👑الدخيلة👑

عشاق القصص و الروايات بجميع اللغات

👸 الدَّخيلَة 👸 ✍بقلم : ghazal trust🖎
الحلقة : الاولى 1

الام بصوت مرتفع : اويييييلي وحدي واش غنباااتو هنااااااا ... سحااااااار واااا سحاااار
سحر من السطح: شوهتينا العمارة كاااملة خرجات شكااااين؟
الام: من الصباح ونتي تما واش مساليييتششش؟
سحر: كنشر اااو ! راه 4 دسلوكة ديالك وديال ولادك
الام: يالاه سربي هبطي هزي معايا السدادر نخرجوهم
سحر : والبرهوشة فيناهياااا اللي متهز ماتحط نهار كامل وهي دالعة تابعة القطوط تعلف فيهم تقول غيخدمو عليها كاع المشاش جمعاتهم فين ما كان شي مش يجي كيجري عندها يعلف
الام: وصاااافي دابا براكة من الهضرة قهرتووني دايرين راسكم فختكم الصغيرة
سحر: ااايه (كدور راسها) ختكم الصغيرة كتموووتي عليها يار ربي السلامة غا بلاتي هانا نازلة (كتحلف بيديها) وتلقاااها هازة ديك الميكة وتسارا بيها تجمع فالمشاش نريش مها على الله
تلفتات الام داخلة للدار: واحطي فيها يدك لا كنتي مرى (دخلات للدار) ااااه اجي نتا خرج ليا الطبلة برا والسدادر فين غادي سالت .... سفياااااان اجي ينعل بوووك معاك كنهضر
سفيان: وا هاد التخمااال مابغاش يسااالي ااااو فين غنكلسو حناا وبزااااااف هادشي الزوهرة عيقتو والله
الزوهرة الام: تحرك برااكة من الهضرة ولا نخرك على بوك هاد الشبكة ... عيط على الحلوف لاخر يهز معاك غتحمقوني بناقص من شي ولاد الى ماكانوش غينفعو يخخ
سفيان: ولينا حمير ماشي ولاد وا سيمااانة على قدها ونتي تحرتي علينا شخفتينا
الزوهرة : زيد زيد وليتو كلمة لكلمة ما بقيتوش تحشمو
سفيان: بصوت سييمووو سيييموو ... اجي بنعل .... هانا جاااي لديلمك
الزوهرة: تابعاه: مالو مالو فين هوا وريه ليا
سفيان: راه هرب شافني كنطل عليه وهو ا يعلق
الزوهرة: سير جيبو مابغاش يتفرق مع داك الشمكار غيخرج عليه البرهوش لاخر ... سير جيبو ليا ليوم نطحن مو ... هااااه بلاتي الى لقيتي اسراء برى عنداك تحط عليها يدك راه نكرضها لك
سفيان: وصااافي صعرتونا ااوووفف 👈سفيان = 28 سنة طويل وشهب عينيه فاتحين ومسرار فوجهو بنات الحومة موضف فاتصالات المغرب حاليا شاد كونجي ناوي يسافر .
👈سحر=البنت البكر 30 سنة شعرها اسود وحروفها كحلين جالسة فالدار هي الري هي الشوار هي اللي هازة الدار
👈اسية:= المجتهدة ديال الدار 25 سنة موضفة فالتيجاري وافا بنك والعام التاني عندها فالدكتورة منعازلة وداياها فقرايتها ممسوقاش لشنو واقع فالدار
👈محمد= كيعيطو ليه سيمو 22 سنة دمو خفيف وشعرو كحل كيشبه لسحر وحتى للام ديالهم فالملامح
واخيييرا اسراء الصغيرة 20 سنة كتقرى الباك وشادة عطلة ديال الصيف حاليا نهار وماطال تابعة القطوط فالزنقة توكلهم وتجمعهم وتفرق عليهم الماكلة وتشري لكروكيت وضل تجمع فيهم فحومتها حتى ولات معروفة عند القطوط ديما تابعينها والحومة كتعرفها .
ساكنين فعمارة بمدينة صفرو فحي شعبي نضيف مع الاب المتقاعد ديما جالس بواحد البيرية على راسو كيلعب الضامة فالقهوة ومطلوق مع الناس اللي بغا يربح العام طويل.
خرج سفيان تابع محمد كيقلب عليه حتى بانت ليه اسراء محنية على ركابيها والمشاش دايرين بيها هازة ميكة وكتفرق ليهم الماكلة ، وقف عليها من اللور قفزها
سفيان: تكعدي من هنا سيري للدار ولا نجمع معاك نتي ومشاشك بشي ركلة