# اخترتك_ بنفسي 10
النظره الخجوله
ما سألتوا صاحب النظرة الخجولة
كيف يسهرني وله وجهٍ صبوح
كيف يظلمني وله طهر الطفولة
كيف يسكنّي وهو دايم يروح
وكيف أنا ألقى ربيعه في فصوله
دام كذبه صادق وصدقه مزوح.
أدهم: وصلنا للفندق ميتين تعب صارلي ايام منايم شعور الذنب موتني أتمنى المحها حتى أعتذر منها أول مرة أحكم غلط وأهين انسان بهالطريقة من جهة نسرين وتصرفاتها الصبيانية يومية صابغة شعرها قبل منجي سوت عملية تجميل لخشمها هسة تريد تسوي شفط شفت خصل صفرة بشعر ليان تخبلت ردت اموت نسرين دخلت بيناتنا ام احمد تريد غصب تكبر البنية.
ام احمد : عيب اخويه هسة نروح للقاعة من نرجع حاسبها وانتي ست نسرين أستري علينا هاليومين لاتخربين زواجة الولد وخلي بنتج تروح ويا ميادة للصالون .
داليا : من الهوسة اللي صارت خطوبة نور ومازن بنفس اليوم صارلي يومين رجعت قضيناها مشاوير وتحضيرات بس ابقى دقيقة لوحدي أبجي على اللي صار متصورت نظرته هيجي اليه وعدت نفسي حتى ماباوع بعد بوجهه نبهت ليلى وميادة ميجيبون اسمه يمي لبست فستان اسود أبويه كالي اذا اليوم منخطبتي راح تبقين عانس للابد داد تروح وتجي تكول صلاوات على النبي ربي يحرسج طالعة مثل عروسة البحر عرفت من نور واصلين للفندق قويت نفسي أردد واكول داليا اذا شفتيه لاتعبري ولاتهتمين اله لبسيه لبسيه افتهمتي داليا.
ليلى : مقهورة من رمزي مسافر لتركيا مكدر يرجع ويجي للحفلة واني جنت مخليه ابالي راح يرجع اهتميت بنفسي اكثر من نور كلما اخابره يكولي بعدين نحجي ويسده شفت خواته يصوروني على الاساس يرسلونه لرمزي بقيت افتر واركص ويا عمتي ويا اخويه وأخذ صور اما داليا حكايتها حكاية لو بيدي أذبح ادهم عرفت اللي سواه بيها الحقير .
ميادة : جنا نركص اني وجلال جريت خالي ويانا جان يلتفت اهوايه ويدور ركزت عليه مجان يباوع جهة نسرين صار عندي فضول بقيت اراقب نظراته جان يباوع على داليا 😦
داليا : جنت اركص اهلل اخويه مازن واختي فرحتهم بنفس اليوم طلب ابويه مني أغنيلهم لان صوتي حلو وكلنا جنا من العائلة ماكو غربه غنيتلهم اغنية فرحانه لهيفا جنت اغني واركص ويا خالد اخويه مرات استرق النظر لأدهم شفت عينه بعيني كلبي جان يرجف من مكانه كملنا الحفلة طلعت أجيب غراض امي من السيارة قفلت الباب انداريت ادهم ورايه غلست ردت اروح وكف كدامي .
ادهم : من شفت داليا واني انتظر الفرصة حتى اطلب منها تسامحني حسيت نفسي صغير من اتهمتها بالباطل لاول مرة أركز عليها كأنثى كامله من كلشي قمة الاثارة والانوثة شعرها مصيبة لحالها كلشي بيها يجذب خبلتني من جانت تركص وتغني وتدلع ويا اخوها حاولت احجي وياها شفتها تطلع من القاعة اتقربت عليها رادت تمشي منطيتها مجال كتلها اسف داليا سامحيني اتهمتج غلط رادت تروح لزمت ايدها باوعت بعيونها نسيت نفسي بيها شعور مينوصف ضاعت مني الكلمات حسيتها ترجف زادت رغبتي بدون اي تردد حضنتها بستها محسيت الا ايدها على خدي .
مازن : جنت مقهور بزواجتي من الخبلة حسيت اهلي يغصبوني عليها بس قرينا الفاتحة وكعدت وياها عرفت هاي الخبلة كبرت وصار عدها كتله من المشاعر خلال يومين خلتني اتعلق واغير نظرتي بيها احلى شي بيها تسمع كلامي بدون نقاش حتى لو جنت غلطان تكولي انت فصل واني البس😍
ميادة : طلعت ويا ليلى ندور على دالي امها جانت تريدها ملكيناها شفت خالي واكف بعيد وايده على خده رايح بغير عالم رحت يمه وعفت ليلى .
