النعمة احيانا تجينا على هيئة صديقة...
لالا مش صديقة اخت......
بصراحه حتى اخت شويه للوصف ، الحقيقة مفيش حاجه توصف المخلوقه الي هكي ، ممكن اقرب كلمة توصفها هي توأم روحك ، مع ان هادي الكلمة قاعده شويييه مقارنة ب مكانتها عندك .
توأم روحك هي الي معاك و معاها في كل شي الي لما تضحكي تضحك معاك و لما تضحك تضحكي معاها و الي لما تبكي تبكي معاك و لما تبكي تبكي معاها .
هي الانسانه الي تفهمك من نظره و تحس بيك من غير كلام ، ممكن عنطريق قرون الاستشعار 😅
هادي المخلوقه مهما زعلاتك حتقعدي تحبيها و تنسي انها ضايقاتك.
هي الي ديما تتغاضيلها او اقل شي تحاولي تتغاضيلها علي كل شي و علي كل هفوه صغيره كانت او كبيره ،
هادي الي تتمنيلها الخير اكتر ما تتمنيه لي روحك و هي نفس الشي .
بين توأمي الروح ميكونش فيه خلافات معقده و طوليه ، بين توأمي الروح خلفاتهم تنتهي قبل ما تبدا ، و حتى لو طولت حترجعو زي قبل .
مفيش داعي انك انتي وياها تكونوا نفس الشي و نفس الشخصيه لان حني مش في كوكب زمرده ومش في عالم الاحلام احني في الحياة الحقيقيه و كل حد عنده شخصيته و الاختلاف حلو و هو الي حيخليكم تكملوا بعض .
و اهم شي ان هي الي ككككلللل سبات الكره الارضيه حلال عليها ،
ان شاء الله ربي يحفظلي نعمتي و يحفظلكم نعماتكم ❤️❤️💙💙
