مر العمر الشيماء محمد ((شيمو -ShimoOo ))

مر العمر بقلم شيمو ShimoOo

مر العمر

الابطال
ادهم: ظابط محترم جدا لسه متخرج جديد
ليلي: بنوته جميله بعنين ملونه بتقلب حسب حالتها المزاجيه
احمد: صاحب ادهم الانتيم
سيف: منافس لادهم علي طول

                                                                                 بقلم / الشيماء محمد

المقدمه

"الهي يا ادهم يا ابن وفاء تتخبط في واحده تحرق قلبك كده وتجننك وتتطير النوم من عينك"
دعوه دعتها امه قبل سفره من باب المزاح
ولكن تتحول الدعوه الي واقع مرير يقلب حياته رأسا علي عقب
يعيش عمره يدفع ثمنا بشعا لتلك الدعوه
يعاني من فقدان حبه وخيانه اقرب الناس اليه
ويمر العمر في الانتظار والترقب والتلهف
ويتقابل الحبيبان وتشتعل الحرب بينهما
فهل سيتقابلان ام يمر العمر؟؟؟

                              

الفصل الاول

اغلق شنطة السفر واستعد للعوده الي ارض الوطن بعد غياب سنين طويله تحديدا خمس سنوات غياب.
اتجه الي المطار وانتهي من جميع الاجراءات واخيرا استقر في طائرته المتجهه الي القاهره ....اغمض عينيه فهاجمته الذكريات كالعاده ..ذكريات تمني ان يهرب منها ولو لمره واحده ..ذكريات تمني ان ينسي ولو جزء منها ..ذكريات اليمه..ذكريات جميله ..ذكريات جعلته يحن الي لحظات تمني ان تدوم ويكره لحظات تمني لو يمحيها من حياته ....
يعيش مع تلك الذكريات ويفيق علي واقعه المرير ..انه وحيد ..هي ليست معه ..ليست هنا...هي بعيده كل البعد عنه ..هي استمرت في حياتها وتخطته ولكنه لم يستطع ابدا نسيانها او معرفة سواها ..لم يدق قلبه ابدا لسواها ..لم يستطع ابدا ان يمحي ذكري واحده من ذكرياتها .لو يمحي صورتها المرسومة دائما امام عينيه .انه يراها في كل شيء ينظر اليه ..يراها في كل امراءه ولهذا ابتعد عن اي امراءه ..لم تستطع اي امراءه مهما بلغ جمالها او رقتها او كمالها ان تخترق ذلك الجدار الذي شيده حول قلبه ..لم تستطع اي واحده ان تقترب ولو قليلا..علي الرغم انه حاول كثيرا ان يقترب ولو حتي اقتراب جسدي من اي امراءه ولكن فشل فشلا ذريعا ..لقد جرب جميع الطرق ..جرب ان يشرب الي ان يغيب عقله ويقترب من اي امراءه ولكن بمجرد ان يلمسها يجد امامه وجهه حبيبته فيبتعد ..ابتعد عن النساء واتجه الي عمله واغرق روحه فيه .....
عاد بذكرياته الي سنوات مضت ..بالتحديد الي عشر سنوات مضت....
__________
منذ عشر سنوات
__________
كان برضه بيرتب شنطه سفره ويستعد للسفر ودخلت عليه والدته وفاء
وفاء: ايه يا حبيبي خلاص جهزت حاجتك ؟؟
ادهم: ايوه خلاص .عايزه اي حاجه مني يا فوفا؟؟
وفاء: ياواد قلتلك بلاش فوفا دي ..المهم عايزاك تبطل تبعد عني بقي وتستقر جنبي شويه
ادهم: انا ببعد عنك؟؟؟ انا علي طول جنبك
وفاء: يا سلام ده انت طول كليتك وانت بعيد واديك اتخرجت اهوه وتسيبني وتسافر تاني
ادهم: كليه الشرطه كده ما ينفعش الظباط يفضلو افي حضن امهاتهم ولا ايه؟؟
وفاء: انا برضه مش فاهمه انت هتسافر ليه دلوقتي؟؟
ادهم: عندي تدريبات خاصه يا امي
وفاء: تدريبات ايه؟؟؟
ادهم: هو انا مش فهمتك .؟؟ علي العموم بصي يا امي انا مش عايز ابقي مجرد ظابط عادي انا عايز ادخل عالم المخابرات وامن البلد الخارجي مش الداخلي وده بيتطلب تدريبات خاصه علشان نكون ظباط مخابرات ناجحين
وفاء: يعني زي شغل جيمس بوند كده وميشن ايمبوسبل بتاع توم كروز ده
ادهم بضحك: يخربيت افلام الاكشن اللي مبوظه دماغك دي ..بس ايوه ده المجال اللي عايز اشتغل فيه
وفاء: نظام الجاسوسيه وتفضل عمرك كله تسافر من البلد دي لدي وما يكونش عندك حياه نهائي وتهرب كل شويه من مكان لمكان
ادهم: مش بقولك الافلام بوظت دماغك خالص ...شوفي يا ست الكل عالم السينما مختلف عن عالم الواقع
وفاء: يعني مش هتسافر في شغلك ؟؟
ادهم: لا طبعا هسافر بس مش بالشكل اللي انتي متخيلاه وبعدين انتي ناسيه ان شله المجانين بتاعتي معايا..
