خير ؟ فردوس : بتعرفي مرت عمي .. دايماً كنت عم فكر .. انو ربنا عز وجل عادل ورحيم .. ليش بخلينا نتعزب بهي الحياة ؟ تطلعت حماتي وحسان ببعض مستغربين حكيي .. فردوس : انو انا كل ما اسجد بصير ببكي وبسأل .. يارب ليش خلقتني ضعيفه ؟ ليش في ناس بيخلقو مكسورين وقلبهن طيب وناس ما عندهن رحمة ام محمد : شو قصدك وليه ؟ بتدعي علي بصلاتك هيك بدك تقولي ؟ فردوس : لا مو هيك بدي قول ، الي بدي قولو انو هلأ عرفت السبب و وصلني الجواب .. هلأ عرفت ليش بهي الحياة في قوي .. وفي ضعيف .. تركتن وطلعت على شقتي انا وعم فكر .. ( اي صح .. الله خلق الضعيف مشان يختبر اخلاق القوي ورحمتو .. خلقنا هيك ليختار كل انسان بكامل ارادتو مكانتو بالآخرة .. بالجنة ولا بالنار .. هي عدالة ربنا .. انا خلقتكن .. وانتو اختارو مصيركن ) _______________ ما عاد تعبت او شكيت من الشغل بالأرض لان ايدي تعودو .. وبعد فترة صارت كوثر تنزل كمان وتشتغل معي كنت ابعد عنها قد ما فيني ، وحاول اخود كل نص ساعه راحة لاني حامل .. بعد خمس شهور ، اجانا خبر انو بنت حماي المتجوزة ومسافرة طلع معها مرض خبيث .. اتصل جوزها خبرنا وقلنا انو رح يبعتها لهون لان تكاليف العلاج غالية عندو ورح يخلي الاولاد معو .. خبرني حسان ونزلت انا وياه نخبر حماتي بالموضوع لان كان خلال هاد الاسبوع رح توصل بنت حماي ولازم يكون عند امها علم بوضعها .. قعدت انا على جنب وكنت متوترة كتير وما حكيت ولا حرف وحسان يلف ويدور ويحاول يحكي لامو ويفهمها انو بنتها مريضه مع انو بسطلها الموضوع بس هي حست انو في شي مو مزبوط .. وصارت تعيط وتحلفو يحكيلها شو القصه و حكالها انو بنتها الوحيده مريضة سرطان وعم تموت وجوزها باعتها لهون لان ما عاد متحمل تكاليف علاجها واخد الأولاد الو .. الي ما حسبنالو حساب انها مريضة قلب ، الخبر كان أكبر من طاقة تحملها و وقعت بين ايدين حسان و صارت تنازع وانا قمت من مكاني وخفت قرب منها او اعمل شي .. حسان يصرخ و ولاد كوثر نزلو يبكو ويعيطو .. وقبل ما يلحق فيها على المستشفى كانت ميته .. قمنا بالعزا وما كنت بعرف حالي شو حاسة ، كل الوقت كنت ساكته وعم فكر .. انو هي هلأ بشو راحت تقابل ربنا هلأ ؟ زعلت عليها وانا اتخيل عذابها بالقبر ودعيلتها بالرحمة مو من طيبة قلبي بس لانو جاينا يوم وكل واحد رح ينحط بهل حفرة هي ويتحاسب على كل شي عملو .. و بنت حماي ماتت عند جوزها قبل ما توصل لعندنا... كنت مفكرة سبب عذابي هو حماتي ، بس طلع حماي مو اقل منها .. كان يهلكني بطلباتو و اوامرو وما في شي ببين معو ما في على لسانو غير ( كوثر الغالية ) .. وانا متل اللفاية و اشتغل من تم ساكت .. وبلش موال العروس .. وفهمت ليش كوثر الغالية .. راحت هي براسها وجابتلو عروس مضيت كل الليل اضحك و جوزي يقلي اخرسي وانا اضحك .. حسان : وبعدين معك ؟ وبعدين ما عاد شبعتي ضحك ؟ فردوس : هههه لك ههههه والله ههههه مو .. مو هههه.. مو هههه .. اااخ يا بطني .. قام ومسكني من وشي هو ومعصب : شمتانه اه ؟ امي كان معها حق لما تقلي انك متل الحية وسمك مخبيتيه وانا دافع عنك وقول مسكينه فردوس : ههههه لك والله مو هيك ههههههه بس انا .. كنت عم فكر بشغله .. اتركني لاحكيلك .. تركني و قام قعد تربع وتطلع فيني ( شو هي الشغله ؟ ) رجعت اضحك وحطيت ايدي على تمي لاسكوت وبعدا اخدت نفس : انو امك .. ازا بتعرف انو ام الصبيان جوزت جوزها قبل ما ينشف ترابها شو كانت بتعمل ؟ ههههههههه مسك المخده ضربني فيها بقوة وقام من التخت ( انا طالع نام عند ام الصبيان .. و لسانك بدي قصو ) رميت حالي عالتخت انا وعم اضحك واطلعت بالسقف .. بلشت اهدى شوي شوي .. وحطيت ايدي على بطني وغمضت عيوني .. ( ماما حبيبي ... تعا بسرعه .. اشتئتلك .. ) _____________________________ حسان : صبي ولا بنت ؟ الداية: صبي هات البشارة حسان:ايه هييييك ها بيضتيها يا فردوس فتحت عيوني بصعوبة و تطلعت بابني هو وعم يبكي .. رجعت نمت وما حسيت على شي كنت تعبانه كتير وجسمي مهدود .. لما رجعت صحيت كانت امي واخواتي جنبي و جابولي ابني جمال لحضني .. خبيتو بين ايدي و وعدتو ما اسمح لشي يئذيه شو ما صار .. #حديث_الأرواح_بقلم_مال_الشام #واقعية الجزء الخامس بعد سنه من ولادة جمال رجعت حملت و جبت توأم ولاد .. وبعد سنتين رجعت جبت بنت .. وبعدها وقفت لان ما عاد لحقت اهتم باولادي وبالشغل الي فوق راسي .. صرت حس حالي متل الجاجة الي عم تبيض وتجيب ولاد وتزتهن .. هيك كانت العادات وقتا انو الوحده بتثبت حالها باديش بتجيب ولاد وكانت كوثر لسه بدها تحبل وتجيب .. بس انا ما بقى قدرت جيب اكتر من هيك ... حطيت ولادي .. وقلت يارب تقويني وتقدرني على تربايتهن .. قطعت شغل الأراضي والمحاصيل لان ولادي صارو يكبرو وما عدت اقدر اتركهن عند حدا ، و مرت عمي الجديدة كانت بحالها هي وكوثر عاملين عصابه وانا ما اهتم بشي كل همي بهل دنيا رضى رب العالمين و اولادي .. الي اكتشفتو انو حتى لما ماتت مرت عمي ما قدرت اتهنى يوم مع حسان ، صحيح بقيت على ذمتو وخلفت منو بس ما كنت قدرانه اتقبلو كــ رجال كنت بس اعتبرو الوسيلة الي عن طريقها بحافظ عى احترامي بالمجتمع اني ست متجوزة .. ولادي اعطوني قوة فظيعه ، يمكن هي غريزة الأمومة .. ابني جمال .. و وليد و سعيد .. وبنتي نور ما كنت اسمح لحدا يزعلهن او يدايئهن .. وبفضل ربنا قدرت امنلهن جو متوازن نوعاً ما .. كانو هن و اخواتهن من كوثر متل الرفقات اتفقت معها نترك خلافاتنا على جنب وما ندخل ولادنا فيهن وكنت اتجاوز كتير شغلات .. ابني جمال الله يرضى عليه دنيا و آخرة و ينزل على قبرو النور و الرحمة لما صار بعمر ال14 بلشت لاحظ عليه شغلات غريبه كنت وقت اقعد معو لحفظو آية قرآنية من اول مره اقرأها يكون حافظها كلها .. ويقلي نقرأ الي بعدها .. كانت سرعتو بالحفظ غريبه كتير كأنو معجزة .. من اول مره علمتو فيها الصلاة ما عاد قطعها بنوب .. وبال14 بلش يروح يصلي بالمسجد و يرجع ييقلي ( يا لطيف يا امي شو دعيتلك الك ولاخواتي .. ) اضحك واسألو شو دعيتلي لك يامو احكيلي ؟ جمال: اول شي دعيتلك الله يعطيكي خير كوثر ويحميكي من شرها ، ودعيتلك ربنا يرزقك من واسع رزقو و يزرع الضحكة على شفافك طول ما انا عايش فردوس : طيب ما بتدعي لابوك امي ؟ جمال : _ _ _ فردوس : يه ! شبك ؟ جمال : بتعرفي امي ؟ فردوس : شو حبيبي ؟ جمال : بس اوعديني تسدئيني فردوس : اي طبعاً .. قلي شو في ؟ جمال : رفيقي بالحارة .. امبارح ونحنا نلعب كرة قدم .. وقع على رجلو وصار يعيط ويتوجع فردوس : اي ؟ جمال : ف انا ركضت عليه و صرت اقرألو عليها قرآن ما بعرف ليش بس ما حسيت على حالي الا عم اقرأ آيات من الي حافظهن و بعد شوي قلي انو تحسن وما عادت وجعتو رجلو .. واختي نور كمان هديك الليلة بقيت عم تبكي قعدت جنبها و قرأتلها قرآن على راسها .. و صارت تضحك ونامت فوراً .. بالأول ما سدئتو وتوقعتا تخيلات طفل .. شجعتو وقلتلو برافو عليك والقرآن في شفاء ونور و مره كان حماي عم يصيح من ضهرو ويتوجع ندهت لجمال و قلتلو تعال اقرأ لجدك قرآن على ضهرو مشان يطيب .. وكان قصدي حسسو اني مسدئتو .. ضل جمال يقرأ قرآن و انا عم اتفرج عليه اديشو خاشع و منسجم ... و ارتاح حماي و نام بعد ما كان كل النهار يعيط و ينكد علينا من وجعو .. وقتا بلشت سدء جمال ... وحسيت بفرح كبير انو الله رزقني بهيك ولد كأنو تعويض عن كل تعبي و شقاي .. كان جمال يضل يقلي شغلات غريبه ( شايفه هالبيت هاد ؟ بدي سكنك بقصر بدال منو .. وبدي لبسك دهب كتير و جيبلك خدم يخدموكي و بدي جبلك كل شي وانتي بس تقعدي وترتاحي بس استني علي لأكبر ) كنت سدء حكيو كتير و افرح كتير ... يوم من ايام الشتوية .. كنا ببداية البرد و المطر .. الدنيا برا كابسه و صوت المي بالزواريب و البرد ينخر العظم شغلت دفاية الحطب لولادي وجمعتهن حوالي وقعدت انا وياهن و كان بهي الليلة الدور عند كوثر .. قعدت انا وياهن وشوينا بطاطا وضحكنا كتير ومزحنا .. نيمت نور و نام سعيد .. ضل وليد و جمال عم يحكو حطيت راسي وبلشت اغفى ... كان دفى وبالي مرتاح .. فتحت عيوني شوي شوي .. وحسيت حالي كأني عم شوف خيال جمال .. بلعت ريقي وفتحت عيوني و شفت جمال قاعد قدامي وعم يتطلع فيني انا ونايمة .. فردوس : جمال ؟ .. شو في ابني شبك .. ليش هيك قاعد ؟ #حديث_الأرواح_بقلم_مال_الشام الجزء السادس جمال : مشتهي كبة فركت عيوني و قمت تطلعت لقيت ولادي نايمين .. ( اي حبيبي روح جيب غطا و غطي اختك و نام وبكرا بعمللكن كبة تكرم ) جمال : ما بدي مشتهيا هلأ فردوس : يوه !! شو هلأ من عقلك ؟ جمال : الله يوفئك والله جايه على بالي كتير وهلأ الله يوفئك استغربت شو قصتو ما الو بالعاده يطلب اكلة هيك و كنت حاسستو كأنو بدو يبكي .. شديتو لعندي وحطيتو بحضني ( تعال نام وبكرا بعملك ياها .. يلا نام حبيبي .. تصبح على خير امي ) بالفعل الصبح اول ما صحيت قمت جهزت للكبة قبل ما يصحو الاولاد .. ورتبت البيت و عملتلن فطور وراحو على مدارسهن ، لوقت ما رجعو كنت مجهزة الأكل و مرتبتو واول ما فات جمال قلتلو يلا تعال عملتلك كبة جمال : بس مو مشتهيا فردوس : لك مو انت بالليل طلبتا ؟؟؟؟؟؟؟ جمال : ايه بس خلص ما عاد مشتهيا .. انزعجت كتير و بعدت عن الأكل و قلت للولاد ياكلو وانا كمان ما بدي اكول .. بعد شوي اجا جمال قعد معنا على الأكل و بلش ياكول قربت واكلت انا كمان .. اكل قطعتين و قلي ما عاد قادر اكول حاسس قلبي عم يوجعني فردوس : بسم الله عليك .. الله يهدي بالك فوت نام وارتاح تغطا جمال ونام .. و قعدت مع وليد وسعيد حللهن وظائفهن و نزل لعندي حسان وشاف الأكل و صار يعيط وبخانق انو ما ندهتلو يجي ياكول و تخانقت انا وياه وطلعت اصواتنا و قعدت ابكي .. صحي جمال وما حكى شي طلع من البيت وتأخر ليرجع وانا ضليت عم ابكي ومو حاسة على الوقت .. عالمغرب دق باب البيت وكان في ولد من ولاد الحارة على الباب .. - خالة الحقي الحقي ابنك عمل حااادث فردوس : مين ابني ؟ .. ابني انا ؟ .. ركض الولد و راح بدون ما يرد علي .. تناولت بشكير حطيتو على راسي ونزلت على الدرج متل المجنونة و لقيت اخي واقف تحت وراسو بالأرض فردوس : ناااااصر ؟ ..نااصر اخي في ولد اجا قلي ناصر : اطلعي البسي عباية وتعي معي فردوس : شو في ؟ ناصر : جمال بالمستشفى بدي اخدك لعندو فردوس : يعني صحيح عمل حادث ؟ عنجد عمل حادث ؟ كيف ؟ لك شو صاير؟ ابني كيفووو صرلو شي ؟؟؟؟ رحنا على المركز الصحي وخبرونا انو حولوه لجمال على مستشفى المدينة لان حالتو خطيرة .. اتصلت بأخي التاني الي معو سيارة وقلتلو ابني عمل حادث واجا اخدني وطلعنا على المشفى .. لما وصلنا كان المستشفى هادي و حركة الناس طبيعية .. عم اتطلع بوجوه الناس متل المجنونة واسأل الكل عن جمال ، اخدوني على غرفتو .. وكانو مغطينو بشرشف ابيض متشرب دمو لحبيب عمري وضنا روحي .. قربت لعندو ورفعت الشرشف عنو وشو وبستو على جبينو فردوس : جمال اصحى حبيبي ... يلا قوم يا نور عيوني ... بدنا نرجع على البيت حبيبي يلا قوم .. رفعتو وشديتو لصدري والممرضة اجت لتبعدني عنو .. شديت عليه اكتر وصرت اصرخ وقلهن يتركولي ياه .. ما بدي ياه يروح .. مو حرام يروح بعد ما كان يوعدني يضل معي كل العمر ؟.. اتركولي ياه وما عاد بدي شي من الدنيا .. بس اتركولي ياه .. _______________________________________ ضلينا بالمستشفى للساعه 2 بالليل والكل عم يدورو على حسان ليجي يستلم جثة جمال بس ما حدا لقيه .. الصبح اجا حماي و استلم الجثة .. واخدناها ورجعنا على البلد .. وكل الطريق وانا ساكته ما عم ابكي ولا عم اقدر التنفس .. حتى عيني ما كانت ترمش...