الشقة

الجزء الاول

من 1 -----16
رواية الشقة كاملة ، حانزلها على جزءين ، تاقو لاصحابكم الماتابعوها

من الحلقة 1 - للحلقة 16

[٣١/‏٧ ١٨:٥٣] فاطمة السر: #الشقه1:- 
بقلمي: fatima alsir
قاعده في غرفتني بنظم في كتب و انا حاسه بملل بقيت بتذكر لمن قررتا اجي اقعد هنا و كلمتا ابوي م عندي زول في الدنيا غير ابوي..امي اتوفت وانا عمري 7 سنوات من وقتها ابوي بقي لي كل حياتي رفض انو يعرس مع اني م رفضتا فكره زواجو بعد امي..بلعكس حبيت الفكره و انو اكون عندي اخوان..بس ابوي رفض..بعد اتخرجتا من الجامعه جيت الخرطوم عشان اشتغل بس م عندي قرايب هنا كلهم في مدني و بورسودان.. ابوي شغاله في بورسودان..ابوي رفض قعادي براي هنا بس لمن لقاني مصره خلاني اقعد.. بثق فيني شديد..بجيني كم مره في السنه و انا كمان بمشي ليهو في الاعياد لمن قررتا اقعد هنا جا معاي اجر لي الشقه و فرشا لي و اتطمن علي حتي مشي.. م كنت بعرف زول بس مع الايام بقي عندي  صحباتي 4 هم المالين لي حياتي..بمشي الشغل و بجي.. بجوني بقضو معاي باقي اليوم..خلصتا ترتيب الكتب طلعتا لمطبخ بعمل في كبايه نسكافي..جرس الباب ضرب عرفتا انهم البنات.. ابتسمتا و مشيت علي الباب فتحتو بقيت هند و لما.. قال لي اتاخرنا?  قلتا ليهم ايوا.. مليت.. و دخلتو وقفلتا الباب مشيت علي المطبخ بعمل في النسكافي لما قالت لي والله انا من بدري جايه بس دي هند اخرتني في المحل..كل م نجي طالعين بجي زباين..هند قالت يعني في زباين اقفل و اطلع..و بعدين البت حقت المسا الليله م جات انا اشتغلتا من الصباح لحدي اسي.. ضحكتا قلتا ليهم خليها ي لما ده اكل عيشها.. اصلا هي من عملت المحل ده من كم شهر و هي بقت مشغووله طواالي..هند قالت لي الحمدلله ربنا ريحني من الشغل عند الناس..بس قرض البنك ده مقلق بي عدييل..م بحب اكون زول داير مني قروش ..لما قالت ليها م مشكله اصلا المحل بتاعك ماشاءالله ماشي كويس و كلها كم شهر و تدفعي لبنك قروشو و ابقي المحل بتاعك..قلتا ليهم كلام لما صح..عليك الله ي هند شوفي لي قريبك الفي البنك ده دايره اجيب عربيه..ضحكو هند قالت لي ي سلام لالا دي عروض لناس ال في اي بي ذي انا بس..ضحكنا قلتا ليهم كويس..وين ميسون و شيماء?  هند قالت لي ميسون اصلا م بتجي بدري.. الا راجلا اطلع و شيماء تلقيها حايمه مع هشام سالتني لما قالت لي انتي ي ميمي شيماء دي مش مره قالت انو هشام ده جاهم البيت و اتقدم ليها?  قلتا ليها ااي قالت كده و تاني م جابت سيره الموضوع..هند قالت بري ااول مره اسمع الكلام ده..جبتا صينيه فيها تلاته كبابي نسكافي و جيت ختيتها و قعدتا معاهم..قلتا ليهم شيماء غامضه بتحكي لي بس مرات بتقفل..الا بمزاجا..عشان كده م بحب اسالا في شي الا تقول براها.. لما قالت لي الا اسالا في الموضوع ده.. قلتا ليها م تتكلمي معاها.. خليها براحتها.. تلفوني ضرب قمتا مشيت علي الغرفه جبتو لقيتها ميسون رديت.. الو...ااي قاعدين وينك انتي?...... طيب تعالي و قفلتا.. قعدتا تاني في مكاني..قلتا ليهم دي ميسون قالت جايه..هند قالت لازم تعمل show لروحها.. لما ضحكت قالت ليها اصلا دي مرت رجل اعمال كبيير قايلاها ذينا..قلتا ليهم فضل شيماء حاشوفها.. شلتا التلفون ضربتا ليها..ردت وين انتي قالت لي جايه.. اصبرو.. و قفلت قلتا ليهم شيماء شكلها زهجانه..لما قالت اكيد متشاكله مع هشام..قلتا ليهم اها حنساهر في شنو? الليله الخميس..  لما قالت لي عندي فلاش في الشنطه فيهو افلام جديده نحضر فيلم و خلاص..هند قالت طيب علي الاقل نجهز حاجات القعده.. عندك فشار صح?  قلتا ليها ااي في.. قالت لي طيب اخلص كبايه النسكافي و اعملو...