وفاء: ماهو ده اللي مخوفني ان شله المجانين معاك لانكم لما بتتلموا علي بعض بتجننوا اكتر واكتر....المهم هو مفيش يا ادهم كده اي واحده هتوحشك لما تسافر؟؟
ادهم: انت طبعا يا جميل
وفاء: انت فاهم قصدي ايه فمتستعبطش
ادهم: وانتي عارفه انه مفيش
وفاء: وامتي هيكون في؟؟
ادهم: الله اعلم بس اكيد مش دلوقتي خالص شغلي حاليا اهم من اي حاجه وبعدين نشوف الموضوع ده..المهم دعوه حلوه كده علي الماشي يالا
وفاء: الهي يا ادهم يا ابن وفاء تتخبط في واحده تحرق قلبك كده وتجننك وتتطير النوم من عينك
ادهم: حرام عليكي ايه الدعوه دي ..تحرق قلبي ؟؟ليه كده؟ ده انا ابنك علي فكره
ضحكوا هما الاثنين
وفاء: اعملك ايه ما انت مش عايز تحب بالذوق يبقي تحب بالعافيه
ادهم: المهم انا كده هتأخر يالا سلام بقي
وفاء: طيب هترجع امتي؟؟
ادهم: امتي دي بقي ما اعرفهاش بس هفضل علي اتصال بيكي ما تقلقيش
اخد امه في حضنه وودعها ونزل لابوه عبد العزيز
عبد العزيز: خلاص هتسافر؟؟
ادهم: ايوه خلاص عايز اي حاجه مني؟؟
عبد العزيز: وانا يعني لو عايز هتعملي اللي عايزو؟؟
ادهم: طبعا انا عمري ما اتأخر ابدا طول ما بايدي
عبدالعزيز: لا بتقدر وبتتأخر
ادهم: بتأخر في ايه؟؟؟؟ انا سبق وقلت لحضرتك انا ما انفعش رجل اعمال واقعد علي مكتب انا اموت لو قعدت علي مكتب ده مش مجالي نهائي انا غير حضرتك وبعدين عندك امجد اخويا هو في اداره اعمال وبيحب الجو ده بكره يتخرج ويمسك الشغل معاك
عبد العزيز: امجد غيرك... انت البكري والكبير انت المفروض تكون سندي في الدنيا دي
ادهم: وانا فعلا سندك بش مش شرط اكون كده باني اشتغل معاك
...المهم اشوف وشك بخير
عبد العزيز: ربنا يوفقك تروح وترجع بالسلامه
ادهم باس ايد ابوه فابتسم له ابوه
ادهم: انا مش عايزك تزعل مني بس فعلا انا بحب شغلي ده والمجال ده
عبد العزيز: عارف يالا ربنا يوفقك في اختيارك وتوصل للي انته عايزه وتكون اعظم ظابط مخابرات في الدنيا
ادهم: ربنا يخليك ليا(نظر لوالدته) شايفه الدعوات مش انتي
وفاء: كل واحد بيدعي بالي في قلبه بقي
ادهم: ماشي ماشي المهم ابقي سلميلي علي امجد وايه لما يرجعوا بقي من جامعاتهم سلام
ادهم سابهم وخرج ومشي في طريقه واتقابل مع اصحابه وراحوا كلهم لمكان تدريبهم الجديد اللي يبعد  عن القاهره حوالي 12 ساعه كان مكان بعيد عن اغلب مظاهر المدنيه
تعالو نتعرف علي ادهم قليلا... ادهم تخرج من كليه الشرطه و عمره تقريبا 23 سنه له اخ واخت امجد في كليه اداره اعمال في السنه الثانيه وايه كانت في الثانويه العامه كانت اخر العنقود محبوبه جدا من اخويها ..
ادهم له اربع اصدقاء (احمد حمدي محمود علي) كانوا رفقاء دائما من بدايه حياتهم الي اليوم وتجمعهم صداقه متينه دخلو كليه واحده واتخصصوا بنفس المجال ..كل واحد بيحب التاني اكثر من نفسه
وصلوا اخيرا لمعسكر التدريب ودوروا عن القائد المسؤل عنهم ..لقوا القائد سايبلهم رساله بمكانه في نادي البلد الوحيد
ليتعرف عليهم وفعلا راحوا له هناك وتقابلوا مع المدرب رأفت اللي بيلقب بالسفاح (كان مدربهم ظابط مخابرات في يوم من الايام ولكن احالوه لتقاعد مبكر وتدريب الخريجيين لانه كان معروف بوحشيته كان مبدأه اقتل اولا واسأل ثانيا
المدرب رأفت: اهلا اهلا بالخريجين الجداد ..اتمني انكم تكونوا ودعتوا حياتكم في مصر لان هنا هتكونوا تقريبا مفصولين عن العالم الخارجي ..تدريبكم هيبدأ الساعه 6 صباحا وهينتهي 6 مساءا بدون اي استراحات او اي اعذار وباقي اليوم النهارده استمتعوا بيه لانه يعتبر اخر يوم راحه ليكم ..ده نادي البلد طبعا مش بمستوي اصغر نادي في القاهره بس ده اللي موجود هو اقرب للمركز الرياضي عن انه نادي ودلوقتي عرفوني بنفسكم
اتعرفوا كلهم علي بعضهم وفهم رأفت ان ادهم يعتبر القائد الروحي لاصدقائه وانهم بيطيعوه في كل كلامه واحس انه شاب يعتمد عليه ...انتهت المقابله ومشيوا يستمتعوا باخر راحه لهم حاول ادهم ان يتصل بوالدته علشان يطمنها عليه بس اتفاجئان مفيش شبكه نهائي وحاول مره وري مره بدون فايده لحد ما شافه رأفت
رأفت: مفيش شبكه هنا اطلع سطح النادي ممكن تلقط شبكه بس بتقطع علي طول فقول المهم بسرعه
