أهُنتُ عليك؟
للكاتبةNuha-d-h
ومرت الايام
وظل الوضع على ماهو عليه
كل وقتي لاطفالي صحيح اني لوحدي
وتربيتهم صعبة وعانيت كلش هواي وياهم خصوصاً
اني لوحدي وهمة صغار طلباتهم سوية ونومتهم سوية واكلهم سوية حتى يكعدون سوية مرات احس روحي
لاحول ولا قوة ومرات لا اگول لازم انهض واصير قوية لخاطرهم
صحيح كنت اجهل هواي اشياء تخص الاطفال وعنايتهم لكن كنت اغلب الاحيان استعين بام زامل لو ام جراح
بس الحمدلله كدرت اجتاز هذا الحاجز واتعلمت وصرت خبرة بالتعامل مع التوم
وسمعت من عمتي ام جراح
ان مرت جراح حامل ومرت جاسم حامل بس مرت قصي موظفة مكتفية بالاطفال الثنين ولد وبنية وصابرين انخطبت وما بقة شي على مهرهة اباوع عليهم مرات يتجمعون بالحديقة فتوصلني اصواتهم العصرية واسمع اصوات الكوابة مالت الجاي والضحك فياخذني الفضول اباوع عليهم من فتحة صغيرة موجودة بالشباك مالت غرفتي مطلة على حديقتهم الامامية
ههه طبعاً هذا الشباك صار نافذتي للاتصال بالعالم الخارجي كنت
اشوفهم شلون متجمعين ويسولفون ربي يديم لمتهم عليهم الواحد من يشوف لمتهم وضحكتهم مجرد النظر يحس وياهم بالونسة.
لعد شنو يكون الشعور اذا كان فرد من افرادهم وينتميلهم ويبادلهم الكلام والضحك
(هَـا يرسل اشو جنج رجعتي وكعدتي تتتمنين يكون الج مكان بينهم لا يرسل اصحي الي مثلج هواي عليه يعيش بين عائلة يحبهم ويحبونه ويفتقدون مكاني اذا غبت عنهم لاتتمنين اكتفي بالنعمة العندج اولادج )
و اباوع لعزام اخو جراح شلون يقلد على صابرين على الناس الي اجو عليها يخطبونهة ودخلت عليهم بالصينية وهي ترجف وموگعة الشربت على الولد اسمع عزام يگللهة صار عندة حب من اول وگعت شربت هذا شكلة يحب الثولات واشوف صابرين شلون تتدلع على خوانهة
وانتبهت على جراح شلون معتني بسلوى وحملها ويعدللهة التكية مالت الكرسي حسب ما سمعت من خالتي ام جراح تكول الدكتور يكول حالت سلوى الصحية تسمحلهة ان تحمل وتجيب وهذا الشي فرح جراح وسلوى خطية ربي يسعدهم حتى جاسم شكلة فرحان بحمل زوجته الظاهر الرجل يشعر بالفخر من تكون زوجته حامل
طبعا انة اي اختلاط بيهم ماعندي ولا اعرفهم
واسمع البنات مرات شلون يجهزن لحفلة المهر وسمعت بيهم عازيمين قرايبهم كلهم واسمع صابرين تگول اريد حفلتي كلش جبيرة وفخمة بس خلي انتظر تدور سنة المرحوم زامل وبعدين اسوي الحفلة بعد رجوعنا من الزيارة
اباوع للولد شلون يسولفون والبنات شلون يحجن ويضحكن على شغلات مسمعتها زين لان صوتهم ناصي بس من يضحكون انتبهت على نفسي اضحك وياهم
جراح
صرت اتجنب شوفت رسل بشكل مو طبيعي لان احس بيهة خطر على سلامة عقلي يعني من اشوفهة ماعرف شيصير بية وتتخربط كل علومي واليدقني انة كلش اصير ضعيف يمهة يعني هاي القساوة والجلد كلها بس من اشوفهة تتبخر
واذا اكول شي حتى بيني وبين نفسي ما اتجرء اگولهة كمت احس بأتجاهة بقوة تربطني ما مارة عليه هيج مشاعر حتى بيوم حبيت سلوى وهذا الشعور بحد ذاتة خلاني ابتعد عن رسل
