الجزء الرابع ....والاخير
بعد يومين دقتلي سلفتي العقربه ام لسانين وبدها تجي عندي زيارة وهاي اول مره بتجي لحالها فيها واهلت وسهلت فيها سالتني كيفك انتي ومحمد قلتلا لحمدلله تمام مافي منه قلتلي منيح الله هداه كنت اكله همك كيف رح تكون حياتك معه قلتلا ليش؟؟!خير ان شالله قلتلي يييييي يعل قص لساني شو حكيت قلتلا لا ولا يهمك خذي راحتك واحكي قلتلي ماتزعلي مني بس زوجك كان على مشاكل مع امه طول فترة خطبتك انو مابدو يخطب ويتزوج ما المشكله فيكي المشكله فيه هو لانو قلبه معلق بهديك يلي ماتتسمى وامه قلتله إذا مابتمرق هالخطبه والجازه على خير راح اغضب عليك ليوم الدين لا انا امك ولا انت ابني لايمتى بدك ضل هيك عايش على ذكرياتها وهي راحت انقبرت تزوجت وصار عندا اولاد حتى العرس كان مارح يجي عالصاله بس دقتلو امه وبهدلته وبعتتله اخواته يبهدلوه ويجيبوه تفاصيل كثيره وبشعه حسيت بالاهانه والذل كثير كنت اسمع البنت بتنجبر عالجازه اما الشاب كنت اسال حالي ليش تزوجني بس مافكرت ابدا انو هيك صاير بالحقيقه شئ ابشع من انو اتخيله ....
انا حاولت اضبط اعصابي قدام هالمكيوده الغيوره يلي اجت لنص بيتي لتقهرني وتبينلي انو لو كل الناس حبتك زوجك مابيحبك كان ردي الها دخيلك مافي وراح بالاخير الرجال ماالو الامرته وكل شى قبلها نزوات بس وانا يهمني انو زوجي بحبني هلا ومدللني وبدو الرضا لارضى بعدا بنص ساعه فتت على غرفتي وبعتت مسج لاختي دقيلي بعد شوي عالموبايل وشو بحكيلك سايريني وماتقوليش ليش هيك عم تحكي وبعدين بفهمك ليش ....
اختي دقتلي مسكت موبايلي وقلتلا زوجي عم يدقلي فتحت الخط وبعدت شوي كرمال ماتسمع صوت اختي وبلشت ايه حمودي وانا اشتقتلك والله اي يااروحي لا خلاص مناكل بالبيت ....مثل مابدك جيب يلي بدك اياه مابتفرق معي هههههههه.....طيب حياتي وانا بحبك و(سكرت الخط بوش اختي) قلتلا يقبر قلبي هيدا حموده عم يقلي ماتطبخي اليوم منطلع نتغذا برا بس انا ما عبالي قلتلو جيب معك ....قلتلي الله يهنيكن وطول القعده بدها تسحب حكي وكلام مني عن حياتي الخاصه مع زوجي بس انا مااعطيتها مجال ابدا وراحت فارغه الايدين من عندي ....
أجا زوجي من شغله وماجبتله سيره هالموضوع ابدا مع انه قضيت نهاري عم ابكي على الشى يلي عرفته وصلت لاكثر من نص الطريق ليش لارجع لنقطة الصفر كرمال تفاصيل من الماضي ....هلا لازم بلش اشتغل على التقرب الجسدي اكثر لانو صرنا مثل الاصدقاء طول القعده منحكي ومنتساير بكل المواضيع ومنضحك سوا ومنطلع مشاويرنا سوا حتى عالسوق سوا فقمت بنص الليل وفيفتو قلي شبك قلتلو انا خايفه كثيرر ولزقت فيه حلمت بكابوس شب عم يلحقني وبدو يغتصبني لفني وقلي طولي بالك ماتخافي وقضيت بقية الليله وانا لازقه فيه ...