ادهم: انا متشكر جدا لحضرتك بعد اذنك
فعلا راح ادهم لسطح النادي وهو ماسك موبيله و مركز فيه  وفجأه صرخ باعلي صوته لدرجه ان اصدقائه سمعوا صوته وراحوله
ادهم كان رايح الي السطح لما اتخبط بواحده كانت شايله كوب نسكافيه سخن جدا فوقع علي صدره الكوب بما فيه وحرق له صدره وده خلاه يصرخ من الالم ..اخذ ادهم وضع الركوع علشان يقلل من لمس القميص السخن لصدره .كان مش قادريتكلم نهائيا بس سمع صوتها تتاسف له
البنت: انا اسفه اسفه اسفه جدا انت كويس؟؟
استعد ادهم كي يرد عليها ويشتمها لتصرفها الغبي واول ما رفع راسه لعلشان يبصلها  تفاجئ بعينين مليئتين بالدموع اللي بتهدد بالنزول عينين اجمل ما يكون ..عنين ما شافش زيهم قبل كده ..عينين معرفش يحدد لونهمهل هو اخضر؟ او رمادي ؟تقريبا كان اخضر فاتح ..غرق في لون عينيها لدرجه نسته الالم اللي بيحس بيه
البنت: ارجوك رد عليا انت كويس؟؟
رجعه صوت البنت للواقع
البنت: انت كويس ولا ايه ؟ طيب اعملك حاجه
ادهم: لا مش كويس نهائي ومفيش حاجه تقدري تعمليها
البنت: طيب حاول تقلع القميص علشان صدرك
هنا وصل اصحابه
احمد: في ايه اللي حصل؟؟ مالك يا ادهم؟
البنت: انا اسفه انا اتخبطت فيه والكوبايه كانت سخنه فوقعت عليه
بص احمد لللبنت واستعد علشان يزعق لها بس تاه في جمال عينيها فسكت...
حمدي: خلاص حصل خير اتفضلي حضرتك احنا هنتصرف معاه
البنت: انا اسفه كمان مره ارجوك سامحني بجد مش قصدي
ادهم:زي ما قالك حصل خير اتفضلي حضرتك
ساعد احمد صاحبه المصاب علشان يقلع  قميصه وراح حمدي علشان يسأل رأفت عن اقرب مستشفي وراح معاه علشان يشوف ادهم
وراحوا لاقرب مستشفي وعالجوه كان حرق من الدرجه الثانيه مش خطير جدا ..اعطوه كثير من المسكنات للالم وروحوا بعدها ادهم كان هياخد المسكنات هنا تدخل رأفت
رأفت: المسكنات للضعفاء وانت هتكون ظابط مخابرات ولو اتصبت في مهمه مش هتلاقي مسكنات او دكاتره بصلهم كلهم ووجه كلامه اليهم جميعا
رأفت: الدرس الاول...الالم صديقك الصدوق لازم تصاحبه ولازم تعود عقلك ازاي تتعامل مع الالم وازاي تفصل عقلك عن الاحساس بالالم ..هاه يا سياده الملازم ادهم لسه عايز تاخد مسكنات؟؟؟
ادهم كان بيحب التحدي جدا وكان يحب انه يتقن اي حاجه يقوم بيها وان كان مطلوب  انه يصاحب الالم فهو ده اللي هيعمله
عطي المسكنات لرأفت
ادهم: لا مش هحتاج لمسكن
رأفت: كويس ودلوقتي ارتاحوا كلكم والساعه 6 تكونوا في الساحه بره وحضرتك ملازم ادهم عندك يومين بس راحه اعتقد كفايه؟؟
ادهم: كفايه جدا متشكر يا افندم
بعد ما خرج رأفت وتركهم
احمد: انت اتجننت ؟؟انت ازاي تديله المسكن؟
ادهم: الالم صاحبنا السادس لازم نتصاحب عليه
حمدي: والله انت مجنون يا ادهم المهم الف سلامه عليك
علي: بس البت كانت ايه مزه مزه يعني
ادهم: هو ده اللي همك البنت صح ؟ المهم ما تنساش احنا هنا علشان حاجه معينه فركز علي المهم ودلوقتي كل واحد يروح ينام علشان الصبح اعتقد ان يومكم هيكون طويل ومش سهل
راح كل واحد منهم لمكان نومه وسابوا ادهم مع افكاره الليرجعتله صوره اجمل عينين
يااه قد ايه عنيها جميله ؟ لازم يشوفها مره تانيه علشان بس يتأكد من لون عنيها ....
ابتسم لما افتكر امه ودعوتها
ادهم لنفسه: كان لازم تدعي انها تحرق قلبي اهي حرقته بجد؟؟يارب بقي باقي الدعوه ما يستجبش انا مش ناقص طيران النوم انا محتاج النوم ضروري
ولكن هيهات النوم يجيله  فطول الليل تطارده عينان وتسرق النوم من عينيه
ادهم اقنع نفسه انه مش قادر ينام من الالم وان عنين البنت مالهاش علاقه نهائي .
عدي اول يوم بالعافيه وتاني يوم قضي اليوم كله في السرير واخيرا وفي وقت الظهر حاول ينام شويه وهو بيحاول
يشيل صوره البنت من دماغه وقرر انه لازم اول ما يصحي يروح لها ويتكلم معاها
راح النادي وفضل يدور عليها لحد ما شافها بفستان ابيض زي الملاك وحطه فيونكه علي شعرها بيضه وكلها اجمل من انها تكون حقيقه قرب عليها وهيا ابتسمت اول ما شافته
ادهم: ازيك عامله ايه؟
البنت: المفروض انا اللي اسالك عامل ايه؟
ادهم: انا كويس ...ما تخافيش عليا
البنت: الجرح احسن دلوقتي ؟
ادهم: اه احسن كتير ..تسمحيلي اقولك حاجه؟
البنت: قول...
