أعشق عيونه الجريئــه

الجزء الثالث

طبعا والدتي متحجي ويايه وجدي كلي عوفيها لحد متروحين وتجين المهم رحت للمطار وكنت دانتظر موعد طيارتي كانت اكو عائله ايضا دترجع لبغداد كانو ولد ثلاثه وبنيه وامهم حجو ويايه وظليت فترة الانتظار كلها احجي ويا الولد وامهم وبتهم واخذو رقم تلفوني واخذت رقم تلفونهم هما كالو انو احنا رجعنه لبغداد علمود شغل
طبعا الولد جانو محترمين بس مصطفى جانت عيونه زايغه واصر انو ياخذ رقمي مع العلم هو شاب حلو ومرتب بس مو النوع الي يستهويني او يعجبني المهم بعد انتهاء كل عذاب سفري وصلت لبغداد وكان قريب جدي باانتظاري وعد كلي ترة ابن عمج موجود لان اتصلو بيه الصبح وعرفو موعد وصولج واصرو انو هما يستقبلوج وجاي ابن عمج ويا سيارة ثانيه كتله اوكي كلي يله خلي نروحله
مشيت لحد السيارة وشفت ولد شاب
جان لابس بنطرون اسود وقميص نيلي ولابس مناظر وجان واكف على السيارة صراحه ماتوقعت انو اكو احد من اقاربي هيج لان دائما جانت والدتي ادكلي نسوانهم يلبسن عبي سود ورياجيلهم يلبسون دشاديش
بس اني شفت ابن عمي استغربت وجان حلو كلش وانيق
وصلنه يم سيارته وقريب جدي كله شيخ وصلت بت عمك باوع عليه من فوك ليجوة مثل الي معاجبه بس كلت يمكن ملابسي لان جنت لابسه بنطرون وقميص
ومجنت محجبه يجوز هذا الي ضوجه عد اني كلتله هلو كلي هلا وجثير الهلابيج بت عمي
يله ديتانونه بالبيت طبعا اني جنت تعبانه ومومال طريق مرة ثانيه بس شسوي وجنت منتبه على ابن عمي شلون يحجي وصوته خشن ورجولي وجانت عندة كلمات اني ماافهمها ماادري شيحجي وعندة كلمات افهما بدون محد يكلي المهم وصلنه للمحافظه الي كانو عايشين بيها دخلني لفد بيت شبيه بالقصور مصورة هيج اصورته من هاي البيوت الي اعتياديه وحسب مكالت والدتي بيتهمً الي من زوجت اجتي سكنت بي جان كلش عادي وعلى كولتها بدائي اني جنت محسبه بعدة هيج بس اكيد الدنيا اطورت وتغيريت المهم نزلت ودخلت جوة للبيت وجان بيت من جوة حلو وجانت اكو فد مرة جبيرة كاعدة على كرسي جانت لابسه اسود بس الشال لونه ابيض وجان كاعد يمها واحد رجال يعني عمر يطلع بالخمسين ومن دخلت كام وكف واقترب عليه وسلم وهاي المرة اشرتلي انو اروح يمها واني هم رحت وجان دكلي هلا بيج يابنيتي نورتي الدار كنا انتانيج كتلها اشكرج كالت إنا ام ابوج وكعدت يمهم وظلو يحجون هي وعمي ويحجون على ابويه وعلى انو اخر شي شلون كان يريدني ويحاول يوصلي ومن هلكلام واجوي نسوان عمومتي سلمو عليه وجهال جانو هوايه فعمي كلي اليوم مجتمعين علمودج حتى يشوفوج الكل ويسلمون عليج
طبعا اني جنت تعبانه كلش بس استحيت اكللهم بس ورة شويه كلي عمواحنا حضرنالج الغرفه مالتج روحي ارتاحي جانت الغرفه فوك عد كتله اي والله ياريت لان كلش تعبانه اريد ارتاح وفعلا صعدت فوك ومن وصلت لباب غرفتي شفت هذا الي جابنه منالمطار طالع من وحدة من الغرف وجان متغير ولاعبالك الولد شاب الي كان انيق وملابسه اخر موديل كان لابس دشداشه ولاف راسه بس جان كلش حلو وصراحه احلى من الصبح ولمن شافني اجه فات من يمي ولاعبالك شافني ولاحجه ويايه حتى اني استغرب على تصرفه لان اني ماحجيت وياة شي يضوجه ليش هيج
شنو الي صار
عد دخلت لغرفتي ودورت على حمام مالكيت بالغرفه بعدين طلعت دورت لكيت حمام بالممر الفوك عد دخلت غسلت
وطلعت وجان هم اشوف هذا بوجهي وعصبي ورافع حاجبه وهم باوعلي نظرة جانبيه وراح اني فريت بيدي
يعني معاجبني تصرفه وداتخل للغرفه وجان اسمع واحد يكلي انتي اجيتي هون شتغيدين
(شتريدين)كتله شنو