رمزي : محبوس بالفندق لا اكدر ارجع للعراق ولا ابقى اهنا خسرت شغلي غراضي وفلوسي كلها اهناك عرفت ماخذيها عندي فلوس اهواية بالبنك بس ساعاتي ومجوهراتي وسيارتي راحت اخاف اهلي يعرفون بالسالفة ابويه يروح بيها لو ليلى أخ شيويت بنفسي هاي نهاية طريق المتعة والحرام مجنت مقتنع باللي عندي مبقيت حجه لأهلي يومية اطلع جذبة جديدة ابويه وليلى يردون ارجع وين انطي وجهي😭
أدهم: مرجعت وياهم للفندق بقيت افتر بالسيارة وكفت بمكان عالي نزلت اباوع على الاضوية مبينة من بعيد مثل النجوم شنو هالاحساس اللي يتخلل بجسمي يمتى جنت مندفع ابوس وحدة غير مرتي كومة اسئلة براسي محتاج جوابها سمعت تليفوني شفت اتصالات من نسرين وخواتي حرام اكون لوحدي غمضت عيوني اتذكرت رجفتها بين ايدي حضنت نفسي اتخيلها بين ايدي 🙏
داليا : ماكدرت انام ولا كدرت اغير ملابسي اجي واروح اباوع على نفسي بالمراية اتحسس مكان البوسة بيدي احس اريد بعد مضايجه ولا فرحانه شعوري غريب ضربته مو قصدي لان باسني لا كأنتقام لان يشك باخلاقي اريد اوصف شعوري ماكدر شيصير لو يبادلني الحب شيصير يحجي ويايي طول الليل مثل ليلى شيصير يغازلني وأدلع عليه ياربي هاي بوسة بسيطة هيجي قلب كياني انتظر ليلى تكمل تليفونها ويا زعطوط مالتها حتى أسالها على احساسها من يبوسها رمزي أتذكرت نفسي نزلت دموعي أدهم ملك نسرين مو الج هذا الحضن الها غبية اي اني غبية وضعيفة 😢
نسرين : بعد الحفلة البايخة رجعت حجيت ويا صديقاتي بعد اسبوعين راح يسافرون اني شلون اقنع هذا المتخلف جبت ليان كعدتها فهمتها نروح وحدنا نتونس يوميه اقرا براسها هسة متحب خالاتها حتى جهالهم ومتسمع حجيهم كتلها انتي بنت ادهم عايشين من خير ابوج رفعي خشمج عليهم شفتي شسوو بيج بالله مو انتي احلى من نور خالتج لو من صدك تحبج تختارج لابنها شفتيهم اشكد يكرهونا حياتي جحيم من وراهم ابوج صاير يضربني شوية دموع من عندي خليتها نار بقت تحجي عليهم وتكول اني بصفج مامي ولايهمج👿
ادهم : رجعت اريد انام شفت نسرين نايمة بفراشي اكيد تريد شي ولا اني ليش حاجزلها غرفه وحدها صحيتها شتسوين نايمه بفراشي كومي اريد ارتاح بدون اي كلمه طلعي وسدي الباب وستري نفسج .هاي ملكت الا اليوم اوف منج غسلت وبدلت اريد انام ماكدر اريد يخلص الوكت يطلع الصبح اتحجج بشي واشوفها خلي اروح يم نسرين راح اتخبل اذا بقيت وحدي طيف داليا كدامي ماكدر اغمض عيوني .
ليلى: سالفة رمزي مو خالية يومية مطلع حجه جنا مقررين بعد شهر نتزوج حجزنا القاعة ورتبت غراضي واخذتها لغرفته بقيت اشياء قليلة عندي باقيلي اشتري فستان صارلي سنين اجمع غراض هسة عندي جهاز 5 عروسات ضجت منه كتله لو ترجع لو احرك الاخضر واليابس وأطلع المستور كافي بعد مااتحمل . جنت بالدوام سلمت النتائج الحارس جابلي ظرف كالي وحدة منقبة جابتها وصتني اسلمه بيدج شخصي باوعت ماكو احد فتحته طلع صورة رمزي ويا بنية بالفراش 💔💔💔💔💔💔💔💔