ادهم: انتي اجمل من اي حاجه شوفتها قبل كده ودي اول مره قلبي يدق بالطريقه دي
البنت: قلبك دق؟؟؟
مسك ايدها وحطها علي قلبه
ادهم: حسي بنفسك
ابتسمت البنت ومسكت ايده وحطتها علي قلبها
البنت: بيدق بالطريقه دي؟؟
ادهم: تصدقيني لو قلتلك ان انت اول حد قلبي يدقله؟
البنت: اصدق لانك انت اول حد قلبي انا كمان يدقله
قرب منها ومسك وشها بايده وقرب شفايفه من شفايفها ولسه هيلمسها
احمد: ادهم ادهم اصحي يا عم انت نايم واحنا مطحونين بره
ادهم فتح عنيه مخضوض
ادهم: هيا فين؟
احمد: هيا مين؟ انت كنت بتحلم بايه بالظبط؟
ادهم: بحلم؟؟؟؟انت بتصحيني ليه؟ انا اصلا طول الليل ما نمتش
احمد: بس مريح وده كفايه .يا بختك انا بحقد عليك
علي:مش انت لوحدك
محمود: بطلوا بقي حقد ..ادهم اخبارك ايه؟
ادهم: انا الحمد لله كويس بس انتو اللي شكلكم مش كويس
محمود: احنا خلاص متنا ..انا غلطان اني سمعت كلامك..انا عايز اتخصص في البرمجه والكمبيوتر مالي ومال التدريبات العنيفه كده انا هنسحب
ادهم: محدش هينسحب وكلها كام يوم وتتعود وانا هساعدك.وبعدين لازم تتدرب طالما هتكون ظابط مخابرات
محمود: بس انا هختص في الكمبيوتر هساعدكم في المجال ده ماليش دعوه بالضرب والقتل
ادهم: ماهو علشان توصل للي انت عايزو لازم تعدي الاول المرحله دي
محمود: لامش هقدر وبعدين مفيش اكل هنا انا كده هموت
احمد: قول بقي ده اللي مضايقك قله الاكل مش التدريب ..اعتبرها رجيم علشان تخس شويه..عمرك شوفت ظابط مكلبظ كده؟؟
محمود: وانت مالك اخس ولا ؟؟حد قالك عايز اخس؟
ادهم: احنا بنخلص تدريب الساعه 6 بعدها كل زي ما انت عايزبس المهم لازم تكمل
محمود: هحاول علشان خاطرك انت بس
ادهم: ماشي المهم انا هخرج اتمشي شويه
احمد: استني اغير هدومي واجي معاك
ادهم: ما تريح انت انا هتمشي ساعه كده وارجع
احمد: لا مش هقدر لازم اغير جو والا هتخنق .خمس دقايق وابقي جاهز استني اوك
ادهم: اوك
راح احمد يجهز وهو بيفكر انه لازم يشوف البنت تاني ويتكلم معاها..وادهم بيفكر في الحلم الغريب اللي حلم بيه ..عمره قبل كده ما حلم بواحده
وصلوا النادي وقعدوا شويه واحمد عينيه بتدور علي البنت
ادهم: انت بتدور علي حد؟؟
احمد: لا ابدا بتفرج بس علي المكان
ادهم: اه...انا هطلع اكلم فوفا زمنها اتجننت لاني مكلمتهاش امبارح
احمد: خد راحتك
طلع ادهم وفي ايده الموبيل وفجأه شافها جايه من بعيد واستغرب جدا لانها كانت لابسه فستان ابيض وحاطه فيونكه بيضه في شعرها وماسكه كوبايه بيطلع منها بخار كتير
وقف ادهم جنب الحيطه وهيا لما شافته ابتسمت
ادهم: اتفضلي عدي انا بعيد تماما
البنت: هههههه انا اسفه مره تانيه
البنت حطت الكوبايه علي الارض
البنت: اهي الكوبايه بعيد ممكن اقرب بقي؟
ادهم: اه كده ممكن
البنت: ازيك اخبارك ايه؟؟وصدرك اخباره ايه؟
ادهم: كويس ما تقلقيش ..ايه ده؟
البنت: ايه ايه؟؟
ادهم: لا ما تاخديش في بالك
ادهم لاحظ ان عنيها مش اخضر فاتح عنيها كانت رمادي غامق
البنت: صدرك بيوجعك؟
ادهم: اكدب عليك لو قلت لأ
البنت: طيب تسمحلي؟
ادهم: اسمحلك بس بايه؟
البنت: افتح قميصك كده
ادهم استغرب بس فتح قميصه وهيا قربت منه وحطت ايديها الاتنين علي صدره وغمضت عنيها وفضلت تقول كلام كتير في سرها وهو مستغرب من تصرفها لحد ما خلصت
ادهم: ممكن اسأل ايه ده؟تعويذه مثلا؟
البنت ضحكت: لا مش تعويذه ده دعاء جدي حفظهولي بيخفف الالم كتير وعن تجربه
ادهم: دعاء ؟؟وانا اللي فهمتك غلط
ضحكوا الاتنين
ادهم: علي فكره انا اسمي ادهم
البنت: وانا ليلي.