عبالك بيهة طاعون واتهرب منها رغم ما شفتها
يوم تطلبني اجيهة او اشوفها تترزز كدام ولدنا ابد بالعكس احس بيهة ثكيلة ورزنة
مرات من اشوفهة بالصدفة لازمة اولادهة كل واحد بأيد
وتمشيهم اشوفهة فخورة باولادهة تحيط بيهة هي واولاده هالة الخصوصية (ليس لك مكانٌ بيننا)
مرات تكسر خاطري من اشوفها تركض ورة واحد من التوام لوحدهة اكول خطية بعدها صغيرة لوحدها وية هذولي الصغار واشوف ولاوحدة من البنات كلفت نفسها واختلطت بيها وصادقتها
اتذكرت مرة شفت حسن جان يمشي على السريع جنة شارد من شي وطالع من باب الملحق وجنة اني وابن عمي نواف اخو مرتي سلوى گاعدين بالحديقة واخواني قصي وعزام وجاسم فشفنا حسن شلون ركض عبالك واحد يركض وراه وشفت حسين يركض هم شارد عبالك مسوين جريمة وبقينة نضحك على شكولهم المدنفشة شلون حلوين وگوة يركضون لان ستوهم بدوا يمشون
لكن الصدمة بانت على الوجوه من طلعت رسل وهي ما منتبهة علينا لان كانو الاطفال يركضون للساحة كدام الملحق واحنا كانت گعدتنا جانبية بالحديقة فكان مبين عليها تركيزه كلة يم اولادها طلعت رسل ولابسة صدرية مالت المطبخ وكانت لابسة تحته ثوب قصير صاير لطش على جسمهة ولابسة نعال منزلي ابو الفرو شكلة عبالك ارنوب برجليهة
وجانت رافعة شعرهة بأهمال بقراصة وواگع كم خصلة منه على رگبتهة والزنود طالعة هي والسيقان عبالك مرمر
ركضت وراهم بهذا شكلهة جانت لازمة بيدهة جمجة مالت صب الاكل طلعت ووصلت قريب عليهم شفناهة دنگت عليهم وهنا الضربة القاضية من دنگت وهي مطيتنة ظهرهة وشالت جهالهة اثنينهم كل واحد على صفحة جوة ابطهة بطريق جدا سهلة وكأنما متعودة تحملهم ثنينهم بوقت واحد لكن منظرهة كأم واولادهة بجفة وجسدها وحركاتة التلقائية بجفة
انتبهت على المطاية الي بصفي شلون فهة حلگهم وكطعو ضحكتهم من اول ما طلعت من الملحق ودخلت جهاله جوة وهذا كلة وهي بالهة مو يمنة
بس انة عودك شنو من حرگة گلبي اتمنة كل واحد انطي لطمة على حلگة
جراح
احم احم الله بالخير شباب خير وين صفنتو طبعا احجي واخزر بيهم خواني دنگو اتلاحكو لروحهم وتذكرو
هاي مرت اخوهم
لكن العلة نواف
نواف-ولك بوية هاي شنهي تي ان تي لاتگولون هاي مرت الحارس
لان اذا هاي مرت الحارس جا كل يوم تلگوني اشرب جاي يم الحارس علمود بلكن اشوف طلة من هالغزال الفات ولك بوية شوفتها عيشة
جراح
هو يحجي وانة دخان ما اذاني يطلع اتمنيت اكسر سنونة
نواف ترة دست زايد هاي حرمتي
نواف اخ الله لاتكول هي هاي التزوجتهة على اختي
اي هي هاي
وانتبه
جراح على نواف شلون طگهة صفنة من سمع بيهة زوجتي
وانة النار احس شبت بظلوعي لان كامت الحسبات تتوافد على عقلي شي اكيد سلوى حاجية لاهلهة عن قصة رسل والتوم وان زواجنة بس على الورق بوكتهة حيل تندمت من كلت لسلوى طبيعة زواجنة لان شي اكيد نواف عندة علم بالسالفة
