Ndimaagu

Wonnoo ɗoo ko suka debbo gooto. Omo wiyee Daado.

Daado ko ɓaleejo juumo, mbaadi e nehdi! Ndiin wiyetee 

kaaɗtudi. Alaa fof to ndaarataa e Daado mbi'aa: «Sinno 

wonaa...» Ko gorko yoori hoore fof, so Daado ɓamtii gite 

mum ɓutte daneeje o ndaarii ɗum, o waɗdii heen mooso 

ray! Oon ñippan ɗe mum, roŋka anndude ko waɗata. 

Daado, kala ɗo o wirtii sagataaɓe worɓe, yeewtere mum'en 

telɓan! Waaw haala'en mbii: «Hoto mem ko a yamiraaka, 

kono wonaa hoto ndaar ko njiɗ ɗaa.» Daado wii ina ƴeewa 

ndimaagu worɓe ɗo tolnii. O wii: «Mi haaldataa e gorko 

ƴamal so wonaa cokaaɗo e suudu balɗe cappanɗe tati, 

subaka fof, ko lonngere wootere ñaamata e wooɓre 

wootere ndiyam yarata, ko e oon kumantee mi.» Kala 

garɗo ƴamde mo, ko ɗuum o wiyata ɗum. Oon wiya: «Miɗo 

yiɗ maa no feewi, kono mi waawaa.» Joom mum hoota. 

Kala ɗo ngar ɗaa taw ɗaa sagataaɓe worɓe ina njeewta, ko 

haala Daado ɓe kaalata, Alla e makko yooɗde. Sagataaɓe 

tato worɓe nani ɗuum. Oo ina wiyee Sammba, oya ina 

wiyee Demmba, tataɓo oo ina wiyee Yero. Gooto e maɓɓe 

fof, ko tinɗo hoore mum to diiwaan mum'en. Ɓe mbii: «Oo 

suka debbo no o wa'i yooɗde nii fof, roŋka gorko jaɓɗo ko 

o wii koo?» Ɓe mbii: «Ƴamoy en mo ngann den hol ko o 

miijii, walla hol ko miijo makko ngoo yiɗi wiide, ngann den 

ko cikku ɗen ko o miijii koo, so ina e makko.» Daado wii: « 

Mi wiyaani ko dañɗo resata mi. Mi wiyaani ko laamɗo 

resata mi. Mi wiyaani ko joom leñol resata mi. Mbii mi ko 

miɗo ƴeewa ndimaagu worɓe ɗo tolnii.» Ɓe ngari ƴamde 

Daado, gooto e maɓɓe fof hokkaa suudu. Daado ari 

salminde ɓe. Daado salmini Sammba, ɓe calmondiri haa 

saɗi joofi. Sammba haali sabaabu garal mum, wonde ari ko 

ƴamde mo. Daado wii: «So tawii ko mbii mi koo aɗa waawi 

waɗde ɗum, maa en kaaldu. Daado ɓenni to Demmba, ɓe 

calmondiri haa saɗi joofi. Demmba wii: «Itti mi wuro amen 

hannde, ko dawol jam tan. Addi mi, ko yiɗde ƴamde ma.» 

Daado wii: «So aɗa waawi waɗde ko mbii mi koo, ma en 

kaaldu.» Daado yahi to Yero. Ɓe calmondiri. Yero wii: 

«Ngar mi ko ƴamde ma.» Daado wii: «A waasataa nande ko