# علاسة الدورة
قصة حقيقية
البارت الاول
قبل ايام واني راجعة من الدوام دااركب كيا بمفرگ الدورةجانت السيارة بعدها ممقبطة فجتي مرة عجوز اتگدي والناس گاموا ينطوها هالقاسمه الله والكل بالكيا جانوا يباعولها مكسور خاطرهم لان مبينة تعبانة وهدومها مشگگة وتبجي بحرگة طلعت من جزداني الف دينار اني كاعدة بالاخير فجتني من الجامة مال الكيا فطلعتلها الالف بس من دانطيهياه اتمعنت بوجهها وملامحها هاي عيونها الخضرة الصغيرة المليانة تجاعيد رجعتني ل19 سنة ليورة فباوعت بوجهها وهي تحاول تلگف الالف دينار فجريته منها وگتلها ام عثمان انتي بعدج عايشة انتي الهوا حرام بيج فصفنت المگدية تريد تعرف منو اني واني اعيط عليها يلا ولي منا لا اجيبلج القوات الامنية يسحلوج منا
هلو حبايبي اعرفكم بنفسي اني مها مواصفاتي ماكو داعي اذكرها لان مو اني بطلة القصة بسنة 1998 شلنا لبيتنا الجديد بمنطقة الدورة بيت جبير دبل فاليوم وكل الفرع جانت حالتهم المادية زينة الا جيراننا المقابيل بيتنا جان حال الضيم حالهم بيت الخبازة ام عثمان جانت اتخيط وتخبز ومملحگة عالعيشة عدها 7 جهال نصهم اقزام وايدهم عضبة يعني معقوفة ليجوة وزوجها متوفي اصلها يرجع لمنطقة الفضل ماخذة شمرة الفضل هي الوحيدة وكت المغارب تكعد بالباب مال بيتها وتظل اتكرز حب هي وجهالها المنطقة جانت راقية فهواية انتقدوها على كعدتها بالباب جانت اتهد عليهم وتتعارك وصوتها عالي وتذب حجي للنسوان والرياجيل اذا فاتوا من يم بيتها وهي كاعدة .. مرة من المرات فات واحد جان حزبي جبير بذاك الوكت فذبتله حجاية فكام يعيط عليها جابت النعال وضربته فهو مقصر جاب اعضاء من الفرقة الحزبية وسيارات شرطة فهي طفرت وية جهالها لبيت جيرانهم وابو غايب الحزبي انقهر عليها فسوة تنازل ورجعت لبيتها يومين بس بطلت تكعد بالشارع ورجعت هي والحب شمس مالتها وهم رجعت لعادتها
ولدها عثمان 15 واحمد 14 ومحمد 13 واصغر واحد بكر والبنات نادية الجبيرة عمرها 17 والاصغر منها بنات اثنين مرة من المرات سنة 2000 زادت حالتهم سوء الولد يشتغلون وامهم تشتغل وممدبرين لگمتهم جنا احنة وغيرنا نتصدق عليهم الناس يتعنون من مكان بعيد يجيبولهم غدا وعشا بعدها ام عثمان على عادتها تكعد بالباب وتباوع عالرايح والجاي وتتدخل بالصغيرة والجبيرة فسمعنا المغربية صوت عياط قوي طلعنا برة لگينا ام عثمان حاطة ابنها محمد وتضربه بتوثية خشب وتبجي سالنا شبيها ام عثمان گالوا ابنها محمد اننتل بالمبردة وهي سامعة المنتول بالكهرباء ينضرب بالخشبة حتى اتفكة الكهرباء اشو هاي مقصرت دگ على راسه ووين ميوجعه احنة انقهرنا عليه كالوا محمد مات وهي تبجي لمت الجيران عليها جيرانهم ابو علي ورة بيتهم هو وابنه علي ودوه لمحمد للمستشفى الطريق كله ابو علي يقراله ايات لان جان بي نفس وبقدرة رب العالمين وبنص الطريق محمد گعد وكلشي مابيه فرح ابو علي وعلي بوسه لمحمد ورجعوا لام عثمان بشروها انه ابنها محمد مابي شي بس يمكن يحتاجله معاينة بشعبة الكسور لان امه كسرت ضلوعه هههههه وشاء رب العالمين انه محمد يعيش ويكبر وياريته معايش
يتبع