نتلاقي😍
[٣١/‏٧ ١٨:٥٥] فاطمة السر: #الشقه2:-
بقلمي: fatima alser
جات ميسون سلمت و قعدت.. سالتها ليه اتاخرتي?  قالت لينا كنت في مشوار.. هند قالت ليها كنا قايلين مجدي راجلك قاعد عشان كده اتاخرتي.. ميسون كشرت وشها و قالت لالا طلعتا قبيل و هو م كان جا.. اصلا متين انا بستناهو عندو شغالبن في البيت اعملو ليهو الدايرو.. قلتا ليها غريبه علاقتكم دي.. مستحيل اتزوج واحد و علاقتنا ببعض تبقي بالبرود ده و كل واحد فينا م جايب خبر لتاني.. ميسون قالت عادي جدا.. لما قالت هو قال القروش اي شي و بديك قروش تعملي الدايراهو.. بس القروش م اي شي انتي من نفسك مفروض تكوني محتاجه ليهو هو.. ميسون قالت لا.. القروش كل حاجه..و انا اصلا م محتاجه ليهو قلتا ليها لو فكرتو تجيبو عيال علاقتكم حتتصلح.. اتخلعت قالت لي ياخ عيال..لالا.. مستحيل انا لسه صغيره دايره اعيش حياتي.. حاقعد لسه اولد و اربي و بكي و عيا..لالالا..  الجرس دقي قامت لما فتحت لقتا شيماء سلمت و قعدت مكشره سالناها مالا قالت ماف شي..طلعت علبه سيجائر ولعت وحده.. ميسون قالت ليها اديني.. شالت وحده ولعتا و بشربو.. حضرنا الفيشار و بقينا نحضر في الفيلم علي شاشه التلفزيون حقي.. في نص الفيلم قلتا ليهم جيعانه.. نطلب اكل.. هند قالت لي ااي..لحدي م اصل نكون خلصنا الفيلم.. لما قالت انا عايزه بيتزا.. ميسون قالت انا دايره شاورما.. انا قلتا بيتزا.. هند قالت بيتزا.. هند شالت التلفون و قامت قالت لينا حاطلبا انا وبجي احضرو.. و قامت دخلت الغرفه..ضربت تلفون.. الو.. كيفك حبيبي?  انا كويسه...كتير والله حبيبي.......اي قاعدين عن مرام...ايوا معانا طبعا.....بنحضر فيلم...انت وين? .... طيب...اوكي حياتي...م بتاخر.....باي.. و قالت بعد ده اطلب الاكل..