كلي مافهمتيني كتله لا ماافهم شتحجي كلي داكلج انتي ليش اجيتي هنا شتغيدين
قصدك شريد كال مو داحكي هندي اني
كتله بس مدافهم عليك سوري كال انوب انكليزي
شوفي خلي احكيلك شي اني ماعجبني حواسج(ملابسج)
كتله شنو تقصد كلي استغفرالله ربي كلي اقصد لاتلبسبن هيج بعد لان هنا عدنا عيب الحرمه من تتزهيب (من تلبس )هيج كل مكان والا احترامه واحنا مو هناكه سمعيتتي واتقيدي بتصرفاتك ومايصير تتصرفين بكيفيج انا
مااخمن (مااظن )سالفتج خاليه يااجنبيه بس غليني (خليني )اشوف ايش
بيكي بس انا مايلازم بيكي
فهمتي وخله
وراح اني كلت هذا شبي اني شعندي وياة ليش هيج حاقد عليه
ومهتميت ودخلت لغرفتي وبدلت ونمت لان جنت تعبانه كلش وحسيت المغرب كعدت ادور بملابسي ردت انزل وكلت خلي البس شي مسترة حتى لايحجون عليه والله لبست نفنوف طويل وجان محترم ونزلت جوة شفتهم كلهم كاعدين عد اني سلمت واستحيت اتحرك من مكاني سمعت عمي يصيحني كلي تعاي كعدي اني همين رحت كعدت بس خجلانه وحاسه اني بمكان مومكاني لان جانت نظراتهم الي موطبيعيه وجنت اريد اشوف اخوتي جان اكو احساس بداخلي يخلي عندي فضول اشوفهم واتعرف عليهم عد ظليت ساكتهظليت ساكته بعدين ماتحملت كتله عمو اني اعرف بابا الله يرحمه جان عدة عائله ثانيه وبنات ولد واكبر مني بس اني ماشفت احد منهم عد عمي باوع لبيبيتي كلي ان شاءالله باجر يجون بس كان كلامه ميطمن وحسيت من كلامه عبالك ميريدون يشوفوني واحتمال جبير محد منهم يجي وفعلا مثل متوقعت ثاني يوم مااجوي وانما بديت اتعرف على الي بالبيت واول واحد عرفت عنه هوايه شغل الولد الي جابني من المطار طلعوو يصيحو شيخ وطلع فد واحد شديد وقوي وماتنكسرله حجايه وشايف نفسه واسمه مازن ماعرفت شكد عمرة شدارس لان شي ميخصني بس حبيت اعرف كل اهل البيت وبالبيت وياهم جان عايش عمي الجبير الي هو اكبر من والدي الله يرحمه والي ابنه شيخ مازن وعندة خمس بنات بس كلهن مزوجات لان هناك عدهم البنات كلش اصغار ويزوجهن وجان عندة ولد اخ اصغر من مازن اسمه محمد وبيبيتي عايشه وياهم يعني البيت العايشين بي يعتبر بيت العائله هما يسمو البيت الجبير عود هذا البيت بيت الكل وجان عمي الصغير ساكن بيت هو وزوجته وثلاث اطفال بصف البيت الجبير وجان هو ومرته كلش حبابين وفقيرين واني تعرفت على زوجته وهي الي سولفتلي وطبعا عندي بعد عم بس معايش وياهم وعندي عمات اثنين متزوجات واولادهم اكبار بيهم شباب هذا كل الي عرفته طبعا مر على وجودي هنا اسبوع ومافهمت اني ليش رجعت وهما ليش رادوني صحيح بيبيتي مريضه ومراة كبيرة بس مومثل ماكال عمي جانت تكعد وتحجي وجانت كل شويه تصيحني اكعد يمها اسولفلي على سوالف قبل وحيات قبل وعلى والدي الله يرحمه
وصراحه مليت من الكعدة عدهم اني متعلمه اطلع واروح واجي واتسوق واسوق سيارتي هنا ميصير ضجت كلش من هاي السالفه وماشفت وجوه جديدة بالبيت واخوتي مااجوي ولااي احد واني قررت افتح الموضوع ويا عمي انو بعد كافي شفتكم لازم ارجع وجنت مقررة هيجي بس اليوم من طلعت كعدت بالحديقه شفت واحد دفع المرجوحه الي جنت كاعده بيها ومشه عد اني كتله خير شييك
جان يندار طلع مازن كلي تحكين وياي
كتله عبالي احد اسفه كام يدير بوجهه منا ومنا جان يكول شنو بيكي كتله مابيه شي اشكرك كلي يااجنبيه كتله انت ليش ادكلي اجنبيه اني مو اجنبيه كلي اني مالي قنصال (مالي واهس )لهاي السوالف بس الي اريدة لاتكعدين تفترين وتتشتكين انج ضايجه وتكعدين تكسغين بالكلب  (تخلصين كلبي )ترة ضايج
يتبع......