ايتها الفتايات انني مقهوره... حبيبي ليس له لحيه ولا شارب.
هذي اغنية ( يا لبنات عليك قهاير) بصوت ماجده الرومي.
المهم مش عارف من وين نبدا موضوع قصتنا اليوم .
ولي حبيت نسميها #عريس_الغفله.
يوما ما من سنين عمري ذات اللون البيج الفاتح. رن عليا خويا ويضحك قالي مبروك يا عريس اليوم خطبنالك مع ضحكه شريره 😈 نفس يلي في نهاية الرسوم المتحركه.
قتلا صبح مش جوك بكل لإني قاعد فالعمل.. قالي جديات نحكي باتي جالس مع فلان صاحبه والراجل قاله بنتي فلانه تخرجت 🎓. شويه باتك قاله خلاص راهي من توا نبيها لي فرج. وتم فيك يا فروجه مع ازدياد خويا في القهقهه.
قتلا باتك هذا كنت انتمنى يجبلي هديه شيشة عطر او عجل لسيارتي. بس عروس مره وحده. وين ماشي يزر هذا وننقاني تعصبت بكل 😩 وطلعت من العمل شور الحوش مع اغنية تعبت منك علشان ماليش غيرك ولا بستغنى عنك والرأي رأيك واني وانا جنبك ماليش ولا أي كلمه وبعيش معاااك صوره وخلاص!😟 ولعت في راسي للوالد اصلا دايرها له نغمة في موبايلي.من كثر الفجايع متاعتا يلي بلا مقدمات. 😣
المهم بعد روحت كيف صار يا نبع الحنان معقوله هك من غير اي مقدمات ولا مشاوره😞 . واكيد انتي عندك العلم عارفك انا كويس.
نبع الحنان: قالتلي وسع بالك انا مش شوري شي. ونحنا فرحانين لكي وانا مادرت شي كلمت امها بس مع ضحكه هك 😂.
انا.. تعرفي عارف انك فالموضوع بس يصير خير. المهم هيا قعدت اتلسن فيا وعليش اتلط راهم ناس كويسه ومرات البنت تعجبك غير انت شوف وكلام من هالكلام.
المهم صبيت في البلكوني وبحتت فالسما وقلت انا شن داير يا ربي...؟ 😢
رد عليا شيطاني 😈 وقالي فكنا من الدراما ياما داير في هلك وخوتك... اها صح خشيت وسكرت البلكوني 😒. المهم مازالن ايام عالمقابله الشرعيه وتمو كلهم يعطو فيا نظرات مع اس اس اهو جا غيرو الموضوع ونسمع في همساتهم في راسي ولي يخطم عليك وعلي كتفه منشف ويبحت بنص عين مع خير يا عريس 😀. وانا امولعلهم صمتي ليس ضعفي. انما بختي العطيب 😢
وجا يوم المقابله الشرعيه. وكلمة الشرعيه في حد ذاتها مستفزه من كثر ما سمعناها في ثورتنا العزيزه.
المهم خلاص رضيت بالامر الواقع وقلت مادام هنا مافش مهرب. مافيها الا هل داري، بين قوسين انساباتي الجدد 😂 . اكيد في مبلط من الموضوع هذا كلا، ومن غير ماحد يخسر حد واتوكلت عللله.
اها انسيت طبعاً الوالد ماشالله داز قدامي حاجات وتورته وهدايا يحسسك ان عايشين في زمان الدوله العباسيه الملك قبل مايوصل يدز قبله هدايا وحلي وجواري. 😒
المهم الوالد قالي توكل ان متكفل بالموضوع.. امشي سقد روحك 😌. وانا نحكي في سري.. بعتني ابكام اٱآصحبي بصوت احمد السقى 😫.
وقعدت نصبر في روحي تي بالك يا فروجه تطلع البنت طرف وجوها حلو ...؟ وعقلي يشيل ويجيب وانا ماشي لعند فتت حوش العرب 😂.
المهم درست قدام حوش انسباتي الجدد 😂مش عارف انحس فيها سمحه الكلمه هذي.
المهم رنيت الجرس وطلع خوها وهوا صاحبي بس لنا زمااان ما تلاقينا وهو مايعرفش اني انا المقبل شرعياً علي اخته.
درت روحي متفاجئ 😨 اووووو حساااام مش معقوله انت خوها...؟ 😌
وهوا اووووو فروجه نسيبنا الجديد.. مرحبتين بيك وسبحان الله عالدنيا.
وتبو الحق بجد فرحت لما عرفت خوها اهو اول الطريق قعد ينحل من ربك.. وخشيت الحوش معاه والحوش معطر عطر حلو مع جاوي وفاسوخ جاي من جوا.. اهي يا فرج سبلتك قوله مايصير شي مش مستعد نرتبط بناس عطر حوشهم جاوي. 😒
بس برضو سبب مش قوي يااهبل ظروري من سبب قوي اززززح 😂. لان جد قلبي يدق بسرعه. ونكمل فيها هانت هانت من جوا 😂.
يتبع..........
... العنابي_يليق_بك