الفيلم خلص و العشا وصل بقينا ناكل و نتونس بس شيماء كانت ساكته م اتكلمت كتير.. ركزتا ليها انا اول وحده.. اصلا شيماء م بتدس عني حاجه.. بعد شويه قامت شيماء علي المطبخ مشيت وراها قلتا ليها تعالي دايراك.. و طلعنا البلكونه و ديلك بتونسو جوه.. وقفنا قلتا ليها مالك?  قالت لي ماف شي.. قلتا ليها زعلانين انتي و هشام?  قالت لي يعني مختلفين شويه قلتا ليها طوالي بتختلفو بس م بتكوني كده?  في شنو?  قالت لي مرام م تشغلي روحك ماف شي..متشاكلين عادي..بكرا بنرجع..قلتا ليها طيب لو عارفه كده زعلانه ليه?  قالت لي تعبتا بس من موضوع اهلو ولسه هو م جاهز و م قادر اتقدم.. و جاني عريس كم مره برفضو عشانو..و اهلي متضايقين مني م قادره اقول ليهم بحب واحد تاني.. ممكن اقتلوني.. قلتا ليها خلي بالعندو بس اجي اتقدم..علي الاقل اوقف العرسان البجوك.. قالت لي قلتا ليهو بس م رضي قال الا يجهز..و انتي عارفه هو الشايل البيت بعد ابوهو الله يرحمو.. و امو و اخوانو الصغار.. موضوع طويييل ي مرام و انا تعبتا.. حنيت علي شيماء.. قلتا ليها ربنا بسهلا..انتي بس م تشيلي هم.. حاولي خليهو اصل بيتكم.. قالت لي ان شاءالله.. جاتنا هند قالت لينا واقفين هنا بتكلمو في شنو?  قلتا ليها شيماء و هشام زعلانين.. هند قالت لينا ياخ خليك من الرجال ديل و الحب و الكلام الفاضي.. خليك مع نفسك و عيشي حياتك..
نتلاقي😊
[٣١/‏٧ ١٨:٥٧] فاطمة السر: #الشقه3:-
بقلمي: fatima alser
هند قالت لي يلا احنا ماشين الساعه 11 انتي حتمشي معانا ي شيماء?شيماء قالت ليها ااي ماشه يلا.. ودعوني و طلعو مشو..قفلتا البيت.. دخلتا غرفتي رقدتا شلتا كتاب بقيت بقرا فيهو..تلفوني ضرب عاينتا لقيتو احمد.. رديت الو...اي حبيبي....يدوب رقدتا...اي مشو...انت رجعتا?  .... اها...كويس...شوفتا بابا الليله? ... اهاا....كويس..... الاخبار تاني شنو?  تميت السهره مع احمد حبيبي...بعرفو من كنت في بورسودان.. كان ولد جيرانا...بس علاقتي معاهو م بدت الا لمن جبت الخرطوم..شغال في المينا..طبعا ابوي بعرفو عشان جيرانا بس م عارف علاقتنا ببعض..
دخلت شيماء الغرفه حقتها بسرعه و قفلت الباب و بتتكلم في التلفون قالت ايوا ي هشام..ليه م بترد علي دقيت ليك ميه مره......هشام حرام عليك م تعمل فيني كده... عارفني م بقدر اعيش بدونك.......هشام لكن حلك ده صعب انا م بقدر عليهو.......هشام م بقدر اعرس من ورا اهلي....... قعدت في الكرسي بتبكي.. قالت ليهو.....لا ي هشام في حل....انك تجي تتقدم لي بس.....اهلي بوافقو انا بعرف اضغط عليهم كيف........لا ي هشام استني... قفل الخط ختت التلفون و بقت تبكي...
ماشه هند و مجدي علي البحر شايلين عصير بشربو فيهو بتونسو و بضحكو.. هند قالت ليهو انا مبسوطه معاك شديد ي مجدي.. مجدي قال ليها وانا كمان والله.. قالت ليهو نفسي كان اعرفك من زمااان.. محدي قال ليها ي ريت والله بس م كنت بعرفك.. الا انتي بقيتي تجي لميسون في البيت و حسيت بيك بتعايني لي و كده.. قالت ليهو ااي جد لمن شفتك و شفتا تعاملك الحلو و شفتا تعامل ميسون معاك كعب كيف حنيت عليك قلتا بتستاهل وحده احسن من ميسون..  قال لي متذكره اول مره لمن وصلتك و طلعتي من ميسون لقيتيني مستنيك بالشارع الورا محل م بتطلعي و وصلتك الشغل و اتونسنا مع بعض ذي البنعرف بعض لينا سنين.. قالت ليهو صح.. اليوم داك م اتوقعتك اصلا تجيني..  سلمتا و طلعتا عادي.. لمن لقيتك مستنيني اتخلعتا..  بس كانت حركه حلوه منك.. منها بدينا علاقتنا.. قال ليها ااي و ان شاءالله قريب نعلن زواجنا لكل الناس.. قالت ليهو و تعمل لي عرس اسطووري.. قال ليها طبعا حبيبتي.   يلا نركب اللنش?  قالت ليهو يلا...و مشوو علي البحر...