مره كنت عند بيت حماي وماقلتلو انو انا عندن وتركته يجي عالبيت بدون مايمر ياخذني وكنت اعمل هيك كل فتره ورجعت عالبيت بعد جيته بربع ساعه فتت وانا معصبه ومكشره وكانو عم احكي مع حالي العمى بقلبه مااوقحه قلي شبك مين هاذا الوقح قلتلو شب على طريق بيت اهلك صار مدايقني مرتين وعم يلحقني ومره بدو يوقف يحكي معي بس انا مارديت عليه عصب وبلشت شراره الغضب تطلع من عيونه (حمش يئبش قلبي وبلش يغار علي) وارتفعت درجة صوته لاول مره مين هادا ليش لهلا ماقلتيلي شو ناطره يعني مشي معي هلا فرجيني اياه ومسكني من ايدي وسحبني عالباب لك (طول بالك ماليكون موجود بالاول على ارض الواقع 😁😁😁 حتى فرجيك اياه)قلتلو خلص شو بدك فيه اجا لحقني لهون وراح قلي شوووو عرف وين ساكنه كمان قلي بالمره الجايه مابترجعي لحالك فهمانه انا بجي بأخذك وبدليني عليه لاعرف شغلي معه قلي كيف شكله قلتلو طويل واكتافه عريضه وكانه بيلعب حديد 😍 واشقر😍وعيونه كبار وعسلي فاتح وجهه ناعم وجذاب (شو مواصفات ملك جمال مو هيك😉)قلي مو كانك عم تتغزلي فيه ومطلعه بعيونه كمان وعارفه قلتلو لا لا ما بيعجبني هيك جمال 😁وبعدين ما على طول بصدفه ماشكله من اهل المنطقه قلي بكره بنشوف...
وقت البس فستان روح لعنده وقلو ممكن ترفعلي السحاب او لما البس عقد برقبتي بيسكر لي قفله ومره كنا سهرانين عالتلفزيون وانا نسطحت عالصوفا وبعد ساعه عملت حالي نمت .. انا صاحيه وبعدين انتبه علي وصار يفيقني يقلي قومي نورا نامي محلك وانا قلو بدلع خلص تركني ماقدر قوم وفات ينام العمى عهالخجله وين راح هيدا وتركني مشلوحه عالصوفايه الحق علي كبرت راسي شكلي رح قضيها الليله هون ويتكسر ضهري الخطه مازبطت بس لااااا حرررام ظلمته كان رايح يزبط التخت ليرجع يحملني😍😍😍ويحطني فيه شعور حلو كثير (يارب يطول الطريق لغرفة النوم ومايخلص بسرعه)وصرت كل عشرة ايام انام عهالصوفايه ليتكرر السيناريو نفسه😄😄😄وهوعلى مايبدو كان مبسوط وتعود عالاغلب صار يحملني بدون اي محاوله ليفيقني .....