ادهم: اهلا بيكي ..بما اننا اتعرفنا متعرفيش مكان ممكن اتكلم فيه في الموبيل يكون فيه شبكه
ليلي: شبكه؟؟تعال هقولك علي مكاني السري
ادهم: هاتي معاكي النسكافيه بتاعك انا ما يخلصنيش تسيبيه
اخدته ورحوا في حته بعيده شويه وطلعوا سلم جانبي وراحوا لسطح النادي بس من وري
ادهم: في شبكه ؟؟معقول؟
ليلي: اي خدمه..اسيبك بقي
ادهم: لا استني انا هعمل مكالمه سريعه
ليلي: علشان بس تاخد راحتك وانت بتكلم الجيرل فرند بتاعتك
ادهم: انا مش هكلم الجيرل فرند بتاعتي لاني معنديش واحده لحظه استني
ليلي: اوك هشرب النسكافيه لحد ما تخلص
ادهم: اوك
اتصل ادهم بامه
ادهم: فوفا روحي ازيك؟
وفاء: لا انا زعلانه ولسه فاكر اصلا ان ليك ام؟
ادهم: روح قلبي انتي. بس اعمل ايه دعوتك هيا اللي اخرتني
وفاء: دعوه ايه؟
ادهم: مش دعيتي عليا اتخبط في واحده تحرق قلبي اديني اتخبطت واتحرقت كمان وما نمتش خالص امبارح مبسوطه؟
وفاء: بجد يا ادهم حبيت؟
ادهم: حبيت ايه؟بقولك اتحرقت تقولي حبيت
وفاء: مش فاهمه
ادهم: يعني خبطت في واحده ماسكه كوبايه سخنه واتدلقت عليا وحرقتني في صدري شوفتي بقي ربنا استجاب ليكي ازاي؟
وفاء: اتحرقت اتحرقت بجد يعني؟
ادهم: ايوه اتحرقت بجد
وفاء: انا اسفه يا حبيبي بس انا مكنش قصدي المهم انت كويس
ادهم: اه كويس وانتي
وفاء: سيبك مني المهم قولي حلوه؟
ادهم: هيا ايه؟
وفاء: البنت ؟
ادهم: شوف اقولها ايه تقولي ايه ؟
وفاء: رد عليا حلوه؟
ادهم: لا مش حلوه ..قمر ممكن.. ملاك كده مش عارف بالظبط
وفاء: هيا السناره غمزت ولا ايه؟
ادهم: بقولك ايه هكلمك بعدين لان الشبكه ضعيفه وبتقطع
وفاء: ماشي بس عايزه اعرف كل حاجه بالتفصيل
ادهم: لما يبقي في حاجه هبقي اعرفك سلام
خلص المكالمه وراح لليلي واول ما شافته ابتسمت الابتسامه اللي بتطير عقله
ليلي: خلاص اتكلمت
ادهم: ايوه
ليلي: تشرب نسكافيه؟
مدت كوبايتها ليه وهو مش بيحب ابدا يشرب مع حد او يشارك حد في حاجته الخاصه بس اتفاجئ من نفسه لما اخد من ايدها الكوبايه وشرب وراها
ادهم: ما قولتليش انتي هنا ليه؟
ليلي: هنا فين ؟انا هنا في بلدي لكن انت اللي هنا ليه؟
ادهم: انا هنا في شغل بس انا قصدي في النادي مش البلد عموما
ليلي: اه انا هنا يا سيدي لاني في فريق الغنا والتمثيل في النادي وبنيجي كل يوم في المعاد ده بندرب وبمشي علي العشا كده وانت جاي بلدنا ليه؟
ادهم: انا هنا علشان عندي تدريب تبع الجيش
ليلي: انت ظابط يعني؟رتبتك ايه؟
ادهم: انا لسه متخرج يعني ملازم اول
ليلي: اممم.. وهتيجي النادي هنا كل يوم ولا؟
ادهم: هاجي كل ما اقدر بس هشوفك لما اجي ؟
ابتسمت ليلي وبصت للارض
ليلي: انت عايز تشوفني؟
ادهم: عايز اتعرف عليكي اكتر ده لو مش يضايقك؟
ليلي: ربنا يسهل المهم انا لازم امشي علشان اكيد بيدوروا عليا ..سلام
ادهم: هشوفك بكره ؟
ليلي: مش عارفه يمكن ويمكن.. سلام
مشيت وسابته متلخبط وفرحان ومش عارف هو حاسسس بايه
نزل وراح لصاحبه وقابله بره النادي
احمد: انت فين كل ده؟انا بدور عليك
ادهم: ابدا اتكلمت علي السطح وجيت
احمد: طيب تعال ندخل
وهما داخلين
احمد: ايه ده ؟بص يا ادهم البنت اللي خبطتك امبارح اهيه
ادهم: اه هيا..يالا ندخل
احمد: مش هنكلمها؟
ادهم: ونكلمها ليه؟؟يالا
احمد: لا انا هكلمها
ليلي كانت ماشيه مع صحباتها
احمد: انسه يا انسه
ليلي: افندم في حاجه؟
احمد: انتي مش فاكراني؟
ليلي: انا اسفه المفروض اني اعرفك؟
احمد: انا كنت مع اللي انت حرقتيه امبارح
ليلي: اه اسفه وهو اخباره ايه دلوقتي؟
احمد: الحمد لله كويس
ليلي: الحمد لله .بعد اذنك
احمد: استني
ليلي: افندم في حاجه تانيه؟
احمد: ممكن تتفضلي تقعدي معانا نتعرف مثلا؟
ليلي: افندم؟ نتعرف؟ بعد اذنك
سابته ليلي ومشيت بعد نظره حس انها ممكن تولع فيه ورجع لادهم اللي كان بيراقب من بعيد وهو مبسوط جدا
فكر ادهم( يعني مش بتكلمي اي حد وخلاص وبعدين معاكي بقي)
دخلو النادي وطلبوا الجرسون واحمد هيولع
احمد: هيا فاكره نفسها مين يعني علشان حلوه حبتين؟مين دي
اصلا؟لتكون فاكره نفسه حلوه دي مفيهاش غير عنين
الجرسون:قصدك علي ليلي صح؟
احمد: معرفش اسمها ايه اصلا
الجرسون: مش البنت اللي خبطت في صاحبك ايوه هيا ليلي ..كبردماغك منها ..قبلك كتير حاولو وفشلو