قعده ميسون في غرفتها بتتكلم في التلفون و تضحك و بتضرب مناكير في اظافرها قالت لا اصلا يوم الجمعه ده بقضيهو مع اصحابو م بقعد في البيت.....منو القال انا قاعده انا اسي طالعه.. عايزه اشتري شويه حاجات..... اكيد حاجي اسلم عليك...معقوله امر يوم بدون م اشوفك حبيبي......خلاص استناني بالغدا......اوكي م بتاخر.... اوكي باي حبيبي...ختت التلفون و نادت الشغاله ي ميري ميري جات جاريه ميري قالت ليها نعم...قالت ليها خلصتي مكوه الفستان حقي?  قالت ليها ايوا اسي بجيبو.. قال ليها سرعه يلا..و خلي ادم اجهز العربيه انا طالعه.. قالت ليها حاضر و مشت طلعت.. بقت بتلم في شعرها قدام المرايا و دخلت الحمام تستحما...
نتلاقي😉
[٣١/‏٧ ١٨:٥٨] فاطمة السر: #الشقه4:-
بقلمي: fatima alser
كنت قاعده في شقتي بتضف.. الجرس ضرب مشيت فتحتا لقيتها لما.. سلمت و دخلت قالت لي بتنضفي?  قلتا ليها ايوا عشان باقي الاسبوع م بقدر انضف مع الشغل.. اقعدي اسي بخلص ختت شنطتها قالت لي طيب بساعدك قلتا ليها لالا والله م بتلمسي حاجه..انا خلصتا اصلا بس المع الصاله دي و خلاص.. احكي الاخبار شنو?  قالت لي ولا شي خلصي سرعه دايراك في موضوع.. قلتا ليها طيب دقايق..امشي اعملي لينا قهوه بتلقيني خلصتا.. قالت لي طيب..و دخلت المطبخ..خلصتا و غسلتا يديني جيت لقيتها خاته صينيه القهوه.. جبتا من علي الصفره علبه فيها شوكلت ختيتها شلتا منها و هي شالت قلتا ليها احكي في شنو? شلتا فنجان القهوه بشرب و هي ختت الفنجان علي الطربيزه و قالت لي..اهلي وافقو علي صالح.. اتخلعتا قلتا ليها الراجل الكبير? ليه?  قالت لي القروش...الله العن القروش..  ابوي بحب القروش و لقاهو عندو قروش طوالي وافق.. قلتا ليها م توافقي قولي م دايراهو.. قالت لي م بسمع لي كلمه.. القي القروش ببقي في عالم تاني.. اصرفا كلها علي العرقي.. م بوعي بشي.. اسي امي قالت لي قال لصالح اجيهو الليله اتفقو علي كل حاجه..انا كنت عارفه انو حيوافق و ليهو يومين م بوقف شرب لا ليل لا نهار..و هو م عندو قروش قدر دي اشرب بيها طوالي حسيت انو صالح ليهو دخل في الموضوع.. قلتا ليهو و امك م حتقدر ترفض و تقيف معاك.. اخدت نفس طويييل و قالت لي م بتقدر تقول ليهو لا بضربا عادي اطلقا و اطلعا من البيت..حتي قدامي انا م قالت لي م موافقه بلعكس قالت لي موافقه و زول كويس و كده..و انا عارفاها بتكذب.. عارفاها م موافقه بس م بتقدر تحسسني بكده..قلتا ليها الحل شنو طيب?  ختيت فنجان القهوه من يدي قالت لي م عارفه..لو رفضتا ابوي م حاسمع كلامي حاعرس لي غصب عني...دموعها نزلت و مسحتهم قلتا ليها ماف زول بقدر اتكلم مع ابوك?  اعمامك اي زول??  قالت لي م بسمع كلام زول..الفي راسو بعملو قلتا ليها لازم اكون في حل.. اتكلمي معاهو ابكي ليهو امكن احن و ارفض الموضوع.. قالت لي م بآثر فيهو شي.. المره الفاتت لمن قال لي صالح اتقدم ليك قلتا ليهو لا و م دايره و كده و بكيت.. م اثر فيهو بشي.. فتح باب الشارع و طلع مشي و رجع بليل سكران م واعي لشي..قلبي وجعني علي موضوع لما.. لما صغيره و طيبه م تستاهل البحصل ليها ده..  غايتو حاولتا اهديها و سالتها لو ممكم اتدخل في الموضوع و اتكلم مع ابوك رفضت..خليتها براحتها جهزنا الغدا و اكلنا انا و هي..
