اهواء القدر

حلقة 10(الاخيرة)

هاهي الحلقة الاخيرة اتمنى ان تعجبكم النهاية ...

................................................................................................................................................................

شاهين محبش يقول لبلال ومجدة بلي لقاهم حب يديرها مفاجأة كان حاب شهد تروح تقعد عندهم حتى يكمل مراسم العرس كان حاب يديرلها عرس وهما الزوج راضيين،،حابين يفتحوا صفحة جديدة يسطروا فيها قصة حبهم...
شاهين رجع بيهم للدار وراحوا عند بلال ومجدة...كي فتحت مجدة الباب مصدقتش عينيها يعني هذي حبيبتها وختها وعشيرتها رجعت ترمات شهد في حضن مجدة يتباكاوا بين زوج راهم 3سنين مشافوش بعض...
مجدة شافت مع ساجد....
مجدة::شهد ميكونش هذا الكعبور وليدك؟؟
حركت شهد رأسها بالإيجاب 😜...
رفداتو مجدة تتحضن فيه وتبوس..مجدة بقات تحرك في عينيها بين ساجد وشاهين لقاتهم نسخة واحدة عرفتها شهد فاه كانت تخمم::وليد شاهين ثاني..
فرحت مجدة كي شافتها مع بعض وأخيرا رجع الثنائي لبعضهم...بعد ما شيبوهم...
دخلتهم لداخل شاهين بقا معاهم شوي وخلاهم على راحتهم..
راح شاهين يبشر بلال لي فرح كي شاف عشيروا فرحان..شهد بقات مع مجدة حكاتلها كامل واش صرا معاها...فوتوها دموع وضحك حتى رجعوا بلال وشاهين من الخدمة....
خبرهم شاهين بلي راح يعاودو يديروا عرس كبير من أول وجديد وهاذي المرة زواجهم عن حب...فاتوا ليامات وجا عرس ♡شهد∞شاهين♡شهد خرجت كي الأميرات بحجابها لي مزين وجهها..هذي المرة خيرت كلش على ذوقها وفرحانة ومقتانعة بيه..انا نقلكم واش صرا::
قبل بيوم جا شكون يطبطب على فاطمة فتحتلوا الباب لقاتو راجل شوي كبير في السن:
فاطمة::انعم كشما تحتاج؟!
الراجل::نتي هي فاطمة***
••ايه أنا هي غير الخير..
•كاين واحد حاب يشوفك ويحكي معاك معليش تجي معايا.
••نجي معاك؟!وين نجي معاك نعرفك انا؟!
•تعيشي مكانش وقت حاجة حياة من موت..
فاطمة تخلعت يعني هذا شكون وويناه لي حاب يشوفني هذا يعرفني مدام قال اسمي...لبست حوايجها وراحت معاه قلبها ماشي مطمن..وصلو لقدام سبيطار::
••معليش تقولي واش جينا نديرو في السبيطار.
•تبعيني تعرفي..
طلع وهي تبع فيه ماهيش عارفة حتى وين راهي رايحة..وصلوا لقدام وحد البيت دخل دخلت معاه لقات راجل كبير فلعمر ماشي غريب عليها تفكراتوو.....ايييه هو أب شهد راجلها يعني..
شافت في الراجل لي جابها عندو::علاش جبتني هنا واش تحتاجو مني..
نطق أب شهد (قلتلكم من قبل اسمو مصطفى)
•مصطفى بصوت ضعيف ماشي قادر يخرجوا....(يحكي مع الراجل لاخر)-تقدر تخلينا وحدنا-
خرج وخلاهم وحدهم..
••درك نقدر نعرف واش تحوس مني..
•سامحيني فاطمة نعرف لي درتو معاك ماشي قليل..•نعرف واش درت معاك ماشي قليل أنا قررت نحوس عليك ولقيتك انا الأجل تاعي قرب راني باغي تسامحيني على كامل واش درتلك قبل 25سنة...
••ساهلة تطلب مني السماح؟!حتى بعدما هربت منك انا وبنتي لحقتنا بشرّك ومارحمتناش...بنتك واش ذنبها وانا واش ذنبي..
•نعرف صعيبة انا مابقاليش ونموت(لقاوا عندو سرطان -عافانا وعافاكم الله- مرحلة متأخرة يعني ليوم في يفوت عليه أسوء من لي قبلو)حاب نموت وانا متهني منيش حاب نموت وكاين لي حاقد عليا باغي قلوبكم تصفى من جيهتي..
فاطمة غاضها وشفقت عليه بالرغم لي هو كان سبب تعاسة حياتها وبنتها فاتت بفترة صعيبة لكن هو راح على فراش الموت المرض ماكلو ماكلة..