ادهم باهتمام: وبعدين وبعد ما حاولوا؟؟
الجرسون: محدش قدر حتي يكلمها كلمه ..بتبص للناس من فوق او مش الناس الشباب بس ..كتير حاولو يرتبطوا بيها بس هيا مالهاش في القصه دي جد زياده عن اللزوم
احمد: دي خنقه مش جد
ادهم: كل ده علشان مرضيتش تكلمك كبر دماغك منها
ادهم فرح جدا ..ده معناه انها زيه.. مش اي حد بتكلمه ويمكن كمان يكون قلبها دق زي قلبه( وبعدين معاكي بقي )
ادهم: المهم سيبك من البنت وقولي عملتو ايه في التدريب النهارده وفيه كام فرقه منافسه
احمد: احنا خمس فرق كل فرقه خمس افراد والكل مستواهم عالي يعني المنافسه هتكون صعبه
ادهم: طيب كويس لاني مبحبش افوز علي حد ضعيف
روحت ليلي علي بيتها وهيا فرحانه جدا وعماله تغني وراحت لجدها واول ما شافته
ليلي:جدو حبيبي اخبارك ايه؟
جدو: انا الحمد لله بس شكل الاخبار عندك انتي احكيلي
ليلي: لا مفيش ..علي فكره انا شفت الولد اللي حرقته بالنسكافيه
جدو: وعامل ايه يا بنتي ؟طمنيني عليه
ليلي: الحمد لله كويس ..بقولك يا جدو انا حطيت ايدي علي مكان الحرق وقلتله الدعاء اللي انت حفظتهولي فيها حاجه دي؟
جدو: انك تقوليله الدعاء مفيهاش حاجه لكن تحطي ايدك علي صدره ..ممكن يفهمك غلط يا بنتي
ليلي: اهو اللي حصل بس هوه شكله حد محترم....قولي يا جدو
جدو: اقولك ايه يا قلب جدو؟
ليلي: هو يعني ايه حب؟؟؟
جدو: حب؟ ده الاول لازم يكون مع الشخص المناسب وفي الوقت المناسب وبعدين ده مش وقته خالص انتي قدامك مستقبلك لسه بتحدديه
ليلي: هو انا قلتلك اني هحب انا بس بسألك يعني ايه؟
جدو: يعني انك تسلمي قلبك وروحك لشخص يستاهلهم وهو يعرف يحافظ عليهم كويس قوي ...ان الشخص ده ممكن تضحي باي شيئ حتي لو بسعادتك انتي علشان خاطر مصلحته..انه يكون اهم حاجه في حياتك..انك تكوني مسستعده تتخلي عن الكل وكفايه هو في حياتك..ان يكون اقرب من اي حد واهم من اي حد واغلي من اي حد ..هو ده الحب ..
ليلي: امال فين رعشه الايدين ودقات القلب والاحضان وكل الذي منه ده؟؟
جدو: اهو اللي بتشوفيه في التلفزيون من احضان والذي منه ده اسمه قله حياء مش حب عمر ما كان الحب بالكلام ده ابدا
والمفروض الحبيب يخاف علي حبيبته من كل الناس واولهم يحميها من نفسه ..هو انتي قلبك دق؟وايديكي اترعشت لحد؟
ليلي: انا؟؟؟؟؟ابدا يا جدو انت عارفني..المهم يالا ورايا حاجات كتير اعملها   باي
ليلي مع نفسها(سوري يا جدو اول مره اكدب عليك بس مش هقدر اقولك حاجه دلوقتي وبعدين لسه اصلا مفيش حاجه يمكن يكون متهيألي لما يكون في حاجه هقولك يا جدو)
تاني يوم صحيوا وادهم كان اول يوم ليه في التدريب
المدرب: النهارده كلكم موجودين ..حمد لله علي السلامه ملازم ادهم اتمني ان صحتك بقت افضل
ادهم: افضل يا فندم ومستعد
رأفت: كويس ...هتبدؤا بالتسخين هتجروا نقول كده حوالي خمسه كيلو تفرفشوا وترجعوا وهنشوف مين اول فرقه هتوصل ..انتو هتتحطوا في اختبارات طول الوقت وكل فرقه هتتقيم بناءا علي ادائها وتكميلها للتمرين المطلوب وكل يوم هنصعب التمارين وطبعا مش كلكم هتنجحوا..في هيستسلم..وفي هيفشل..وفي اللي هينجح وده اللي يستاهل انه يكون ظابط مخابرات مستعدين
الكل: تمام يا فندم
رأفت: ابدؤا ..اه ..مش مهم مين اللي يوصل الاول المهم ان الفريق كله يوصل مفهوم..اتفضلوا
طبعا الكل بدأ يجري ..فريق ادهم كانت لياقته عاليه بس كانت مشكلتهم في محمود هو اللي ديما بيعطلهم ,,وطبعا تعب بسرعه وقعد في الارض.. فجاله ادهم
ادهم: انت لازم تقوم وانت عارف كده كويس
محمود: انا قلتلك يا ادهم اني هكون عطله في فريقك وخلاص
ادهم: فريقنا كل واحد بيكمل التاني واحنا محتاجين مهاراتك يبقي تقوم ..قوم فكر في اجمل اكله اكلتها وتخيل انها مستنياك اول ما نوصل ..هاه
محمود: اكله محشي من ايدين امي
ادهم: لو خلصت التمرين ده هأكلك اكله متحلمش بيها ..ايه رأيك؟
محمود: وعد؟
ادهم: وعد
محمود: طيب ايدك شدني
وبدؤا يجروا تاني بس ادهم كان بيجري علي خطوه محمود وبيشجعه كل شويه ..الكل وصل وكان اخر اتنين هما محمود
وادهم.. وصلوا متأخرين جدا ..بس المهم وصلوا طبعا في كاميرات بتراقب كل حاجه بيعملوها وفي فريق من ضمنهم رأفت بيقيموا الفرق وادائهم ..
