كان يا ما كان
فى بنت قنينة وحلوة هلبا اسمها ذهيبة امها شكلها اجنبية هدا باش طالعة هك
ولانها عاشت فى ليبيا ماتت جاها البغدد بكرى بكرى وخلت برنية مع بوها
كان الحاج الى هو بو ذهيبة فقرى منتف ماعنده شى حوشه مسقف بالزينقوا
ناس عايشة عالبركة وخدمته على داب حالهم يجيب فى خضرة من الحوايز ويبيع فيها فى السوق
كانت ذهيبة الحلوة فى الجهة وناس كلها حاسدتها بس مايبى حد يتزوجها لان امها طليانية على اساس انهم كانوا محتلينا
مره من مرات الحاج مروح من الحوايز ببضاعته جى تبرورى وريح ومطر معادش عرف الطريق وراح
لن لقى روحه قدام دوبلكس كبير وجنانات ودنيا خضراء ولو ان غريبة حوايز الى جنبه صفرا ومعبية شوك
قرر ان يخش بالك حد يساعده ويجبد معاه سيارة
خش الحاج وهو فاتح فمه فى الحوش والجنان
تى تى هدا حوش من وزير ولا السراج
وخيرها الحوازة فاضية مافيها حد
وهو ماشى لقى باب حوش مفتوح
خش ينادى ياناس يا هووو يا عرب حوش وينكم
ومش مصدق الى يشوف فيه
اثاث فخم وبساطات فرو وثريات
تقولى عليه خاش محلات القصر
وهو يقول فى خاطره تى شن يخدم صاحب حوش يحول فى دولار ويهرب فى البنزينة
وكيف هو متحرك فسط حوش طلعله وحش
الحاج انخلع وركبله ضغط قريب بيموت من خلعه
انت من بنى ادم ولا قطوس ولا شن
الوحش : انت الى من خاش لحوشى تفركس فيه شن تحسايه رابش
الى يخش حوشى مايطلعش منا الا وهو ميت
الشيبانى خاف وبدى يرعش
ياسويدى اطلقنى انا جاى نبى حد يساعدنى نطلع سيارة الى حصلت فى طريق
مادخليش فيك سيارتك حصلت ولا جاى تخنب
قاله الحاج خلينى نمشى ونحلفلك ان نعطيك بنتى قنينة وطيبة وماتلثاش زيها
الوحش : وانا شن يخلينى نصدقك مرات تهرب
الحاج : لا شن نهرب ابعث معاى حد يعرف الحوش
ونجيبهالك
الوحش : بالك الى عندك زى غولة جنانات
فى خاطرة الحاج على اساس انت غزال
الوحش : شن حسك قلت
لالا شىء اهو خلينى نمشى وشوفلى حد يدف معاى سيارة
توكل الحاج وهو ماشى لدهيبة على حظها منكوب كيف بخليها تجى هنا
وصل الحوش
ولقى دهيبة قالقة عليه
خيرك عطلت خفت عليك
مافيا شى غير حصلت فى طريق وفى شاب ماشاء الله عليه خلانى فى حوشه
عليك حوش يا دهيبة
نودك بيه
معقولة فى حد توا شاب وعنده حوش هك بالك يبيع فى الحشيش
حشيش شن شكله راجل باهى وانا صراحة اعطيته كلمة فيك وبنرفعك ليه
تى كيف ترفعنى ليه مش العريس هو يجى هنا
لالا يقدرش يطلع خايف يخطفوه ويطلبوا ف فديه
مش قتلك امبحبح
فرحت دهيبة كيف جاها سعد زى هدا
والحاج يخمم كيف بيطلعوا غدوة
دهيبة قررت ماترفع شى وكل حاجة يشريهالها المبحبح
استاقضوا صبح واتوكلوا على حالهم لن وصلوا هداكا الحوش
دهيبة فتحت فمها ياسعدودى انا هدا كله ليا انا
والحاج يشبحلها وعارف شن بتلقى
وصلوا لقوا باب مفتوح دخل دهيبة
وقالها انا ماشى وجاى
والحاج ماقدرش يقعد يشبح بنته فى هالموقف فقرر يهرب خير
دهيبة استغربت فى بوها وين ماشى ومخليها بروحها
خشت تدهور لن سمعت صوت حد يرحب بيها من فسط ظلام
عرفت ان هدا صاحب حوش اتحشمت
قاتله انا دهيبة بنت الحاج
قالها بوك مشى وخلاك
قاتله اى قال ماشى وراجع بالك عنده بضاعه دلاع
لا دلاع لا بطاطا بوك باعك ليا ومشى على حاله
انخلعت دهيبة وبدت عيط شن باعنى لطف
طلع هداكا الوحش ودهيبة داخت من المنظر
ناضت لقت معلقيلها يبرا شكارة
الوحش بحداها وخايف عليها
اسمعى يا دهيبة انا نعرف ان انا شين بس قلبي طيب
سخفت عليه دهيبة قالت اهو ظل وحش ولا ظل وحيطة
وقفت معاه ويشريلها فى كل شى واتعودت عليه
وكانت تشبح دهيبة ف حاجات غريبة ف حوش
اثاث يرقص دولاب يتحرك
ووقت تساله يقولها مافى شى انتى تتخيلي
نهار من نهارات هدوا عليه الحاج وجماعته يبوا يقتلوه وياخدوا البنت
اتعارك معاهم بالدبابيس ودهيبة تحز فيهم
وتقولهم انا نبيه
الحاج استغرب تى شن تبى ف هو زى غولة جنانات
الوحش اتغشش وجت ف ضربة طاح
وهو طايح جت دهيبة تبكى عليه
لن فجاة بسم الله العظيم اتحول لشبوب زى الغزال
قالها حبيتينى يا دهيبة حبيتينى حتى وانا شين
فى خاطرها قالت حبيتك من هم ماقيت حد وكان حتى غوريلا بنحبك امالا شن بندير
بس اهو الى صبر نال
الحاج وجماعته واقفين مستغربين يسالوا ف
كيف كنت زى الغولة
قعد الوحش الى هو اسمه وسام يحكيلهم ان كانت وحدة جارتهم مكبدة ف
تبى يتزوجها بسيف
قاتله ياتتزوجنى يانسحرك
قالها وكان حتى تخلينى قرد مانى واخدك
وخلتنى زى غولة باش ماياخدنى حد
بس اهو دهيبة
حبتنى مش على جمالى
وتوا انا مال وجمال
عاش بسعادة هو ودهيبة وجاب عليها 4 ضرات
وخلاهم لاهين فى بعضهم هما ومفرخهم