حسيت كأنو قلبي طلع من مطرحو وما عاد في شي بيرجعلي ياه .. تاني نهار اجا ابي وقلي انو لازم يدفنو جمال وما عم يلاقو حسان .. غمضت عيوني و قلتلو ادفنوه ابي .. ادفنوه .. _________________ بالليل اجا حسان وما كان دريان بشي ... لما شاف الناس وخيمة العزا فات يركض ويسأل ازا ابوه الي مات .. قالولو انو جمال الي توفى .. طلع لعندي عم يبكي وانا قاعده جنب الشباك و عم قول لحالي انو كل شي عم يصير كزب .. قعد عندي حسان بالغرفة و صار يحكي عن جمال و محبتو بقلبو و انو ما تخيل يروح من بين ايديه .. كنت محتاجه يضمني لان كنت حاسه ببرد .. برد كتير عم ينخر بروحي وقلبي .. ما ضللي دموع ولا صوت اصرخ وابكي فيه .. بعد تلات ساعات .. تركني و طلع ينام عند كوثر .. #حديث_الأرواح_بقلم_مال_الشام الجزء السابع طلع لعندي ابي قبل ما يروح على البيت ، مسكت فيه وترجيتو ياخدني معو .. ما كنت قدرانه اقعد بالبيت ابداً .. لبست تيابي واخدت وليد وسعيد ونور و رحت مع ابي .. ما نمت الليل وانا فكر بابني و اتطلع من الشباك واحلم انو لاقيه هلأ راجعلي .. بعد الفجر دق باب بيت اهلي ، كان حسان جاي و معصب انو كيف ابي بياخدني بدون علمو .. فردوس : انا طلبت منو اجي ، ما بئى متحمله ضل هنيك رح اختنئ حسان: طيب والولاد ليه اخدتيهن ؟ فردوس:كيف ليش اخدتهن وين بدي ارتكهن ولادي بيضلو معي ! حسان:لا اعطيني الولاد وانتي ضلك عندك وايمت ما حبيتي بترجعي تطلعت بأبي و لقيتو ساكت وما حكي .. فردوس : ما بعطيك ياهن وانا مو ناقصتك بكفيني الي فيني .. حسان:لكن جيبيهن وتعي معي عالبيت فردوس:مابدي ارجع .. لك مو طايقه شوفك مابدي ارجع حسان:عمي سامع؟ ابي:بنتي اخزي الشيطان و وكلي الله ، خليه ياخود الولاد وبس ترتاحي بترجعي على بيتك .. بضل ابوهن ما تشغلي بالك !.. ___________________ اخد حسان ولادي وراح ورفضت ارجع معهن .. ضليت عند اهلي شهرين ما سأل عني وبعدين اجا رمضان .. كانو وليد وسعيد يضلو يجو يزوروني بعد المدرسة .. وليد : عم نضل صايمين كل النهار و وقت الفطور ما منلاقي شي ناكلو سعيد : والله جوعان كتير و مرت ابي ما بتخلينا نفوت نفطر معها وابي كمان بيقلنا ننزل لتحت وليد:هن بياكلو كل شي شي طيب ونحنا عم نفطر على بطاطا مسلوقة وبيض .. ونور كمان عم تصوم وما عم ترد علينا وضعفانه كتير سعيد:الله يوفئك ماما ارجعي وليد:انتي و ابي مو سائلين عنا اصلاً نيالو جمال هو راح وارتاح من هي الحياة البشعه .. حمل وليد شنتايتو و راح هو ومعصب و لحقو سعيد .. تمنيت اركض وراهن بس كل ما كنت فكر ارجع على بيت حس كأني رح موت هنيك وما عاد قدرانه ارجع وشوف حسان .. بعد اسبوع اجت اختي ريم وقالتلي انو سمعت بيتي محترق .. نور كانت عم تلعب بالدفايه و حارقه البيت .. نشف الدم بعروقي و صرت اضروب حالي ( ولادي .. ولادي كلهن راحو خلص .. خلص كلهن راحو خلص ما ضل حدا منهن.. ) هدتني وقالتلي انو ما صارلهن شي و طفو الحريق وطلعوهن .. لبست فوراً ورحت على بيتي .. كانو ولادي تحت عند بيت جدهن ضليت عم ابكي وبوسهن وقلهن يسامحوني وهن يبكو كمان .. طلعت على شقتي وكان معظم الفرش محترق .. ساعدوني الولاد لنطلع كل شي وننزلو لتحت و نشطف البيت ... خلصنا شغل و المسا رجع حسان و خبرو حماي انو انا والولاد بالبيت فوق .. كنت حاطه فطور الي و لولادي و حاطين تحتنا شرشف لان طلعنا كل شي من البيت وشطفناه وما بقي فرش .. اجا وقعد افطر معنا وقلي انو اشتقلي وطولت غيبتي و الله يرحم جمال ولازم نجيب ولد تاني ونسميه جمال بدال الي راح .. قلتلو مو وقت هالحديث .. رجعت ضبضبت بيتي و اخي كل يوم يجي ويجبلي فرش للبيت و يشق علي ويعطيني مصاري .. صرت امنع ولادي يروحو على اي مكان و خليهن قدام عيني كل الوقت ، مسكرة باب البيت على حالي وقاعده انا وياهن وعم اتأملهن كل الوقت .. رجع حسان ينام يوم عندي ويوم عند كوثر .. بعد سنه من موت جمال الله يرحمو ، حبلت ... جبت بنت وسميتها جميلة .. وصارو يكبرو ولادي و يصيرو شباب ، كنت حاول خليهن متل ما كان جمال والحمدلله كان فيهن خير و طيبين كتير .. بس ما حدا متل جمال .. ما حدا متلو .. مع الأيام و لما بلشت تستقر نفسيتي ... خرب استقرار هالبلد .. وصارت الأحداث بسوريا ... وانحرق الأخضر واليابس ... وانحرقت انا للمره التالته .. الخوف كان يكبر بقلوبنا شوي شوي .. خوف من المجهول والجاي .. خوف شو مخبيه الحرب وراها !! .. وكيف رح تخلص ؟ .. توفى حماي و نزلت انا و كوثر وسكنا بالطابق الأول لانو أمان اكتر .... اخدت غرفة الي ولاولادي و سكرتها علينا .. كان لسه في حياة طبيعية لان صعب الحياة توقف ، و كل يوم اصبح ابعت الاولاد على المدرسة وضل حوص بالبيت وجهزلهن غدا واعصابي على نار ليرجعو .. ولاد كوثر كانو يشتغلو مع حسان بالاراضي والمحاصيل كنت اترجى قاسم ( ابن كوثر الكبير ) يوصلهن كل اليوم الصبح ، كان يوصلهن ويرجع يقلي انو صارو على باب المدرسة و يرجع .. مع انو وليد وسعيد صارو شباب بس كنت خاف كتير عليهن .. مره من المرات بعد ما رجعو من مدرستهن و طعميتهن و قعدت معهن وحكيولي كل شي عم يصير برا .. كملنا نهارنا كلو ضحك و مزح .. وبالليل فتنا ننام .. و نامو حوالي و نمت .. ما بعرف اديه مرق من الوقت بس صحيت مرعوبة وعم ابكي ... كان عتمه حوالي و ولادي مو مبينين .. قمت ازحف و اتلمس الأرض بايدي و هلوس واهدس ( سعيد .. سعيد وينك .. سعيد وييييييييييينك سعيد .. ) وصلت على فرشتو و حسيت برجلين وليد صحي من النوم هو ومرعوب و سألني شبني .. حطيت ايدي على فرشت سعيد وما لقيتو ... فردوس ( وينو اخوك ؟ .. سعيد وينو ؟ ) انفتح باب الغرفة وفات الضو ... و كان سعيد واقف قدامي .. بس شفتو حسيت النور عم يطلع من وشو هو مو من وراه .. وصلت لعندو مسكت رجليه و وقفت وضميتو .. سعيد : خير امي شبك ؟ فردوس: وين كنت ياعمري وين كنت؟ سعيد:بالحمام !! فردوس:انا ..انا بس خفت عليك سعيد:ليش لتخافي ليكني هون .. مافي شي .. لك ليش عم تبكي ؟ ضليت كل الليل عم ابكي وارجف .. والصبح مسكت الهاتف واتصلت على امي .. ( كنت مدفونة انا وياه ... كنت عم اختنئ وهو مبتسم ويقلي امي ما تخافي .. حاولت احفر الأرض بايدي واصرخ .. سمعت صوت الي دفنونا عم يترحمو علينا ويبعدو بخطواتهن وانا اصرخ وقلهن طلعونا نحنا ما متنا .. وسعيد مبتسم و يقلي امبلى متنا .. ما تخافي .. ما في شي بيخوف .. ضليت احفر بايدي لاطلع وطلعو معي .. وشفت شغلات ما فيني احكيهن .. ما بعرف احكيهن اخر شي طلعت ايدي من التراب ... وحسيت بالهوا برا وحاولت قرب لاخود نفس .. بعدين مسكت سعيد وقلتلو يلا تنفس مشان ما تختنئ... قلي انو هو ما فيه يتنفس خلص .. وطلب مني اتركو وروح .. ) امي : الله يجعلو خير .. ما تخافي بنتي ما في شي بخوف هاد كابوس فردوس : خايفه ... خايفه كتير .. امي:ما تحكيه لحدا لان مو منيح الحلم البشع ينحكى .. امسكي الاستغفار وانسي .. صحيح ضل عندكن خبز ؟ الخبز مقطوع عندنا من يومين فردوس:ايه..