رأفت: متأخر احسن من مفيش صح ولا ايه؟ هو الكل نايم في الارض ليه من قال ان دي راحه ..انتباه للكل
الكل قام وقف وهما مش قادرين اصلا يتنفسوا
رأفت: شايفين الاسلاك الشائكه المحطوطه هناك دي اتفضلواعدوها وتوصلوا للناحيه التانيه هتلاقوا بركه هتعرفوا فيها ايه لما توصلولها المهم البركه دي فيها شنط .كل شنطه عليها اسم صاحبها ..كل واحد هيروح يجيب شنطته ويجي بسرعه...استنونسيت اقولك الاشواك دي هتعدوا من تحتها مش فوقها يعني هتعدوا زحف علي بطنكم..عارف ان الرمله سخنه فاتحركوا بسرعه لانهابتسخن كل شويه زياده ..اتحركوا
وفعلا الكل بدأ يتحرك تاني ويزحفوا علي بطنهم الرمله سخنه تحتهم والاسلاك الشائكه فوقهم بتعورهم لو حاولوا يرفعوا جسمهم عن الرمله ..يا اما تستحمل سخونه الارض يا اما تستحمل الاشواك تعور ظهرلك والاختيارين اصعب من بعض واخيرا وصلوا للبركه لقوها مليانه جثث حيوانات ميته ومنظرها وريحتها خلي اغلبهم يرجع فازاي هينزلوا فيها ويجيبوا الشنط؟؟
محمود: لا انا مش ممكن انزل في دي لو هيطردوني
علي: ولا انا ده انا عمري ما هنضف تاني ابدا
احمد: هاه يا ادهم هنعمل ايه ؟؟؟حد عنده افكار
حمدي: واحد يتبرع ينزل ويجيب للباقين الشنط
علي: ومين بقي اللي هيتبرع؟
ادهم: استنوا مش شرط حد ينزل نهائي..ولو حد هينزل هنعمل قرعه وكل واحد وحظه سيبوني بس لحظه افكر
بص ادهم حواليه .كان في فرق وصلت وفي ناس فعلا نزلو البركه
وهما بيرجعوا ..في فريق كان منافس جدا لفريق ادهم بقياده واحد اسمه سيف كان بيغير من ادهم جدا من ايام الكليه وده كان اول واحد ينزل البركه وجاب شنطته وطلع وبدأ رحله الرجوع وفريقه حاولوا يعملوا زيه واللي نزل ومعرفش يطلع واللي وقع وكانت الحال متلخبطه علي الاخر ..ادهم درس المكان كويس .كان في نخله فوق البركه وفروعها نازلين شويه مقاربين للبركه ..ادهم راح قطع جريدة نخله وشال كل اللي فيها وطلع النخله واتشعبط في الجريد النازل وبالجريده اللي في ايده بدأ يطلع في الشنط..اي شنطه كانت بتيجي في ايده سواء لفريقه او لأ كان بيرميها بره لحد ما طلع كل الشنط بتاعتهم واصحابه شاوروله انه خلاص شنطهم طلعت فقالهم يبدؤا يرجعوا ويسيبوه وهو كمل تطليع الشنط اللي بيطولها للباقي لحد ما طلع كل اللي بيطوله من مكانه فكمل رحله رجوعه وطبعا ده خلاه محبوب جدا من كل واحد طلعله شنطته.رجع ادهم اخيرا ووصل للقائد اللي كان واقف بيراقب من بعيد
رأفت: مهمتك انك تطلع شنطتك بس ليه بتطلع باقي الشنط
ادهم: حضرتك محددتش اي طريقه لتطليع الشنط ولا قلت ان محدش يساعد التاني ..واساس وظيفه اي ظابط انه يساعد المحتاج ولا ايه؟
رأفت: تاني مره مالكيش دعوه غير بفريقك يا سياده الملازم مفهوم؟
ادهم: مفهوم يا افندم
رأفت: ودلوقتي اتفضل سلم نفسك للفريق الطبي وشوف جرحك انت يومك خلص النهارده
ادهم: بس انا كويس وعايز اكمل مع فريقي
رأفت: وانا بقول يومك خلص ..جرحك ممكن يتلوث وبدل ما تخف في يومين تاخد شهر تعبان لو اتلوث اتفضل وما تستعجلش التقيل لسه جاي
خلص اليوم وادهم راح فعلا للفريق الطبي غيروله علي جرحه واخيرا جه اخر النهار وهيروح يقابلها بس المره دي معرفش يخترع حجه لنفسه يقابلها بيها
راح هو واصحابه كلهم وهو استأذن منهم وانسحب بهدوء وراح لمكانها السري بحجه انه هيتكلم في الموبيل ..مسك الموبيل في ايديه وفضل يستناها
ليلي واقفه مع اصحابها وعقلها مشغول بادهم يا تري هيجي ولا لأ
طيب هيا هتتطلع تشوفه ولا تبعد زي ما جدها قالها مش وقته
مدرس الموسيقي: استراحه يا بنات عشر دقايق كده وهرجعلكم محدش يتأخر