نتلاقي🙃
[٣/‏٩ ١٢:١١] فاطمة السر: #الشقه5:-
وقفت ميسون عربيتها قدام عماره و نزلت دخلت العماره في اللحظه ديك جات ماره شيماء في تاكسي و شافت ميسون دخلت العماره و استغربت و قالت في نفسها( ميسون جايه هنا لمنو) و مشت طوالي م وقفت..  دقت ميسون باب الشقه و فتح ليها واحد اسمو عمار.. سلمت و دخلت ..
لما قعدت معاي لحدي بليل جات هند و شيماء..بقينا كلنا بنفتش في حل ل لما.. ميسون جات سلمت و قعدت تشر معانا في الشاي ..شيماء سالت ميسون قالت ليها: (ميسون قبيل شفتك في الرباض داخله عماره كده صح?)  ميسون اتخلعت و اتوترت شديد و قالت ليها: (ااي في وحده بتبيع حاجات جايباها من لندن قلتا امشي اشوفها) ..هند حست بتوتر ميسون حست في حاجه..انا كمان حسيت بس م حبيت احسسا بحاجه.. شيماء قالت ليها: (اشتريتي? ) قالت ليها :(لالا م عحبتني حاجاتها..).. لما قالت:( ليها بتبيع شنو? )..ميسون سكتت مسافه قالت ليها:( ميكب..و اكسسوارات..).. شيماء قالت:( ليها طيب كنتي تسوقينا كنا اشترينا..)..ميسون قالت ليها:( حاجاتها غاليه م بتشتريها و اصلا حقت نسوان م بنات..)  لما قالت ليها:( احتمال اعرس قريب..).. ميسون اتخلعت قالت ليها (بالجد?)  شيماء قالت ليها:( ااي.. ).. ميسون قالت:( كدي احكو لي ده منو??  )
كنت واقفه في البلكونه بتكلم مع ابوي.. جات هند وقفت جمبي و ساكته..  خلصتا مكالمتي.. هند قالت لي:( انتي ي مرام صدقتي موضوع ميسون ده? )..  قلتا ليها:( حق العماره?ااي ليه? ).. قالت لي:( لالا كذابه م شفتيها اتخلعت و اتوترت كيف..في حاجه هي داساها.. )..  قلتا ليها : (م عارفه بس م اظن.. انتي براك راسك بمشي بعيد)..  قالت لي:( في حاجه انا متاكده.. ).. قلتا ليها :(حاكون في شنو يعني?)  قالت لي:( م عارفه..).. قلتا ليها :(ماف شي يلا ندخل.. )..حسيت هند مهتميه شديد بموضوع ميسون م عرفتا ليه قلتا فضول منها ساي بس..
قاعده شيماء مع هشام في كافتيريا بتكلمو.. هشام كان زعلان و مكشر وشو..هشام:( ساكته ليه?  ضربتي لي الا اشوفك اسي و ضروري.. اهو جيت في شنو?)  شيماء:( هشام م ممكن علاقتنا تنتهي كده م بقدر انا والله حاموت.. انا بحبك ي هشام.. ) هشام:( م بتحبيني انتي لو كنتي بتحبيني كنتي وافقتي علي.. انتي انانيه و بتحبي نفسك لا بتحبيني لا بتثقي فيني.. ) شيماء:( لالا بثق فيك والله ).. هشام:( كذابه.. كنتي وافقتي علي عرسنا..) شيماء: ( م بقدر.. صعب ي هشام والله صعب.. ) هشام:( شيماء انا م غصبتك..م دايره اوكي انتي حره.. بس انا كمان حر م داير علاقه معاك..).. شيماء بقت تبكي قالت ليهو:( هشام حرام عليك م ممكن البينا انتهي بسهوله كده.. م بقدر انا..) هشام:( عايني انا م داير ضياع وقت..يلا مع السلامه )..و قام داير امشي وقفتو..شيماء:( هشام..انا موافقه..).. هشام  فرح قبل عاين ليها و هو مبتسم..رجع قعد جمبها و مسك يدها قال ليها هشام:( اوعدك انو م تندمي علي قرارك ده..) سكتت بقت مقلقه و حاسه حتندم شديد علي قرارها ده..
