# علاسة الدورة
البارت الثالث
رگضوا ام عثمان ونادية ورة سيارة الشرطة ويتصارخون ويتباچون ورجعوا لبيتهم يلطمون على ولدهم ونسيبهم ونادية تبچي وتصيح اتيتم ابني بهل وكت جانت نادية حامل بأول طفل عدها
ام عثمان هلا بيكم اني ام عثمان شايلة ضيم وهضم من راح رجلي وانسحك بسيارة خلفلنا هذا البيت الي يخر علينا بالشتا وبالصيف نايمين عالبنكة نبلل روحنا ونصعد للسطح اننام جهالي ايتام وردت اعيشهم بكل وسيلة اخبز واخيط وعايشين عالصدقات الي يجيبوها جوارينا كلهم خوش اوادم وحالتهم المادية زينة بناتي الصغار عاشوا ابيت خالهم والولد ونادية يمي نادية اتزوجت واحد من اهل ابو غريب كال اشتغل فيتر وفرحنا كلش وشغل الولد وياه يصلحون سيارات شوية اتنفهت من وسام شغل الولد فگاموا يجيبولنا دشاديش صح جانت مستعملة بس نظيفة يكولون يمة لبسيها جبنالچياها من البالة ويجيبولي قناني غاز هواية گمت ابيع الدبة ب12 الف ووسام يجيب لمرته ذهب جابلها زنجيل كارتير ومحابس اثنين وملوي فكال هاي مرت الاسطة الله هاديها علية وتكول هاي لزوجتك اني بصراحة جنت شاكة هاي الفلوس مو مال شغل فيتر بس ساكتة لان خلصوني من الخبز والخياطة اني تعبت وكلت خل ارتاح شوية مرة من المرات عثمان ومحمد كاعدين وسام غمزلهم وگلهم اليوم عدنا شغل فناموا الظهر لان ورانا كعدة بالليل انصلح سيارة واحد بالاستخبارات من ذولة الصماخات وراح ينطينا هالقاسمه الله ومبين هذا ابن خير اني مأجة ابالي كلشي كالوا يمة راح اننام ونكعد بالليل ورانا شغل اني رحت نظفت ونادية حامل مااخليها تشتغل عجنت وخبزت وكعدت الولد لان اجة وسام دياخذهم وياه للشغل يصلحون سيارة الضابط ورة متعللت بالدرب وكرزنا حب رحت صبيت العشا وگعدت گليت الكباب ووياه طرشي وزلاطة وكعدنا اتعشينا فگالوا يمة روحي نامي وليظل بالج لملمنا الغراض ونادية غسلت المواعين وصارت ب11 كلش تعبانة احس روحي رحت نمت اني ونادية واحمد وبكر جانوا بالفضل يم خوالهم نمنا وساعة 2 بالليل اسمع صوت عياط جيرانا ام حيدر اتصيح حرامي گلبي علمني ذولة وليداتي يمهم فنادية كالت حطلع اشوف شكو جريتها من ثوبها وگتلها رجعي مالنا دخل بالجوارين فگالت يمة گلبي معصور خليني اشوف شكو اني قفلت الباب حتى لتطلع لان عرفت رجلها واخوتها ابيت ام حيدر وخفت عليها ليصير عدها اسقاط فجريتها بس عينها گوية اخذت المفتاح گوة وفتحت الباب وبقت تتفرج اني ختلت ورة الباب جتي سيارة الشرطة ونشوف الجيران يباعون علينا ويفرون بايدهم والحرامية الي لازميهم شبعوهم كتل وكفخات وجان تعيط نادية يمة الحگي وسام يمة الحگي اخوتي حياخذوهم الشرطة فرگضنا لبيت ابو حيدر بدشاديشنا وحتى عباية ملابسين رحت اتوسلت بالضابط خوية ذولة ولدي واحنة جوارين ونتفاهم بيناتنا فالضابط دفعني قوي ووكعني عالرصيف وكال اذا ذولة ولدج جان ربيتيهم ليش خليتيهم يبوكون جيرانهم يلا ولي منا لاخذج وياهم للمركز فمكدرت اسوي شي غير نركض اني ونادية ورة سيارة الشرطة الى ان تعبنا ورجعنا للبيت
