ياساتر ياساتر.. شنو اللمه يلي غادي يا شباب..؟
يافرج هذا واحد متفائل وسعيد مسكاته الشرطه توا.
بلاااا لا حول ولا قوة الا بالله.. معقوله خاش بسعادته علينا في وسط بلادنا.. الدنيا جابت ما فيها. خساره يا بلادي. المهم ياريت يقتلوه قبل ما يكثرو علينا. 😌
.وخلونا في موضوعنا يلي هوا #الجزء_الرابع والاخير من قصة
وخلونا انكملو هالقصه يلي حتي انا كيفكم متمزط من فرج الدغاري 😂.
المهم وصلنا لعند ما تمت المقابله مع البنت واتفقنا علي اساس البنت تفكر وترد عليا.
وانا صليت استخاره وخليتها عالله وقررت نكمل حياتي عادي. اوكي ياحياتي عادي انت 😂 ريت هالحياه.
المهم بعد ايام رن تلفوني رقم غريب.. الو من معاي..؟ انت فرج الدغاري نعم تفظل.
معليش انا نبيك في موضوع وياريت نتقابلو. قتلا تم. وبعد ما تقابلنا طلع راجل كبير في السن. وقالي يا فرج مش عارف كيف نحكيلك الموضوع، انا اولدي يبي البنت يلي تبي تخطبها وكان يقرا معاها ومش عارف كيف نخشلك فالموضوع. بس وضع اولدي صعب حالياً.
المهم مشيت تأكدت من الموضوع وطلع الموضوع صح الشاب يبي البنت ومكبد عليها.
وقلت قبل ما نعطي الراجل جواب. خليني انخش علي صفحة الشاب فالفيس وكان القيت منشور متاع حاط مسدس 🔫 علي راسه وكاتب (وإن سألوك عن الحب، قل لهم لا تجوز علي الميت الا الرحمه ). معناها يا فرج انت حفظت الشباب والبنات ولازم تسافر لعند يديرو حاجه جديده فلبلاد.
المهم خشيت صفحته ونلقاه كاتب المنشور هذا ابعينه. ونعطيها عيطه ووووه وووه حي عليا وين نمشي منكم نا بس 😣.
المهم قلت لبات الشاب راهو البنت مش ليا وتربحو طريقكم بيضه.
ومن الاخر مانبي نبني سعادتي علي تعاسة حد. (الله كريم)
المهم انتهى الموضوع. بس كيف توا تبي تقنع العائله الهولنديه يلي عايش عندها..؟ 😒
ازعمه انقول لوالدي اني اخاف الا اقيم حدود الله معاها.. تمشي عليه،،!؟
بس خايف عقله يمشي بعيد ويحاسبني علي العريبي..ويصير فيها اجيبه جااااي 😂.
المهم خشيت علي والدي وقتله اسمع يا حاج العرب لوله قالت كان كبر باتك خاويه.😊 وكانت قدامه سفرت الغدا. قالي بطل فلسفه زايده ماتبيش البنت قول واضح موضوعك اصلا 😌
انا وجي قعد هك 😂. قتله اخساره قبل اموتيلك فلسفه مع دباجه حاتبهرك. بس يلا مالكش نصيب 😜
وتوا مازال نبع الحنان.. كيف تبي تخش فيها..؟ بعدك المسكينه ناشره الخبره في مجلة زهرة الخليج وقريب داراته اعلان ممول فالفيس خبر زيزتي. 😞
المهم تاني يوم خشيت عليها فالمطبخ والقيتها جالسه عالطاوله وثاريتها عندها العلم بالموضوع.
والقيتها ترثي فيا رثاء الخنساء لي خوها صخر.
بي سيمفونية جميله كان في مطلعها اتقول يا نعلي يا اوليدي يلي ما عندا حظ، يا نعليا يا ضحاكي ويا بسامي يانعليا يا جياب الحاجه الحلوه وجايب الموز. 😥
المهم وقفتها في نص المعزوفه وقتلها ارجي انسيتي يا سكار البيبان... ماهو اصليتا حوشنا اربع بيبان اثنين من لاورا واثنين من قدام.. لا تعرفه حوش ولا عيادة اسنان.
المهم رنو اصحابي فرحانين بلي صار ورجوعي الهم سالم فرحانين ابشنو مش عارف 😒.
ودرنا عشا صح الصح وضحك وسلفيات. ع اساس يطلعو فيا من صدمة الحدث 😂.
المهم وانتهت قصتي ورديت لحياتي.. وكل شي من ربي حلو..
وشكراً لحسن تعليقاتكم وسامحوني كني كثرت عليكم.. منورين يا احلي قروب 😉