ليلي في نفسها( هروح اشوف بس في رسايل جتلي ولا لأ)
وراحت للسطح وقلبها بيدق قوي وهيا طالعه بس للاسف كان السطح فاضي فحست بكابه وحزن مع انها كانت حاطه احتمال انه ميجيش.بس لما ماجاش زعلت وفجأه صوت من وراها
ادهم: مستنيه حد؟؟
ليلي صرخت
ادهم: انا اسف اسف مكانش قصدي اخضك كده اسف
ليلي حاطه ايدها علي قلبها من كتر الخوف واخيرا بصتله
ليلي: انت كنت فين انا ما شفتكش والسطح كان فاضي
ادهم عمال يبصلها باستغراب
ادهم: انا كنت هناك كده ورا الحيطه دي كنت بتفرج علي المكان حوالينا سوري
ليلي: انت بتبصلي كده ليه؟في حاجه غلط في شكلي؟لو في قول
ادهم: انا مش فاهم ؟
ليلي: مش فاهم ايه؟قولي وانا افهمك
ادهم: اول مره شوفتك كانت عنيكي لونها اخضر فاتح بس تاني مره غلطت نفسي وقولت يمكن علشان الحرق ما ركزتش كويس لان كان لونهم رمادي غامق دلوقتي عنيكي اخضر فاتح تاني
ليلي ضحكت وبصتله : وايه كمان؟
ادهم: ودلوقتي بقوا رمادي تاني .انت حد مصلتك عليا تجنيني..انتي عنيكي لونها ايه؟
ليلي: انت اللي شايف؟انت قول
ادهم: كل شويه بلون ارسيلك علي لون
ليلي: لما بكون مبسوطه بيبقي رمادي غامق ولما بخاف او اتخض بيكون اخضر فاتح عنيا بتقلب
ادهم: اهمم ولو متضايقه مثلا؟؟في الوان تانيه
ابتسمت ليلي وبصت للارض
ليلي: باقي الالوان اعرفها بنفسك
ادهم: يعني في الوان تانيه؟
ليلي: ده اللي هسيبك تفكر فيه ..سلام بقي علشان متأخرش
ادهم: هشوفك بكره؟
ليلي: معرفش باي
سابته ومشيت وهيا فرحانه انها شافته وهو نزل لاصحابه مبسوط
علي: مالك مبسوط قوي كده؟
محمود: وهو ميتبسطش ليه ؟هو كان مطحون زينا طول النهار ؟
ادهم: سوري يا حوده بس مكنش بايدي المهم تعال اعزمك علي الاكله اللي قلتلك عليها ولا مش عايز؟؟
احمد: مش عايز مين ده ممكن ياكلك انت بحد ذاتك لو مجيبتلوش اكل
محمود: لا لو هاكل حد هيبقي انت حتي نخلص من رخامتك
ادهم: طيب يالا بينا ..احمد انت مش هتيجي؟
احمد: هحصلكم روحوا انتو
ادهم: وراك ايه؟انت مستني حد؟
احمد: لا وهستني مين يعني ؟بس روحوا انتو وانا وراكم
ادهم : براحتك
ادهم كان متأكد ان احمد هيستني ليلي لما تخلص علشان يشوفها وده ضايقه جدا وراحوا علي المطعم وطلبوا مشويات كل الانواع وادهم استأذن يجيب احمد علشان يلحق ياكل معاهم وراح وفعلا شاف احمد مستني ليلي وهيا كانت خارجه مع اصحابها فوقف من بعيد يشوف هيقولها ايه ؟
احمد: انسه ليلي..انسه ليلي
ليلي: افندم في حاجه تاني؟مش معني اني خبطت في صاحبك ان ده يديلك الحق انك توقفني كده كل شويه تكلمني
احمد: عندك حق بس انا كنت عايز اتأسفلك عن اسلوبي معاكي امبارح مش اكتر ..مكن تقبلي اسفي ؟
ليلي: ممكن اسفك مقبول بعد اذنك
احمد: استني بس انتي علطول مستعجله؟
ليلي : صحباتي مستنيني وبعدين عايز ايه تاني اتأسفت وقبلت اسفك خلاص بقي
احمد: طيب ممكن نبقي اصحاب؟
ليلي: اوك ..انت غريب مش من البلد مش زميل دراسه او شغل ومفيش شيئ يجمعنا يبقي ازاي نبقي اصحاب .؟اسفه بعد اذنك
سابته ومشيت وهو كالعاده وشه بيطلع نار و ادهم بعد ما هيا مشيت جاي مبسوط
ادهم: تاني؟محرمتش
احمد: انا قلت بس اعمل باصلي واعتذرلها بس هيا فعلا ما تستاهلش
ادهم: مش كل البنات بتقبل تتعرف بسهوله مش يمكن تكون مختلفه؟
احمد: ولا مختلفه ولا حاجه دي بس عايشه الدور حبتين
ادهم: وان قلتلك يا احمد متضايقهاش تاني علشان خاطري انا هتقولي ايه؟
احمد: هقولك ليه؟انت ايه دخلك؟
ادهم: من غير ليه..مشيها دلوقتي متضايقهاش وبس ممكن؟
احمد: ممكن
احمد لاول مره يضايق من صاحب عمره لانه حس انه مخبي حاجه عنه بس هو مش هيسبهاله بسهوله كده