••ربي يسامحك انا من جيهتي مسامحاتك ربي وحدو يقدر يحاسب ربي يغفرلك....بنتك لي ما نظنش تسامحك ماشي ساهل تنسى واش درت فيها...
بقى يشوف فيها حاب يعرف واش تقصد..
••نعرف ماكش عارف واش درتلها راح نقلك: وحكاتلو كل شي وقت كانت شهد حابة تعرف وينو بوها وكيفاه وصلت ليه وكيفاه كان سبب في تدمير عائلة وبنتو بسبتو حاسة بالذنب لي قررت تحوس عليه)
يسمع فيها تحكي ودموعوا يطيحوا قداش زاد كره ونقم على روحو هو وقت كان يرتكب في الجرائم كان ميحسش واش كان يدير بصح وهو على فراش الموت حس بالإثم تاعو...
طلب من فاطمة أنو يشوف شهد ويطلب منها السماح ترجاها باه تقنعها..
كيما قزتلكم من قبل حكات لشاهين واش صرا..
شاهين كي سمع بمرضو قال يعني ربي حب ينتقم منو في الدنيا قبل الآخرة ويجازيه على كامل أفعالوا خمم يحكي لشهد الحقيقة كاملة بصح كان متأكد لي هي ماهيش راح تقبل تروح معاه حب يحطها تحت الأمر الواقع..وهذا لي صار قالها امك طلبت مني نديكم ونروحوا لدزاير راهي باغية تشوف ساجد وهي كانت متوحشة امها بزاف قبلت تروح معاه..راحوا لدزاير وحالت بوها كانت خطيرة يعني يا يلحقوا بيه يا لا...من المطار داها شاهين طول لسبيطار ..كي وصلوا السبيطار تخلعت قالت اكيد ماما صارتلها حاجة ماشي مليحة...
شهد:شاهين قلي ماما صارتلها حاجة..
شاهين:لا امك لباس عليها..
شهد:قلي علاش جينا هنا مرحناش للدار..
شاهين قالها تبعيني وصلوا للبيت تاع بوها دخل شاهين هو لول مباعد لحقاتو شهد كان في حالة ميؤوس منها شهد معرفاتوش في لول ان ضعييف بزاف وكامل جسمو متاصل بالآلات بقات تتمعن فيه مليح حاسة روحها شايفاتو هي علاقات معاه غير مرة من نهار تبعاتو هي وميس...
دخلت فاطمة للبيت راحت شهد ترمات في حظنها ت حشتها بزاااف هي تبكي ومها تبكي..مباعد شافت فالراجل فوق السرير ورجعت شافت مع امها..سألتها..
•ماما حاسة بلي شايفاتو قبل قوليلي اذا انا نعرفو..دورت وجهها لشاهين:قولي واش جرانا نديروا هنا ماما راهي لباس..
فاطمة:شهد شوفي فيه هذا باباك..
شهد(متفاجئة ملي سمعاتوا)::ك.. بابا؟!؟
فاطمة::ايه ياشهد هذا باباك وباغي يطلب منك السماح على كامل واش دار..••بغيتوني نسامحوا على حياتي لي دمرها ولا على حياة عايلة كاملة لي ماتت بسبتو..•نطق مصطفى بصوت خافت يادووب يتسمع::
.بنتي سامحيني والله الشيطان تلفلي عقلي والله ندمت على كامل واش درت في حياتي مبقاليش قد لي راح اذا كملت هاذي الساعة راح نموت الساعة لي قبلها مانيش باغي نموت ونتم مازلتو حاقدين عليا...
•بدات شهد تبكي يعني بوها لي كانت تحلم باه تشوفوا المرة لولة حاول يقتلها والمرة الثانية على فراش الموت..
•نطقت بصوت مخنوق::(تحكي مع مها)اذا كان حاب يطلب السماح الشخص الوحيد لي لازم يطلب منو هو شاهين..
شافت فيها امها::كيفاه لازم يطلب السماح من شاهين؟!
شهد::ماما شاهين هو خو ميس يعني عايلتو لي ماتت بسبتو..
فاطمة::كيفاه شهد خو ميس؟!!!
..ماما ماشي وقتو نروحوا للدار نشرحلك يسمعوا في الآلة تاع القلب﹏﹏__
اييه مات.... ما نقدرش نقول شهد سامحاتو لكن هو انتقل لرحمة ربي هو الوحيد لي يقدر يغفرلوا ويسامحوا....
شهد حكات لمها كلش حكاتلها حتى كيفاه تزوج بيها شهد وعلى طلاقها في لول محبتش تكمل تسمع منها يعني خبات عليها كامل هذا الشيرجعت شهد معا شاهين لندن وين بناوا حياتهم ووين خدمتهم وشغالاتهم شهد قد ماحاولت تقنع امها تسافر معاها محبتش قاتلها هذي بلادي زدت فيها نموت فيها...
شاهين قدر ينسيها في كامل واش جاز عليها مكانش مقصر عليها بحتى حاجة..حياتهم كانت عبارة عن حب وتفاهم كل يوم يكتاشفوا حاجات مكانوش يعرفوها من قبل على بعض صح مرات يصرا نقاشات بينهم لكن يحلوها يتجاوزوها ..بلال ومجدة زاد عندهم ولد سماوه سيف... علاقتهم مع شهد وشاهين على حالها وكل ما تزيد بيناتهم العشرة قد ما يتعلقوا ببعض في الأخير عندهم غير بعض في هذي الغربة.....
شهد وشاهين بعد عامين زواج قرروا يجبوا أخ ولا أخت لساجد رزقهم ربي بتوام بنات مع ساجد سماوهم ساجدة وراكعة {نقسر برك 😜}..شفاء ووفاء..
                                   هذي كانت حكاية نشاء الله تكونوا ستمتعتوا بيها وعجبتكم.😇