نتلاقي☺
[٣/‏٩ ١٢:١٢] فاطمة السر: #الشقه6:-
قاعده هند في المحل بتاعها حق هدوم.. كان كبير و مليان هدوم و فيهو زبائن واقفه معاهم البت البياعه..و هند قاعده علي مكتبها و قدامها ورق شغاله فيهو جا داخل مجدي بعاين في المحل مبتسم و شايل تلفونو و مفاتيحو في يدو وقف قدامها قال ليها مجدي:(السلام عليكم..) رفعت راسها عاينت ليهو ابتسم هند:(و عليكم السلام..شنو المفاجاه الحلوه دي?) مجدي:( اشتقت ليك جيت اشوفك).. هند:( ههه و انا كمان اشتقتا ليك.. اقعد..) مجدي:( لالا ماشي..) هند كشرت وشها قالت:( عشان ممكن ميسون تجي هنا و تشوفك? ) مجدي:( ايوا.. ميسون م عارفه اني عارف انو انتي عندك محل اصلا.. ) هند باستهتار :(ولا عارفه انو انت العملت لي المحل ده.. ) مجدي:( ماف داعي لكلام ده..انا عملتو ليك عشان اريحك من الشغل مع الناس و ابقي عندك دخل و تستفيدي و عشان انتي مرتي.. و انا و انتي بس عارفين الموضوع ده و م داير  زول اعرفو كلمتك كم مره.. ولا حتي صحباتك )..هند:( عارفه ي مجدي م كل شويه تقول لي الكلام ده.. حفظتو خلاااص) مجدي:( كويس.. الشغل ماشي كيف?) هند:( كويس شديد..) مجدي:( طيب.. يلا سلام..)  هند:( م حاشوفك الليله? ) مجدي:( م عارف..اسي راجع البيت و طالع بعد ساعه عندي اجتماع و بعديهو بوريك.. انتي ماشه عن مرام?) هند:( اي لو م حالاقيك بمشي..) مجدي:( طيب بوريك لمن اخلص..  محتاجه حاجه?) هند:( لا تسلم حبيبي ) مجدي:( يلا سلام)  و طلع....
بليل قاعدين كلنا بنتونس و نضحك.. الا شيماء قاعده مهمومه م اتونست و سرحانه.. سالتها..(مالك ي شيماء?)  شيماء:( ماف شي بس تعبانه من الشغل.. )ميسون:( لالا في حاجه م طبيعيه انتي) شيماء:( ماف شي..)..و سكتت طلعت تلفونها فتحت لعبه و بقت تلعب فيها.. عاينا لبعض و سكتنا خليناها ميسون: (اها ي لما..عملتي شنو في موضوع العريس?)  لما ردت بكل برود كانو الموضوع م يهمها (ابوي اتفق معاهو علي ااي حاجه و العقد بعد 10 يوم..) اتخلعنا كلنا عاينا لبعض قلنا ليها :(انتي جاده?)..لما:(ا ااي والله.. ابوي باعني خلاص و قبض القروش.. )..هند مسكتها. من يدينها قالت ليها:(يحليلك ي لما.. م عارفين نقول ليك شنو..) لما:( قولو الله يرحمني بس ) هند ضمت لما عليها  قالت ليها :(بعد الشر عليك.) مشيت قعدتا جمبها و مسكتها من يدها..جو  ميسون و شيماء كلنا قعدنا جمبها نواسيها ..دموعنا نزلت و زعلنا عليها شديد..
نتلاقي😉
[٣/‏٩ ٢٠:٣٣] توتة: #الشقه7:-
بقلم : فاطمة السر