سنه و 9 شهور صار لي متزوجه رجعت امي فتحت سيرة مراجعة الدكتوره النسائيه وقلتلي هالمره بدك تروحي مابكيفك حجزتلك لبعد بكره قلتلها ماشي بروح نطرت المسا ليجي وكنت حاسمه اموري انو اليوم خلص بدي احط النقط عالحروف واعرف شو انا بالنسبه اله بعد ما اكل وتحمم وارتاح قلتلو بدي احكي معك بموضوع قلي تفضلي قلتلو كل فتره الماما بتقلي بدي اخذك عند دكتوره نسائيه تفحصك ليش لهلا ماحبلتي وانا عم اتهرب من الموضوع ومابقا فيني حجج واتهرب اكثر النا سنه و٩ شهور مع بعض فتره منيحه وماشفت منك الا كل خير بدي تبلش بمعاملة الطلاق من بكرا قلي طلاااااق وكان بدو يحكي بس انا قاطعته فورا وتابعت حكي قلتلو انا اي وحده محلي بتطلب الطلاق من اول شهرين بس انا ماعملت هيك لانو هالشي رح يأثر علي لقدام وتقل فرص زواجي من شخص تاني انو اطلق بعد 3 شهور زواج شكله كبيره لهيك انا نطرت هالمده كلها حتى يكون طلاقنا منطقي قدام الناس (انا طبعا مامفكره اطلق ابدا حتى لو بقيت هيك 5سنين تانيات ماكان عندي مشكله لانو بحبه وكل يوم حبي اله يزيد بس كنت بدي اعرف شو انا بالنسبه اله متمسك فيني والا لا)وتابعت قلتلو نطلق بالمعروف مثل ما فتنا بالمعروف ومين ما سالك ما أنسجمنا وماتفاهمنا مع بعض كرمال سمعتي وسمعتك وخلصت حديتي وقمت من فوق لتحت وجهه انخطف لونه بين عليه الصدمه فورا بعد نص ساعه لبس وطلع من البيت مابعرف لوين ومارجع لساعه 3الصبح رجع لبس وطلع ماعرفت لوين الابعد ساعتين دقتلي ماما وقالتلي ليش خبيتي علي انا تلبكت وماعرفت كيف جاوب قلتلا شو خبيت عليكي قالتلي زوجك اجا الصبح ومن شوي راح من عندي حكالي كل شى قلتلا شو حكى ( انا خفت انو فعلا يكون حكى كل شئ لانو هيك نها قصتنا)قالتلي ليش ماقلتيلي انكن رحتو عند دكتوره وفحصتك ومافيكي شئ وانو المشكله عند زوجك وعم ياخذ ادويه ويتعالج .....قلتلا مابدي اشغلك فكرك فرحت كثير انو زوجي عمل هيك هالشغله لانو بدوياني ابقى عنده ومتمسك فيني بحبني او بلش يحبني نطرته ليرجع بفارغ الصبر لاساله ليش هيك عملت ونحن مااتفقنا هيك وبعد ساعه عالتمام اجا لانه ماراح عاشغله هداك اليوم واول مافات بين عليه التعب ووقت جيت حكيه قلي ما الي جلاده احكي ولا كلمه تعباااان بدي نام لفيق منحكي ....
وبس فاق لقاني جنبه صافنه فيه ..ملامح وجهه وناطرته ليفيق قلي صباح الخير قلتلو قول مساالخير قلي لاصباح الخير لانو هلا بلش نهاري oh my god😍اتصبحت بهالوجه الحلو الناعم قلي وجهي حلو اول جمله مفيده 😍😍😍بيحكيهامن اول ماتزوجنا لهلا تغزل فيني كنت رح قوم نط عالتخت من الفرحه مثل الاولاد صغار (بس اقل لحالي شو بلاش بيقول عني هبله😁)قام قلي اااخ ضهري عم يجعني من القعده مبارح عالبحر قومي جيبيلي مرهم ادهنيلي ضهري
(فكرت حالي عم بحلم كانو نام وفاق واحد ثاني)وفعلا نطيت هديك النطه قلت قبل مايغير رايه هاي فرصه لاتعوض وكانت هديك الليله او ليله زواج فعليه الي مابس حبر وورق كانت ليله من الف ليله والشنته يلي رفعتا فوق الخزانه من سنتين نزلتا بعد شهرين من زواجي الفعلي بناء على طلبه قلي حاجتها اكلتها الغبراء ....
ماسالته ابدا عن قصته مع حبيبته الاول حتى مايرجع يتذكر ويتذكر تفاصيلها وكيف كانت مشاعره اتجاهها زوجي هلا يحبني كثير ويقلي انا محظوظ فيكي لو أي وحده تانيه كانت ماتحملت هالشى كله وتركت ومشت بس انتي صبرتي كثيرر على ورجعتيلي الحياة والضحكه قدما حبيتك مابكون اعطيتك حقك وكلملو الحب عم يكبر ويكبر وخاصه بعد ماصار عنا صبي وبنوته.
(أنتهت)...