ما اتحمل احد يفكر برسل ان هي متاحة متوفرة لان ماعندها رجال يقضي عليهة وحشتهة وينطيهة احتياجاتها مثل اي مرة
رسل يوم عن يوم افرح من اشوف اولادي جاي يكبرون ومابقة شي ويصير عمرهم سنة صارو يخطون ويمشون من فدوة رحت للرياجيل شوكت تكبرون وتصيرون سندي
رفل
كل يوم ابحث عن اختي رسل واريد اعرف اخبارهة
كان كلام رسل اختي صحيح ان مروان هو المتحارش بيهة مو مثل ماهو حضرتة حجة وكال مروان-طردتهة من البيت لان كعدت تتحارش بية الماتستحي وان صديتهة وطردتهة وكعدت تسمعني كلام والله اخجل احجي
رفل
انة بالبداية كنت مصدگة مروان وگلت هي زعلانة مني وضايجة وحتى تكرهني لان اني ضيعت حياتها ومستقبلهة
قهرتني من اتصلت عليهة ورزلتهة وشفتهة مانطقت اي كلام تدافع عن نفسهة بي مو خوفا مني بس حسيت حتى ماتريد تبررلي وتعب نفسهة لاصلاح علاقتها بية ابد بس كل الخسرتة ان كالت التتحارش ماتضرب راس واحد وتشكة وتطلع دمه المشكلة من دخلت للبيت ما شفت اثار دم على مروان لكن بعد كلام رسل انتبهت على راسة بس اثر دم متجمد بشعره
اتعاركت بوكتها وية مروان ورجع يتوسل لي حتى ارجع له وانة اتقبلت الموضوع لان ماعندي احد اروح الجيء هي بس هالاخت الوحيدة وضيعتها من بين ايدي مثل كل مرة رعونيتي تسبقني
صرت مثل الطير المذبوح اريد اعرف وين اراضيهة لان هي من رجعت وعاشت وياي غصب عنها لان ماعندهة احد تروح عندة واني الهة وهي الي
صرت ادور عليهة مستشفيات مراكز وبكل مكان اروح اسأل عليها
ربي اختي وحيدتي ومالي غيرها جنت اتذكر من رجعت من عيالها وتاركة ابنها وشفتهة وجها
شلون اصفر عرفت بوقتهة بحساباتي الخاصة ان هي من اجتني كانت بعدهة نفسة سودة علية وجهه اصفر كركرم من التعب وتاركة ابنها غصبن عنها بوقتها نظرت لابني حمودي وعرفت عظمة مصيبة اختي حاولت بقدر الامكان اتقرب منها بس هي كانت ردة فعلها
البرود والصد كنت اتمنى تصيح بوجهي تعاتبيني تغلط تضرب اي شي بس كون تنبع منها مشاعر اتجاهي حتى كمت ارحب مشاعر الكره ميخالف حتى لو تكرهني اتقبلها
على الاقل تكن الي بگلبة مشاعر بس مع الاسف اختي رسل اني موتتها بيدي وهاي فقط طيف رسل
اشوفها دائما باحلامي تعبانة
ومرة حلمت بيهة الدنيا تمطر ورسل
شايلة جنطتها مالت المدرسة من كنا صغار وخالتهة على راسهة ومدنگه حت تحمي ثنين عصافير نايمات بحضنهة وهي تبجي
كعدت من الحلم مفزوعة
ومرة ثانية انعاد علية نفس الحلم
بس هلمرة واحد من العصافير طار من حضنهة واجة لعند حضني وفزيت
وظليت بس افكر بيها وختى صرت ما اكدر انام
واخذ الحلم يتكرر علية
سالت سولاف كالت هاي لان تفكرين بيهة هواي و
ضال بالج عندهة
سولاف صديقتي رغم هي مخربطة ومابطلت سوالفهة واشوفه شلون تقشمر بنات البيوت الي يجونهة بالصالون حتى ترتبله كم بنية للزباين الكبار الي هي عايشة بحمايهم لكن اشوفهة دائما يمي من احتاجه
أهُنتُ عليك؟
للكاتبةNuha-d-h
نورني بتعليقاتكم فهي السبب لاستمراري في اكمال روايتي
