أعشق عيونه الجريئــه

الجزء السادس

نزلت من السيارة وشفته هو خله وراح واني الخوف اكلني اكل مااعرف شسوي وين اروح   كمت امشي على كيفي  واباوع ليكدام اخاف اندار  اخاف اشوف احد يلحكني ومشيت شويه وجان اسمع صوت مال سيارة وكمت امشي بسرعه كلت يجوز احد شافني امشي وحدي  واجوي عليه وحضرت نفسي حتى اركض بكل قوتي وجان اسمع السيارة صارت  قريبه يمي واني ماادري شصارلي وكمت اركض واسمع صوت بس مادافهم شنو الي يحجي
واخير شي حسيت نفسي نجريت
كلي ولج هاي اني شبيج ركضتيني نص الدنيا وشفت مازن وارتاحيت صراحه توقعت حقير وعافني وراح ومتوقعت يرجع بس بعدين من سمعت صوت سيارة جتي  ميت حسبه بالي خفت وكلت لنفسي احسن شي اركض
بس الحمدلله طلع مازن
باوع عليه كلي ليش تركضين كتله موانت عفتني وعبالي مترجع بعد وشفت المكان فارغ مابي بشر ولمن سمعت صوت السيارة عبالي احد يريد يتحرش بيه
وكمت اركض جان يضحك كلي والله سباعيه عفيه عليج يس ترة وجعتي كلبي من كثغ (كثر)ماجريت وراج(ركضت وراج)كتله اسفه
كلي امشي للسيارة انطيج ماي لان جنج راح تموتين
وجهج اصفر مشي  ويايه
وصلنه للسيارة وانطاني مي كلي شربي كتله انت متشرب هم هوايه ركضت كلي يرط كثيغ(مليان بالماء هوايه بي)
شربت وصعدت كعدت بالسيارة وكلبي يدك بعدة من التعب ونهد حيلي عد هو صعد وظل كاعد يرتاح وباوعت عليه
وكتله عبالي عفتني ورحت باوعلي كلي ليش ماعندي غيرة اعوفج هني بمنطقه مابيه صريخ ابن يومين بس انتي ضوجتيني
وتعاندين هوايه ومتسمعين الكلام كلت خلي اعاقبج ردت احجي بس بعدين سكتت
كلي شوفي بعد مااسامحج اذا ضوجتيني هالمرة صدك اعوفج واروح واخلي الذيابه تاكلج بس نوبه وحيدة (مرة وحدة)بعد ترة مااقبل كتله اي ميخالف واني اشكرك لان رجعتلي لان خفت وين اروح وحدي
هز براسه مجاوبني
كلي شوفي يابنت عمي إنا مااريد مشاكل والي راح اسوي أنا فكرت بي راح يروح سمعتنه من راح اوديج لبيت اقاربج وارجع وحيدي راح يكثر الكلام وراح يتحجون بسمعتنه ويكلون بت عمهم نهزمت فاإنا راح افكر بغير حل
كال بس إنا راح اكول لاابويه إنا معجب بيج واريد ازوجج وخلي السالفه تبرد كم يوم وبعدين نشوف شلون
واذا ابوي سئلج عني شي حاولي تبينين انج هم معجبه بيني
كتله اخاف اسبلك مشاكل كال اإنا من اول ماشفتج عرفت بيج راح اجيبلي المشاكل وجع الراس بس شسوي ماني طالع بيدي شي
غير اساعدج لان شفت ظلم انو يجبوج من غير مكان وغير حياة ويسون هيجي بيج وينطوج لواحد ماشايفته
كلي اريد اسئل سؤال انتي هم عندج واحد تحبي
اعرف انتو الاجانب عادي احد يسئلكم هيج اسئله
كتله اول شي اني مواجنبيه واضوج من دكلي اجنبيه جان يكول اي انتي مبينه مو عراقيه من ركضتج لان العراقيات مايركضن هيج من كثر كعدت البيت بس هني واشر عليه الاخت رياضيه كتله اي العب رياضه دائما واطلع يوميه الصبح اركض جان يكلي بالشوارع تركضين كتله اي كال  هني من تركضين بالشارع يشمروج الجهال بالطابوك ويصحوج مخبله وكعد يضحك واني اباوع عليه بعصبيه كتله اول شي هاي حريه شخصيه كلي لايابه ماجنت ادري اي
كملي كتله وثاني شي شنو يعني النسوان عدكم متطلع من البيوت سجناء المراة مثلها مثل الرجل كلي لاوالله ها اي بعد شكو دخليلج شارب ولبسي دشداشه ويشماخ وكعدي بين الزلم بالديون بويه سكتي لاضحكين علينه الناس حنا هني مومثل يمكم. حنا نختلف حياتنه قاسيه ونسوانه امهات بيوت شغلهن ببيوتهن
كتله لاتواخذني بس هذا تخلف كال اي مو البنطرون الي جيتي بي للعراق وشافوج الزلم بي هذا تحرر دحجي (شوفي)
التحرر بالعقل مو بلبس والدخله والطبه والعلاقات مابين الزلم والنسوان
كتله ماااتصور انو العلاقات تحرر اني هم عايشه بالخارج بس دائما كنت اتقيد بكل تصرفاتي حتى لاينوخذ عليه نظرة خاطئه
كلي اي زين الله يزيدج كتله واجابه على سؤالك لا ماعندي حبيب
ولااسوي علاقات وياالشباب كلي عجيبه كتله شنو العجيب كلي كلامج كتله ماكو شي عجيب اني هيج عايشه لنفسي ولدراستي و صديقاتي وعندي عائلتي الي هما ماما وجدو وبيبي احلى شي بالدنيا لان  اني احب الجو العائلي وصراحه هذا الشي شفته يمكم لمن كلكم تنجمعون وتاكلون سوة وتسولفون وتضحكون ولمن تكعدون العصريه وتشربون الجاي هاي امور جدا جميله
وسكتت وهو ظل ساكت وكاانما استغرب من شخصيتي المتناقضه
وبعدين صار عندي فضول اعرف هو عندة حبيبه سئلته
كتله انت عندك حب بحياتك باوع عليه كلي اي عندي
والمشكله الي احبه مثل امج حضيريه
كتله وليش ممزوجها كال اهلي مايردوها  صار عدهم عقدة من زواج امج وعمي الله يرحمه
كتله وانت مقرر تتنازل عن حبك كال مامفكر بالموضوع
كلي المشكله تعرفين وين بلاامور الجديدة الي تصير بحياتنه ممكن تغير كلشي بينه 
شافني صافنه عليه ابتسم كلي ترة محسوبج دارس بالكليه ثلاث سنوات واخر سنه وعفت الكليه بوقته والدي تمرض وظل  فترة طويله وإنا عفت الدراسه
كتله ليش حرامات ارجع ادرس كال لاوالله
لحين ارجع زحمه صرنه كبار ماترهم حنا مانصغر ونرجع بالعمر حنا نكبر خوما ادخل بعكالي ودشداشتي للكليه وضحك بصوت عالي كتله شكو بيه والله حلووو جان يسكت ويباوعلي واني خجلت كلي والله يابت عمي الله كريم وكلي  المهم هسه راح نرجع للبيت وكاانما مصار شي وإنا راح احجي ويابويه واشوف شيكول
يتبع ....