في خبز .. رح ابعتلكن .. __________________________________ بعد يومين خليت وليد وسعيد يقعدو بالبيت وقلتلن ما عاد في داعي للمدرسة هالفترة ليهدا الوضع منقرر .. كان قلبي حاسسني بدو يصير شي كنت عايشه على اعصابي صارت تيجيني نوبات تشنج .. حكيت لحسان انو خايفه على الولاد بس بعمرو ما وقف جنبي .. اتصلت باخي انا وعم ابكي وحكيتلو انو خايفه كتير على ولادي وازا بصيرلهن شي هالمره رح اقتنل حالي .. ناصر: طيب شو الي بريحك لاعملو ؟ فردوس:بدي طلع ولادي برا البلد ناصر:يا اختي يا عيوني ما معنا مصااااري كيف بدنا نطلعهن ، لك ما حدا منا معو يسافر فردوس:طيب قلك شو؟بس سعيد .. بدي سعيد يسافر مشان الله ناصر:طيب .. انا رح احكي مع اخي وشوف اديه معو وانا وياه منطلعلك سعيد بس ديري بالك على صحتك و ولادك فردوس:بتوعدني ؟ امانه ما تنسى ناصر:لك شو انسى .. خلص بهل يومين منجمع المصاري .. كان فراقو علي متل السم .. عم ضبلو اغراضو وابكي و اضحك .. رفض حسان يخليه يسافر بس وقفت بوشو و قلتلو رح يسافر كيف ما كان برضاه او غصب عنو .. امنولي اخوتي المصاري .. و بوست سعيد و اعطيتو شوية مصاري .. وبعتناه على تركيا .. ضل يحكيني كل فترة والتانيه ، بعدين صار يبكي ويترجاني كرمال يرجع لان مو قدران يعيش بعيد عنا والحياة صعبة عليه .. ضليت ارفض لوقت ما اجا بدون علمي .. وما لقيتو الا على باب البيت حامل شنتايتو .. ضمني و صار يبوس راسي وايدي ويقلي ما تزعلي مني بس والله اشتقتلكن .. شميت ريحتو وحضنتو وقلتلو روح ربي وقلبي يرضو عليك .. مضي النهار هو وحاطط راسو بحضني عم يقلي عن الحياة بتركيا وانها بلد حلوة بس غالية وانا العب بشعراتو و بوسو .. المسويات طلع ليشوف رفقاتو كان مشتقلهن كتير وما قدرت امنعو يروح .. طلع هو و وابن ضرتي قاسم .. وفتت انا لعند نور وجميلة لاعبتهن شوي .. بعد ساعه رجع سعيد فتح الباب وتطلع فينا فردوس: رجعت بسرعه سعيد:لا بس جيت شق عليكن وبدي ارجع لعندهن فردوس: تعال هون لشوفك كانت الكهربا مقطوعة وقاعدين على ضو الشمعه .. قعد مواجهي و تطلعت فيه كأني عم شوفو اول مره .. ضحكت من قلبي وصليت على النبي .. وسالتو ازا صلى المغرب والعشا وقلي انو صلاهن بالمسجد جماعة ... راح سعيد وطلعت قعدت على البرنده انا وحسان و وليد و كوثر .. كنت شاردة وعم اتطلع بالسما .. صافيه كتير وما فيها لا غيوم ولا نجوم .. هيك بعد نص ساعه .. لسمعنا صوت قوي كتير ... هز الأرض تحتنا وخلا الناس كلها تصحى من نومها والصغار صحيو وصارو يبكو ويعيطو .. وانا واقفه مكاني .. و اول شي خطرلي هو ابني سعيد .. #حديث_الأرواح_بقلم_مال_الشام الجزء الثامن #الأخير ضليت واقفه برا .. بين لحظة والتانية فاتت العالم ببعضها و فجأة اختفت كل الأصوات كأنو ما في على هالأرض لا بشر ولا دواب .. صارت ريح هوا بارة ... وضليت عم اتطلع قدامي بالعتمة وما عم احكي ولا عم اصرخ و ابني وليد يندهلي ويقلي مشان فوت .. التفتت عليه بكل هدوء وقلتلو يفوت مع ابوه و شوي برجع .. لبست برجلي ونزلت هيك عم امشي ما بعرف حالي وين رايحه .. كان الصوت قريب منا بالحارة التانيه .. مشيت محل ما شفت في عالم عم تركض و وقفت بعيد مع الناس الي متجمعه محل ما نزلت القذيفة .. وقفت جنب مجموعة شباب صغار هيك بعمر سعيد .. نكزت ولد بايدي وسألتو ( خالة حبيبي شو صاير ؟ شو في ؟ ) - والله شوفة عينك يا خالة في اصابات عم يسعفوهن كنت بدي ابكي كان قلبي محروق قبل ما اعرف ازا ابني معهن او شي لاني مجربة حرقة هالقلب وما بتمناها لأم على وش هالأرض شو ما كانت ومين ما كانت .. قربت اكتر وكنت هادية كتير و عم ادعي ربي ما يفجعني كمان مره باولادي لانو ما عدت حمل .. #مال_الشام مسكني شب من ايدي وشدني وصار يصرخ ( سعيييييييييييد مااااات يا ام جمال سعييييييد مات .. سعيييييد ماااااااات ) كتير عالم عم تصرخ ودم وبكي وعياط ، والشب عم يشدني بقوة ويقلي ( سعيد مات ) فردوس : سعيد ابني ؟ .. مات ؟ ( ايه ماااات مااااات .. ) تركني الشب وركض ورا العالم الي عم يسعفو المتصاوبين ، حطيت ايدي على تمي وصرت ابكي واصرخ .. ركضت بين العالم و قلتلهن يعطوني ابني حكولي بدهن يغسلوه ويدفنوه مع الشباب الي تصاوبت وقعت بالأرض عم اصرخ وقلهن يعطوني ياه وما رح خليهن يدفنوه اجو شباب تنين و نزلولي ياه و حطوه قدامي فردوس : ايه .. ايه ليكو مو ميت كيف عم تقولو ميت .. اعطوني مي بغسلو دمو هلأ وبيرجع بيقوم اعطوني مي .. مانو ميت هلأ بيفيق .. قربت وحده لعندي حطت مي بايدها وغسلتلي وشي و حطت ايدها على كتفي ( استغفري الله يا ام جمال وسلمي امرك لله ) فردوس : لك مو .. مو ميت ليكي هلأ بيقوم تعي ساعدني .. شيليه معي لناخدو عالبيت هلأ بحممو و بطعميه وبيفيق .. ساعديني لنشيلو الله يوفقك .. ما .. ما بدك تساعديني صح ؟ ايه .. ايه انا بشيلو لحالي .. رميت حالي عليه و صرت ارفعو و الناس تبعدني عنو .. كان متصاوب براسو و دمو غزير عبق بتيابي .. اخدو ابني مني غصب عني وما قدرت اخدو منهن .. اخدوه غصب عني .. سخنو مي و غسلوه و حطوه بالكفن ... و طلع من بيتي وطلعت اركض وراه وصيتو باخواتو و قلتلو ما يخاف بنوب ما رح اتركو لحالو .. ابن كوثر ( قاسم ) تصاوب وانشل وما كان يقدر يتحرك .. كنت ابقى قاعده جنبو وماسكة ايدو واسألو عن سعيد كيف كان وشو قلو وكان عم يضحك ولا متدايئ ؟ .. الله لا يلوع قلب ام على ضناها .. ___________________________ كل يوم بروح لهنيك ... بشق على حرة و جمال و سعيد .. بحطلهن ورد وبقعد معهن وبحكيلهن كل شي وبضحك معن يمكن هي اللحظات لصفى لحظات بعيشهن ، حديث الأراوح .. بتحكي مع روح قريبه منك وبتفهمك .. ما بتعود تحكي مع جسد في بينك وبينو حواجز لما تحكي الأرواع مع بعضها .. بيوصل الإحساس فوراً ..كل ما يصير لازم اتركهن وروح بحس قلبي بيوجعني كيف بدي اتروك قطعه من قلبي هون ؟ .. بحتار كتير وبكون بعيوني ألف اعتذار الهن وبتمنى يسامحوني #مال_الشام هاد الحديث ما بكون بس بالمقبرة لأ ، وقت اعمل اكله بيحبوها .. و قت طلع تيابهن و شمهن .. وقت شوف صورهن حياتي كلها صارت عبارة عن حديث مع الأرواح .. بحسهن حوالي مو بعاد عني .. بيحموني من الوجع والقهر وبيصبروني على الوجع الي معشعش جوا قلبي .. بعد 8 شهور من وفاة سعيد تقدم لنور شب ، اجت امو وطلبتها و الشب كان اهلو مطلعينو على مصر وبيشتغل هنيك كانت بعدا صغيره ، بعمر ال 15 ... صليت استخارة و طلبت من ربي يختار الاحسن لهل بنت وافق حسان على الشب وانا ما اعطيت رأيي بشي وبنتي تبكي وتقلي انو خايفه وما بدا تسافر ، اخر شي كنت بتمناه هو جوزها بهاد العمر بس كنت خايفه عليها لان الوضع عنا عم يصير اسوء وبيخوف اكتر .. جهزتها و قعدت معها ومسحتلها دموعها .. ( نور البي ... وين ما كنتي رح كون معك ... لا مسافه ولا بلاد ولا حدود بتبعدني عنك انا بعرف انك طفلة ، بس يا عمري خايفه عليكي بدي ياكي تروح لبعيد لاطمن عليكي .. يمكن الحقك و اجي لعندك ما تخافي اوعي تسمحي لحدا يزعلك .. اوعي تنامي بيوم وانتي بكيانة .. الي بنزل دمعتك احرقيه يا بعد عمري المحبة والرحمة الي الله زرعها بقلبي وانتي اخدتيها مني ما تخليها منهج حياتك ..اعطيها بس للي بيستاهلها انا شرطت على جوزك يخليكي تكفي دراسه ، بحياتي عندك تكملي دراستك ايه حبيبتي ؟ .. ) بوستها على جبينها و ودعتها ... وباسبوع كانو ماخدينها و سافرت لعند جوزها .. ________________________________________________ ( بعد تلات سنين ) النرويج حلوة ... حلوة كتير .. اخي ناصر طلع هو واولادو وبعد شهر اتصل فيني وقلي اطلع على تركيا انا و اولادي وبعدا رتبلنا طلعه بالبحر على النرويج .. كانت رحلة صعبة كتير وخطيرة على ولادي بس ما كنت مفكرتا بتخوف كل هالقد .. الي سنه بهي البلد ... تعزبنا كتير لطلعنا من الكامب و اعطونا بيت و حطو ولادي بمدارس و انا كمان عم ادروس لغة هن ناس ما بيشبهونا وما بيفهمو علي ولا بعرف افهم عليهن ... بنتي نور صار عندا ولد وسمتو جمال تؤبر البي ولسه ما شفتو غير على الصور يعني انا صرت تيته .. و حسان كل يوم بيتصل فيني مشان ابعتلو مصاري يطلع على تركيا وبعدا اعملو لم شمل ، ايه بس انا ما فيني اعملو لم شمل هو ما رضي يطلع معنا لان خاف من الرحلة .. وانا ما فيني جيبو لان هيك رح يتروك كوثر وانا ما بدي ياه يتروك كوثر خطي مين بدو يضل معا !!! لهيك قررت خليه عندا !! هلأ رجعت ادروس وعم اتعلم لغة متل الولاد الصغار ، متل ما بيقولو .. ( بعد الكبرة جبة حمره ) ههههه في مناظر هون بالشوارع يا لطييييييف الله يستر على بناتنا شي عيب .. ما عندن حيا .. بخاف على وليد و جميلة بس دخيل عينهن حليبي ما ضاع فيهن ... مربايين على الغالي ضو عيوني ... احلى شي هون المناظر الطبيعية .. الخضار و الشجر و الورد و الهوا النظيف .. بس في عند جيرانا كلب كبير كتير ولونو اسود بضل يرعبني يبعتلو حمى اي بذمتي بيطعموه لحمة اكتر من اللحمة الي اكلتها كل حياتي !! حاولت اتعرف على اصحاب ومعارف عرب بس يا جماعة ما بعرف شو صاير لهل عالم ليش هيك صايرن ما بتحبو بعض اه ؟ ليش بهل غربة ما بيكون الواحد حضن دافي لابن بلدو وبيحن عليه لك ما عيب ؟ طبعاً ما الكل هيك بس كم واحد اوقات بشوف هالبلد جنبة ، فيها كل شي حلو ومريحه كتير و فيها شغلات بحياتي ما شفتهن ولا عرفتهن بس هيك كيف بدي قلكن .. بحس في شي ناقصني ريحة الأرض و هوا سوريا و طيبة الناس ومحبتهن اشتقت لكل شي حتى لقطعة الكهربا ، واشتقت لقبر ولادي كتير جبت من قبر كل واحد منهن كمشة تراب بس ما وصلو معي ضاعو بالبحر متل ما ضاعو كتير ناس .. زعلتهن عليهن من قلبي والله وانقهرت وبكيت كتير ما جيت لهون لان خايفه على حال ، بس ضلولي هالولدين خايفه عليهن .. والحمدلله عم يدرسو وكل شي مأمنلهن بخاف ينسو الشام ... بخاف ينسو الزيت والزعتر و اللبنة والمكدوس .. بخاف يكبرو و وقت يسألهن حدا من وين انتو يقولو ( I am from Norway ) بس لا لا ... ان شاء الله هيك يوم يومين .. اسبوع اسبوعين .. او يعني شهر .. حتى لو سنة انو اخرتنا نرجع !!! رح نرجع مو ؟ اي اكيد رح نرجع .. بقلب بماضيي وايام حياتي ، بحس انو اديه ظلمت حالي اكتر من اي حدا تاني .. بس فردوس قبل 30 سنة مو نفسا فردوس بنت اليوم ما كان بايدها حل تاني .. ما عرفت بيوم شو يعني حب او حنية .. من صغر عرفت شو يعني ضرة وشو يعني حماية ظالمة وشو يعني زوج ما عندو عواطف وما بقدر يعاملني كأنثى عرفت شو يعني تفقد ضنا .. وشو يعني تكون نيتك صافيه و تلاقي القهر و الأذى وشو يعني تموت #تلات مرات و انت بعدك عايش .. بهي الدنيه في كتير ناس مظلومين وقلبهن محروق ، بس الي صحتو وعافيتو عليه .. وضناه بحضنو .. يشكر ربو الف مره ويسكوووووووووت ... ما بطلعلو يقول اخ .. مو مشان شي والله ... بس لان ما بيعرف شي عن معنى الآخ .. اليوم المسا عاملة حفلة شاي☕☕ لجاراتي النرويجيات الله يرضى عليهون ويهديهون ويطولو لبسهن شوي .. وجميعكن معزومين بدون استثناء .. والصبايا قبل الختايرة .. شنو عم دور على عروس لوليد😍 صحيح لسه بكير عليه بس بدي يجيبلي ولاد صغار ينطوطو حواليني ... بدي يجيبلي سعيد وحرة بس ما تواخذوني يعني .. بدي بنات رز ببازليا .. ( شقر وعيون خضر ) 😂انتو تعو على حفلة الشاي و انا بنقي جايه على بالي طبق كل شي عملتو فيني ام محمد ما بعرف الله يرحمها ولا ما يرحمها خليها لربنا يتولاها .. بس بدي طبق دروسها .. 💪😈 مو ما تيجو ها ... بستناكن 😌 #انــــــــتـــــــــــــهت